ថ្ងៃអាទិត្យ ទី២៥ ខែកុម្ភៈ ឆ្នាំ២០២៤

អត្ថបទទី ១៖ សូមថ្លែងព្រះគម្ពីរកំណើត កណ ២២,១-២.៩ក.១០-១៣,១៥-១៨

ព្រះជាម្ចាស់ល្បងចិត្តលោកអប្រាហាំ។ ព្រះអង្គមានព្រះបន្ទូលហៅលោកថា៖ «អប្រាហាំអើយ!»។ លោកឆ្លើយថា៖ «ក្រាបទូលព្រះអម្ចាស់!»។ ព្រះជាម្ចាស់មានព្រះបន្ទូលថា៖ «ចូរយកអ៊ីសាកកូនអ្នកមក គឺកូនតែមួយដ៏ជាទីស្រឡាញ់របស់អ្នក ហើយទៅស្រុកម៉ូរីយ៉ាទៅ នៅទីនោះ ចូរយកវាធ្វើយញ្ញបូជានៅលើភ្នំដែលយើងនឹងបង្ហាញប្រាប់អ្នក»។ ពេលលោកអប្រាហាំ និងអ៊ីសាកមកដល់កន្លែងដែលព្រះជាម្ចាស់បានបង្ហាញប្រាប់ហើយ លោកអប្រាហាំលូកដៃទៅយកកាំបិតបម្រុងនឹងសម្លាប់កូនបូជាថ្វាយព្រះអម្ចាស់។ ពេលនោះ ស្រាប់តែទេវទូតរបស់ព្រះអម្ចាស់ហៅលោកពីលើមេឃមកថា៖ «អប្រាហាំ! អប្រាហាំ!»។ លោកអប្រាហាំឆ្លើយថា៖​ «ក្រាប​ទូល!»។ ទេវទូតពោលទៀតថា៖ «កុំប្រហារជីវិតកូនឡើយ កុំធ្វើអ្វីវាឱ្យសោះ ដ្បិតឥឡូវនេះយើងដឹងថា អ្នកពិតជាគោរពកោតខ្លាចព្រះជាម្ចាស់មែន គឺអ្នកមិនរួញរានឹងយកកូនតែមួយរបស់អ្នកមកថ្វាយយើងឡើយ»។ លោកអប្រាហាំងើបមុខឡើង ឃើញពពែឈ្មោលមួយជាប់ស្នែងនៅគុម្ពោតឈើក្បែរនោះ។ លោកក៏ទៅចាប់ពពែនោះមកធ្វើយញ្ញបូជាជំនួសកូនប្រុសគាត់។ ទេវទូតរបស់ព្រះអម្ចាស់ ហៅលោកអប្រាហាំពីលើមេឃម្តងទៀតថា៖ «ព្រះអម្ចាស់មានព្រះបន្ទូលថា ដោយអ្នកបានធ្វើដូច្នេះ គឺអ្នកមិនរួញរានឹងយកកូនតែ​មួយរបស់អ្នកមកថ្វាយយើង យើងសូមសន្យាយ៉ាងម៉ឺងម៉ាត់ថា ដូចយើងពិតជាព្រះអម្ចាស់យ៉ាងណា យើងក៏ពិតជានឹងឱ្យពរអ្នក ហើយនឹងធ្វើឱ្យពូជពង្សអ្នកបានកើនចំនួនច្រើនឡើងៗ ដូចចំនួនផ្កាយនៅលើមេឃ និងដូចគ្រាប់ខ្សាច់នៅឆ្នេរសមុទ្រយ៉ាងនោះដែរ។ ពូជពង្សអ្នកនឹងគ្រប់គ្រងលើពួកមារសត្រូវ។ ព្រោះអ្នកបានស្តាប់បង្គាប់យើង ប្រជាជាតិទាំងប៉ុន្មាននៅលើផែនដីនឹងឱ្យពរគ្នាទៅវិញទៅមក ដោយយកឈ្មោះពូជពង្សរបស់អ្នក»។

ទំនុកតម្កើងលេខ ១១៦ (១១៤-១១៥), ១០.១៥-១៩ បទព្រហ្មគីតិ

អត្ថបទទី ២៖ សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងរ៉ូម រម ៨,៣១-៣៤

បងប្អូនជាទីស្រឡាញ់!
ប្រសិនបើព្រះជាម្ចាស់កាន់ខាងយើងហើយ តើនរណាអាចនឹងចោទប្រកាន់យើងបាន?។ ព្រះអង្គពុំបានទុកព្រះបុត្រារបស់ព្រះអង្គផ្ទាល់ទេ គឺព្រះអង្គបានបញ្ជូនព្រះបុត្រានោះមកសម្រាប់យើងទាំងអស់គ្នា បើដូច្នេះ ព្រះអង្គមុខជាប្រណីសន្តោស ប្រទានអ្វីៗទាំងអស់មកយើង រួមជាមួយព្រះបុត្រានោះដែរ។ តើនរណាអាចចោទប្រកាន់អស់អ្នកដែលព្រះជាម្ចាស់បានជ្រើសរើស បើព្រះអង្គប្រោសគេឱ្យបានសុចរិតហើយនោះ? តើនរណាអាចដាក់ទោសគេបាន បើព្រះគ្រីស្តយេស៊ូបានសោយទិវង្គតហើយ ជាពិសេស ទ្រង់មានព្រះជន្មរស់ឡើងវិញគង់នៅខាងស្តាំព្រះបិតា និងទូលអង្វរឱ្យយើងដូច្នេះ?

