ថ្ងៃចន្ទ អាទិត្យទី៣៣
រដូវធម្មតា «ឆ្នាំសេស»
ពណ៌បៃង
ថ្ងៃចន្ទ ទី១៧ ខែវិច្ឆិការ ឆ្នាំ២០២៥
ព្រះនាងអេលីសាបែត (១២០៧-១២៣១) រៀបអភិសេកក្នុងជន្មាយុដប់បួនឆ្នាំ។ ព្រះនាងប្រសូតបានបុត្របីអង្គ រួចធ្លាក់ជាមេម៉ាយក្នុងជន្មាយុម្ភៃព្រះវស្សា ហើយត្រូវគេមើលងាយធ្វើបាបជាទម្ងន់ថែមទៀតផង ព្រះនាងសម្តែងធម៌មេត្តាករុណាចំពោះជនក្រីក្រ ដោយចិត្តស្រឡាញ់យ៉ាងខ្លាំង។ ព្រះនាងចូលទិវង្គតក្នុងជន្មាយុម្ភៃបួនព្រះវស្សា។ ដោយព្រះនាងមានឈ្មោះល្អយ៉ាងអស្ចារ្យបានជាគ្រីស្តបរិស័ទប្រកាសព្រះនាងថា ជាសន្តបុគ្គលតែបួនឆ្នាំក្រោយពីនាងចូលទិវង្គតប៉ុណ្ណោះ។
អត្ថបទទី១៖ សូមថ្លែងព្រះគម្ពីរមរណសាក្សីនៃជនជាតិអ៊ីស្រាអែល ១មបា ១,១០-១៥.៤១.៤៣.៥៤-៥៧.៦២-៦៤
នៅឆ្នាំមួយរយសាមសិបប្រាំពីរនៃសករាជក្រិក ព្រះបាទអន់ទីយ៉ូគូសអេពីផាន ជារាជបុត្ររបស់ព្រះបាទអន់ទីយ៉ូគូស ឡើងសោយរាជ្យ ក្រោយពីបានរួចពីចំណាប់ខ្មាំងនៅក្រុងរ៉ូម។ ព្រះរាជាជាស្ដេចពាលឥតសាសនា។ គ្រានោះ មានមនុស្សខិលខូចជាច្រើនលេចមុខនៅស្រុកអ៊ីស្រាអែល ហើយអូសទាញទឹកចិត្តអ្នកស្រុកជាច្រើន ដោយពោលថា៖ «គ្នាយើង! ចូរនាំគ្នាចងសម្ពន្ធមេត្រីជាមួយប្រជាជាតិទាំងប៉ុន្មាន ដែលរស់នៅជុំវិញយើងទៅ! ដ្បិតតាំងពីយើងមិនព្រមរស់នៅតាមរបៀបរបស់គេ យើងរមែងតែងជួបក្ដីអន្តរាយជាច្រើន»។ អ្នកស្រុកពេញចិត្តនឹងពាក្យទាំងនេះ ហើយមានមនុស្សជាច្រើនប្រញាប់ប្រញាល់ទៅគាល់ព្រះមហាក្សត្រ សុំរាជានុញ្ញាតឱ្យពួកគេកាន់តាមប្រពៃណីប្រជាជាតិទាំងនោះ។ ដូច្នេះ ពួកគេសាងកីឡាដ្ឋាននៅក្រុងយេរូសាឡឹម តាមទំនៀមទម្លាប់របស់ប្រជាជាតិដទៃ។ គេយកស្បែកមកដេរភ្ជិត ដើម្បីកុំឱ្យឃើញស្នាមកាត់ស្បែក។ គេលះបង់សម្ពន្ធមេត្រីដ៏វិសុទ្ធចោល ហើយបែរទៅចូលរួមរស់ជាមួយសាសន៍ដទៃវិញ។ ពួកគេក៏លក់ខ្លួនទៅប្រព្រឹត្តអំពើអាក្រក់ទៀតផង។ ព្រះបាទអន់ទីយ៉ូគូសចេញរាជក្រឹត្យមួយបញ្ជាឱ្យជនជាតិទាំងអស់ដែលរស់នៅក្នុងរាជាណាចក្រទាំងមូល លះបង់ទំនៀមទម្លាប់រៀងៗខ្លួនចោល ដើម្បីចូលរួមគ្នាធ្វើជាប្រជារាស្ត្រតែមួយ។ប្រជាជាតិទាំងប៉ុន្មានអនុវត្តតាមរាជក្រឹត្យនេះ។ ជនជាតិអ៊ីស្រាអែលជាច្រើនក៏សុខចិត្តកាន់តាមសាសនារបស់ព្រះមហាក្សត្រដែរ គឺគេនាំគ្នាធ្វើយញ្ញបូជាថ្វាយព្រះក្លែងក្លាយ ព្រមទាំងលែងគោរពថ្ងៃសប្ប័ទទៀត។ នៅថ្ងៃទីដប់ប្រាំ ខែគីសឡេ ដែលត្រូវជាខែមិគសិរ ឆ្នាំមួយរយសែសិបប្រាំ ព្រះបាទអន់ទីយ៉ូគូសធ្វើរូបបដិមាដ៏គួរស្អប់ខ្ពើមដាក់នៅលើអាសនៈ ក្នុងព្រះវិហារក្រុងយេរូសាឡឹម ហើយអ្នករាជការក៏សង់អាសនៈតាមក្រុងនានាដែលនៅជុំវិញដែរ។ គេដុតគ្រឿងក្រអូបនៅមាត់ទ្វារផ្ទះ និងតាមកន្លែងសាធារណៈ។ បើគេរកឃើញគម្ពីរវិន័យ គេហែកដុតកម្ទេចចោល។ ប្រសិនបើគេឃើញគម្ពីរសម្ពន្ធមេត្រីក្នុងផ្ទះនរណាម្នាក់ ឬប្រសិនបើអ្នកណាម្នាក់ប្រតិបត្តិតាមធម្មវិន័យនោះ គេនឹងកាត់ទោសប្រហារជីវិតអ្នកនោះ តាមរាជក្រឹត្យរបស់ព្រះមហាក្សត្រ។ ប៉ុន្តែ ទោះបីជាយ៉ាងណាក្ដី ក៏ជនជាតិអ៊ីស្រាអែលជាច្រើនមានចិត្តរឹងប៉ឹង ក្លាហានអង់អាច មិនព្រមបរិភោគម្ហូបអាហារមិនបរិសុទ្ធឡើយ។ អ្នកទាំងនោះស៊ូស្លាប់ ជាជាងបរិភោគអាហារដែលមិនបរិសុទ្ធ ហើយទោះជាត្រូវទទួលទោសដល់ស្លាប់ ក៏គេមិនព្រមបង្អាប់បង្អោនសម្ពន្ធមេត្រីដ៏វិសុទ្ធដែរ។ នៅគ្រានោះ ជនជាតិអ៊ីស្រាអែលជួបនូវគ្រោះមហន្តរាយយ៉ាងខ្លាំង។
ទំនុកតម្កើងលេខ ១១៩(១១៨),៥៣.៦១.១៣៤.១៥០.១៥៥.១៥៨ បទពាក្យ៧
| ៥៣ | ពេលពួកមនុស្ស | ពាលមិនស្គាល់ខុស | ឱ្យខ្ញុំខ្វល់ខ្វាយ |
| ចាក់រុកឆ្កិះឆ្កៀល | ឱ្យក្ដៅក្រហាយ | គេចង់កម្ចាយ |
| | វិន័យព្រះអង្គ | ។ |
| ដូរទៅបទពាក្យប្រាំពីរ | | |
| ៦១ | ពួកជនអាក្រក់ធ្វើឱ្យខ្ញុំ | ជាប់អន្ទាក់រុំរបស់វា | |
| តែទូលបង្គំខំពុះពារ | គោរពមាគ៌ាច្បាប់ព្រះអង្គ | ។ |
| ១៣៤ | សូមជួយរំដោះខ្ញុំឱ្យរួច | ពីអ្នកខិលខូចខ្ញុំបានស្បើយ | |
| អ្នកដែលជិះជាន់ឈប់មានហើយ | ខ្ញុំមិនកន្តើយធ្វើតាមច្បាប់ | ។ |
| ១៥០ | ពួកអ្នកឃ្លាតចាកពីវិន័យ | ធម៌ព្រះម្ចាស់ថ្លៃគេមានល្បិច | |
| ខិតចូលមកជិតខ្ញុំជានិច្ច | ចិត្តគេគួចកិច្ចគុំកម្លៅ | ។ |
| ១៥៥ | ព្រះអង្គទ្រង់មិនសង្គ្រោះអ្នក | ដែលមិនជឿជាក់ចិត្តសាមាន្យ | |
| មិនកាន់វិន័យល្អថ្កើងថ្កាន | គេធ្វើមិនបានតាមបញ្ញត្តិ | ។ |
| ១៥៨ | ពេលដែលខ្ញុំឃើញជនទុរយស | ខ្ញុំសែនទើសទាស់ពេញក្នុងចិត្ត | |
| ដ្បិតគេមិនធ្វើតាមបែបបទ | បន្ទូលវិសុទ្ធព្រះអង្គទេ | ។ |
ពិធីអបអរសាទរព្រះគម្ពីរដំណឹងល្អតាម យហ ៨,១២
អាលេលូយ៉ា! អាលេលូយ៉ា!
