ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! យើងខ្ញុំជឿថា ព្រះយេស៊ូគ្រីស្តជាព្រះសង្គ្រោះរបស់មនុស្សលោក​គង់នៅ​ជា​មួយ​ព្រះអង្គ ទាំងប្រកប​ដោយសិរីរុងរឿង។ យើងខ្ញុំក៏ជឿជាក់ថា ព្រះគ្រីស្តស្ថិតនៅជាមួយយើងខ្ញុំសព្វថ្ងៃនេះ រហូត​ដល់​អវសានកាលនៃពិភពលោកដែរ។ សូមព្រះ​អង្គទ្រង់ព្រះមេត្តាប្រោសយើងខ្ញុំឱ្យធ្វើជាសាក្សីពីព្រះគ្រីស្តនេះផង។

អត្ថបទទី១៖ សូមថ្លែងព្រះគម្ពីរកិច្ចការរបស់គ្រីស្តទូត កក ១,១៥-១៧.២០-២៦

នៅគ្រានោះ បងប្អូនប្រមាណមួយរយម្ភៃនាក់នៅជុំគ្នា។ លោកសិលាក្រោកឈរឡើងនៅកណ្តាលពួកគេ ហើយពោលថា៖ «បងប្អូន​អើយ! ព្រះវិញ្ញាណដ៏វិសុទ្ធបានថ្លែងទុកជាមុនតាមរយៈព្រះបាទដាវីឌ អំពីយូដា​ជាអ្នក​នាំ​គេ​មកចាប់ព្រះយេស៊ូ។ ហេតុការណ៍នេះ ត្រូវតែកើតឡើងស្របតាមសេចក្តីដែលមានចែងទុកក្នុងគម្ពីរមែន។ យូដាស​ជា​សមាជិកម្នាក់ក្នុងក្រុមរបស់យើង ហើយបានទទួលចំណែកមុខងាររួមជាមួយយើងដែរ។ ក្នុងគម្ពីរទំនុកតម្កើង​មានចែង​ទុក​អំពីហេតុការណ៍នេះថា “ត្រូវឱ្យម្នាក់ទៀតទទួលយកតំណែងរបស់គាត់”។ ហេតុនេះ ក្នុងចំណោមអស់​អ្នក​ដែល​​មកជាមួយយើងនៅពេល ព្រះយេស៊ូដឹកនាំយើង គឺចាប់តាំងពីគ្រាដែលលោក​យ៉ូហានធ្វើពិធីជ្រមុជទឹកថ្វាយព្រះអង្គ រហូតដល់ពេលព្រះជាម្ចាស់លើកយកព្រះអង្គចេញពីយើងទៅ ត្រូវឱ្យមានម្នាក់ធ្វើជាសាក្សីរួមជាមួយយើង អំពី​ព្រះ​អង្គ​មានព្រះជន្មរស់ឡើងវិញ»។ គេនាំសាវ័កពីរនាក់មក ម្នាក់ឈ្មោះយ៉ូសែប ហៅ “បារសាបា” ផង “យូស្ទូស” ផង និងម្នាក់ទៀត​ឈ្មោះ​ម៉ា​ធី​យ៉ាស។ បន្ទាប់មកគេនាំគ្នាអធិដ្ឋានដូចតទៅ៖ «បពិត្រព្រះអម្ចាស់! ព្រះអង្គជ្រាបចិត្តគំនិតរបស់មនុស្សទាំងអស់ ហេតុនេះ​ សូមបង្ហាញឱ្យយើងខ្ញុំដឹងផងថា ក្នុងចំណោមបងប្អូនទាំងពីរនាក់នេះ តើព្រះអង្គសព្វព្រះហឫទ័យ​ជ្រើសរើស​អ្នក​ណាឱ្យបំពេញមុខងារជាគ្រីស្តទូតជំនួសយូដាស ដ្បិតយូដាសបានបោះបង់មុខងារនេះទៅឯកន្លែងរបស់គាត់»។ សាវ័ក​នាំ​គ្នា​ចាប់ឆ្នោត ត្រូវលើលោកម៉ាធីយ៉ាស ហើយលោកម៉ាធីយ៉ាស ក៏ចូលរួមក្នុងក្រុមគ្រីស្តទូតដប់មួយនាក់ទៀត។

