ថ្ងៃសុក្រ ទី២៤ ខែឧសភា ឆ្នាំ២០២៤

សូមថ្លែងលិខិតគ្រីស្តទូតយ៉ាកុប យក ៥,៩-១២

បងប្អូនជាទីស្រឡាញ់!
មិនត្រូវរអ៊ូរទាំនឹងគ្នាទៅវិញទៅមកឡើយ ដើម្បីកុំឱ្យ​មានទោស ដ្បិតព្រះជាម្ចាស់ដែលជាចៅក្រម ទ្រង់ឈរនៅមាត់ទ្វារស្រាប់ហើយ។​ បងប្អូនអើយ! ចូរយកតម្រាប់តាមពួកព្យាការីដែលបានរងទុក្ខលំបាក និងមានចិត្ត​អត់ធ្មត់ ហើយថ្លែងព្រះបន្ទូលក្នុងព្រះនាមព្រះអម្ចាស់។ យើងតែងតែសរសើរអស់អ្នក​ដែលចេះស៊ូទ្រាំថា ជាអ្នកមានសុភមង្គល។ បងប្អូនធ្លាប់ឮគេនិយាយស្រាប់ហើយថា លោកយ៉ូប ចេះស៊ូទ្រាំយ៉ាណាៗនោះហើយ បងប្អូនក៏ឃើញដែរថា នៅទីបំផុតព្រះអម្ចាស់ឱ្យគាត់បានទៅជាយ៉ាងណា ដ្បិតព្រះអម្ចាស់មានព្រះហប្ញទ័យអាណិតអាសូរ និងមេត្តាករុណាយ៉ាងក្រៃលែង។
បងប្អូនអើយ! ជាពិសេសកុំស្បថឱ្យសោះ គឺកុំយកមេឃ យកផែនដី ឬយកអ្វី​ផ្សេងទៀតមកធ្វើជាប្រធានសម្បថឡើយ។ បើថា “មែន”​ ឱ្យប្រាកដជាមែន “ទេ” ឱ្យប្រាកដជាទេ ដើម្បីកុំឱ្យមានទោស។​

ទំនុកតម្កើងលេខ ១០៣ (១០២),១-៤.៨-៩.១១-១២ បទកាកគតិ

ពិធីអបអរសាទរព្រះគម្ពីរដំណឹងល្អតាម យហ ៤,១៦

អាលេលូយ៉ា! អាលេលូយ៉ា!
ប្រសិនបើយើងស្ថិតនៅក្នុងសេចក្តីស្រឡាញ់ យើងស្ថិតនៅជាប់នឹងព្រះជាម្ចាស់។ ព្រះជាម្ចាស់ជាសេចក្តីស្រឡាញ់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ១០,១-១២

ព្រះយេស៊ូយាងមកដល់ស្រុកយូដា និងដល់ត្រើយខាងនាយទន្លេយ័រដាន់។ មហា​ជននាំគ្នាទៅរកព្រះអង្គសាជាថ្មី ព្រះអង្គក៏ចាប់ផ្តើមបងៀនគេតាមទម្លាប់របស់ព្រះអង្គ។ មានពួគខាងគណៈផារីស៊ីចូលមកជិត ក្នុងគោលបំណងល្បងលព្រះអង្គ។ គេទូលសួរព្រះអង្គថា៖ «តើស្វាមីមានសិទ្ធិលែងភរិយាបានឬទេ?»។ ព្រះអង្គមានព្រះ​បន្ទូលថា៖ «តើលោកម៉ូសេបង្គាប់អ្នករាល់គ្នាឱ្យធ្វើអ្វី?»។ គេទូលតបថា៖«លោក​ម៉ូសេអនុញ្ញាតឱ្យស្វាមីធ្វើលិខិតលែងលះប្រពន្ធបាន»។ ព្រះយេស៊ូមានព្រះបន្ទូល​ទៅគេថា៖ «លោកម៉ូសេចែងវិន័យនេះឱ្យអ្នករាល់គ្នា ព្រោះតែអ្នករាល់គ្នាមានចិត្តរឹងរូស។ ប៉ុន្តែ កាលដើមដំបូង នៅពេលដែលព្រះជាម្ចាស់បានបង្កើតពិភពលោក​ព្រះអង្គបង្កើតមនុស្សមក ជាបុរស ជាស្ត្រី។ ហេតុនេះហើយ បានជាបុរសត្រូវចាកចេញ​ពីឪពុកម្តាយ ទៅរួមរស់នៅជាមួយភរិយារបស់ខ្លួន ហើយអ្នកទាំងពីរត្រឡប់ទៅជារូបកាយតែមួយ។ គេមិន​មែនជាបុគ្គលពីរនាក់ទៀតទេ គឺជារូបកាយតែមួយវិញ។ ដូច្នេះ មនុស្សមិនត្រូវបំបាក់បំបែកគូស្រករដែលព្រះជាម្ចាស់បានផ្សំផ្គុំនោះឡើយ»។ ពេលទៅដល់ផ្ទះ ក្រុមសាវ័កទូលសួរព្រះយេស៊ូអំពីរឿងនេះម្តងទៀត។ ព្រះអង្គមាន​ព្រះបន្ទូលទៅគេថា៖ «ប្រសិនបើស្វាមីណាលែងភរិយា ហើយទៅរៀបការនឹងស្ត្រីម្នាក់​ទៀត ស្វាមីនោះបាន​ផិតក្បត់ភរិយារបស់ខ្លួន។ រីឯភរិយាណាដែលលែងស្វាមី ហើយទៅរៀបការនឹងបុរសម្នាក់ទៀត ស្រ្តីនោះក៏បានប្រព្រឹត្តអំពើផិតក្បត់ដែរ»។