ថ្ងៃអង្គារ ទី០៥ ខែសីហា ឆ្នាំ២០២៥

អត្ថបទទី១៖ សូមថ្លែងព្រះគម្ពីរជំរឿនប្រជាជន ជរ ១២,១-១៣

លោកម៉ូសេបានយកស្ត្រីជាតិអាហ្រ្វិកម្នាក់ធ្វើជាភរិយា ហេតុនេះហើយបានជាអ្នកស្រី​មៀរីយ៉ាម និងលោកអរ៉ុនជាបងរបស់លោកមានប្រសាសន៍ជំទាស់នឹងលោក។ អ្នកទាំង​ពីរមានប្រសាសន៍ថា៖ «ព្រះអម្ចាស់ពុំមែនមានព្រះបន្ទូលមកម៉ូសេតែប៉ុណ្ណោះទេ គឺព្រះ​អង្គ​​មានព្រះបន្ទូលមកពួកយើងដែរ!»។ ពេលនោះព្រះអម្ចាស់ទ្រង់ព្រះសណ្តាប់ឮពាក្យនេះ។ លោកម៉ូសេសុភាពរាបសាជាងគេបំផុត ក្នុងចំណោមមនុស្សនៅលើផែនដីនេះ។ រំពេចនោះ ព្រះអម្ចាស់មានព្រះបន្ទូលមកកាន់លោកម៉ូសេ លោកអរ៉ុន និងអ្នកស្រីមៀរីយ៉ាមថា៖​«ចូរអ្នកទាំងបីនាំគ្នាចេញទៅពន្លាជួបព្រះអម្ចាស់ទៅ!»។ អ្នកទាំងបីក៏​ចេញទៅទាំងអស់គ្នា។ ព្រះអម្ចាស់យាងចុះមកក្នុងដុំពពក ហើយគង់នៅមាត់ទ្វារ​ពន្លា។ ព្រះអង្គហៅលោកអរ៉ុន និងអ្នកស្រីមៀរីយ៉ាម អ្នកទាំងពីរក៏ចូលទៅជិត​ព្រះអង្គ។ ព្រះអង្គមានព្រះបន្ទូលថា៖ «ចូរស្តាប់ពាក្យយើងឱ្យបានជាក់ច្បាស់! ក្នុងចំណោមអ្នករាល់គ្នា ពេលណាមានព្យាការីម្នាក់ យើងជាព្រះអម្ចាស់សម្តែង​ឱ្យព្យាការីនោះស្គាល់យើងតាមរយៈនិមិត្តហេតុ យើងនិយាយទៅកាន់គេតាមរយៈ​សុបិននិមិត្ត។ ចំណែកឯម៉ូសេដែលជាអ្នកបម្រើរបស់យើងវិញ មិនដូច្នោះទេ ម៉ូសេមានចិត្តស្មោះត្រង់ចំពោះកិច្ចការក្នុងដំណាក់របស់យើងទាំងមូល។ យើងនិយាយទៅកាន់ម៉ូសេដោយផ្ទាល់មាត់ យើងសម្តែងឱ្យម៉ូសេឃើញយ៉ាងច្បាស់ ដោយឥត​​​ប្រើប្រស្នា ហើយម៉ូសេអាចសំឡឹងមើលមកយើងបាន។ ហេតុអ្វីបានជាអ្នកទាំងពីរមិន​កោតក្រែង និយាយប្រឆាំងនឹងម៉ូសេជាអ្នកបម្រើរបស់យើងដូច្នេះ?»។ ព្រះអម្ចាស់ទ្រង់ព្រះពិរោធនឹងអ្នកទាំងពីរ ហើយព្រះអង្គក៏យាងចាកចេញទៅ។ ពពកក៏រសាត់ឡើងចាកចេញពីពន្លាដែរ។ ពេលនោះ លោកស្រីមៀរីយ៉ាមក៏កើតឃ្លង់​ពេញខ្លួន​ មានពណ៌សដូចកប្បាស។ លោកអរ៉ុនបែរទៅរកលោកស្រីមៀរីយ៉ាម ឃើញគាត់កើតឃ្លង់។ លោកក៏ពោលទៅកាន់លោកម៉ូសេថា៖​«សូមលោកប្អូនជាម្ចាស់ មេត្តាយល់អធ្យាស្រ័យដល់យើងទាំងពីរផង។ យើងទាំងពីរបានប្រព្រឹត្តលេលា និង​បានប្រព្រឹត្តអំពើបាប!។ សូមកុំឱ្យនាងមៀរីយ៉ាម ដូចកូនដែលកើតមកស្លាប់ មាន​ស្បែករយីករយាកដូច្នេះឡើយ!»។ លោកម៉ូសេស្រែកអង្វរព្រះអម្ចាស់ថា៖ «ឱ ព្រះជាម្ចាស់អើយ! សូមមេត្តាប្រោសបងមៀរីយ៉ាមឱ្យបានជាឡើងវិញផង!»។

