ថ្ងៃសុក្រ-អាទិត្យទី៣១-រដូវធម្មតា «ឆ្នាំសេស»

បងប្អូនជាទីស្រឡាញ់!
ខ្ញុំជឿជាក់ថា បង‌ប្អូនមានចិត្តសប្បុរសណាស់ ហើយក៏មានចំណេះជ្រៅ‌ជ្រះ និងមានសមត្ថ‌ភាពអាចទូន្មានគ្នាទៅវិញទៅមកបានថែមទៀតផង។ ប៉ុន្តែ នៅត្រង់ចំណុចខ្លះ ខ្ញុំសរសេរមករំឭកដាស់‌តឿនបង‌ប្អូនយ៉ាងធ្ងន់ៗបន្ដិច ដោយសំអាងលើមុខ‌ងារ ដែលព្រះ‌ជាម្ចាស់ប្រោសប្រទានមកខ្ញុំឱ្យបម្រើព្រះ‌គ្រីស្ដ‌យេស៊ូសម្រាប់សាសន៍ដទៃ។ ខ្ញុំប្រកាសដំណឹង‌ល្អរបស់ព្រះ‌ជាម្ចាស់ ជាមុខ‌ងារមួយដ៏ពិសិដ្ឋ ដើម្បីនាំសាសន៍ដទៃមកថ្វាយខ្លួនទុកជាតង្វាយដែលគាប់ព្រះ‌ហឫទ័យព្រះ‌អង្គ និងជាតង្វាយដែលព្រះ‌វិញ្ញាណដ៏‌វិសុទ្ធប្រោសឱ្យវិសុទ្ធ។ ដោយហេតុនេះ ខ្ញុំបានខ្ពស់មុខដោយរួមជាមួយព្រះ‌គ្រីស្ដ‌យេស៊ូ ចំពោះកិច្ច‌ការដែលខ្ញុំបានធ្វើថ្វាយព្រះ‌ជាម្ចាស់ ដ្បិតខ្ញុំមិនហ៊ានលើកយកអ្វីផ្សេងមកនិយាយក្រៅពីការដែលព្រះ‌គ្រីស្ដបានធ្វើតាម‌រយៈខ្ញុំ ទោះបីតាមពាក្យសម្ដីក្តី ឬតាមកិច្ច‌ការក្តី ដើម្បីនាំសាសន៍ដទៃឱ្យមកស្ដាប់បង្គាប់ព្រះ‌ជាម្ចាស់នោះឡើយ។ ព្រះ‌អង្គសម្ដែងឫទ្ធា‌នុភាពនៃទីសម្គាល់ និងឫទ្ធិ‌បាដិ‌ហារិយ៍ ព្រះ‌អង្គសម្ដែងឫទ្ធា‌នុភាពរបស់ព្រះ‌វិញ្ញាណ។ ដូច្នេះ ខ្ញុំបានផ្សព្វ‌ផ្សាយដំណឹង‌ល្អរបស់ព្រះ‌គ្រីស្ដសព្វគ្រប់នៅគ្រប់ទីកន្លែង ចាប់តាំងពីក្រុងយេរូ‌សាឡឹម រហូតទៅដល់តំបន់អ៊ីល្លីរី។ ប៉ុន្តែ ខ្ញុំបានតាំងចិត្តប្រកាសដំណឹង‌ល្អតែនៅកន្លែងណាដែលគេមិនទាន់ឮព្រះ‌នាមព្រះ‌គ្រីស្ដនៅឡើយ ដើម្បីចៀស‌វាងសង់ពីលើគ្រឹះដែលអ្នកផ្សេងបានចាក់រួចមកហើយ គឺឱ្យបានស្របតាមសេចក្ដីដែលមានចែងទុកមកថាៈ «អស់អ្នកដែលមិនទាន់បានទទួលដំណឹងអំពីព្រះ‌អង្គ មុខជាឃើញ ហើយអស់អ្នកដែលមិនទាន់បានឮមុខជាបានយល់»។

ទំនុកតម្កើងលេខ ៩៨(៩៧),១-៤ បទកាកគតិ

១	ចូរច្រៀងបទថ្មី	ថ្វាយព្រះម្ចាស់ថ្លៃ	កុំភ្លេចឡើយណា
	ដ្បិតទ្រង់ប្រព្រឹត្ត	សព្វកិច្ចអស្ចារ្យ	ដោយប្ញទិ្ធចេស្ដា
		យកជ័យជម្នះ	។
២	ព្រះម្ចាស់បង្ហាញ	ប្រជាឱ្យឃើញ	ពីការសង្គ្រោះ
	ព្រះអង្គសម្ដែង	ឱ្យគេទាំងអស់	ឃើញសុចរិតស្មោះ
		របស់ព្រះអង្គ	។
៣	ព្រះអង្គនៅតែ	សម្ដែងឥតប្រែ	ករុណាត្រចង់
	ព្រះទ័យស្មោះស្ម័គ្រ	អ៊ីស្រាអែលផង	សុចរិតឥតហ្មង
		ចងចាំទាំងអស់	។
	មនុស្សម្នាមូលមីរ	រស់នៅគ្រប់ទី	ឆ្ងាយទាំងស្រីប្រុស
	នៃភពផែនដី	ឃើញការសង្គ្រោះ	ព្រះម្ចាស់របស់
		យើងគ្រប់ៗគ្នា	។
៤	ជនទាំងប្រុសស្រី	នៅលើផែនដី	រៀបចំអង្គារ
	អបអរសាទរ	ថ្វាយព្រះនាមា	ស្រែកហ៊ោរខ្ញៀវខ្ញា
		ដោយតូរ្យតន្រី្ដ	។