ទំនុកតម្កើងលេខ ១០៣ (១០២), ១-២.១១-១២.១៩.២២ បទកាកគតិ

អត្ថបទទី២៖ សូមថ្លែងលិខិតទី០១ របស់គ្រីស្តទូតយ៉ូហាន ១ យហ ៤,១១-១៦

ម្នាលកូនចៅជាទីស្រឡាញ់! ប្រសិនបើព្រះជាម្ចាស់បានស្រឡាញ់យើងដល់កម្រិតនេះទៅហើយ យើង​ក៏​ត្រូវ​ស្រឡាញ់គ្នាទៅវិញទៅមកដែរ។ ពុំដែលមាននរណាបានឃើញព្រះជាម្ចាស់ឡើយ។ ប្រសិនបើយើងស្រឡាញ់គ្នាទៅវិញទៅមក ព្រះជាម្ចាស់​ស្ថិត​នៅជាប់នឹងយើង ហើយព្រះហឫទ័យស្រឡាញ់របស់ព្រះអង្គនឹងបានគ្រប់លក្ខណៈនៅក្នុងយើងដែរ។ យើងដឹង​ថា យើងស្ថិតនៅជាប់នឹង ព្រះអង្គ ហើយព្រះអង្គស្ថិតនៅជាប់នឹងយើង ដោយទ្រង់បានចែកព្រះវិញ្ញាណរបស់ព្រះអង្គ​មក​យើង។ រីឯយើងវិញ យើងបានឃើញ ហើយផ្តល់សក្ខីភាពថា ព្រះបិតាបានចាត់​ព្រះបុត្រា​ឱ្យយាង​មក​សង្រ្គោះ​មនុស្ស​លោក។ អ្នកណាប្រកាសជំនឿថា ព្រះយេស៊ូពិតជាព្រះបុត្រារបស់ព្រះជាម្ចាស់ ព្រះជាម្ចាស់​ស្ថិតនៅជាប់​នឹង​អ្នក​នោះ ហើយអ្នកនោះក៏ស្ថិតនៅជាប់នឹងព្រះអង្គដែរ។ រីឯយើងវិញ យើងបានស្គាល់ព្រះហឫទ័យស្រឡាញ់​របស់​ព្រះជាម្ចាស់​ក្នុងចំណោមយើង ហើយយើងក៏បានជឿ។ ព្រះជាម្ចាស់ជាសេចក្តីស្រឡាញ់ អ្នកណា​ស្ថិត​នៅ​ជាប់​នឹង​សេច​ក្តីស្រឡាញ់ អ្នកនោះស្ថិតនៅជាប់នឹងព្រះជាម្ចាស់ ហើយព្រះជាម្ចាស់ក៏ស្ថិតនៅជាប់នឹងអ្នកនោះដែរ។

