ថ្ងៃចន្ទ ទី២៩ ខែមេសា ឆ្នាំ២០២៤

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គជាប្រភពនៃជីវិតគ្រប់យ៉ាង ព្រះអង្គក៏បានប្រទានសញ្ញាសម្គាល់នានា​ឱ្យ​​ម​នុស្សលោកអាចស្គាល់ព្រះអង្គបានដែរ។ សូមទ្រង់ព្រះមេត្តាប្រោសឱ្យយើងខ្ញុំភ្ជាប់ចិត្តនឹងព្រះអង្គជានិច្ច កុំ​យក​ធន​ធាន​ ការភ្លើតភ្លើន ឬព្រះក្លែងក្លាយមកគោរពឡើយ។ សូមឱ្យយើងខ្ញុំបែរមករកព្រះអង្គជាព្រះបិតាដែលសោយរាជ្យ​រួម​ជាមួយព្រះបុត្រា និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។

សូមថ្លែងព្រះគម្ពីរកិច្ចការរបស់គ្រីស្តទូត កក ១៤,៥-១៨

នៅក្រុងអុីកូញុម សាសន៍ដទៃ និងសាសន៍យូដាផ្សំគំនិតគ្នាជាមួយពួកមេដឹកនាំរបស់គេចង់ធ្វើបាប និងចង់​យក​ដុំថ្មគប់សម្លាប់លោកប៉ូល និងលោកបារណាបាស។ លោកទាំងពីរយល់ឃើញ​ថាសភាពការណ៍​មិន​ស្រួលក៏រត់​ភៀស​ខ្លួនទៅស្រុកលីកាអូនី គឺទៅក្រុង​លីស្ត្រា និងក្រុង​ឌែរបេ ព្រមទាំងតំបន់ដែលនៅជុំវិញ ហើយប្រកាសដំណឹងល្អនៅទីនោះ។ នៅក្រុងលីស្ត្រាមានបុរសម្នាក់ពិការជើងតាំងពីកំណើតមក គាត់មិនអាចដើរបានឡើយ គាត់អង្គុយ​ស្តាប់​​លោ​​​​ក​​ប៉ូលមានប្រសាសន៍។ លោកប៉ូលសម្លឹងមើលគាត់ ហើយយល់ឃើញថា គាត់មានជំនឿគួរឱ្យទ​ទួល​ការ​សង្គ្រោះ​បាន ​លោកក៏មានប្រសាសន៍ទៅគាត់ខ្លាំងៗថា៖ «សុំក្រោកឡើងឈរឱ្យត្រង់!»។ បុរស​នោះ​ស្ទុះក្រោក​ឈរឡើង ហើ​យ​ដើរបាន។ កាលមហាជនឃើញការអស្ចារ្យដែលលោកប៉ូលបានធ្វើនោះ គេក៏នាំគ្នាស្រែកហ៊ោ​ឡើងជា​ភាសា​លីកា​អូនីថា៖«ព្រះនិម្មិតមកជាមនុស្ស ចុះមកគង់ជាមួយយើងហើយ!»។ គេហៅ​លោក​បារណា​បាសថា៖ «ព្រះសឺស» និង​ហៅ​លោកប៉ូលថា «ព្រះហ៊ែរម៉េស» ព្រោះលោកជាអ្នកនាំពាក្យ។ បូជាចារ្យរបស់ព្រះសឺសដែលមានវិហារ​ទល់​មុខ​នឹង​ទីក្រុង នាំគ្នាដឹកគោឈ្មោលតុបតែងលម្អដោយភួងផ្កាមកមាត់ទ្វារក្រុង ព្រោះគាត់ចង់ធ្វើបូជាយញ្ញរួមជាមួយ​មហាជន។ កាលលោកបារណាបាស និងលោកប៉ូលឮដំណឹងនេះ លោកក៏ហែកសម្លៀកបំពាក់ ហើយ​ស្ទុះរត់ទៅរក​ប្រ​ជា​ជនទាំងស្រែកឡើងថា៖ «ហេតុអ្វីបានជាបងប្អូននាំគ្នាធ្វើដូច្នេះ? យើង​ខ្ញុំក៏​ជា​មនុស្ស​ធម្មតា​ដូច​បង​ប្អូន​ដែរទេតើ។ យើ​ង​​ខ្ញុំនាំដំណឹងល្អមកជម្រាបជូនបងប្អូន គឺសូមបងប្អូនងាកចេញពីការថ្វាយបង្គំព្រះក្លែងក្លាយទាំងនេះ ហើយបែរ​មក​​រក​ព្រះជាម្ចាស់ដ៏មានព្រះជន្មវិញ ជាព្រះដែលបានបង្កើតផ្ទៃមេឃ ផែនដី សមុទ្រ និងអ្វីៗសព្វសារពើដែលមាន​នៅទី​ទាំង​​​​នោះផង។ នៅជំនាន់មុនៗ ព្រះអង្គបានបណ្តោយឱ្យជាតិសាសន៍នានាដើរតាមមាគ៌ារៀងៗខ្លួន។ ក៏ប៉ុន្តែ ទោះ​ជាយ៉ាងណាក៏ដោយ ក៏ព្រះអង្គនៅតែសម្តែងព្រះហឫទ័យសប្បុរសមិនដែលអាក់ខានឡើយ ដើម្បីឱ្យគេបានស្គាល់​ព្រះ​អង្គ គឺប្រទានទឹកភ្លៀងពីលើមេឃ និងប្រទានភោគផលមកបងប្អូនតាមរដូវកាល ធ្វើឱ្យបងប្អូនមានម្ហូបអាហារ​ដ៏បរិបូណ៌ និងមានអំណរសប្បាយក្នុងចិត្តផង»។ ទោះបីលោកទាំងពីរមានប្រសាសន៍​ដូច្នេះក្តី ក៏លោករក​ឃាត់​មហា​ជន​មិនឱ្យធ្វើបូជាយញ្ញជូនលោកសឹងតែពុំបាន។

