ពាក្យណែនាំរបស់អ្នកបកប្រែ
តាំងពីថ្ងៃទី១១ ខែតុលា ឆ្នាំ១៩៦២ រហូតដល់ថ្ងៃទី៧ ខែធ្នូ ឆ្នាំ១៩៦៥ អភិបាលព្រះសហគមន៍កាតូលិកទូទាំងសាកលលោក ៣៥០០នាក់ បានជួបជុំគ្នាជាមហាសន្និបាតសាកលលើកទី២១ តាមទំនៀមទម្លាប់ព្រះសហគមន៍ពីបុរាណ។
អស់លោកមានគោលបំណងរិះគិតអំពីរបៀបសម្ដែងលទ្ធិនៃជំនឿគ្រីស្តសាសនាឲ្យបានស្របតាមសម័យទំនើប។ អស់លោកចែងនិងប្រកាសឯកសារ១៧ច្បាប់ ដែលបញ្ជាក់លទ្ធិនៃជំនឿរបស់ព្រះសហគមន៍កាតូលិកយើងជាផ្លូវការនៅសតវត្សទី២០។ ឯកសារទាំងនោះចែងជាភាសាឡាតាំង ហើយមានសារៈសំខាន់ណាស់តែពិបាកស្ដាប់បន្តិច។ អស់លោកអភិបាលបានជ្រើសរើសពាក្យនីមួយៗដោយប្រយ័ត្នប្រយែងគឺរកពាក្យណាដែលចំនឹងអត្ថន័យនៃជំនឿ។ ពេលយើងបកប្រែមកជាភាសាខ្មែរយើងក៏មានគោលបំណងដូចអស់លោកដែរ គឺយើងខិតខំរកពាក្យដែលចំនឹងអត្ថន័យដើម។ ជួនកាលយើងយកពាក្យដែលគ្រីស្តបរិស័ទខ្មែរយើងមិនធ្លាប់ប្រើតែពាក្យដែលយើងប្រើនោះចំនឹងអត្ថន័យជាង។ បងប្អូនអ្នកអានត្រូវចាត់ពាក្យថ្មីទាំងនោះ ទុកជាជំនួយសម្រាប់ឲ្យបងប្អូនរិះគិតអំពីអត្ថន័យដ៏ជ្រៅនៃជំនឿរបស់យើង។ យើងគ្រាន់តែផ្ដល់យោបល់ជូនបងប្អូនប៉ុណ្ណោះ មិនមែនបង្ខំបងប្អូនឲ្យប្រើពាក្យទាំងនោះទេ។
១. Creare, Creator, Creatio៖ ក្នុងគមី្ពរភាសាហេប្រឺមានពាក្យពិសេសមួយគឺ (បារ៉ា) សំដៅលើព្រះរាជកិច្ចរបស់ព្រះជាម្ចាស់ដែលប្រទានឲ្យអ្វីៗទាំងអស់កើតឡើង ដោយព្រះអង្គគ្រាន់តែមានព្រះបន្ទូលប្រកបដោយព្រះប្រាជ្ញាញាណប៉ុណ្ណោះ។ មានពាក្យផ្សេងសំដៅទៅលើឪពុកម្ដាយដែលបន្តជីវិតឲ្យកូន។ហេតុនេះហើយបានជាយើងសន្មតប្រែពាក្យ Creare ថា "ប្រតិស្ឋាន" ដែលមានន័យថា "ចាត់ចែងរៀបចំដោយប្រាជ្ញា"។
- Creator៖ យើងសន្មតប្រែពាក្យនេះថា "ព្រះអាទិករ" ដែលមានអត្ថន័យថា "អ្នកផ្ដើមធ្វើមុន អ្នកកសាងលោក"។
- Creatio៖ យើងសន្មតប្រែពាក្យនេះថា "សត្វលោកទាំងឡាយ" ឬអ្វីៗដែលព្រះជាម្ចាស់ប្រតិស្ឋានមក។
