ពាក្យអធិដ្ឋានពេលចូល

បពិត្រព្រះជាម្ចាស់ដែលបានបង្កើតពិភពលោកទាំងមូល! ព្រះអង្គសព្វព្រះហឫទ័យឱ្យមនុស្សម្នាលើកតម្កើងសិរីរុងរឿងរបស់ព្រះអង្គ ដោយសារការងាររបស់ខ្លួនដែលបន្តព្រះកិច្ចរបស់ព្រះអង្គ។ សូមទ្រង់ព្រះមេត្តាប្រោសយើងខ្ញុំឱ្យបំពេញកិច្ចការរបស់ខ្លួនដោយចិត្តស្មោះ និងយកចិត្តទុកដាក់សាងសង្គមមនុស្សប្រកបដោយយុត្តិធម៌ និងភាតរភាពផង។

អត្ថបទទី១៖ សូមថ្លែងព្រះគម្ពីរកំណើរពិភពលោក កណ ១,២៦-២,៣

ព្រះជាម្ចាស់មានព្រះបន្ទូលថា៖ «យើងបង្កើតមនុស្សជាដំណាងរបស់យើង គឺឱ្យមានលក្ខណៈដូចយើង ដើម្បីឱ្យគេមានអំណាចលើត្រីសមុទ្រ លើបក្សាបក្សីដែលហើរនៅលើមេឃ លើសត្វស្រុកនៅលើផែនដីទាំងមូល និងលើសត្វល្អិតៗទាំងប៉ុន្មានដែលលូនវារលើដី​ផង»។ ព្រះជាម្ចាស់បានបង្កើតមនុស្សជាដំណាងរបស់ព្រះអង្គ ព្រះអង្គបានបង្កើតគេឱ្យមានលក្ខណៈដូចព្រះជាម្ចាស់ គឺព្រះអង្គបានបង្កើតមនុស្សជាបុរសជាស្ត្រី។ ព្រះជាម្ចាស់ប្រទានពរឱ្យមនុស្ស គឺព្រះអង្គមានព្រះបន្ទូលថា៖ «ចូរបង្កើតកូនចៅឱ្យកើតបានច្រើនឡើងពាសពេញលើផែនដី ហើយត្រួតត្រាផែនដីទៅ! ចូរមានអំណាចលើត្រីសមុទ្រ លើបក្សាបក្សីដែលហើរនៅលើមេឃ និងលើសត្វល្អិតៗទាំងប៉ុន្មានដែល​លូនវារលើដី!»។ ព្រះជាម្ចាស់មានព្រះបន្ទូលថា៖ «មើល៍! យើងប្រគល់ធញ្ញជាតិទាំងប៉ុន្មានដែលមានគ្រាប់ពូជដុះនៅពាសពេញលើផែនដី និងរុក្ខជាតិដែលបង្កើតផ្លែ មានគ្រាប់បន្តពូជឱ្យអ្នករាល់គ្នាសម្រាប់ធ្វើជាអាហារ។ យើងក៏ឱ្យធញ្ញជាតិទាំងប៉ុន្មានដល់សត្វទាំងអស់នៅលើផែនដីដល់បក្សាបក្សីដែលហើរនៅលើមេឃ ដល់សត្វល្អិតៗទាំងប៉ុន្មាន ដែលលូនវារនៅលើផែនដី គឺដល់អស់សត្វទាំងប៉ុន្មានដែលមានដង្ហើមជីវិតសម្រាប់ធ្វើជាអាហារ»។ ការណ៍នេះក៏កើតឡើងដូច្នេះ។  ព្រះជាម្ចាស់ទតឃើញអ្វីៗទាំងអស់ដែលព្រះអង្គបានបង្កើតមក ទ្រង់ឈ្វេងយល់ថា ល្អប្រសើរណាស់។ ពេលនោះ មានល្ងាច មានព្រឹក គឺជាថ្ងៃទីប្រាំមួយ។ ផ្ទៃមេឃ ផែនដី អ្វីៗទាំងអស់នៅផ្ទៃមេឃ និងលើផែនដីកើតបានមានឡើង ដូច្នេះរួចរាល់សព្វគ្រប់ហើយ។ នៅថ្ងៃទីប្រាំពីរ ព្រះជាម្ចាស់បង្ហើយកិច្ចការដែលព្រះអង្គបានធ្វើចប់សព្វគ្រប់។ ក្រោយពីព្រះអង្គបានបញ្ចប់ការទាំងនោះមក ទ្រង់ក៏ឈប់សម្រាក។ ព្រះជាម្ចាស់ប្រទាន​ពរឱ្យថ្ងៃទីប្រាំពីរនោះ និងញែកថ្ងៃនោះឱ្យបានវិសុទ្ធ ដ្បិតថ្ងៃនោះហើយដែលព្រះអង្គបញ្ចប់កិច្ចការទាំងប៉ុន្មានដែលទ្រង់បានបង្កើត​មក។ នេះហើយជាដើមកំណើតរបស់ផ្ទៃមេឃ និងផែនដី នៅគ្រាដែលព្រះជាម្ចាស់បានបង្កើតមក។

ទំនុកតម្កើងលេខ ៩០(៨៩),២-៤,១២-១៤.១៦ បទពាក្យ ៧​​​

អត្ថបទទី២៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូឡូស កូឡ ៣,១៤-១៥.១៧.២៣-២៤

