ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! យើងខ្ញុំសូមលើកតម្កើងព្រះហឫទ័យស្រឡាញ់ដ៏លើសលប់របស់ព្រះអង្គចំពោះមនុស្សលោក។ ព្រះយេស៊ូស្រឡាញ់យើងខ្ញុំរហូតដល់សព្វព្រះហឫទ័យឱ្យគេចាក់ព្រះបេះដូងព្រះអង្គ។ ព្រះជន្មផ្ទាល់របស់ព្រះអង្គក៏បានហូរមកដល់យើងខ្ញុំ តាមមុខរបួសនេះដែរ។ សូមទ្រង់ព្រះមេត្តាពង្រឹងជំនឿ និងសេចក្តីស្រឡាញ់យើងខ្ញុំផង។

អត្ថបទទី១៖ សូមថ្លៃងព្រះគម្ពីរព្យាការីអេសេគីអែល អគ ៣៤,១១-១៦

ព្រះអម្ចាស់មានព្រះបន្ទូលថា៖«ចាប់ពីពេលនេះតទៅ យើងនឹងតាមរកហ្វូងចៀមរបស់យើង ហើយមើលថែវាដោយយើងផ្ទាល់។ យើងនឹងតាមរកហ្វូងចៀមរបស់យើង ដូចគង្វាលតាមរកហ្វូងចៀមរបស់ខ្លួនដែលបែកស្ញែកដែរ។ យើងនឹងប្រមូលចៀមរបស់យើងពីគ្រប់កន្លែង ដែលវាខ្ចាត់ខ្ចាយទៅនៅថ្ងៃមេឃងងឹង និងចុះអាប់។ យើងនឹងនាំប្រជាជនចេញពី​ចំណោមជាតិសាសន៍នានា យើងនឹងប្រមូលពួកគេពីគ្រប់ស្រុកឱ្យមករស់នៅលើទឹកដីរបស់ខ្លួនវិញ។ យើងនឹងខ្វាលពួកគេនៅតាមបំបន់ភ្នំនៅស្រុកអ៊ីស្រាអែល តាមជ្រលងដងអូ និងគ្រប់ទីកន្លែងដែលអាចរស់នៅបាន។​ យើងនឹងខ្វាលចៀមរបស់យើងនៅកន្លែងដែលសម្បូណ៍ស្មៅខៀវខ្ចី ពួកគេនិងស្នាក់អាស្រ័យនៅតាមភ្នំខ្ពស់ៗនៃស្រុកអ៊ីស្រាអែល។ នៅទីនោះពួកគេនឹងសម្រាកហើយរកស៊ីតាមវាលស្មៅដ៏ខៀវខ្ចី។ យើងនឹងខ្វាលហ្វូងចៀមរបស់យើង យើងនឹងឱ្យវាសម្រាក។ នេះជាព្រះបន្ទូលរបស់ព្រះជាម្ចាស់។ យើងនឹងស្វែងរកចៀមដែលបាត់ យើងនឹងនាំចៀមវង្វេងឱ្យ ត្រឡប់មក​វិញ យើងនឹងរំរបួសឱ្យចៀមរបួស ហើយព្យាបាលចៀមឈឺឱ្យជា និនមានកម្លាំងឡើងវិញ។ រីឯចៀមធាត់ ដែលមានកម្លាំងមាំមួនយើងនឹងដកវាចេញ។​ យើងនឹងខ្វាលហ្វូងចៀមរបស់យើងដោយយុត្តិធម៌»។

ទំនុកតម្កើងលេខ ២៣ (២២),១-៦ បទពាក្យ ៧

អត្ថបទទី២៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងរ៉ូម រម ៥,៥-១១

បងប្អូនជាទីស្រឡាញ់!
ព្រះអម្ចាស់បានចាក់បង្ហូរព្រះហឫទ័យស្រឡាញ់របស់ព្រះអង្គមកក្នុងចិត្តយើង ដោយប្រទានព្រះវិញ្ញាណដ៏វិសុទ្ធមកយើង។ កាលយើងមិនទាន់មានកម្លាំងនៅឡើយ លុះដល់ពេលកំណត់ព្រះគ្រីស្តបានសោយទិវង្គតសម្រាប់មនុស្សដែលមិនគោរពប្រណិប័តន៍ព្រះអង្គ។ កម្រមាននណាម្នាក់ហានប្តូរជីវិតដើម្បីមនុស្សសុចរិតណាស់ ប្រហែលជាមានម្នាក់ ហ៊ានស៊ូប្តូរជីវិតដើម្បីមនុស្សល្អដែរមើលទៅ!។ រីឯព្រះជា​ម្ចាស់វិញ ព្រះអង្គបានបង្ហាញព្រះហឫទ័យស្រឡាញ់របស់ព្រះអង្គចំពោះយើង គឺព្រះគ្រីស្តបានសោយទិវង្គតសម្រាប់យើង ក្នុងពេលដែលយើងនៅជាមនុស្សជាប់បាបនៅឡើយ។ ឥឡូវនេះ បើព្រះជាម្ចាស់ប្រោសយើងឱ្យបានសុចរិត ដោយសារព្រះលោហិតរបស់ព្រះគ្រីស្តយ៉ាងហ្នឹងទៅហើយ ព្រះអង្គរឹងតែសង្គ្រោះយើងឱ្យរួចពីព្រះពិសេធដោយសារព្រះគ្រីស្តថែមទៀតជាពុំខាន។ បើព្រះជាម្ចាស់សម្រុះ​សម្រួលយើងឱ្យជានានឹងព្រះអង្គវិញ ដោយព្រះបុត្រារបស់ព្រះអង្គសោយទិវង្គតក្នុងគ្រាដែលយើងនៅជាសត្រូវនឹងព្រះអង្គនៅឡើយចំណង់បើឥឡូវនេះ យើងបានជានានឹងព្រះអង្គហើយ ព្រះអង្គក៏រឹតតែសង្គ្រោះយើង ដោយសារព្រះជន្មរបស់ព្រះបុត្រាថែមទៀតជាពុំខាន។ មិនតែប៉ុណ្ណោះសោត យើងនឹងបានខ្ពស់មុខ ដោយពឹងលើព្រះជាម្ចាស់ តាមរយៈព្រះយេស៊ូគ្រីស្តជាអម្ចាស់នៃយើង ដែលទ្រង់បានសម្រុះសម្រួលឱ្យយើងជានានឹងព្រះជាម្ចាស់វិញ នៅពេលនេះ។