២. Credere, Fides, Fideles, Doctrina: យើងបានសន្មតប្រែពាក្យ Credere ថា "ផ្ញើជីវិតលើព្រះគ្រីស្ត" ជាអត្ថន័យសមនឹងពាក្យដើម។ ពាក្យ "ជឿ" "ជំនឿ" ដែលគ្រីស្តបរិស័ទតែងប្រើតាំងពីដើមរៀងមកមានអត្ថន័យទូលំទូលាយពេកមិនសូវច្បាស់ នាំឲ្យពុទ្ធបរិស័ទយល់ឃើញថា គ្រីស្តបរិស័ទយើងជាមនុស្សល្ងង់ ជឿដោយមិនរិះគិតពិចារណា។
- Fides៖ យើងសន្មតប្រែពាក្យនេះថា "ជំនឿ"។
- Fideles៖ យើងសន្មតប្រែពាក្យនេះថា "គ្រីស្តបរិស័ទ" គឺអ្នកផ្ញើជីវិតលើព្រះគ្រីស្ត។
- Doctrina៖ យើងសន្មតប្រែពាក្យនេះថា "លទិ្ធ" លទ្ធិនៃជំនឿ លទ្ធិនៃគ្រីស្តសាសនា។
៣. Laïcus៖ ក្នុងភាសាក្រិកជាភាសាដើមពាក្យ Laïcos សំដៅទៅលើសមាជិកនៃប្រជារាស្រ្តរបស់ព្រះជាម្ចាស់។ តាំងពីយូរយារមកហើយ គ្រីស្តបរិស័ទខ្មែរតែងតែបកប្រែពាក្យនេះថា "គ្រហស្ថ" ដែលសំដៅទៅលើពុទ្ធបរិស័ទដែលមិនបួសជាព្រះសង្ឃ។ តែពាក្យនេះនាំឲ្យច្រឡំ និងស្មានថា ក្នុងព្រះសហគមន៍មានគ្រីស្តបរិស័ទខ្លះឋានៈទាបជាងលោកគង្វាល ឬទាបជាងបព្វជិត បព្វជិតាដែលជាអ្នកបុណ្យ។ តាមជំនឿនៃគ្រីស្តសាសនាវិញ គ្រីស្តបរិស័ទទាំងអស់ជាបងប្អូនដែលមានឋានៈស្មើគ្នាទាំងអស់ជា "ក្រុមបូជាចារ្យរបស់ព្រះមហាក្សត្រ" (១សល២,៨)។ តែក្នុងព្រះសហគមន៍ មានគ្រីស្តបរិស័ទខ្លះទទួលមុខងារបម្រើព្រះសហគមន៍ (១ករ១២,៥)។ អ្នកបំពេញមុខងារបម្រើទាំងនោះមិនមែនជាគ្រីស្តបរិស័ទដ៏ប្រសើរជាងគេ ឬមានឋានៈខ្ពស់ជាងគ្រីស្តបរិស័ទឯទៀតៗទេ។ តាមព្រះសហគមន៍ ដែលកាន់តាមរបៀបរបបពិធីផ្សេងៗបូជាចារ្យមានគ្រួសារ។រីឯបព្វជិត បព្វជិតាជាគ្រីស្តបរិស័ទដែលរស់នៅតាមរបៀបប្លែកពីគេ ដោយថ្វាយខ្លួនទាំងស្រុងទៅព្រះជាម្ចាស់ទុកជាសញ្ញាសម្គាល់អំពីព្រះរាជ្យ តែគ្មានឋានៈប្រសើរជាងគ្រីស្តបរិស័ទឯទៀតៗទេ។ ហេតុនេះហើយបានជាយើងសន្មតប្រើពាក្យ Laïcus នេះថា "គ្រីស្តបរិស័ទធម្មតា"។
