បុណ្យរម្លឹក
ព្រះបេះដូងដ៏និម្មល
របស់ព្រះនាងព្រហ្មចារិនីម៉ារី
ពណ៌ស
ថ្ងៃសៅរ៍ ទី០៥ ខែមិថុនា ឆ្នាំ២០២៧
ព្រះនាងម៉ារីមានចិត្តគំនិតភ្ជាប់នឹងព្រះជាម្ចាស់ជានិច្ច មិនដែលរកប្រយោជន៍ផ្ទាល់ខ្លួនខ្លះឡើយ។ ព្រះនាងម៉ារីជឿព្រះបន្ទូព្រះជាម្ចាស់ និងផ្ញើជីវិតទាំងស្រុងទៅលើព្រះអង្គ។ ដូច្នេះ ព្រះនាងធ្វើជាគំរូដល់គ្រីស្តបរិស័ទ។
ពាក្យអធិដ្ឋានពេលចូល
បពិត្រព្រះអម្ចាស់ប្រកបដោយតេជានុភាពសព្វប្រការ! ព្រះអង្គបានរៀបចំចិត្តគំនិតព្រះនាងម៉ារីដើម្បីឱ្យព្រះនាងទទួលព្រះវិញ្ញាណដ៏វិសុទ្ធ។ សូមទ្រង់ព្រះមេត្តាប្រោសយើងខ្ញុំឱ្យផ្ញើជីវិតទាំងស្រុកលើព្រះអង្គជានិច្ចដូចនាងម៉ារី សូមឱ្យយើងខ្ញុំរស់នៅយ៉ាងសមរម្យ និងឋានៈរបស់ខ្លួន ជាព្រះដំណាក់របស់ព្រះអង្គផង។
អត្ថបទទី១៖ សូមថ្លៃងព្រះគម្ពីរព្យាការីអេសាយ តប១២,១.៥-១៥.២០
កាលពិធីមង្គលការ ចប់សព្វគ្រប់ហើយ លោកតូប៊ីតហៅលោកតូប៊ីយ៉ាជាកូនមក ហើយមានប្រសាសន៍ថា៖ «កូនអើយ ចូរកុំភ្លេចជូនប្រាក់ឈ្នួលឲ្យអ្នកដែលរួមដំណើរជាមួយកូន! ចូរថែមប្រាក់ខ្លះទៀតបន្ថែមឲ្យគាត់ផង»។ លោកតូប៊ីយ៉ា ហៅទេវទូតរ៉ាផាអែល ហើយជម្រាបគាត់ថា៖ «សូមបងទទួលទ្រព្យដែលបងបាននាំយកមកជាមួយខ្ញុំនេះចំនួនពាក់កណ្ដាលទុកជាប្រាក់ឈ្នួលចុះ ហើយសូមបងអញ្ជើញត្រឡប់ទៅវិញ ដោយសុខសាន្ត!»។ ពេលនោះ ទេវទូតរ៉ាផាអែលនាំអ្នកទាំងពីរចេញដោយឡែកពីគេ ហើយមានប្រសាសន៍ថា៖ «ចូរលើកតម្កើងព្រះជាម្ចាស់! ចូរលើកតម្កើងព្រះនាមព្រះអង្គនៅចំពោះមុខសត្វលោកទាំងអស់ ដែលមានជីវិត និងចំពោះការទាំងប៉ុន្មានដែលព្រះអង្គបានប្រព្រឹត្តចំពោះអ្នកទាំងពីរ។ ចូរលើកតម្កើង និងច្រៀងសរសើរព្រះនាមព្រះអង្គ។ ចូរបង្ហាញឲ្យមនុស្សទាំងអស់ ស្គាល់ស្នាព្រះហស្តរបស់ព្រះអង្គព្រោះការទាំងនេះពិតជាអស្ចារ្យមែន។ ចូរលើកតម្កើងព្រះអង្គដោយឥតឈប់ឈរ! គួរឲ្យលាក់រឿងសម្ងាត់របស់ព្រះមហាក្សត្រ ផ្ទុយទៅវិញ ត្រូវលើកតម្កើងស្នាព្រះហស្តរបស់ព្រះជាម្ចាស់ ត្រូវប្រកាសឲ្យគេបានស្គាល់គ្រប់គ្នាផង។ ចូរលើកតម្កើងស្នាព្រះហស្តរបស់ព្រះអង្គ ព្រោះការទាំងនេះពិតជាអស្ចារ្យមែន។