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តលូកា លក ១៥ ,​៣-៧

ព្រះយេស៊ូមានព្រះបន្ទូលទៅគេជាប្រស្នានេះថា៖ «ក្នុងចំណោមអ្នករាល់គ្នា ឧបមាថាមានម្នាក់មានចៀមមួយរយក្បាល បើគាត់បាត់​ចៀមមួយ គាត់មុខជាទុកចៀមកៅសិបប្រាំបួនចោលនៅទីវាល ហើយទៅតាមរកចៀមដែលបាត់នោះរហូតទាល់តែបានឃើញវិញ។ កាលរកឃើញហើយ គាត់ត្រេកអរណាស់ គាត់ក៏លើកចៀមដាក់លើ-ក ត្រឡប់មកផ្ទះវិញ​ ហៅមិត្តភក្តិ និងអ្នកជិតខាងប្រាប់ថា៖ “សូមជួយអរសប្បាយជាមួយខ្ញុំផង ដ្បិតចៀមរបស់ខ្ញុំដែលបាត់ទៅនោះ ឥឡូវនេះខ្ញុំរកឃើញវិញហើយ”។ ខ្ញុំសុំប្រាប់អ្នករាល់គ្នាថា ព្រះអង្គម្ចាស់នៅស្ថានបរមសុខមានអំណរសប្បាយដោយមានមនុស្សបាបតែម្នាក់ប្រែចិត្តគំនិត ខ្លាំងជាងព្រះអង្គសប្បាយនឹងមនុស្ស​សុចរិតកៅ​សិបប្រាំបួននាក់ដែលមិនត្រូវការកែប្រែចិត្តគំនិត»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះយេស៊ូជាព្រះបុត្រាព្រះអង្គបានសម្តែងសេចក្តីស្រឡាញ់ដ៏លើសលប់ចំពោះព្រអង្គ និងចំពោះយើងខ្ញុំ ថ្វាយទុកជាសក្ការបូជាដែលគាប់ព្រះហឫទ័យព្រះអង្គ។​ យើងខ្ញុំសូមថ្វាយកាយ វាចា ចិត្ត រួមជាមួយ និងសក្ការបូជានេះ សូមទ្រង់ព្រះមេត្តាទទួលតង្វាយរបស់យើងខ្ញុំដោយអនុគ្រោះផង។

ធម៌លើកតម្កើង

បពិត្រព្រះអម្ចាស់ជាព្រះបិតាដ៏វិសុទ្ធ ដែលមានព្រះជន្មគង់នៅអស់កល្បជានិច្ច ហើយដែលមានតេជានុភាពសព្វប្រការ! យើងខ្ញុំសូមអរព្រះគុណព្រះអង្គ សូមសរសើរតម្កើងព្រះអង្គ រួមជាមួយព្រះយេស៊ូគ្រីស្តជាអម្ចាស់យើងខ្ញុំ។ ជាពិសេសនៅថ្ងៃនេះ យើងខ្ញុំនាំគ្នាលើកតម្កើងព្រះហឫទ័យស្រឡាញ់ដ៏លើសលប់របស់ព្រះយេស៊ូ។ ព្រះអង្គបានបូជាព្រះជន្ម ដើម្បីជាប្រយោជន៍ដល់យើងខ្ញុំទាំងអស់គ្នា។ ពេលគេចាក់ព្រះបេះដូងព្រះយេស៊ូ មានទឹក និងឈាមហូរចេញមក ពេលនោះទ្រង់បានបង្កើតអគ្គសញ្ញានៃព្រះសហគមន៍ ដើម្បី​ឱ្យយើងខ្ញុំទទួលព្រះជន្មផ្ទាល់របស់ព្រះអង្គ។ អាស្រ័យហេតុនេះហើយ បានជាយើងខ្ញុំសូមចូលរួមជាមួយទេវទូត និងសន្តបុគ្គលទាំងឡាយ ដើម្បីលើកតម្កើងសិរីរុងរឿងរបស់ព្រះអង្គ ដោយសូរស័ព្ទតែមួយថា៖ “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!… ”

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យឱ្យយើងខ្ញុំចូលរួមជាមួយព្រះយេស៊ូ ដោយអគ្គសញ្ញានៃព្រះកាយ និងព្រះលោហិតនេះ។ ក្នុងអភិបូជា ព្រះយេស៊ូបានបង្ហាញសេចក្តីស្រឡាញ់យ៉ាងលើសលប់ចំពោះមនុស្សលោក។ សូមទ្រង់ព្រះមេត្តាប្រោសយើងខ្ញុំឱ្យស្រឡាញ់ព្រះអង្គ និងស្រឡាញ់បងប្អូនកាន់តែខ្លាំងឡើងៗផង។