ថ្ងៃព្រហស្បតិ៍ អាទិត្យទី៣៣
រដូវធម្មតា «ឆ្នាំសេស»
ពណ៌បៃតង
ថ្ងៃព្រហស្បតិ៍ ទី២០ ខែវិច្ឆិការ ឆ្នាំ២០២៥
អត្ថបទទី១៖ សូមថ្លែងព្រះគម្ពីរមរណសាក្សីនៃជនជាតិអ៊ីស្រាអែល ១មបា ២,១៥-២៩
មន្រ្តីដែលព្រះមហាក្សត្រចាត់មក ដើម្បីបង្ខំឱ្យប្រជាជនលះបង់ជំនឿរបស់ខ្លួន មកដល់ក្រុងម៉ូឌីន ដើម្បីថ្វាយយញ្ញបូជា។ ជនជាតិអ៊ីស្រាអែលជាច្រើនចេញទៅជួបលោក តែលោកម៉ាថាធីយ៉ាស និងកូនទាំងប៉ុន្មានរបស់គាត់ ជួបជុំគ្នាដោយឡែកពីគេ។ មន្ត្រីរបស់ព្រះមហាក្សត្រប្រាប់លោកម៉ាថាធីយ៉ាសថា៖ «លោកជាអ្នកដឹកនាំមានឈ្មោះល្បី និងមានអំណាចក្នុងភូមិនេះ ដោយមានកូន និងបងប្អូនជាច្រើនជួយគាំទ្រផង។ សូមលោកអញ្ជើញមកអនុវត្តតាមរាជបញ្ជារបស់ព្រះករុណាមុនគេ ដូចប្រជាជាតិទាំងប៉ុន្មាន និងអ្នកស្រុកយូដា ព្រមទាំងអ្នកដែលនៅសេសសល់ក្នុងក្រុងយេរូសាឡឹម បានធ្វើរួចមកហើយ។ បើធ្វើដូច្នេះ លោក និងកូនរបស់លោកត្រូវរាប់បញ្ចូលក្នុងចំណោមមិត្តសម្លាញ់របស់ព្រះរាជា។ លោក និងកូនរបស់លោក នឹងទទួលមាសប្រាក់ ព្រមទាំងអំណោយជាច្រើនទៀតផង!»។ លោកម៉ាថាធីយ៉ាសបន្លឺសំឡេងយ៉ាងខ្លាំងៗ តបទៅគេថា៖ «ទោះបីប្រជាជាតិទាំងប៉ុន្មាន ដែលនៅក្នុងរាជាណាចក្រទាំងមូល យល់ព្រមធ្វើតាមរាជបញ្ជារបស់ស្ដេច លះបង់សាសនាដូនតារបស់គេរៀងៗខ្លួនចោល ហើយបែរទៅគោរពតាមរាជឱង្ការរបស់ស្ដេចក្ដី ក៏ខ្ញុំ កូនខ្ញុំ និងបងប្អូនខ្ញុំ នៅតែប្រតិបត្តិតាមសម្ពន្ធមេត្រីនៃដូនតារបស់យើងតទៅមុខទៀតជាដរាប។ សូមព្រះជាម្ចាស់អាណិតមេត្តាការពារយើង កុំឱ្យយើងខ្ញុំបោះបង់ចោលធម្មវិន័យ និងបញ្ញាត្តិរបស់ព្រះអង្គឡើយ។ យើងមិនព្រមស្តាប់តាមរាជបញ្ជាទេ យើងមិនព្រមងាកចេញពីសាសនារបស់យើងឡើយ ឱ្យនៅខាងស្ដាំ ឬខាងឆ្វេង គឺយើងមិនព្រមជាដាច់ខាត!»។ កាលលោកមានប្រសាសន៍ដូច្នេះហើយ ជនជាតិយូដាម្នាក់ឡើងទៅថ្វាយយញ្ញបូជា នៅចំពោះមុខប្រជាជនទាំងមូល លើអាសនៈនៅក្រុងម៉ូឌីន តាមរាជបញ្ជា។លោកម៉ាថាធីយ៉ាសឃើញដូច្នេះ ក្តៅក្រហាយញ័រខ្លួនចំប្រប់យ៉ាងខ្លាំង កំហឹងដ៏សុចរិតពុះកញ្ជ្រោលក្នុងខ្លួនលោក។ លោកស្ទុះទៅសម្លាប់អ្នកនោះនៅលើអាសនៈ និងសម្លាប់មន្ត្រីដែលស្ដេចចាត់ឱ្យមកបង្ខំអ្នកស្រុកថ្វាយយញ្ញបូជា រួចលោករំលំអាសនៈនោះចោលទៀតផង។ លោកមានចិត្តស្រឡាញ់ធម្មវិន័យជាខ្លាំង ដូចកាលពីដើម ដែលលោកពីណេហាស់បានប្រព្រឹត្តចំពោះលោកយីមរី ជាកូនលោកសាលូ។ បន្ទាប់លោកម៉ាថាធីយ៉ាសដើរស្រែកយ៉ាងខ្លាំង តាមផ្លូវក្រុងម៉ូឌីនថា៖ «អស់អ្នកដែលមានចិត្តស្រឡាញ់ធម្មវិន័យ និងចង់គោរពតាមសម្ពន្ធមេត្រី សូមអញ្ជើញមកតាមខ្ញុំមក!»