បពិត្រព្រះយេស៊ូគ្រីស្ដ! ព្រះអង្គពិតជាពន្លឺបំភ្លឺពិភពលោកមែន! អ្នកណាទៅតាមព្រះអង្គ អ្នកនោះមានពន្លឺដែលនាំគេទៅកាន់ជីវិត។ អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តលូកា លក ១៨,៣៥-៤៣
កាលព្រះយេស៊ូយាងមកជិតដល់ក្រុងយេរីខូ មានមនុស្សខ្វាក់ម្នាក់អង្គុយសុំទាននៅតាមផ្លូវ។ ពេលគាត់ឮស្នូរបណ្ដាជនដើរតាមនោះ គាត់សួរគេថា មានរឿងអ្វី គេប្រាប់គាត់ថា ព្រះយេស៊ូជាអ្នកភូមិណាសារ៉ែតយាងមកតាមផ្លូវនោះ។ មនុស្សខ្វាក់ក៏ស្រែកឡើងថា៖ «ឱព្រះយេស៊ូជាព្រះរាជវង្សព្រះបាទដាវីឌអើយ! សូមអាណិតមេត្តាទូលបង្គំផង!»។ ពួកអ្នកដែលដើរខាងមុខបានឃាត់គាត់ឱ្យនៅស្ងៀម ប៉ុន្តែ គាត់ស្រែករឹតតែខ្លាំងឡើងៗថា៖ «ឱព្រះរាជវង្សព្រះបាទដាវីឌអើយ សូមអាណិតមេត្តាទូលបង្គំផង!»។ ព្រះយេស៊ូក៏ឈប់ ហើយបញ្ជាគេឱ្យនាំគាត់ចូលមកជិតព្រះអង្គ។ លុះមនុស្សខ្វាក់ដើរចូលមក ព្រះយេស៊ូមានព្រះបន្ទូលសួរគាត់ថា៖ «តើអ្នកចង់ឱ្យខ្ញុំធ្វើអ្វី?»។ គាត់ទូលព្រះអង្គថា៖ «បពិត្រព្រះអម្ចាស់! សូមព្រះអង្គប្រោសឱ្យភ្នែកទូលបង្គំបានភ្លឺឡើងវិញផង»។ ព្រះយេស៊ូមានព្រះបន្ទូលទៅគាត់ថា៖ «ជំនឿរបស់អ្នកបានសង្គ្រោះអ្នកហើយ ចូរឱ្យភ្នែកអ្នកបានភ្លឺឡើងវិញចុះ»។ រំពេចនោះ គាត់មើលឃើញវិញភ្លាម ហើយគាត់ក៏តាមព្រះយេស៊ូទាំងលើកតម្កើងសិរីរុងរឿងរបស់ព្រះជាម្ចាស់។ ប្រជាជនទាំងមូលបានឃើញហេតុការណ៍នោះ គេសរសើរតម្កើងព្រះជាម្ចាស់ទាំងអស់គ្នា។
580 Views
Post Views:
585