បងប្អូនជាទីស្រឡាញ់!
បងប្អូនត្រូវមានចិត្តស្រឡាញ់​ ដ្បិតសេចក្តីស្រឡាញ់ធ្វើឱ្បបងប្អូនរួបរួមគ្នាពេញលក្ខណៈ។ សូមឱ្យសេចក្តីសុខសាន្តរបស់ព្រះគ្រីស្តសោយរាជ្យនៅក្នុងចិត្តបងប្អូន ព្រោះព្រះជាម្ចាស់បានត្រាស់ហៅបងប្អូនឱ្យរួបរួមគ្នាក្នុងព្រះកាយតែមួយ ដើម្បីឱ្យបងប្អូនប្រកបដោយសេចក្តីសុខសាន្ត។ ត្រូវអរព្រះគុណព្រះអង្គជានិច្ច។ ការអ្វីក៏ដោយដែលបងប្អូនធ្វើនោះ ជាពាក្យសម្តី ឬកាយវិការក្តី ត្រូវធ្វើក្នុងព្រះនាមព្រះអម្ចាស់យេស៊ូរទាំងអស់ ទាំងអរព្រះគុណព្រះជាម្ចាស់ជាព្រះបិតា ដោយរួមជាមួយព្រះគ្រីស្តផង។ គ្រប់កិច្ចការដែលបងប្អូនធ្វើ ចូរធ្វើឱ្យអស់ពីចិត្ត ដូចជាធ្វើថ្វាយព្រះអម្ចាស់ដែរ គឺមិនមែនធ្វើសម្រាប់មនុស្សលោកទេ ដោយដឹងថា បងប្អូនមុខជាទទួលមត៌កពីព្រះជាម្ចាស់ទុកជាកំរៃមិនខាន។ ម្ចាស់ដ៏ពិតប្រាកដ គឺព្រះគ្រីស្ត ចូរបងប្អូនបម្រើព្រះអង្គទៅ។

ពិធីអបអរសាទរព្រះគម្ពីរដំណឹងល្អ ទន ៦៧,២០

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១៣,៥៤-៥៨

ព្រះយេស៊ូត្រឡប់ទៅភូមិស្រុករបស់ព្រះអង្គវិញ។ ព្រះអង្គបង្រៀនអ្នកស្រុកនៅក្នុងធម្មសាលារបស់គេ ធ្វើឱ្យគេងឿងឆ្ងល់គ្រប់ៗគ្នា។ គេពោលថា៖ “តើគាត់បានទទួលប្រាជ្ញា និងឫទ្ធានុភាពធ្វើការអស្ចារ្យទាំងនេះមកពីណា? អ្នកនេះជាកូនរបស់ជាងឈើ ហើយម្តាយរបស់គាត់ឈ្មោះនាងម៉ារី បងប្អូនរបស់គាត់ឈ្មោះ យ៉ាកុប យ៉ូសែប ស៊ីម៉ូន យូដាសទេតើ!”។ ប្អូនស្រីរបស់គាត់ទាំងប៉ុន្មានរស់នៅភូមិជាមួយយើងដែរ។ ដូច្នេះ គាត់ដឹងសេចក្តីទាំងនេះពីណាមក?”។ ហេតុនេះហើយ បានជាគេមិនអាចជឿព្រះអង្គបាន។ ព្រះយេស៊ូរមាន ព្រះបន្ទូលទៅគេថា៖ «ធម្មតាគេមើលងាយព្យាការីតែក្នុងស្រុកកំណើត និងក្នុងផ្ទះរបស់លោកប៉ុណ្ណោះ!»។ នៅទីនោះព្រះយេស៊ូពុំបានធ្វើការអស្ចារ្យច្រើនឡើយព្រោះគេគ្មានជំនឿ។

ពាក្យថ្វាយតង្វាយ

បពិត្រព្រះអម្ចាស់! អ្វីៗទាំងអស់ដែលមានក្នុងពិភពលោកយើងនេះ សុទ្ធតែមកពីព្រះអង្គ! សូមទ្រង់ព្រះមេត្តាទទួលតង្វាយទាំងនេះ ដែលជានិមិត្តរូប និងជាតំណាងនៃការងាររបស់យើងខ្ញុំ និងរបស់មនុស្សលោក សូមបង្រួមយើងខ្ញុំក្នុងសក្ការបូជាដ៏ប្រសើរបំផុតរបស់ព្រះយេស៊ូគ្រីស្ត ជាព្រះបុត្រាព្រះអង្គ និងជាអម្ចាស់យើងខ្ញុំ។

ពាក្យអរព្រះគុណ

បពិត្រព្រះអម្ចាស់! ព្រះអង្គបានប្រទានព្រះកាយព្រះគ្រីស្តឱ្យយើងខ្ញុំ សូមទ្រង់ព្រះមេត្តាបំភ្លឺចិត្តគំនិត្តយើងខ្ញុំជាគ្រីស្តបរិស័ទ សូមប្រោសយើងខ្ញុំឱ្យយល់តម្លៃដ៏ថ្លៃថ្លានៃការងាររបស់ខ្លួន និងឱ្យខិតខំរកយុត្តិធម៌ក្នុងសង្គមមនុស្សផង។