ពិធីអបអរសាទរព្រះគម្ពីរដំណឹងល្អតាម ១ យហ ២,៥

អាលេលូយ៉ា! អាលេលូយ៉ា!
អ្នកដែលកាន់តាមព្រះបន្ទូលរបស់ព្រះគ្រីស្ដ សេចក្ដីស្រឡាញ់របស់ព្រះជាម្ចាស់ពិតជាស្ថិតនៅក្នុងអ្នកនោះគ្រប់លក្ខណៈមែន។អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១៦,១-៨

ព្រះ‌យេស៊ូមានព្រះ‌បន្ទូលទៅកាន់សាវ័កថា៖ «មានសេដ្ឋីមួយរូបបានប្រគល់មុខ‌ងារឱ្យអ្នកបម្រើម្នាក់មើលខុសត្រូវលើទ្រព្យ‌សម្បត្តិរបស់លោក។ មានគេមកជម្រាបលោកថា អ្នកនោះបានចាយវាយទ្រព្យ‌សម្បត្តិលោកយ៉ាងខ្ជះ‌ខ្ជាយ។ សេដ្ឋីក៏ហៅអ្នកមើលខុសត្រូវមកប្រាប់ថា “ចូរគិតបញ្ជីយកមកឱ្យខ្ញុំ អ្នកមិនអាចមើលខុសត្រូវលើទ្រព្យ‌សម្បត្តិខ្ញុំតទៅទៀតឡើយ ព្រោះសេចក្ដីដែលខ្ញុំបានឮគេនិយាយអំពីអ្នកមិនល្អសោះ”។ អ្នកបម្រើនោះរិះ‌គិតក្នុងចិត្តថា “ចៅហ្វាយលែងឱ្យអញទទួលខុសត្រូវលើទ្រព្យ‌សម្បត្តិលោកទៀតហើយ។ តើអញគិតទៅធ្វើការអ្វីវិញហ្ន៎? អញគ្មានកម្លាំងនឹងកាប់គាស់ដីទេ បើដើរសុំទានខ្មាសគេ។ អូ៎! នឹកឃើញហើយ គួរធ្វើយ៉ាងនេះ ដើម្បីអ្នកស្រុកទទួលអញឱ្យស្នាក់នៅផ្ទះគេ នៅពេលអញឈប់កាន់កាប់ការ‌ងារនេះ”។ គាត់ក៏ហៅកូនបំណុលរបស់ចៅហ្វាយឱ្យចូលមកម្នាក់ម្ដងៗ គាត់សួរអ្នកទីមួយថា “តើអ្នកជំពាក់ចៅហ្វាយខ្ញុំប៉ុន្មាន?”។ កូនបំណុលនោះឆ្លើយថា “ប្រេងមួយ‌រយប៉ោត”។ អ្នកបម្រើប្រាប់ថា “នេះនែ៎! យកបញ្ជីរបស់អ្នកហើយអង្គុយចុះ សរសេរយ៉ាងប្រញាប់ដាក់ថា ជំពាក់ហា‌សិបប៉ោត”។ បន្ទាប់មក គាត់សួរម្នាក់ទៀតថា “តើអ្នកជំពាក់ចៅហ្វាយខ្ញុំប៉ុន្មានដែរ?”។ កូនបំណុលនោះឆ្លើយថា “ស្រូវប្រាំ‌រយថាំង”។ អ្នកបម្រើប្រាប់ថា “នែ៎! យកបញ្ជីរបស់អ្នក ហើយសរសេរដាក់ថា ជំពាក់បួន‌រយថាំង”។ ម្ចាស់ក៏សរសើរអ្នកបម្រើដែលប៉ិន‌ប្រសប់បោកបញ្ឆោត។ មនុស្សក្នុងលោកនេះតែង‌តែប៉ិន‌ប្រសប់រកស៊ីជាមួយគ្នា ជាងអស់អ្នកដែលស្គាល់ពន្លឺរបស់ព្រះ‌ជាម្ចាស់ទៅទៀត»។

304 Views

Post Views: 305

ថ្ងៃសុក្រ អាទិត្យទី៣១រដូវធម្មតា «ឆ្នាំសេស»ពណ៌បៃតង

អត្ថបទទី១៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្តបរិស័ទក្រុងរ៉ូម រម ១៥,១៤-២១

ទំនុកតម្កើងលេខ ៩៨(៩៧),១-៤ បទកាកគតិ

ពិធីអបអរសាទរព្រះគម្ពីរដំណឹងល្អតាម ១ យហ ២,៥

សូមថ្លែងព្រះគម្ពីរដំណឹងល្អតាមសន្តលូកា លក ១៦,១-៨

ថ្ងៃសុក្រ អាទិត្យទី៣១
រដូវធម្មតា «ឆ្នាំសេស»
ពណ៌បៃតង