ចូរប្រព្រឹត្តអំពើល្អ នោះអ្នកមុខជាមិនជួបប្រទះនឹងគ្រោះកាចឡើយ។ ការអធិដ្ឋានដោយស្មោះ និងការចែកទានដោយចិត្តសុចរិត ប្រសើរជាងមានទ្រព្យសម្បត្តិយ៉ាងបរិបូណ៌ ដោយប្រព្រឹត្តអំពើទុច្ចរិត! ការចែកទានឲ្យគេ ប្រសើរជាងប្រមូលមាសទុក។ ដ្បិតការចែកទាន រំដោះឲ្យរួចពីសេចក្ដីស្លាប់ ហើយជម្រះឲ្យរួចពីអំពើបាបគ្រប់យ៉ាង។ អ្នកធ្វើទាន រមែងមានអាយុវែង រីឯអ្នកប្រព្រឹត្តអំពើបាប និងអំពើទុច្ចរិត រមែងក្លាយជាខ្មាំងសត្រូវរបស់ខ្លួនផ្ទាល់។ ពេលនេះ ខ្ញុំសូមប្រាប់សេចក្ដីពិតទាំងអស់ឥតលាក់លៀមអ្វីឡើយ។ ខ្ញុំទើបនឹងបង្រៀនអ្នកទាំងពីរថា៖ គួរឲ្យលាក់រឿងសម្ងាត់របស់ព្រះមហាក្សត្រ ផ្ទុយទៅវិញ ត្រូវបង្ហាញស្នាព្រះហស្តរបស់ព្រះជាម្ចាស់យ៉ាងជាក់ស្តែង ឲ្យគេស្គាល់ផង។ កាលលោក និងនាងសារ៉ាទូលអង្វរព្រះអម្ចាស់ ខ្ញុំបាននាំពាក្យអង្វរនេះ ទៅទូលថ្វាយនៅចំពោះព្រះភ័ក្រ្តព្រះអង្គ ដែលប្រកបដោយសិរីរុងរឿង។ នៅពេលដែលលោកបញ្ចុះសាកសព ក៏ខ្ញុំថ្វាយការនេះទៅព្រះជាម្ចាស់ដែរ។ នៅគ្រាដែលលោកមិនរួញរានឹងក្រោកឡើង ដោយទុកអាហារចោល ដើម្បីទៅបញ្ចុះសពបុគ្គលម្នាក់។ ពេលនោះ ព្រះជាម្ចាស់ចាត់ខ្ញុំឲ្យមកជួបលោក ដើម្បីល្បងលលោក។ ប៉ុន្តែ នៅពេលជាមួយគ្នានេះ ព្រះជាម្ចាស់ចាត់ខ្ញុំឲ្យមកព្យាបាលលោក និងនាងសារ៉ាជាកូនប្រសាលោក ឲ្យជាសះស្បើយ។ ខ្ញុំឈ្មោះរ៉ាផាអែល ជាទេវទូតមួយរូប ក្នុងចំណោមទេវទូតទាំងប្រាំពីរដែលឈរនៅ ចំពោះព្រះភ័ក្រ្តព្រះអម្ចាស់ ប្រកបដោយសិរីរុងរឿងនឹងចាំបម្រើព្រះអង្គជានិច្ច»។ ហេតុនេះហើយ ចូរលើកតម្កើងព្រះអម្ចាស់ ចូរកោតសរសើរព្រះជាម្ចាស់នៅលើផែនដីនេះ។ រីឯខ្ញុំវិញ ខ្ញុំត្រឡប់ទៅរកព្រះអង្គដែលចាត់ខ្ញុំឲ្យមក! ចូរកត់ត្រាទុកព្រឹត្តិការណ៍ទាំងអស់ ដែលកើតឡើងចំពោះអ្នកទាំងពីរ»។
ទំនុកតម្កើងលេខ តប១៣,២.៦-៨ បទកាកគតិ
| ២ | ព្រះធើ្វឲ្យ | មនុស្សស្លាប់ទៅហើយ | ចុះស្ថានមច្ចុរាជ |
| ក្រោយមកព្រះអង្គ | ប្រោសឲ្យបានរួច | គ្មានអ្វីដែលអាច |
| | គេចពីបារមី | ។ |
