ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! យើងខ្ញុំសូមផ្ញើជីវិតលើព្រះហឫទ័យសប្បុរសរបស់ព្រះអង្គ ដែលចាត់ចែងអ្វីៗទាំងអស់តាមព្រះគម្រោងការដ៏អស្ចារ្យរបស់ព្រះអង្គ ដោយមិនដែលភាន់ច្រឡំឡើយ។ សូមទ្រង់ព្រះមេត្ដាកម្ចាត់ឧបទ្រពទាំងឡាយចេញពីយើងខ្ញុំ សូមប្រោសប្រទាននូវអ្វីៗដែលអាចជួយយើងខ្ញុំឱ្យបានប្រកបដោយសេចក្ដីសុខសាន្ដ ក្នុងការគោរពបម្រើព្រះអង្គ។

អត្ថបទទី១៖​ សូមថ្លែងព្រះគម្ពីរពង្សាវតាក្សត្រទី១ ១ ពង្ស ៨,៤១-៤៣

ព្រះបាទសាឡូម៉ូនអធិដ្ឋានក្នុងព្រះវិហារដែលទ្រង់បានកសាងនៅក្រុង​យេរូសា​ឡឹ​មដូចតទៅ៖ «បពិត្រព្រះអម្ចាស់! ព្រះនាមដ៏ឧត្ដុង្គឧត្ដម ឫទ្ធិបារមី និង​​តេ​ជានុភាព​របស់ព្រះអង្គមុខជាល្បីខ្ចរខ្ចាយទៅក្នុងចំណោមប្រជាជាតិនានា។ ប្រសិន​បើជនបរទេសដែលមិនមែនជាជនជាតិអ៊ីស្រាអែល ប្រជារាស្រ្ដរបស់ព្រះអង្គមកពីស្រុកឆ្ងាយ ព្រោះមករកព្រះនាមរបស់ព្រះអង្គ ប្រសិនបើជនបរទេសនោះមក​អង្វរ​ព្រះ​អង្គ​ក្នុងព្រះដំណាក់នេះ សូមព្រះអង្គដែលគង់នៅស្ថានបរមសុខទ្រង់​ព្រះ​​សណ្ដាប់ និង​ប្រោសប្រទានតាមសំណូមពរ​ទាំ​ងប៉ុ​​ន្មានដែលជនបរទេសនោះទូលសូមពីព្រះអង្គ ដើម្បីឱ្យជាតិសាសន៍ទាំងអស់នៅលើផែនដីស្គាល់ព្រះនាមរបស់ព្រះអង្គ ហើ​យ​​គោរព​កោតខ្លាចព្រះអង្គដូចអ៊ីស្រាអែលជាប្រជារាស្រ្ដរបស់ព្រះអង្គដែរ។ ពួក​គេនឹងទទួលស្គាល់ថា ព្រះដំណាក់ដែលទូលបង្គំសង់នេះ ពិត​ជាកន្លែងដែល​ព្រះ​អង្គ​គង់នៅមែន។

ទំនុកតម្កើងលេខ ១១៧ (១១៦),១-២ បទពាក្យ ៧

អត្ថបទទី​២៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទស្រុកកាឡាទី កឡ ១,១-២.៦-១០