។ លោក និងកូនលោកភៀសខ្លួនទៅតំបន់ភ្នំ ដោយទុកទ្រព្យសម្បត្តិចោលនៅក្នុងក្រុង។ ពេលនោះ អ្នកស្រុកជាច្រើនដែលខិតខំធ្វើអំពើសុចរិត និងគោរពតាមធម្មវិន័យ រត់ទៅនៅក្នុងវាលរហោស្ថាន។
ទំនុកតម្កើងលេខ ៥០(៤៩),១-២.៥.៧.១៤-១៥ បទព្រហ្មគីតិ
| ១ | ព្រះអម្ចាស់ជាព្រះ | ប្រសើរណាស់លើសអ្វីៗ | |
| ទ្រង់កោះហៅផែនដី | ខាងលិចក្ដីដល់ខាងកើត | ។ |
| ២ | ព្រះជាម្ចាស់ចែងចាំង | ពីទីក្រុងស៊ីយ៉ូនឆើត | |
| ដែលជាក្រុងល្អស្អាត | ត្រូវតាមខ្នាតឥតមានខ្ចោះ | ។ |
| ៥ | ព្រះអង្គមានព្រះបន្ទូល | ថាប្រមូលកុំខកខាន | |
| គឺអស់អ្នកដែលបាន | ចងសម្ព័ន្ធជាមួយគ្នា | ។ |
| ៧ | ប្រជាជនបវរ | នាំគ្នាមកស្ដាប់ពាក្យពិត | |
| អ៊ីស្រាអែលកុំគិត | យើងនេះពិតជាថ្វាយជាហូរហែ | ។ |
| ១៤ | តង្វាយផងទាំងឡាយ | ដែលអ្នកតែគោរពតាម | |
| គឺពាក្យតម្កើងដែរ | អ្នកត្រូវតែគោរពតាម | ។ |
| ១៥ | នៅពេលមានអាសន្ន | កុំស្លោស្លន់រកយើងភ្លាម | |
| យើងនឹងមិននៅស្ងៀម | យើងមកភ្លាមរំដោះអ្នក | ។ |
ពិធីអបអរសាទរព្រះគម្ពីរដំណឹងល្អតាម ទន ៩៥,៨
អាលេលូយ៉ា! អាលេលូយ៉ា!
នៅថ្ងៃនេះ កុំមានចិត្តរឹងរូសឡើយ! ចូរនាំគ្នាប្រុងត្រចៀកស្ដាប់ព្រះសូរសៀងរបស់ព្រះអម្ចាស់។ អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តលូកា លក ១៩,៤១-៤៤
កាលព្រះយេស៊ូយាងជិតដល់ក្រុងយេរូសាឡឹម ព្រះអង្គទតឃើញទីក្រុង ហើយព្រះអង្គព្រះកន្សែងនឹកអាណិតក្រុងនោះ ទាំងមានព្រះបន្ទូលថា៖ «យេរូសាឡឹមអើយ! គួរឱ្យស្ដាយពេក នៅថ្ងៃនេះ អ្នកពុំបានយល់ហេតុការណ៍ដែលផ្ដល់សេចក្ដីសុខសាន្តមកអ្នកសោះ ដោយអត្ថន័យនៅលាក់កំបាំងនៅឡើយ អ្នកពុំអាចមើលឃើញបានទេ។ នៅពេលខាងមុខ ខ្មាំងសត្រូវនឹងមកបោះទ័ពឡោមព័ទ្ធជុំវិញអ្នក ហើយវាយប្រហារអ្នកពីគ្រប់ទិស គេនឹងកម្ទេចអ្នកចោល ព្រមទាំងសម្លាប់អ្នកក្រុងឱ្យវិនាសបង់ផង។ គេមិនទុកឱ្យដុំថ្ម នៅត្រួតពីលើគ្នាក្នុងក្រុងទៀតឡើយ ដ្បិតអ្នកពុំបានទទួលស្គាល់ពេលកំណត់ដែលព្រះជាម្ចាស់បានយាងមកសង្គ្រោះអ្នកទេ»។
517 Views
Post Views:
531
