ថ្ងៃសៅរ៍ ទី២៣ ខែធ្នូ ឆ្នាំ២០២៣

ពាក្យអធិដ្ឋានពេលចូល

បពិត្រព្រះអម្ចាស់ដ៏មានតេជានុភាពសព្វប្រការ! ព្រះអង្គបានចាត់ព្រះបុត្រាឱ្យយាងមក​ប្រសូតជាមនុស្សដូចយើងខ្ញុំ។ ព្រះបុត្រាបានសម្តែងព្រះហឫទ័យមេត្តាករុណារបស់​ព្រះ​អង្គចំពោះអ្នកតូចតាច និងអ្នកក្រីក្រ។ សូមទ្រង់ព្រះមេត្តាប្រោសយើងខ្ញុំឱ្យទទួល​ស្គាល់​កិត្តិយស​ដ៏ថ្លៃថ្លារបស់ខ្លួន ជាបុត្រធីតារបស់ព្រះអង្គផង។

អត្ថបទទី១៖ សូមថ្លែងព្រះគម្ពីរព្យាការីម៉ាឡាគី មគ ៣,១-៤.២៣-២៤

ព្រះអម្ចាស់នៃពិភពទាំងមូលមានព្រះបន្ទូលថា៖ «យើងចាត់ទូតយើងឱ្យទៅមុនដើម្បី​រៀបចំផ្លូវសម្រាប់យើង។ រំពេចនោះព្រះអម្ចាស់ដែលអ្នករាល់គ្នាស្វែងរកនឹងយាងចូល​ក្នុង​ព្រះវិហាររបស់ព្រះអង្គ។ រីឯទូតនៃសម្ពន្ធមេត្រីដែលអ្នករាល់គ្នារង់ចាំកំពុងតែមក។ ប៉ុន្តែ នៅថ្ងៃដែលព្រះអង្គយាងមកដល់ តើនរណាអាចទ្រាំបាន? នៅពេលព្រះអង្គលេចមក តើនរណាអាចឈរបាន? ដ្បិតព្រះអង្គប្រៀបបាននឹងភ្លើងរបស់ជាងដែក និងដូចសាប៊ូរបស់អ្នកបោកសម្លៀកបំពាក់។ ព្រះអង្គនឹងគង់កាត់ក្តីដូចជាងទងអង្គុយរំលាយ និងបន្សុទ្ធ​សាច់​ប្រាក់។ ព្រះអង្គនឹងជម្រះកូនចៅលោកលេវីឱ្យបានបរិសុទ្ធ ព្រះអង្គនឹងបន្សុទ្ធពួកគេ​ដូច​បន្សុ​ទ្ធ​មាស និងប្រាក់។ ពួកគេនឹងនាំតង្វាយដ៏ត្រឹមត្រូវតាមវិន័យ​ មកថ្វាយព្រះអម្ចាស់​ដោយ​ចិត្តស្មោះត្រង់។ ពេលនោះព្រះអម្ចាស់សព្វព្រះហឫទ័យទទួលតង្វាយរបស់អ្នកស្រុក​យូដា និងអ្នកក្រុងយេរូសាឡឹមដូចនៅបុរាណកាល និងនៅជំនាន់មុន។ ចំណែកឯយើងវិញយើងនឹងចាត់ព្យាការីអេលីឱ្យមកមុនថ្ងៃរបស់ព្រះអម្ចាស់ ជាថ្ងៃដ៏ឧត្តុង្គឧត្តមគួរឱ្យ​ស្ញែង​ខ្លាច។ យើងនឹងបង្វែរចិត្តឪពុកទៅ​រកកូន ហើយបង្វែរចិត្តកូនទៅរកឪពុក។ ដូច្នេះយើង​នឹងមិនមកបំផ្លាញស្រុករបស់អ្នករាល់គ្នាឱ្យវិនាសសូន្យទេ»។

