ឬសន្តសិលា ដាមីយុាំងជាអភិបាល
និងជាគ្រូបាធ្យាយនៃព្រះសហគមន៍

លោកដាមីយ៉ាំង កើតប្រហែលនៅឆ្នាំ ១០០៧ នៅក្រុងរ៉ាវ៉ែន (ប្រទេសអ៊ីតាលី)។ កាល​បានអាយុ ២៨ឆ្នាំ លោកបួសជាឥសីរស់នៅក្នុងព្រៃ។ លោកយក​ចិត្តទុក​ដាក់​កែ​តម្រង់ព្រះសហគមន៍​ដោយប្រៀន​ប្រដៅអស់លោកបូជាចារ្យ។ លោកនិពន្ធសៀវភៅជាច្រើនក្បាល ហើយកាន់វិន័យយ៉ាងតឹងរឹង លោក​ទទួលមុខងារជាអភិបាលព្រះសហគមន៍ក្រុងអូស្ទីយ៉ា (អ៊ីតាលី) តែលោកសូមលា​លែង​មុខ​តំ​ណែង​ត្រឡប់ទៅរស់នៅជាឥសីវិញ។ លោកទទួលមរណភាពនៅឆ្នាំ ១០៧២។

សន្តស្តានីស្លាសជាអភិបាល និងជាមរណសាក្សី

លោកស្តានីស្លាស (១០៣០-១០៧៩) កើតនៅត្រកូលអភិជននៅប្រទេសប៉ូលឡូញ។ លោកយកទ្រព្យសម្បត្តិទាំងអស់ទៅលក់យកប្រាក់ចែកឱ្យអ្នកក្រីក្រ តាមព្រះដំបូន្មានរបស់ព្រះយេស៊ូ។ ក្រោយមកលោកទទួលមុខងារជាអភិបាលព្រះសហគមន៍ក្រុងក្រាកូវី។ លោកហ៊ានស្តីបន្ទោសព្រះមហាក្សត្រស្រុកប៉ូឡូញជាស្តេចពាលដែលជិះជាន់អ្នកក្រីក្រ។ ព្រះមហាក្សត្រប្រហារជីវិតលោកដោយផ្ទាល់ ព្រះហស្ត នៅពេលដែលលោកកំពុងតែថ្វាយអភិបូជា។ សន្តស្តានីស្លាសជាឧបការីប្រទេសប៉ូឡូញ។

សន្តម៉ាតាំងទី១ជាសម្ដេចប៉ាប និងជាមរណសាក្សី

លោកម៉ាតាំងទទួលមុខងារជាអភិបាលក្រុងរ៉ូមនៅឆ្នាំ ៦៤៩។ លោកជំទាស់នឹងអ្នកកាន់ជំនឿក្លែងក្លាយម្យ៉ាងដែលប្រកាសថា ព្រះ​គ្រីស្តគ្មានបំណងដូចមនុស្សធម្មតាទេ គឺព្រះអង្គគ្រាន់តែមានព្រះហឫទ័យតាមឋានៈជាព្រះជាម្ចាស់ប៉ុណ្ណោះ។ ព្រះចៅអធិរាជកុងស្តង់ដែលកាន់តាមជំនឿក្លែងក្លាយនោះចាប់លោក ហើយនិរទេសទៅស្រុកគ្រីម៉េ។ លោកទទួលមរណភាពនៅស្រុកនោះដោយខ្វះខាតខ្លាំងពេក។

សន្តយ៉ូសែប ជាពលករ

លោកយ៉ូសែបជាពលករ។ អស់សាមសិបឆ្នាំ ព្រះយេស៊ូទទួលការអប់រំពីលោកយូ៉សែប និងប្រកបអាជីវកម្មដូចអ្នកស្រុកឯទៀតៗទាំងអស់។ ទាំងលោកយូ៉សែប ទាំងព្រះយេស៊ូរធ្លាប់ធ្វើការផ្ទាល់ដៃ។ នៅថ្ងៃនេះ ក្នុងសកលលោកទាំងមូលមានចាត់ចែង “ទិវាពលកម្ម” គឺមនុស្សទូទៅលើកតម្កើងសិទ្ធប្រជាពលករ ឬធ្វើបាតុកម្មទាមទារយុត្តិធម៌ក្នុងសង្គម។ នៅឆ្នាំ ១៩៥៥ សម្តេចប៉ាបពីយ៉ូទី១២ បានចាត់​ចែងពិធីបុណ្យនៅថ្ងៃនេះដែរ ដើម្បីដាស់តឿនគ្រីស្តបរិស័ទទូទាំងសកលលោក​ ឱ្យនឹកដល់តម្លៃនៃការងាររបស់ខ្លួន គឺថាដោយកិច្ចការរបស់ខ្លួន មនុស្សគ្រប់ៗរូបបន្តព្រះកិច្ចរបស់ព្រះជាម្ចាស់ដែលបានបង្កើតពិភពលោក។ នៅថ្ងៃនេះ ព្រះសហគមន៍រំឭកគ្រីស្តបរិស័ទឱ្យដឹងថា ខ្លួនមានភារកិច្ចសាងសង្គមមនុស្សប្រកបដោយយុត្តិធម៌និងភាតរភាព កុំបណ្តោយឱ្យអ្នកមាន ឬអ្នកកាន់អំណាចជិះជាន់ប្រជាពលករ។ “យុវពលករ មានតម្លៃជាងមាសទាំងប៉ុន្មានដែលមានក្នុងពិភពលោកទាំងមូល (អភិបាលកាឌិន)”។