ថ្ងៃព្រហស្បតិ៍ ទី០៩ ខែឧសភា ឆ្នាំ២០២៤

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! ព្រះអង្គសព្វ​ព្រះហឫទ័យត្រាស់​ហៅ​មនុស្សគ្រប់ជាតិគ្រប់សាសន៍ឱ្យស្គាល់ព្រះអង្គ ដោយមិនរើសមុខនរណាឡើយ។ សូមទ្រង់ព្រះមេត្តា​បំភ្លឺចិត្ត​គំនិត​​យើងខ្ញុំឱ្យទទួលអស់អ្នកដែលជឿសង្ឃឹម​លើព្រះគ្រីស្តទុកជាបងប្អូនផង។

សូមថ្លែងព្រះគម្ពីរកិច្ចការរបស់គ្រីស្តទូត កក ១៨,១-៨

ក្រោយពីលោកប៉ូលបានថ្លែងព្រះបន្ទូលនៅមុខសភាក្រុងអាថែន លោកចាកចេញពីក្រុងអាថែននោះ ធ្វើ​ដំណើរ​​​ទៅក្រុងកូរិនថូស។ នៅក្រុងកូរិនថូស លោកជួបជនជាតិយូដាម្នាក់ឈ្មោះអគីឡាស ជាអ្នកស្រុកប៉ុនតុស។ លោកអគីឡាស និងនាងព្រីស៊ីឡាជាភរិយា ទើបនឹងមកពីស្រុកអ៊ីតាលី ព្រោះព្រះចៅអធិរាជក្លូដចេញបញ្ជា​ឱ្យជន​ជាតិយូដាទាំងអស់ចាកចេញពីក្រុងរ៉ូម។ លោកប៉ូលទៅទាក់ទងនឹងអ្នកទាំងពីរ ហើយស្នាក់នៅជាមួយ និងធ្វើការ​ជា​មួយ​គេ ព្រោះលោកមានមុខរបរដូចគ្នា គឺត្បាញក្រណាត់សម្រាប់បោះជំរំ។ រៀងរាល់ថ្ងៃសប្ប័ទ លោកតែងតែមាន​ប្រ​សាសន៍​ក្នុងធម្មសាលា និងខិតខំណែនាំទាំងសាសន៍យូដា ទាំងសាសន៍ក្រិកឱ្យជឿ។ កាលលោកស៊ីឡាស និងលោកធីម៉ូថេធ្វើដំណើរពីស្រុកម៉ាសេដូនមកដល់ហើយ លោកប៉ូលចំណាយ​ពេល​ទាំង​អស់ដើម្បីប្រកាសព្រះបន្ទូល​។ លោកបញ្ជាក់ប្រាប់សាសន៍យូដាថា ព្រះយេស៊ូពិតជាព្រះគ្រីស្ត។ ប៉ុន្តែ ដោយ​សាសន៍​​យូដាចេះតែប្រឆាំងនឹងលោក ហើយជេរប្រមាថលោកទៀតផងនោះ លោកក៏រលាស់ធូលីដី​ពីអាវរបស់​លោ​ក ​​ទាំងមានប្រសាសន៍ថា៖ «បើអ្នករាល់គ្នាវិនាសបាត់បង់នោះ គឺមកតែពីកំហុសរបស់អ្នករាល់គ្នាផ្ទាល់ប៉ុណ្ណោះ គ្មាន​ជាប់​​ជំពាក់អ្វីជាមួយខ្ញុំទេ! ចាប់ពីពេលនេះទៅ ខ្ញុំនឹងទៅរកសាសន៍ដទៃវិញ»។ លោកក៏ចាកចេញពីទីនោះ ឆ្ពោះ​ទៅ​ផ្ទះ​បុរសម្នាក់ឈ្មោះ ទីធ្យូស–យូស្ទូស ជាអ្នកគោរពកោតខ្លាចព្រះជាម្ចាស់ ហើយផ្ទះ​គាត់​នៅ​ជាប់​នឹងធម្មសា​លា​។ រីឯលោកគ្រីស្តូស ដែលជាអ្នកទទួលខុសត្រូវលើធម្មសាលា និងក្រុមគ្រួសាររបស់លោកវិញ ក៏ជឿលើ​ព្រះអម្ចាស់​ដែរ​។​ មានអ្នកក្រុងកូរិន​ថូសជាច្រើនទៀត បានស្តាប់លោកប៉ូល ហើយជឿ ព្រមទាំងទទួលពិធីជ្រមុជទឹក​ផង។