ទំនុកតម្កើងលេខ ២៥,៤-១០.១៤ បទពាក្យ ៧

ពិធីអបអរសាទរព្រះគម្ពីរដំណឹងល្អ

អាលេលូយ៉ា! អាលេលូយ៉ា!
ឱ! ព្រះគ្រីស្តជាទីសង្ឃឹមនៃប្រជាជាតិទាំងឡាយអើយ! សូមយាងមក! ព្រះសង្គ្រោះរបស់ប្រជាជនទាំងអស់អើយ សូមយាងមក​សង្គ្រោះអ្នកដែលវង្វេងបាត់ផង។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១,៥៧-៦៦

ពេលនាងអេលីសាបិតគ្រប់ខែហើយ គាត់សម្រាលបានកូនប្រុសមួយ។ អ្នកជិតខាង និងញាតិសន្តាននាំគ្នាអបអរសាទរជាមួយគាត់ ព្រោះគេបានឮដំណឹងថា ព្រះអម្ចាស់បាន សម្តែងព្រះហឫទ័យមេត្តាករុណាដល់គាត់យ៉ាងច្រើនអនេក។ ប្រាំបីថ្ងៃក្រោយមក គេនាំគ្នាធ្វើពិធីកាត់ស្បែកឱ្យទារកនោះ ហើយចង់ដាក់ឈ្មោះថា “សាការី” ដូចឪពុកដែរ តែម្តាយប្រាប់ថា៖ «ទេ! ត្រូវដាក់ឈ្មោះថា “យ៉ូហាន” វិញ (ឈ្មោះ “យ៉ូហាន” នេះមានន័យថា “ព្រះអម្ចាស់ប្រណីសន្តោស”)។ ពួកគេតបថា៖ «ក្នុងញាតិសន្តានរបស់អ្នក គ្មាននរណាមានឈ្មោះនេះទេ»។ គេធ្វើសញ្ញាសួរទៅលោកសាការីថា ចង់ដាក់ឈ្មោះអ្វីឱ្យកូន។ លោកសាការីសុំឱ្យគេយកក្តារឆ្នួនមួយមក ហើយសរសេរថា៖ «កូននេះឈ្មោះ យ៉ូហាន»។ ពួកគេស្ងើចសរសើរតម្កើងគ្រប់គ្នា។ រំពេចនោះ ស្រាប់តែលោកនិយាយបានដូចដើមវិញ រួចលោកបន្លឺសំឡេងលើកតម្កើងព្រះជាម្ចាស់។ អ្នកជិតខាងកោតស្ញប់ស្ញែងគ្រប់ៗគ្នា ហើយព្រឹត្តិការណ៍នេះឮសុសសាយពេញតំបន់ភ្នំ ក្នុងស្រុកយូដា។ អស់អ្នកដែលបានឮ ក៏ចងចាំរឿងនេះទុកក្នុងចិត្ត ហើយដណ្តឹងសួរខ្លួនឯងថា៖ «តើថ្ងៃក្រោយកូននេះនឹងទៅជាយ៉ាងណា?» ដ្បិតព្រះបារមីរបស់ព្រះអម្ចាស់តាមជួយថែរក្សាកូននេះ។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គចាត់ព្រះបុត្រាឱ្យយាងមកសង្គ្រោះយើងខ្ញុំ។ ក្នុងអភិបូជានេះ យើងខ្ញុំនាំគ្នារំឭកពីសក្ការបូជាដ៏ប្រសើរបំផុត ដែលព្រះបុត្រាបានថ្វាយទៅព្រះបិតា។ សូមទ្រង់ព្រះមេត្តាប្រោសយើងខ្ញុំ ឱ្យរៀបចំចិត្តគំនិតយើងខ្ញុំ ដើម្បីទទួលព្រះបុត្រាយាងមកជារៀងរាល់ថ្ងៃ។ ព្រះអង្គមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រោសយើងខ្ញុំឱ្យចូលរួមជាមួយព្រះយេស៊ូក្នុងអភិបូជានេះ។ សូមទ្រង់ព្រះមេត្តាប្រោសយើងខ្ញុំឱ្យប្រុងស្មារតីទទួលព្រះបុត្រាដែលយាងមកសព្វថ្ងៃនេះ។ សូមបំភ្លឺចិត្តគំនិតយើងខ្ញុំឱ្យរៀបចំផ្លូវថ្វាយព្រះអង្គដោយយកចិត្តទុកដាក់ផង។