ខ្ញុំប៉ូល ជាគ្រីស្ដទូតដែលមិនមែនតែងតាំងឡើងដោយមនុស្សលោក ឬដោយ​ជន​ណាម្នាក់នោះឡើយ គឺតែងតាំងឡើងដោយព្រះយេស៊ូគ្រីស្ដ និងព្រះជាម្ចាស់​ជាព្រះបិតាដែលប្រោសព្រះអង្គឱ្យមានព្រះជន្មរស់ឡើងវិញ។ ខ្ញុំ និងបងប្អូនទាំង​អស់ដែលនៅជាមួយខ្ញុំសូមជម្រាបមកព្រះសហគមន៍ទាំងឡាយនៅស្រុកកាឡាទី។ ខ្ញុំ​ឆ្ងល់ណាស់ ដោយឃើញបងប្អូនឆាប់ងាកចេញពីព្រះជាម្ចាស់ដែលបានត្រាស់ហៅ​បងប្អូន តាមព្រះហឫទ័យប្រណីសន្ដោសរបស់ព្រះគ្រីស្ដ ហើយបងប្អូនបែរទៅរកដំណឹងល្អមួយផ្សេងទៀត! តាមពិតគ្មានដំណឹងល្អណាមួយផ្សេងទៀតឡើយ គឺមានតែអ្នកខ្លះបានធ្វើឱ្យកើតវឹកវរ និងចង់បំភ្លៃដំណឹងល្អរបស់ព្រះគ្រីស្ដ​ប៉ុណ្ណោះ។ ប្រ​សិន​បើមាននរណាម្នាក់ ទោះបីយើងក្ដី ឬទេវទូតណាមួយ​ពីស្ថាន​បរមសុខក្ដី នាំដំណឹងល្អណាផ្សេងមកប្រាប់បងប្អូន ខុសប្លែកពីដំណឹងល្អដែលយើងបាននាំមកជូន​បងប្អូន សូមឱ្យអ្នកនោះត្រូវបណ្ដាសាទៅចុះ!។ ដូចយើងបានជម្រាបមក​ស្រាប់​ហើយ តែខ្ញុំក៏សូមជម្រាបម្ដងទៀតថា ប្រសិនបើនរណាម្នាក់នាំដំណឹងល្អផ្សេងមកជូនបងប្អូន ខុសប្លែកពីដំណឹងល្អដែលបងប្អូនធ្លាប់ទទួល សូមឱ្យអ្នកនោះត្រូវបណ្ដា​សា​ចុះ! ឥឡូវនេះ តើខ្ញុំចង់ផ្គាប់ចិត្ដមនុស្ស ឬធ្វើឱ្យគាប់ព្រះហឫទ័យព្រះជាម្ចាស់? តើខ្ញុំស្វែងរកឱ្យមនុស្សពេញចិត្ដឬ? ប្រសិនបើខ្ញុំនៅតែចង់ឱ្យមនុស្សពេញចិត្ដនោះ មានន័យថា ខ្ញុំលែងជាអ្នកបម្រើរបស់ព្រះគ្រីស្ដ​​ទៀតហើយ!។

ពិធីអបអរសាទរព្រះគម្ពីរដំណឹងល្អតាម យហ ៣,១៦

អាលេលូយ៉ា! អាលេលូយ៉ា!
ព្រះជាម្ចាស់ស្រឡាញ់មនុស្សលោកខ្លាំងណាស់ ហេតុនេះហើយ ​ បានជាព្រះអង្គប្រទានព្រះបុត្រាតែមួយរបស់ព្រះអង្គមកដើម្បីឱ្យអស់អ្នកដែលជឿលើព្រះបុត្រាមានជីវិតអស់កល្បជានិច្ច។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ៧,១-១០

