ថ្ងៃសៅរ៍ ទី២៧ ខែកក្កដា ឆ្នាំ២០២៤

សូមថ្លែងព្រះគម្ពីរព្យាការីយេរេមី យរ ៧,១-១១

ព្រះអម្ចាស់មានព្រះបន្ទូលមកលោកយេរេមីដូចតទៅ៖«ចូរទៅឈរនៅមាត់ទ្វារ​ព្រះវិហារ ហើយប្រកាសពាក្យនេះថា អ្នកទាំងអស់គ្នាជាជនជាតិយូដាអើយ! អ្នករាល់គ្នា​ចូលតាមទ្វារទាំងនេះ ដើម្បីទៅក្រាបថ្វាយបង្គំព្រះអម្ចាស់ ចូរនាំគ្នាស្តាប់ព្រះបន្ទូល​របស់ព្រះអង្គ!។ ព្រះអម្ចាស់នៃពិភពទាំងមូលដែលជាព្រះរបស់ជនជាតិអ៊ីស្រាអែល ទ្រង់មានព្រះបន្ទូលថា៖ “ចូរកែប្រែកិរិយាមារយាទ និងលះបង់អំពើអាក្រក់ដែលអ្នករាល់គ្នាប្រព្រឹត្តទៅ! នោះយើងនឹងទុកឱ្យអ្នករាល់គ្នាចូលមកទីនេះតទៅមុខទៀត។ មិនត្រូវទុកចិត្តលើពាក្យដែលអ្នករាល់គ្នាចេះតែបញ្ឆោតខ្លួនឯងថា “ទីនេះជាព្រះវិហារ​របស់ព្រះអម្ចាស់! ព្រះវិហាររបស់ព្រះអម្ចាស់! ព្រះវិហាររបស់ព្រះអម្ចាស់!” សោះ​ឡើយ។ ប្រសិនបើអ្នករាល់គ្នាកែប្រែកិរិយាមារយាទ និងលះបង់អំពើអាក្រក់ដែល​អ្នករាល់គ្នាប្រព្រឹត្ដ ប្រសិនបើអ្នករាល់គ្នាពិតជារក​យុត្តិធម៌ឱ្យគ្នាទៅវិញទៅមក ប្រសិនបើអ្នករាល់គ្នាឈប់ជិះជាន់ជនបរទេស ក្មេងកំព្រា និងស្ត្រីមេម៉ាយ ប្រសិនបើ​អ្នករាល់គ្នាឈប់ប្រហារជីវិតជនស្លូតត្រង់នៅទីនេះ ហើយបើអ្នករាល់គ្នាឈប់រត់ទៅគោរពព្រះដទៃដែលធ្វើឱ្យអ្នករាល់គ្នាត្រូវវេទនា នោះយើងនឹងទុកឱ្យអ្នករាល់គ្នា​ចូលមកទីនេះ និងរស់នៅក្នុងស្រុកដែលយើងបានប្រគល់ឱ្យបុព្វបុរសរបស់អ្នករាល់គ្នាតាំងពីដើមរៀងមក ហើយអស់កល្បតរៀងទៅ។ ប៉ុន្តែ អ្នករាល់គ្នាទុកចិត្តលើពាក្យដែលអ្នករាល់គ្នាចេះតែបញ្ឆោតខ្លួនឯង ជាពាក្យ​ឥតបានការនោះទៅវិញ។ អ្នករាល់គ្នាលួចប្លន់ កាប់សម្លាប់ ផិតក្បត់ ស្បថបំពាន ដុតគ្រឿងសក្ការបូជាថ្វាយព្រះបាល និងរត់ទៅគោរពព្រះដទៃដែលអ្នករាល់គ្នាពុំ​ស្គាល់ពីមុន រួចហើយនាំគ្នាចូលមកថ្វាយបង្គំយើងក្នុងព្រះវិហារនេះ ដែលជាដំណាក់​របស់យើង។ អ្នករាល់គ្នាហ៊ាប្រកាសថា នៅកន្លែងនេះ​យើងរួចខ្លួន!។ អ្នករាល់គ្នា​ពោលដូច្នេះ ហើយប្រព្រឹត្តអំពើគួរឱ្យស្អប់ខ្ពើមតទៅទៀត។ តើអ្នករាល់​គ្នាស្មានថា ព្រះវិហារដែលជាដំណាក់របស់យើងនេះ ជាសំបុកចោរឬ? តាមពិត យើងឃើញថា ទីនេះពិតជាសំបុកចោរមែន!»។ នេះជាព្រះបន្ទូលរបស់ព្រះអម្ចាស់។

ទំនុកតម្កើងលេខ ៨៤ (៨៣),២-៦.១១ បទព្រហ្មគីតិ

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១៣,២៤-៣០

ព្រះយេស៊ូមានព្រះបន្ទូលជាពាក្យប្រស្នាមួយទៀតទៅកាន់បណ្តាជនថា៖«ព្រះរាជ្យនៃស្ថានបរមសុខប្រៀបបាននឹងបុរសម្នាក់ដែលបានព្រោះគ្រាប់ពូជល្អទៅក្នុងស្រែ​របស់គាត់។ ពេលមនុស្សម្នាដេកលក់អស់ មារសត្រូវរបស់គាត់មកព្រោះស្រងែនៅ​ក្នុងស្រែនោះដែរ រួចចេញបាត់ទៅ។ ពេលស្រូវដុះឡើងដាក់គ្រាប់ ស្រងែក៏ដុះឡើង​ដែរ។ ពួកអ្នកបម្រើចូលមកជម្រាបម្ចាស់ស្រែថា៖«លោកម្ចាស់! លោកបានព្រោះតែគ្រាប់ពូជល្អក្នុងស្រែសោះ ចុះស្រងែនេះមកពីណា?»។ ម្ចាស់តបវិញថា៖«ពិតជាមាន​មារសត្រូវមកព្រោះហើយ!»។ ពួកអ្នកបម្រើសួរលោកទៀតថា៖«តើលោកចង់ឱ្យយើងខ្ញុំទៅដកស្រងែនោះចេញឬ?»។ ម្ចាស់តបថា៖«កុំអី! បើអ្នករាល់គ្នាដក​ក្រែងលោដោយស្រូវមកជាមួយដែរ ទុកឱ្យវាដុះជាមួយគ្នា រហូតដល់ស្រូវទុំចុះ! ពេលនោះខ្ញុំនឹងប្រាប់ពួកអ្នកច្រូតថា ចូរប្រមូលស្រងែចងជាបាច់ យកទៅដុតចោល​ជាមុនសិន រួចសឹមប្រមូលស្រូវដាក់ជង្រុកឱ្យខ្ញុំ»។