៤. Liturgia៖ តាមភាសាដើមពាក្យនេះ សំដៅទៅលើកិច្ចការរួមរបស់ប្រជាជនដែលគោរពព្រះរបស់ខ្លួន។ តាំងពីដើមរៀងមកគ្រីស្តបរិស័ទខ្មែរតែងបកប្រែថា "ពិធីបុណ្យ"។ ប៉ុន្តែយើងជាគ្រីស្តបរិស័ទត្រូវដឹងថា យើងមិនពឹងលើកុសលផលបុណ្យ ឬលើផលអានិសង្សនៃបុណ្យទេ តែយើងផ្ញើជីវិតទាំងស្រុងលើព្រះយេស៊ូជាអម្ចាស់ និងជាព្រះសង្គ្រោះ។ ហេតុនេះហើយបានជាយើងសន្មតប្រែពាក្យនេះថា "ពិធីគោរពប្រណិប័តន៍" ដែលមិននាំឲ្យនរណាច្រឡំឡើយ។
- Cultum៖ យើងសន្មតប្រែពាក្យនេះថា "ការ ឬពិធីគោរពបម្រើព្រះជាម្ចាស់ "។
- Rituum, ceremonia៖ យើងសន្មតប្រែពាក្យនេះថា "ពិធី"។
- Orientale Ritum៖ ក្នុងព្រះសហគមន៍កាតូលិកយើងមានក្រុមគ្រីស្តបរិស័ទតែងតែគោរពប្រណិប័តន៍ព្រះជាម្ចាស់តាមពិធីប្លែកពីគ្នា គឺមានរបៀបគោរពប្រណិប័តន៍តាមព្រះសហគមន៍ក្រុងរ៉ូម មានរបៀបគោរពប្រណិប័តន៍តាមព្រះសហគមន៍ក្រិក កូប្ទ ស្លាវ៉ុង។ល។និង។ល។ យើងសន្មតប្រែពាក្យនេះថា "របៀបរបបពិធី"។
- Divinum Officium៖ យើងសន្មតប្រែពាក្យនេះថា "ពិធីលើកតម្តើងសិរីរុងរឿងព្រះជាម្ចាស់តាមពេលកំណត់"។
- Rituale៖ យើងសន្មតប្រែពាក្យនេះថា "ក្បួនពិធី" "សៀវភៅក្បួនពិធី"។
- Predicatio៖ យើងសន្មតប្រែពាក្យនេះថា "ពិធីអត្ថាធិប្បាយគម្ពីរ" ព្រោះពាក្យ "ធម្មទេសនា" ដែលយើងធ្លាប់ប្រើនោះ សំដៅតែលើការពន្យល់ធម៌ប៉ុណ្ណោះ រីឯអ្នកធ្វើពិធីអត្ថាធិប្បាយគម្ពីរយកចិត្តទុកដាក់បកស្រាយបន្ទូល ធ្វើជាពន្លឺបំភ្លឺការរស់នៅរបស់គ្រីស្តបរិស័ទ។ ក្នុងឯកសារ "ពិធីគោរពប្រណិប័តន៍" អស់លោកចែងថា ការអត្ថាធិប្បាយគម្ពីរពិតជាពិធីមួយក្នុងអភិបូជា (ពិធី៥២)។
៥. Magisterium, Traditio៖ យើងសន្មតប្រែពាក្យ Magisterium នេះថា "ការបង្រៀន” (មិនគ្រាន់តែអភិបាលព្រះសហគមន៍ក្រុងរ៉ូមប៉ុណ្ណោះ)។ Traditio៖ “ការបញ្ជូនបន្ត"។
៦. Mysterium៖ អត្ថន័យដើម គឺគម្រោងការដ៏លាក់កំបាំង ដែលព្រះជាម្ចាស់បានសម្តែងឲ្យមនុស្សលោកស្គាល់ ដោយសារព្រះគ្រីស្ត (អភ៣, ៣-៤) តែឥឡូវលែងលាក់បាំងហើយ។ ហេតុនេះហើយបានជាយើងសន្មតប្រែពាក្យនេះថា "គម្រោងការដ៏អស្ចារ្យ"។ ជួនកាលយើងប្រែថា "ព្រឹត្តិការណ៍" គឺសំដៅទៅលើហេតុការណ៍ ដែលកើតក្នុងប្រវត្តិជីវិតព្រះយេស៊ូ (កំណើត ការសោយទិវង្គត។ល។)។ ជួនកាលយើងប្រែថា "ការអាថ៌កំបាំង"។