ទំនុកតម្កើងលេខ ១១៥ (១១៣ខ), ១-៤.១៥-១៦ បទកាកគតិ

ពិធីអបអរសាទរព្រះគម្ពីរដំណឹងល្អតាម អភ ២,១៨

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៤,២១-២៦

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គមានព្រះបន្ទូល​ទៅកាន់​ក្រុម​សាវ័កថា៖ «អ្នកណាមានវិន័យរបស់ខ្ញុំ និងប្រតិបត្តិតាម គឺអ្នកនោះហើយដែលស្រឡាញ់ខ្ញុំ។ ព្រះបិតារបស់ខ្ញុំស្រ​ឡាញ់​អ្នក​ដែលស្រឡាញ់ខ្ញុំ ហើយខ្ញុំក៏ស្រឡាញ់អ្នកនោះដែរ។ ខ្ញុំនឹងបង្ហាញឱ្យអ្នកនោះស្គាល់ខ្ញុំថែមទៀតផង»។ លោកយូដាស (មិនមែនយូដាសអ៊ីស្ការីយ៉ុតទេ) ទូលព្រះអង្គថា៖ «បពិត្រព្រះអម្ចាស់ ហេតុដូចម្តេច​បានជា​ព្រះ​អង្គ​បង្ហាញឱ្យតែយើងខ្ញុំស្គាល់ព្រះអង្គ មិនឱ្យមនុស្សលោកស្គាល់ផងដូច្នេះ?»។ ព្រះយេស៊ូមាន​ព្រះបន្ទូល​ទៅ​គាត់​ថា៖ «អ្នកណាស្រឡាញ់ខ្ញុំ អ្នកនោះនឹងប្រតិបត្តិតាមពាក្យខ្ញុំ​ ព្រះបិតាខ្ញុំនឹងស្រឡាញ់អ្នកនោះ ហើយ​ព្រះ​បិ​តា​ និង​ខ្ញុំក៏នឹងមកតាំងលំនៅនៅក្នុងអ្នកនោះដែរ។ អ្នកណាមិនស្រឡាញ់ខ្ញុំ អ្នកនោះមិនប្រតិបត្តិតាមពាក្យខ្ញុំឡើយ។ ពាក្យ​ដែលអ្នករាល់គ្នាឮខ្ញុំនិយាយ មិនមែនជាពាក្យរបស់ខ្ញុំទេ គឺជាព្រះបន្ទូលរបស់ព្រះបិតាដែលបានចាត់ខ្ញុំឱ្យមក។ ខ្ញុំ​​បាន​ប្រាប់សេចក្តីទាំងនេះឱ្យអ្នករាល់គ្នាដឹង ក្នុងពេលដែលខ្ញុំស្ថិតនៅជាមួយអ្នករាល់គ្នានៅឡើយ ប៉ុន្តែ ​ព្រះ​អង្គ​ដែល​ជួយ​ការ​ពារ គឺព្រះវិញ្ញាណដ៏វិសុទ្ធដែលព្រះបិតានឹងចាត់ឱ្យមកក្នុងនាមខ្ញុំ ទ្រង់នឹង​បង្រៀន​សេចក្តី​ទាំង​អស់​ដល់​​អ្នករាល់គ្នា ព្រមទាំងរម្លឹកអ្វីៗដែលខ្ញុំបានប្រាប់អ្នករាល់គ្នាផង»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គស្រឡាញ់អស់អ្នកដែលស្រឡាញ់ព្រះយេស៊ូ សូម​ទ្រង់​ព្រះមេត្តា​ប្រោស​ប្រ​ទានឱ្យយើងខ្ញុំស្រឡាញ់ព្រះអង្គកាន់តែខ្លាំងឡើងៗ ដោយប្រតិបត្តិតាមពាក្យប្រៀនប្រដៅរបស់ព្រះយេស៊ូ។ សូម​ព្រះ​បិតាយាងមកតាំងទីលំនៅក្នុងយើងខ្ញុំ រួមជាមួយព្រះយេស៊ូជាព្រះបុត្រាព្រះអង្គ ដែលមានព្រះជន្មគង់នៅ និងសោយ​រាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ក្នុងអភិបូជានេះ ព្រះអង្គបានប្រោសឱ្យយើងខ្ញុំចូលរួម​យ៉ាង​ជិតស្និទ្ធ​ជាមួយ​ព្រះ​យេស៊ូជាព្រះបុត្រារបស់ព្រះអង្គ សូមទ្រង់ព្រះមេត្តាចាត់ព្រះវិញ្ញាណដ៏វិសុទ្ធឱ្យ​យាង​មក​បង្រៀន​យើងខ្ញុំ ព្រម​ទាំង​រំឭកយើងខ្ញុំនូវអ្វីៗទាំងអស់ដែលព្រះយេស៊ូមានព្រះបន្ទូលប្រាប់យើងខ្ញុំផង។ សូម​ព្រះវិញ្ញាណ​ការពារយើងខ្ញុំ និងប្រ​​ទានកម្លាំងក្លាហានឱ្យយើងខ្ញុំ អាចប្រព្រឹត្តតាមព្រះបន្ទូលទាំងនោះផង។