ពិធីអបអរសាទរព្រះគម្ពីរដំណឹងល្អតាម មថ ១៧,៥

សូមថ្លែងព្រះគម្ពីរដំណឹងល្អតាមសន្តម៉ាកុស មក ៩,២-១០

ព្រះយេស៊ូនាំលោកសិលា លោកយ៉ាកុប និងលោកយ៉ូហានឡើងទៅលើភ្នំ គឺព្រះអង្គនាំតែលោកទាំងបីទៅដាច់ឡែកពីគេ។ ពេលនោះ ព្រះអង្គប្រែជាមានទ្រង់ទ្រាយប្លែកពីមុន នៅមុខសាវ័កទាំងបីនាក់ គឺព្រះពស្ត្ររបស់ព្រះអង្គត្រឡប់ជាមានពណ៌សភ្លឺត្រចះត្រចង់ ដែលគ្មានមនុស្សណានៅលើផែនដីអាចធ្វើឱ្យសយ៉ាងនេះបានឡើយ។ ពេលនោះ សាវ័កទាំងបីនាក់ឃើញព្យាការីអេលី និងលោកម៉ូសេសន្ទនាជាមួយព្រះយេស៊ូ។ លោកសិលាទូលព្រះអង្គថា៖ «ព្រះគ្រូ! យើងខ្ញុំនៅទីនេះប្រសើរណាស់ យើងខ្ញុំនឹងសង់ពន្លាបី គឺមួយសម្រាប់ព្រះគ្រូ មួយសម្រាប់លោកម៉ូសេ និងមួយទៀតសម្រាប់លោកអេលី»។ លោកសិលាមានប្រសាសន៍ដូច្នេះ មកពីលោកពុំដឹងថា ចង់និយាយអំពីអ្វីឡើយ ដ្បិតសាវ័កទាំងបីភ័យខ្លាចយ៉ាងខ្លាំង។ ពេលនោះ ស្រាប់តែមានពពកមកគ្របបាំងគេទាំងអស់គ្នា មានព្រះសូរសៀងបន្លឺពីក្នុងពពកមកថា៖ «អ្នកនេះជាបុត្រដ៏ជាទីស្រឡាញ់របស់យើង ចូរស្តាប់ព្រះអង្គចុះ!»។ រំពេចនោះ ក្រុមសាវ័កក្រឡេកមើលជុំវិញខ្លួនពុំឃើញនរណាទៀតឡើយ ឃើញតែព្រះយេស៊ូមួយព្រះអង្គប៉ុណ្ណោះដែលគង់ជាមួយគេ។ ពេលព្រះយេស៊ូយាងចុះពីលើភ្នំជាមួយសាវ័កទាំងបី ទ្រង់ហាមប្រាមគេមិនឱ្យនិយាយអំពីហេតុការណ៍ដែលខ្លួនបានឃើញប្រាប់នរណាឡើយ រហូតដល់បុត្រមនុស្សទទួលជីវិតថ្មី អ្នកទាំងបីធ្វើតាមព្រះបន្ទូលរបស់ព្រះអង្គ តែគេសាកសួរគ្នាថា៖ «តើពាក្យ “ទទួលជីវិតថ្មី” មានន័យដូចម្តេច?»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! កាលពីដើមលោកអប្រាហាំបានយកកូនដ៏ជាទីស្រឡាញ់មកថ្វាយព្រះអង្គ។ យើងខ្ញុំសូមយកកាយ វាចា ចិត្ត រួមជាមួយនំ និងស្រានេះមកថ្វាយ។ សូមទ្រង់ព្រះមេត្តាទទួលដោយអនុគ្រោះ រួមជាមួយសក្ការបូជារបស់ព្រះយេស៊ូគ្រីស្ត ដែល មានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ធម៌លើកតម្កើង

បពិត្រព្រះអម្ចាស់ជាព្រះបិតា! យើងខ្ញុំសូមលើកតម្កើងសិរីរុងរឿងរបស់ព្រះអង្គ! សូមអរព្រះគុណព្រះអង្គ ដោយរួមជាមួយព្រះបុត្រាដ៏ជាទីស្រឡាញ់របស់ព្រះអង្គ។ គឺព្រះបុត្រាហ្នឹងហើយ ដែលបញ្ចេញរស្មីពណ្ណរាយនៅលើភ្នំ ទ្រង់បង្ហាញសិរីរុងរឿងដែលទ្រង់នឹងបានទទួល ក្រោយពីបានសោយទិវង្គតយ៉ាងសែនអាម៉ាស់ ឱ្យសាវ័កឃើញជាមុន។ ទ្រង់ប្រព្រឹត្តដូច្នេះ ដើម្បីបំភ្លឺយើងខ្ញុំឱ្យជឿថា ទុក្ខលំបាករបស់យើងខ្ញុំ មុខតែនឹងប្រែទៅជាអំណរសប្បាយដ៏ពិតប្រាកដពុំខាន។ អាស្រ័យហេតុនេះហើយ បានជាយើងខ្ញុំសូមលើកតម្កើងសិរីរុងរឿងរបស់ព្រះអង្គ ដោយប្រកាសថា៖ “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!“។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហប្ញទ័យឱ្យយើងខ្ញុំស្គាល់គម្រោងការដ៏អស្ចារ្យនៃព្រះរាជ្យព្រះអង្គ! ព្រះអង្គក៏បានប្រោសប្រទានព្រះកាយ និងព្រះលោហិតនៃព្រះបុត្រាដ៏ជាទីស្រឡាញ់របស់ព្រះអង្គ ឱ្យយើងខ្ញុំចូលរួមជាមួយព្រះអង្គ។ សូមទ្រង់ព្រះ មេត្តាបំភ្លឺចិត្តគំនិតយើងខ្ញុំ ឱ្យទទួលស្គាល់ឋានៈរបស់ខ្លួនជាបុត្រធីតារបស់ព្រះអង្គ និងរស់នៅឱ្យបានសមរម្យតាមឋានៈនោះផង។