៧. Ministerium, Munus, officium៖ យើងសន្មតប្រែពាក្យទាំងបីនេះថា "មុខងារបម្រើបន្ទុកការងារ"។
៨. Pontifex Summus ៖ ពាក្យនេះបញ្ចាក់អំពីឋានន្តរសក្ដិរបស់ព្រះចៅអធិរាជក្រុងរ៉ូម ដែលមានន័យថា "មហាបូជាចារ្យ" បម្រើព្រះទាំងប៉ុន្មានរបស់ប្រជាជនក្រុងរ៉ូម។ មហាសន្និបាតចែងពាក្យ Pontifex Summus ច្រើនជាងគេ។ ជួនកាលមានចែង Romanus Episcopus គឺ "អភិបាលព្រះសហគមន៍ក្រុងរ៉ូម" (ពន្លឺ២២)។ មានចែងពាក្យ Papa (គឺ "លោកតា") តែពីរឬបីដងទេ។ ក្នុងឯកសារទាំងនោះមានចែងអំពីអំណាចរបស់លោកដែលជា "មេដឹកនាំ" (Caput) ជា "ប្រធាន" (Praesidium) របស់ក្រុមអភិបាល គឺមានបញ្ជាក់អំពីទំនាក់ទំនងរបស់លោកជាមួយនឹងអភិបាលឯទៀតៗ ក្នុងឋានៈលោកជាអ្នកបន្តមុខងារពីគ្រីស្តទូតសិលាមក រីឯអភិបាលឯទៀតៗ បន្តមុខងារពីក្រុមគ្រីស្តទូតវិញ។ ហេតុនេះហើយបានជាយើងសន្មតប្រែពាក្យទាំងពីរនោះ ដោយពាក្យតែមួយគឺ "អភិបាលព្រះសហគមន៍ក្រុងរ៉ូម"។ នៅខាងដើមឯកសារទាំងប៉ុន្មាន លោកប៉ូលទី៦ សរសេរថា "ខ្ញុំប៉ូលជាអភិបាល"។ នៅខាងក្រោមឯកសារនីមួយៗ លោកសរសេរថា "ខ្ញុំប៉ូលអភិបាលព្រះសហគមន៍កាតូលិក រួមជាមួយអភិបាលឯទៀតៗ"។ តាំងពីដើមរៀងមកគ្រីស្តបរិស័ទខ្មែរយើងតែងប្រើពាក្យ "សម្តេចប៉ាប" ដោយមានបំណងប្រៀបធៀបអភិបាលព្រះសហគមន៍ក្រុងរ៉ូម ទៅនឹងសម្ដេចសង្ឃ តែគំនិតនេះខុសនឹងព្រះបន្ទូលផ្ដែផ្ដាំរបស់ព្រះយេស៊ូ។
៩. Presbyter, Sacerdos៖ ក្នុងភាសាដើម (ហេប្រឺ-ក្រិក-ឡាតាំង) មានចែងពាក្យ Cohen, Iereus, Sacerdos។ តាំងពីឆ្នាំ១៩៧០ គ្រីស្តបរិស័ទខ្មែរតែងបកប្រែពាក្យនេះថា "បូជាចារ្យ" ជាពាក្យចំនឹងអត្ថន័យដើម គឺសំដៅទៅលើអ្នកដែលបូជាយញ្ញដុតថ្វាយព្រះជាម្ចាស់តាមរបៀបគម្ពីរសម្ពន្ធមេត្រីចាស់។ ពាក្យនេះក៏ចំនឹងព្រះយេស៊ូជាមហាបូជាចារ្យរបស់យើង (ហប៧, ១១-២៨) ហើយក៏ចំនឹងគ្រីស្តបរិស័ទ ដែលយកអ្វីទាំងអស់ក្នុងលោកនេះមកថ្វាយព្រះបិតា (១សល២,៨)។
