ថ្ងៃពុធ ទី២៤ ខែមិថុនា ឆ្នាំ២០២៦

បុណ្យឱឡារិក
កំណើតសន្តយ៉ូហានបាទីស្ត
ពណ៌ស

សូមចុចទីនេះ

ព្រះសហគមន៍ចាត់ចែងឱ្យធ្វើពិធីនឹករឭកថ្ងៃលោកយ៉ូហានបាទីស្តកើត ដើម្បីប្រកាសថាព្រះជាម្ចាស់ចាប់ផ្តើមសង្គ្រោះមនុស្សលោកជាស្ថាពរ នៅពេលព្រះអង្គប្រោសឱ្យលោកយ៉ូហានកើតមក។ លោកយ៉ូហានរៀបចំផ្លូវថ្វាយព្រះព្រះគ្រីស្ត។ លោកយ៉ូហានជាព្យាការីក្រោយគេបង្អស់ លោកទទួលមុខងាររៀបចំប្រជាជនថ្វាយព្រះគ្រីស្ត។ លោកកើតមកដើម្បីធ្វើជាសាក្សីថ្វាយពន្លឺដ៏ពិតប្រាកដ គឺព្រះគ្រីស្ត។

សូមថ្លែងព្រះគម្ពីរពង្សាវតាក្សត្រភាគទី២ ២ពង្ស ២២,៨.១០-១៣; ២៣,១-៣

ព្រះបាទយ៉ូស៊ីយ៉ា ចាត់លោកសាផានជាស្មៀនហ្លួង ទៅជួបលោកមហាបូជាចារ្យ​ហ៊ីលគីយ៉ា ដែលមានភារកិច្ចជួសជុលព្រះវិហារ។ លោកមហាបូជាចារ្យមានប្រសាសន៍ទៅកាន់លោកសាផានជាស្មៀនហ្លួងថា៖ «ខ្ញុំបានរកឃើញគម្ពីរធម្មវិន័យនៅក្នុងព្រះ​ដំណាក់របស់ព្រះអម្ចាស់!​»​។ លោកហ៊ីលគីយ៉ា ជូនគម្ពីរនេះទៅលោកសាផាន ហើយ​លោកសាផានក៏អាន។ លោកសាផានជាស្មៀនហ្លួងទូលស្តេច​ថា៖ «លោកបូជាចារ្យ​ហ៊ីលគីយ៉ា ប្រគល់គម្ពីរមួយក្បាលឱ្យទូលបង្គំ» រួចលោកក៏អានថ្វាយព្រះរាជាស្តាប់។ កាលព្រះរាជាឮ​សេចក្តីទាំងប៉ុន្មានដែលមានចែងក្នុងគម្ពីរធម្មវិន័យ ស្តេចក៏ហែកព្រះ​ភូសា។ បន្ទាប់មក ទ្រង់បញ្ជាទៅលោកបូជាចារ្យ​ហ៊ីលគីយ៉ា លោកសាផានជាស្មៀនហ្លួង និងរាជបម្រើថា៖ «សូមអស់លោកអញ្ជើញទៅទូលសួរព្រះអម្ចាស់ឱ្យយើង និង​ប្រជាជនស្រុកយូដាទាំងមូលអំពីសេចក្តីទាំងប៉ុន្មានក្នុងគម្ពីរ ដែលទើបរកឃើញនេះផង។ ព្រះអម្ចាស់មុខជាព្រះពិរោធនឹងយើងយ៉ាងខ្លាំង ដ្បិតពួកដូនតារបស់យើង​មិនបានស្ដាប់តាមសេចក្ដីទាំងប៉ុន្មានដែលមានចែងទុកក្នុងគម្ពីរនេះទេ ហើយក៏មិន​ប្រតិបត្តិតាមដែរ»។ ព្រះរាជាចាត់គេឱ្យទៅអញ្ជើញអស់លោកព្រឹទ្ធាចារ្យនៅស្រុកយូដា និងនៅក្រុង​យេរូសាឡឹមមកគាល់។ បន្ទាប់មក ស្តេចយាងទៅកាន់ព្រះដំណាក់របស់ព្រះអម្ចាស់ជាមួយប្រជាជនទាំងអស់នៅស្រុកយូដា និងអ្នកក្រុងយេរូសាឡឹមទាំងមូល គឺមានអស់​លោកបូជាចារ្យ ព្យាការី និងប្រជាជនទាំងអស់គ្រប់ជាន់ថ្នាក់។ ព្រះរាជាអានព្រះបន្ទូលទាំងប៉ុន្មានក្នុងគម្ពីរសម្ពន្ធមេត្រី ដែលគេរកឃើញក្នុងព្រះដំណាក់របស់ព្រះអម្ចាស់ឱ្យប្រជាជនស្ដាប់។ ព្រះរាជាឈរនៅលើវេទិកា នៅចំពោះព្រះភក្រ្ដព្រះអម្ចាស់ ហើយចងសម្ពន្ធមេត្រីជាមួយព្រះអម្ចាស់ ដោយសន្យាថា សុខចិត្តដើរតាមព្រះអម្ចាស់ និងកាន់តាមបទបញ្ជា ដំបូន្មាន និងក្រឹត្យវិន័យរបស់ព្រះអង្គ ដោយស្មោះអស់ពីចិត្ត និងអស់ពីស្មារតី ដើម្បីគោរពតាមសេចក្តីក្នុងសម្ពន្ធមេត្រី ដែលមានចែងទុកក្នុងគម្ពីរ​នេះ។ ប្រជាជនទាំងមូលក៏ចូលរួមក្នុងសម្ពន្ធមេត្រីនេះដែរ។

ទំនុកតម្កើងលេខ ១១៩ (១១៨),៣៣-៣៧.៤០ បទពាក្យ ៧

ពិធីអបអរសាទរព្រះគម្ពីរដំណឹងល្អតាម ទន ១,២-៣

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៧,១៥-២០

ក្រុមសាវ័កជួបជុំជាមួយព្រះយេស៊ូនៅលើភ្នំ។ ព្រះអង្គមានព្រះបន្ទូលទៅកាន់ពួកគេថា៖ «ចូរប្រយ័ត្ននឹងពួកព្យាការីក្លែងក្លាយ គេក្លែងខ្លួនមករកអ្នករាល់គ្នាដោយពាក់ស្បែកចៀម តែគេមានចិត្ដសាហាវដូចចចក។ អ្នករាល់គ្នាអាចស្គាល់គេបានតាមអំពើ​ដែលគេប្រព្រឹត្ត​។ ពុំដែលមាននរណាបេះផ្លែទំពាំងបាយជូរ និងផ្លែស្វាយពីគុម្ពបន្លា​ឡើយ។ ដើមឈើល្អតែងតែឱ្យផ្លែល្អ រីឯដើមឈើអាក្រក់ តែងតែឱ្យផ្លែអាក្រក់។ ដើមឈើល្អមិនអាចឱ្យផ្លែអាក្រក់ទេ រីឯដើមឈើអាក្រក់ ក៏មិនអាចឱ្យផ្លែល្អបានដែរ។ ដើមឈើណាមិនឱ្យផ្លែល្អ គេនឹងកាប់យកទៅដុត។ រីឯពួកព្យាកាក្លែងក្លាយក៏ដូច្នោះ​ដែរ អ្នករាល់គ្នាអាចស្គាល់គេបាន តាមអំពើដែលគេប្រព្រឹត្ត»។