ទំនុកតម្កើងលេខ ៥១ (៥០),៣-៦ក ខ.១២-១៣ បទព្រហ្មគិត​

ពិធីអបអរសាទរព្រះគម្ពីរដំណឹងល្អតាម យក ១,១៨

អាលេលូយ៉ា! អាលេលូយ៉ា!
បពិត្រព្រះជាម្ចាស់ ព្រះអង្គប្រទានជីវិតឱ្យយើងខ្ញុំ ដោយសារព្រះបន្ទូលនៃសេចក្តីពិត។ ព្រះអង្គត្រាស់ហៅយើងខ្ញុំមុនសត្វលោកទាំងឡាយដែលព្រះអង្គបង្កើតមក។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១៥,១-២.១០-១៤

មានពួកខាងគណផារីស៊ី និងពួកធម្មាចារ្យមកពីក្រុងយេរូសាឡឹមចូលគាល់ព្រះយេស៊ូ ហើយទូលសួរថា៖ «ហេតុអ្វីបានជាសិស្សរបស់លោកមិនគោរពតាមទំនៀមទម្លាប់ គឺមិន​ធ្វើពិធីលាងដៃមុនពេលបរិភោគដូច្នេះ?»។ ព្រះយេស៊ូត្រាស់ហៅបណ្តាជន រួចមានព្រះបន្ទូលទៅគេថា៖ «ចូរស្តាប់ ហើយយល់ឱ្យបានច្បាស់ថា អ្វីៗដែលចូលតាមមាត់​មនុស្ស ពុំដែលធ្វើឱ្យមនុស្សទៅជាមិនបរិសុទ្ធឡើយ ផ្ទុយទៅ​វិញ មានតែអ្វីៗដែលចេញពីមាត់មនុស្សវិញប៉ុណ្ណោះទេដែលធ្វើឱ្យមនុស្សត្រឡប់ទៅជាមិនបរិសុទ្ធ»។ ពេលនោះសាវ័កនាំគ្នាចូលមកជិតព្រះអង្គ ហើយទូលថា៖ «សូមព្រះគ្រូជ្រាប! ពួកខាង​គណៈផារីស៊ីទាស់ចិត្តណាស់ មកពីឮលោកមានប្រសាសន៍ដូច្នេះ»។ ព្រះយេស៊ូមាន​ព្រះ​បន្ទូលតបទៅគេវិញថា៖ «ព្រះបិតារបស់ខ្ញុំដែលគង់នៅស្ថានបរមសុខនឹងដករុក្ខ​ជាតិទាំងឡាយណាដែលព្រះអង្គមិនបានដាំ។ កុំអំពល់នឹងគេធ្វើអ្វី អ្នកទាំងនោះសុទ្ធតែ​មនុស្សខ្វាក់ដែលដឹកនាំមនុស្សខ្វាក់។ បើមនុស្សខ្វាក់ដឹកដៃមនុស្សខ្វាក់ គេមុខជាធ្លាក់រណ្តៅទាំងពីរនាក់ជាមិនខាន»។