ទំនុកតម្កើងលេខ ៩៨ (៩៧ ), ១-៤ បទកាកគតិ

ពិធីអបអរសាទរព្រះគម្ពីរដំណឹងល្អតាម យហ ១៤,១៨

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៦,១៦-២០

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គមានព្រះបន្ទូល​ទៅកាន់​ក្រុម​សាវ័ក​ថា៖ «បន្តិចទៀត អ្នករាល់គ្នាលែងឃើញខ្ញុំហើយ តែបន្តិចក្រោយមកទៀត អ្នករាល់គ្នានឹងឃើញខ្ញុំវិញ»។ សាវ័ក​ខ្លះសួរគ្នាថា៖ «ព្រះអង្គមានព្រះបន្ទូលថា “បន្តិចទៀតអ្នករាល់គ្នាលែងឃើញខ្ញុំ តែបន្តិចក្រោយមកទៀត អ្នក​រាល់​​គ្នានឹងឃើញខ្ញុំវិញ” ហើយថា “ខ្ញុំនឹងទៅឯព្រះបិតា” តើព្រះអង្គចង់មានព្រះបន្ទូលអំពីអ្វី?»។ គេក៏សួរ​គ្នា​ទៀត​ថា៖ «ព្រះអង្គមានព្រះបន្ទូលថា “បន្តិចទៀត” នោះ តើព្រះអង្គចង់មានព្រះបន្ទូលអំពីអ្វី យើងមិនយល់សោះ!»។ ព្រះយេស៊ូជ្រាបថា គេចង់សួរព្រះអង្គ ទើបទ្រង់មានព្រះបន្ទូលទៅគេថា៖ «អ្នករាល់គ្នាសួរគ្នាទៅវិញទៅមកចង់ដឹងអំពីពាក្យដែលខ្ញុំប្រាប់អ្នករាល់គ្នាថា “បន្តិចទៀត អ្នករាល់គ្នាលែងឃើញខ្ញុំ តែបន្តិចក្រោយមកទៀត អ្នករាល់គ្នានឹងឃើញខ្ញុំវិញ”។ ខ្ញុំ​សុំ​ប្រាប់ឱ្យអ្នករាល់​គ្នាដឹង​ច្បាស់​ថា​ អ្នករាល់គ្នានឹងទ្រហោយំសោកសង្រេង តែមនុស្សលោកនឹងអរសប្បាយ។ អ្នករាល់គ្នានឹងកើតទុក្ខព្រួយ ប៉ុន្តែ​ ទុក្ខ​ព្រួយ​​របស់អ្នករាល់គ្នានឹងប្រែទៅជាអំណរសប្បាយវិញ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ក្នុងលោកនេះ គ្មាននរណាបានឃើញព្រះភ័ក្រ្តព្រះអង្គទេ យើងខ្ញុំក៏​មិនឃើញ​ព្រះ​យេស៊ូ​ដែរ តែព្រះអង្គបានប្រោសអគ្គសញ្ញានៃអភិបូជានេះ ដើម្បីយើ​ងខ្ញុំនឹករឭក​ដល់​ព្រះគ្រីស្ត​ដែលបូជា​ព្រះ​ជន្ម។ សូមទ្រង់ព្រះមេត្តាប្រោសឱ្យនំ និងស្រាដែលយើងខ្ញុំសូមថ្វាយនៅពេលនេះ បានទៅជាព្រះកាយ​ និងព្រះលោហិត​ព្រះគ្រីស្តដែលទ្រង់មានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានព្រះបន្ទូល និងព្រះកាយព្រះគ្រីស្តឱ្យស្ថិតនៅជាមួយ​យើង​ខ្ញុំ​​ជានិច្ច។ ព្រះអង្គក៏បានប្រោសឱ្យយើងខ្ញុំទៅជាព្រះកាយព្រះគ្រីស្តក្នុងពិភពលោកនេះ។ សូមទ្រង់ព្រះមេត្តា​ពង្រឹង​ជំនឿ​យើង​ខ្ញុំ និងណែនាំយើងខ្ញុំឱ្យរស់នៅស្របតាមឋានៈដ៏ថ្លៃថ្នូររបស់យើងខ្ញុំផង។