កាលព្រះយេស៊ូមានព្រះបន្ទូលឱ្យប្រជាជនស្ដាប់ចប់សព្វគ្រប់ហើយ ព្រះអង្គ​ក៏យាងចូលទៅក្រុងកាផានុម។ នៅក្រុងនោះ មានអ្នកបម្រើសំណព្វចិត្ដរបស់​នាយទាហានរ៉ូម៉ាំងម្នាក់មានជំងឺជាទម្ងន់ ជិតស្លាប់។ ពេលនាយទាហាននោះ​ឮគេនិយាយអំពីព្រះយេស៊ូ គាត់ក៏ចាត់ចាស់ទុំនៃជនជាតិយូដាខ្លះឱ្យទៅយាងព្រះអង្គមក​ប្រោស​អ្នកបម្រើរបស់គាត់។ ចាស់ទុំទាំងនោះទៅគាល់ព្រះយេស៊ូទទូចអង្វរ​​​ព្រះអង្គថា៖ «នាយទាហាននោះជាមនុស្សម្នាក់ដែលគួរតែលោកប្រោសប្រណី​​ដល់​​គាត់ ព្រោះគាត់ស្រឡាញ់ជាតិសាសន៍របស់យើង ថែមទាំងបានសង់ធម្ម​សាលា​ឱ្យយើងផង»។ ព្រះយេស៊ូយាងទៅជាមួយចាស់ទុំទាំងនោះ។ លុះយាងជិត​ដល់​ហើយ នាយទាហានចាត់​មិត្ដភក្ដិរបស់គាត់ឱ្យមកទូលថា៖ «លោកម្ចាស់! មិនបាច់អញ្ជើញចូលផ្ទះខ្ញុំប្របាទទេ ដ្បិតខ្ញុំប្របាទមានឋានៈទន់ទាបណាស់ មិនសមនឹងទទួលលោកក្នុងផ្ទះខ្ញុំប្របាទឡើយ។ ហេតុនេះហើយ បានជាខ្ញុំប្របាទមិន​ហ៊ាន​មក​​ជួបលោកផ្ទាល់។ សូមលោក​មេត្ដាមានប្រសាសន៍តែមួយម៉ាត់ នោះអ្នកបម្រើរបស់ខ្ញុំប្របាទនឹងជាសះស្បើយមិនខាន។ ខ្ញុំប្របាទជាអ្នកនៅក្រោមបញ្ជាគេ ហើយក៏មានកូនទាហានជាច្រើននៅ​ក្រោ​ម​បញ្ជាខ្ញុំប្របាទដែរ។ បើខ្ញុំ​ប្របាទបញ្ជា​អ្នក​ណា​ម្នាក់ឱ្យទៅ គេប្រាកដជាទៅ បើ​ប្រាប់ម្នាក់ទៀតឱ្យមក គេនឹងមក។ ពេល​ខ្ញុំប្របាទប្រាប់អ្នកបម្រើឱ្យធ្វើការអ្វីមួយ គេនឹងធ្វើតាម»។ កាលព្រះយេស៊ូទ្រង់ព្រះសណ្ដាប់ពាក្យទាំងនេះហើយ ព្រះអង្គស្ងើចសរសើរនាយទាហាននោះណាស់​។ ​ ព្រះអង្គងាកទៅរកបណ្ដាជនដែលដើរ​តាម​ព្រះអង្គ ហើយមានព្រះបន្ទូលថា៖ «ខ្ញុំ​មិន​ដែល​​ឃើញ​នរ​ណាមាន​ជំនឿ​បែប​នេះ​ឡើ​យ ទោះបីនៅស្រុកអ៊ីស្រាអែល​ក៏​គ្មាន​ផង»។ មិត្ដភក្ដិ​ដែល​នាយ​ទា​ហានចាត់ឱ្យមកក៏​វិល​ត្រឡប់ទៅវិញ ឃើញអ្នក​បម្រើ​បាន​ជា​សះស្បើយ។

ពាក្យថ្វាយតង្វាយ

បពិត្រព្រះអម្ចាស់! យើងខ្ញុំយកតង្វាយដែលកើតពីកម្លាំងញើសឈាមមក​ថ្វាយ​ព្រះអង្គ។ សូមទ្រង់ព្រះមេត្ដាបញ្ចូលយើងខ្ញុំក្នុងសក្ការបូជារបស់ព្រះគ្រីស្ដ សូមជម្រះចិត្ដយើងខ្ញុំឱ្យរួចពីបាបផង។

ពាក្យអរព្រះគុណ

បពិត្រព្រះអម្ចាស់! ព្រះអង្គបានប្រោសប្រទានព្រះកាយ និងព្រះលោហិតនៃព្រះបុត្រាឱ្យយើងខ្ញុំធ្វើជាអាហារដែលផ្ដល់ជីវិត។ សូមទ្រង់ព្រះមេត្ដាចាត់ព្រះវិញ្ញាណព្រះអង្គឱ្យយាងមកណែនាំយើងខ្ញុំ សូមប្រោសឱ្យយើងខ្ញុំអាចផ្ដល់សក្ខីភាព​​​ថ្វាយព្រះអង្គដោយមិន គ្រាន់តែពោលពាក្យប៉ុណ្ណោះទេ គឺដោយប្រព្រឹត្ដអំពើ​ល្អ​ផង។