ថ្ងៃសុក្រ ទី១២ ខែកញ្ញា ឆ្នាំ២០២៥

អត្ថបទទី១៖ សូមថ្លែងលិខិតទី ១ របស់គ្រីស្ដទូតប៉ូលផ្ញើជូនលោកធីម៉ូថេ ១ ធម ១,១-២.១២-១៤

ខ្ញុំប៉ូល ជាទូតរបស់ព្រះគ្រីស្ដយេស៊ូ! តាមបញ្ជារបស់ព្រះជាម្ចាស់ជាព្រះសង្គ្រោះ​នៃយើង និងតាមបញ្ជារបស់ព្រះគ្រីស្ដយេស៊ូ ជាទីសង្ឃឹមនៃយើង មកដល់ធីម៉ូថេ ជាកូន​ដ៏ពិតប្រាកដរបស់ខ្ញុំក្នុងជំនឿ។ សូមព្រះជាម្ចាស់ជាព្រះបិតា និងព្រះគ្រីស្ដយេស៊ូជាព្រះ​អម្ចាស់នៃយើង ប្រណីសន្ដោស មេត្តាករុណា និងប្រទានសេចក្ដីសុខសាន្ដដល់បងប្អូន។ ខ្ញុំសូមអរព្រះគុណព្រះគ្រីស្ដយេស៊ូជាអម្ចាស់នៃយើង ដែលបានប្រទានកម្លាំងមកខ្ញុំ! ព្រោះព្រះអង្គបានរាប់ខ្ញុំជាមនុស្សគួរឱ្យទុកចិត្ត ហើយតែងតាំងខ្ញុំឱ្យបម្រើព្រះអង្គ។ ទោះបីពីដើមខ្ញុំធ្លាប់ប្រមាថ ធើ្វទុក្ខបុកម្នេញ និងប្រព្រឹត្តអំពើឃោរឃៅក៏ដោយ ​ក៏ព្រះអង្គមានព្រះហប្ញទ័យមេត្តាករុណាដល់ខ្ញុំដែរ ព្រោះកាលណោះ ខ្ញុំគ្មានជំនឿ​ ហើយ​មិនយល់កិច្ចការដែលខ្ញុំប្រព្រឹត្ត។ ប៉ុន្ដែ ព្រះអម្ចាស់នៃយើងប្រណីសន្ដោសខ្ញុំ​ច្រើនពន់ប្រមាណ ទ្រង់ប្រោសប្រទានឱ្យខ្ញុំមានជំនឿ និងមានសេចក្ដីស្រឡាញ់ ដោយ​រួមក្នុងអង្គព្រះគ្រីស្ដយេស៊ូ។

ទំនុកតម្កើងលេខ ១៦ (១៥) ,១-២.៥.៧-៨-១១ បទពាក្យ ៧

ពិធីអបអរសាទរព្រះគម្ពីរដំណឹងល្អតាម យហ ១៧,១៧

អាលេលូយ៉ា! អាលេលូយ៉ា!
បពិត្រព្រះអម្ចាស់! ព្រះបន្ទូលព្រះអង្គជាសេចក្ដីពិត។ សូមប្រោសយើងខ្ញុំឱ្យបានបរិសុទ្ធដោយសារសេចក្ដីពិតនោះផង។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ៦,៣៩-៤២

ព្រះយេស៊ូមានព្រះបន្ទូលជាពាក្យប្រស្នាទៅកាន់ក្រុមសាវ័កថា៖ «មនុស្សខ្វាក់ពុំអាច​​នាំមនុស្សខ្វាក់ម្នាក់ទៀតបានឡើយ។ បើធើ្វដូច្នោះ មុខជាធ្លាក់រណ្ដៅទាំងពីរនាក់មិនខាន។​ ពុំដែលមានសិស្សណាធំជាងគ្រូឡើយ ប៉ុន្ដែ សិស្សដែលបានទទួលចំណេះសព្វ​គ្រប់ អាចស្មើនឹងគ្រូបាន។ ហេតុអ្វីបានជាអ្នកមើលឃើញល្អងធូលីនៅក្នុងភ្នែករបស់​បងប្អូនអ្នក តែមើលមិនឃើញធ្នឹមនៅក្នុងភ្នែករបស់អ្នកផ្ទាល់ដូច្នេះ?។ បើអ្នកមើល​ធ្នឹមនៅក្នុងភ្នែករបស់អ្នកមិនទាំងឃើញផង ម្ដេចក៏ហ៊ាននិយាយទៅបងប្អូនថា ទុកឱ្យ​ខ្ញុំ​ផ្ដិតយកល្អងធូលីនេះចេញពីភ្នែកអ្នក?។ ​មនុស្សមានពុតអើយ! ចូរយកធ្នឹមចេញ​ពីភ្នែកអ្នកជាមុនសិន ទើបអ្នកមើលឃើញច្បាស់ល្មមនឹងផ្ដិតយកល្អងធូលីចេញពី​ភ្នែករបស់បងប្អូនអ្នកបាន»។