| ៣ | អីស្រាអែលអើយ | កុំនៅកន្តើយ | តម្កើងរាល់ថ្ងៃ |
| នៅមុខជនជាតិ | ផ្សេងៗទាំងឡាយ | ដែលទ្រង់កម្ចាយ |
| | ឲ្យអ្នកទៅនៅ | ។ |
| ៤ | នៅទីនោះឯង | ព្រះអង្គសម្តែង | មិនមានអាស្រូវ |
| ឫទ្ធាបារមី | មានច្រើនពេកកូវ | ទ្រង់សម្តែងនៅ |
| | មុខអស់សត្វលោក | ។ |
| ព្រះអង្គពិតជា | ព្រះយើងរាល់គ្នា | អង្វែងរៀងមក |
| ជាព្រះបិតា | តែមួយលើលោក | ពីនេះទៅមុខ |
| | អស់កល្បតទៅ | ។ |
| ៥ | ព្រះអង្គបានដាក់ | ទោសដល់ពួកអ្នក | ជារឿងត្រឹមត្រូវ |
| ព្រោះអ្នករាល់គ្នា | បានប្រព្រឹត្តនូវ | អំពើអាស្រូវ |
| | អាក្រក់អប្រិយ៍ | ។ |
| ប៉ុន្តែព្រះអង្គ | ទ្រង់់មិនបោះបង់ | តែងតែប្រណី |
| អាណិតអាសូរ | ប្រជាប្រុសស្រី | នាំអ្នកវិលវៃ |
| | ឥតបីខ្ចាត់ខ្ចាយ | ។ |
| ៦ | ប្រសិនអ្នក | រាល់គ្នាស្មោះស្ម័គ្រ | ដោយចិត្តរីករាយ |
| វិលរកព្រះអង្គ | នឹងផុសអន្តរាយ | រស់នៅសប្បាយ |
| | ប្រព្រឹត្តស្មោះត្រង់ | ។ |
| ព្រះអង្គមុខជា | រកអ្នករាល់គ្នា | ក្រសោបត្រកង |
| ឈប់គេចព្រះភ័ក្រ្ត | ឈប់ប្រែបែរខ្នង | មិនឲ្យមានហ្មង |
| | អង្អែលភ័ក្រ្តា | ។ |
| ៧ | ឥឡូវពេលនេះ | ចូរគិតត្រិះរិះ | អំពីកិច្ចការ |
| ព្រះអង្គប្រព្រឹត្ត | ដល់គ្រប់អាត្មា | តម្កើងក្សត្រា |
| | ឲ្យពេញទំហឹង | ។ |
| ៨ | សូមលើកតម្កើង | កុំធើ្វឆ្មៃឆ្មើង | ថ្កើងទាំងរំពឹង |
| ដែលទ្រង់ប្រព្រឹត្ត | យុត្តិធម៌លំនឹង | ចូរកោតព្រះអង្គ |
| | អស់កល្បឥតបី | ។ |
| រីឯខ្ញុំវិញ | ខ្ញុំឃ្លាតចាកចេញ | ពីដែនបុរី |
| ហើយបានមករស់ | នៅលើទឹកដី | ពួកខ្មាំងអប្រិយ៍ |
| | ក៏មិនភ្លេចដែរ | ។ |
| ខ្ញុំបង្ហាញប្រាប់ | ឲ្យអស់អ្នកបាប | ស្គាល់ជាហូរហែរ |
| ថាព្រះអង្គមាន | ឫទ្ធាពូកែ | បារមីគ្មានប្រែ |
| | ខ្លាំងខ្លាឧត្តម | ។ |
| អ្នកបាប្រុងប្រៀប | កាន់ចិត្តសុភាព | វិលមកជួបជុំ |
| ប្រព្រឹត្តសុចរិត | កុំនៅសំងំ | ទ្រង់ហ្នឹងថ្នាក់ថ្នម |
| | មេត្តាប្រណី | ។ |
ពិធីអបអរសាទរព្រះគម្ពីរដំណឹងល្អ
អាលេលូយ៉ា! អាលេលូយ៉ា!
អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តលូកា លក ២, ៤១-៥១
ជារៀងរាល់ឆ្នាំ ក្នុងឱកាសបុណ្យចម្លង មាតាបិតារបស់ព្រះយេស៊ូតែងតែធ្វើដំណើរទៅក្រុងយេរូសាឡឹម។ លុះដល់ព្រះយេស៊ូមានព្រះជន្មាយុដប់ពីរព្រះវស្សា មាតាបិតាក៏នាំព្រះអង្គឡើងទៅចូលរួមក្នុងពិធីបុណ្យ តាមទំនៀមទម្លាប់។ លុះពិធីបុណ្យបានចប់សព្វគ្រប់ហើយ អ្នកទាំងពីរនាំគ្នាវិលត្រឡប់ទៅផ្ទះវិញ។ រីឯព្រះកុមារយេស៊ូគង់នៅក្រុងយេរូសាឡឹមនៅឡើយ តែមាតាបិតាពុំបានដឹងទេ។ គាត់នឹកស្មានថា ព្រះកុមារគង់នៅក្នុងចំណោមអស់អ្នកដែលរួមដំណើរជាមួយគ្នា។ ក្រោយពីបានធ្វើដំណើរអស់រយៈពេលមួយថ្ងៃ ទើបគាត់នាំគ្នាដើររកព្រះកុមារក្នុងចំណោមញាតិមិត្តទាំងអស់ ប៉ុន្តែ រកពុំឃើញសោះ គាត់ក៏នាំគ្នាត្រឡប់ទៅក្រុងយេរូសាឡឹមវិញ ដើម្បីរកព្រះអង្គនៅទីនោះទៀត។ បីថ្ងៃក្រោយមក មាតាបិតាឃើញព្រះយេស៊ូក្នុងព្រះវិហារ ព្រះអង្គគង់នៅកណ្ដាលចំណោមគ្រូបណ្ឌិតខាងវិន័យកំពុងតែស្ដាប់គេនិយាយ ព្រមទាំងសួរសំណួរផ្សេងៗដល់គេផង។ អស់អ្នកដែលស្ដាប់ព្រះកុមារ នឹកឆ្ងល់ពីព្រះបន្ទូលឆ្លើយឆ្លងរបស់ព្រះអង្គ ប្រកបដោយព្រះប្រាជ្ញាញាណ។ កាលមាតាបិតាបានឃើញព្រះកុមារហើយ គាត់នឹកឆ្ងល់យ៉ាងខ្លាំង។ មាតាសួរថា៖«កូនអើយ! ហេតុអ្វីបានជាកូនធ្វើដូច្នេះ? ឪពុកម្ដាយព្រួយចិត្តណាស់ ខំដើររកកូន»។ ព្រះកុមារមានព្រះបន្ទូលតបថា៖«ហេតុអ្វីបានជាលោកឪពុកអ្នកម្ដាយរកកូនយ៉ាងហ្នឹង? តើលោកឪពុកអ្នកម្ដាយមិនជ្រាបថា កូនត្រូវនៅក្នុងដំណាក់ព្រះបិតារបស់កូនទេឬ?»។ ប៉ុន្តែ មាតាបិតាពុំបានយល់អត្ថន័យនៃព្រះបន្ទូលរបស់ព្រះកុមារឡើយ។ បន្ទាប់មក ព្រះកុមារយេស៊ូយាងត្រឡប់ទៅភូមិណាសារ៉ែតជាមួយមាតាបិតាវិញ ហើយធ្វើតាមឱវាទរបស់គាត់ទាំងពីរនាក់។ មាតារបស់ព្រះអង្គចងចាំហេតុការណ៍ទាំងអស់នោះទុកក្នុងចិត្ត។
ពាក្យថ្វាយតង្វាយ
បពិត្រព្រះអម្ចាស់ជាព្រះបិតា! សូមទ្រង់ព្រះមេត្តាទទួលសក្ការបូជាដែលយើងសូមថ្វាយនូវថ្ងៃគោរពព្រះនាងព្រហ្មចារីម៉ារី ជាព្រះមាតារបស់ព្រះយេស៊ូជាអម្ចាស់។ សូមទ្រង់ព្រះមេត្តាទទួលដោយអនុគ្រោះ សូមពង្រឹងជំនឿយើងខ្ញុំផង។
ពាក្យអរព្រះគុណ
បពិត្រជាព្រះបិតា! ព្រះអង្គសព្វព្រះហឫទ័យឱ្យយើងខ្ញុំចូលរួមក្នុងអភិបូជា ជាអគ្គសញ្ញាអំពីការរំដោះរបស់យើងខ្ញុំ។ ដោយយើងខ្ញុំនាំគ្នាគោរពព្រះនាងម៉ារី ជាព្រះមាតាព្រះបុត្រាព្រះអង្គ សូមទ្រង់ព្រះមេត្តាប្រោសយើងខ្ញុំឱ្យបានប្រព្រឹត្តតាមបែបដែលគាប់ព្រះហឫទ័យព្រះអង្គជានិច្ចផង។
973 Views
Post Views:
975
