ថ្ងៃព្រហស្បតិ៍ ទី២៥ ខែកញ្ញា ឆ្នាំ២០២៥

អត្ថបទទី១៖ សូមថ្លែងព្រះគម្ពីរព្យាការីហាកាយ ហក ១,១-៨

នៅឆ្នាំទីពីរ នៃរជ្ជកាលព្រះចៅដារីយូស នៅថ្ងៃទីមួយ ក្នុងខែទីប្រាំមួយ ព្រះអម្ចាស់​មានព្រះបន្ទូលដោយសារព្យាការីហាកាយ មកកាន់លោកសូរ៉ូបាបិល ជាកូនរបស់លោក​សាលធាល និងជាទេសាភិបាលនៃអាណាខេត្តយូដា ព្រងទាំងលោកមហាបូជាចារ្យ​យ៉ូស៊ូអា ដូចតទៅនេះ៖ ព្រះអម្ចាស់នៃពិភពទាំងមូលមានព្រះបន្ទូលថា៖ «ប្រជាជននេះពោលថា “មិនទាន់​ដល់ពេលសង់ព្រះដំណាក់របស់ព្រះអម្ចាស់ឡើងវិញទេ”។ ពេលនោះ ព្រះអម្ចាស់មាន​ព្រះបន្ទូលមកពួកគេដោយសារព្យាការីហាកាយដូចតទៅនេះ ពេលដំណាក់របស់យើង​បាក់បែកនៅឡើយ តើអ្នករាល់គ្នាគួររស់នៅក្នុងផ្ទះដែលតាក់តែងឡើងដោយឈើដ៏មានតម្លៃដូច្នេះឬ?។ ឥឡូវនេះ ព្រះអម្ចាស់នៃពិភពទាំងមូលមានព្រះបន្ទូលថា «ចូររិះ​គិតអំពីសភាពការណ៍របស់អ្នករាល់គ្នា! អ្នករាល់គ្នាបានសាបព្រោះច្រើន តែច្រូតបាន​ផលតិច អ្នករាល់គ្នាបរិភោគ តែមិនចេះឆ្អែត អ្នករាល់គ្នាផឹកស្រា តែមិនចេះស្កប់ អ្នក​រាល់គ្នាស្លៀកពាក់ តែមិនកក់ក្ដៅ អ្នកធើ្វការទទួលប្រាក់ឈ្នួល តែដូចជាទុកនៅក្នុងថង់​កណ្ដាច»។ ព្រះអម្ចាស់នៃពិភពទាំងមូលមានព្រះបន្ទូលថា៖ «ចូររិះគិតអំពីសភាពការណ៍របស់អ្នករាល់គ្នា! ចូរនាំគ្នាឡើងទៅលើភ្នំ យកឈើមកសង់ដំណាក់របស់យើង។ យើងពេញចិត្តនឹងដំណាក់នេះ ហើយយើងនឹងបង្ហាញសិរីរុងរឿងរបស់យើង»។ ​នេះជាព្រះបន្ទូលរបស់ព្រះអម្ចាស់។

ទំនុកតម្កើងលេខ ១៤៩ ,១-៦.៩ បទកាកគតិ

ពិធីអបអរសាទរព្រះគម្ពីរដំណឹងល្អតាម ទន ២,១០-១១

អាលេលូយ៉ា! អាលេលូយ៉ា!
សេ្ដចទាំងឡាយអើយ! ឥឡូវនេះចូររិះគិតពិចារណាឡើង! ចូរបម្រើព្រះអម្ចាស់ដោយគោរពកោតខ្លាច! ចូរថ្វាយបង្គំព្រះអង្គទាំងញាប់ញ័រ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ៩,៧-៩

ព្រះបាទហេរ៉ូដ ជាស្ដេចអនុរាជ ជ្រាបហេតុការណ៍ទាំងអស់ដែលកើតមានឡើង។ ទ្រង់មិនដឹងជាត្រូវគិតយ៉ាងណា ព្រោះមានអ្នកខ្លះនិយាយថា៖ «លោកយ៉ូហានបាទីស្ដ​រស់ឡើងវិញហើយ»។ អ្នកខ្លះទៀតនិយាយថា៖ «មានព្យាការីអេលីបង្ហាញខ្លួនឱ្យ​គេឃើញ»។ ហើយអ្នកខ្លះទៀតនិយាយថា៖ មានព្យាការីមួយរូបពីសម័យបុរាណ​រស់ឡើងវិញ»។ រីឯព្រះបាទហេរ៉ូដមានរាជឱង្ការថា៖ «យើងបាន​ឱ្យគេកាត់កយ៉ូហាន​ស្លាប់បាត់ទៅហើយ ចុះបុរសដែលគេនិយាយថា បានធើ្វការអស្ចារ្យទាំងនោះជា​នរណា?»។ ព្រះបាទហេរ៉ូដមានបំណងចង់ជួបព្រះយេស៊ូ។