ពិធីអបអរសាទរព្រះគម្ពីរដំណឹងល្អតាម យហ ១៤,១៨

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៧,១១-១៩

នៅពេលកំណត់ដែលព្រះយេស៊ូត្រូវឆ្លងពីលោកនេះ ឆ្ពោះទៅព្រះបិតា ព្រះអង្គងើបព្រះ​ភក្រ្ត​ទត​ទៅ​លើ​មេឃ​ ហើយមានព្រះបន្ទូលថា៖ «ឱព្រះបិតាដ៏វិសុទ្ធអើយ! សូមថែរក្សាអ្នកទាំងនោះដោយព្រះនាមព្រះអង្គផង គឺព្រះ​នាម​នេះ​ហើយ ដែលព្រះអង្គបានប្រទានមកទូលបង្គំ ដើម្បីឱ្យគេរួមគ្នាជាអង្គតែមួយ ដូចយើងជាអង្គតែមួយដែរ។ កាល​ទូល​បង្គំនៅជាមួយអ្នកទាំងនោះ ទូលបង្គំបានថែរក្សាគេដោយព្រះនាមដែលព្រះអង្គបានប្រទានមកទូលបង្គំ។ ទូល​បង្គំ​បានការពារគេ ហើយគ្មាននរណាត្រូវវិនាសបាត់បង់ឡើយ លើកលែងតែម្នាក់ដែលត្រូវវិនាស ស្របតាម​សេចក្តី​ដែល​មានចែងទុកក្នុងគម្ពីរប៉ុណ្ណោះ។ ឥឡូវនេះ ទូលបង្គំទៅឯព្រះអង្គ ទូលបង្គំនិយាយដូច្នេះ ពេល​ទូលបង្គំនៅក្នុង​លោក​នេះនៅឡើយ ដើម្បីឱ្យគេមានអំណររបស់ទូលបង្គំ ជាអំណរដ៏ពេញលក្ខណៈ។ ទូលបង្គំបានប្រទាន​ព្រះ​បន្ទូល​របស់ព្រះអង្គឱ្យគេ តែមនុស្សលោកស្អប់គេ ពីព្រោះគេមិនកើតពីលោកីយ៍ទេ ដូចជាទូល​បង្គំមិន​កើតពីលោកីយ៍​នេះ​ដែរ​។ ទូលបង្គំមិនអង្វរព្រះអង្គឱ្យយកគេចេញពីលោកនេះឡើយ គឺសូមទ្រង់មេត្តាការពារគេពីអំណាចមារ​កំណាច​វិញ​។ គេមិនកើតពីលោកីយ៍ទេ ដូច​ទូលបង្គំមិនកើតពីលោកីយ៍នេះដែរ។ សូមប្រោសគេ​ឱ្យវិសុទ្ធដោយសារ​សេចក្តី​ពិត គឺព្រះបន្ទូលរបស់ព្រះអង្គនោះហើយជាសេចក្តីពិត។ ទូលបង្គំចាត់គេឱ្យទៅក្នុងលោក ដូចព្រះ​អង្គ​បាន​ចាត់​ទូល​បង្គំឱ្យមកក្នុងលោកដែរ។ រីឯទូលបង្គំវិញ ទូលបង្គំបូជាជីវិតថ្វាយព្រះអង្គជាប្រយោជន៍ដល់គេ ដើម្បីគេ​ឱ្យបាន​វិសុទ្ធ ដោយសារសេចក្តីពិត»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះយេស៊ូអង្វរព្រះអង្គឱ្យយើងខ្ញុំ សូមឱ្យអស់អ្នកជឿរួបរួម​គ្នាជាអង្គតែមួយ​។​ ក្នុងអភិបូជានេះ យើងខ្ញុំនាំគ្នានឹករឭកដល់ព្រះយេស៊ូបូជាព្រះជន្ម ដើម្បីបង្រួបបង្រួមមនុស្សលោក។ សូមព្រះអង្គ​ទ្រង់​​​ព្រះសណ្តាប់ពាក្យអង្វររបស់ព្រះយេស៊ូដោយអនុគ្រោះផង។

ធម៌លើកតម្កើង

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! យើងខ្ញុំសូមលើក​តម្កើងសិរីរុង​រឿង​របស់ព្រះអង្គ ដោយរួមជាមួយព្រះគ្រីស្តជាអម្ចាស់យើងខ្ញុំ។ ព្រះគ្រីស្តប្រទាន​ជីវិតថ្មីឱ្យ​យើងខ្ញុំ​ដែល​ជឿ​សង្ឃឹម​លើ​​ព្រះ​អង្គ។ ទ្រង់បង្រួបបង្រួមមនុស្សគ្រប់ជាតិសាសន៍ឱ្យចូលក្នុងព្រះសហគមន៍តែមួយ។ ព្រះសហគមន៍​ក៏ទទួល​ឫទ្ធិបារមីពីព្រះវិញ្ញាណដែរ ដើម្បីបង្ហាញធម៌មេត្តាការុណារបស់ព្រះអង្គសព្វថ្ងៃនេះ។ អាស្រ័យហេតុនេះ​ហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយ សូម​លើក​តម្កើងសិរីរុងរឿងរបស់ព្រះអង្គ ដោយប្រកាសថា៖ “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”។

ពាក្យអរព្រះគុណ

បពិត្រព្រះបិតា ប្រកបដោយធម៌មេត្តាករុណាយ៉ាងក្រៃលែង! ព្រះអង្គប្រទានព្រះកាយ និងព្រះលោហិត​របស់​​ព្រះបុត្រាឱ្យយើងខ្ញុំទទួលទានទុកជាអាហារ។ យើងខ្ញុំសូមអរព្រះគុណព្រះអង្គ។ សូមទ្រង់​ព្រះមេត្តា​ប្រទាន​ឱ្យ​យើង​​ខ្ញុំមានសេចក្តីសង្ឃឹមយ៉ាងមាំមួនថា នឹងទទួលសិរីរុងរឿងរួមជាមួយព្រះយេស៊ូនៅថ្ងៃណាមួយជាពុំខាន! សូមជួយយើងខ្ញុំឱ្យបង្ហាញការសង្គ្រោះរបស់ព្រះអង្គសព្វថ្ងៃនេះផង។