ក្នុងភាសាដើមទាំងបីនោះ ក៏មានពាក្យមួយទៀតគឺ Zichn-Presbyteros-Presbyter។ តាំងពីឆ្នាំ១៩៧០ គ្រីស្តបរិស័ទខ្មែរតែងតែបកប្រែពាក្យនេះថា "បូជាចារ្យ" ដដែលនោះ តែរបៀបបកប្រែនេះខុសនឹងអត្ថន័យដើម។ ក្នុងគម្ពីរអន្តរនិកាយយើងបកប្រែថា "ព្រឹទ្ធាចារ្យ" ដែលចំនឹងអត្ថន័យដើម។ ប៉ុន្តែ តាំងពីពេលរដ្ឋាភិបាលបង្កើតព្រឹទ្ធសភាមក យើងមិនអាចប្រើពាក្យនេះបានទេ។
ឯកសារនៃមហាសន្និបាតក្រោមចំណងជើងថា "ពិធីគោរពប្រណិប័តន៍" មានប្រើតែពាក្យ Sacerdos ប៉ុណ្ណោះ។ ក្នុងឯកសារ "ការរស់នៅរបស់លោកគង្វាល" មានប្រើពាក្យ Sacerdos ប្រហែលម្ភៃដង ហើយពាក្យ Presbyter ច្រើនជាង។ ក្នុងឯកសារឯទៀតៗមានចែងពាក្យ Sacerdos និង Presbyter លាយឡំគ្នា។ ក្នុងឯកសារខ្លះមានចែងពាក្យ Pastor (គង្វាល) សំដៅទៅលើលោកអភិបាល ហើយជួនកាលទៅលើ Presbyter តែម្តង (ពិធី៤២)។
ហេតុនេះបានជាយើងសន្មតបកប្រែពាក្យ Presbyter ថា "លោកគង្វាល" តាម កក ២០,៣៨ និងតាមទម្លាប់ប្រទេសខ្លះដែលនិយាយភាសាអង់គ្លេស។ លោកគង្វាលនេះ ជាសហការីរបស់លោកអភិបាលក្នុងឋានៈលោកជាគង្វាល ហើយទទួលចំណែកក្នុងមុខងារទាំងបីរបស់លោក គឺមុខងារបង្រៀន មុខងារនាំឲ្យគ្រីស្តបរិស័ទបានវិសុទ្ធ និងមុខងារគ្រប់គ្រងព្រះសហគមន៍។
Clergé: យើងបានបកប្រែ "ក្រុមបូជាចារ្យ" ឬ "ក្រុមគង្វាល" តាមកន្លែង។
១០. Resurrectio៖ ពាក្យនេះមានន័យថា "ក្រោកឈរឡើង"។ ព្រះសហគមន៍យកពាក្យនេះ មកសំដៅទៅលើព្រឹត្តិការណ៍ដ៏អស្ចារ្យដែលកើតមកលើលោកយេស៊ូ ក្រោយពីលោកស្លាប់ គឺព្រះជាម្ចាស់ប្រោសឲ្យលោកមានជីវិតវិញ ព្រះអង្គលើកលោកឡើងតែងតាំងជាព្រះគ្រីស្តនិងជាព្រះអម្ចាស់ ហើយប្រទានព្រះវិញ្ញាណដ៏វិសុទ្ធឲ្យព្រះយេស៊ូចាក់បង្ហូរលើក្រុមសាវ័ក។ តាមគម្ពីរដំណឹងល្អទាំងបួនកណ្ឌការណ៍ទាំងបីនោះ ជាព្រឹត្តិការណ៍តែមួយគត់។ តែលោកលូកាដែលចែងកណ្ឌកិច្ចការគ្រីស្តទូតបានបំបែកព្រឹត្តិការណ៍តែមួយនេះ ហាក់ដូចជាព្រឹត្តិការណ៍បីវិញ (កក ១,១-២) ក្នុងគោលបំណងលាតត្រដាងអត្ថន័យតាមថ្ងៃបុណ្យរបស់ជនជាតិយូដា។ ដូច្នេះយើងសន្មតបកប្រែពាក្យនេះថា "ព្រះយេស៊ូមានព្រះជន្មថ្មីដ៏រុងរឿង" ឬ "មានព្រះជន្មថ្មី"។ យើងជៀសវាងពាក្យ "ឡើងវិញ" កុំនាំឲ្យមាននរណាច្រឡំ ដោយគិតថា ព្រះយេស៊ូមានព្រះជន្មដូចពីមុន ឬចាប់ជាតិឡើយ។
១១. Vocatio៖ ធម្មតាយើងបកប្រែពាក្យនេះថា "ព្រះជាម្ចាស់ត្រាស់ហៅ" ជួនកាល "ទិសដៅកំណត់" ជួនកាល "ឧបនិស័យ"។
ការបកប្រែនេះ គ្រាន់តែជាការល្បងលមើលប៉ុណ្ណោះ។ អ្នកមានយោបល់ផ្សេងៗចង់កែសម្រួល សូមផ្ញើសេចក្តីទាំងនោះទៅ fponchaud@gmail.com ។
សូមអរគុណ
François PONCHAUD
ភ្នំពេញ, ថ្ងៃទី២០ ខែកញ្ញា ឆ្នាំ២០១២
សារនៃមហាសន្និបាតផ្ញើជូនមនុស្សទាំងអស់
នៅពេលបើកមហាសន្និបាត
ថ្ងៃទី២០ ខែតុលា ឆ្នាំ១៩៦២
យើងជាអភិបាលព្រះសហគមន៍កាតូលិកទាំងប៉ុន្មាន សូមគោរពជូនមកប្រជាជាតិនានា។ យើងសូមសម្ដែងសេចក្ដីស្រឡាញ់ដ៏ជ្រាលជ្រៅចំពោះមនុស្សទាំងអស់ សូមឲ្យមនុស្សទាំងអស់បានប្រកបដោយសេចក្ដីសុខសាន្ត ដែលព្រះយេស៊ូគ្រីស្តជាព្រះបុត្រារបស់ព្រះជាម្ចាស់ដ៏មានព្រះជន្មគង់នៅនាំមកក្នុងពិភពលោកយើងនិងបានផ្ញើឲ្យព្រះសហគមន៍របស់ព្រះអង្គ។
យើងជួបជុំគ្នាតាមសេចក្ដីអញ្ជើញរបស់លោកអភិបាលព្រះសហគមន៍ក្រុងរ៉ូម យ៉ូហានទី២៣ និងយើងព្យាយាមអធិដ្ឋានរួមគ្នា ដោយមាននាងម៉ារីជាមាតាព្រះយេស៊ូ រួមជាមួយផងដែរ។ យើងនៅទីនេះ ក្នុងឋានៈជាអ្នកបន្តមុខងារពីក្រុមគ្រីស្តទូតមក ដោយមានអភិបាលព្រះសហគមន៍ក្រុងរ៉ូម ដែលបន្តមុខងារពីគ្រីស្តទូតសិលាជាប្រធាន។
សូមពន្លឺនៃព្រះភ័ក្ត្រព្រះគ្រីស្តចាំងឡើង
ពេលយើងប្រជុំគ្នានៅទីនេះ យើងរិះគិតក្រោមការណែនាំនៃព្រះវិញ្ញាណដ៏វិសុទ្ធ រករបៀបកែសម្រួលខ្លួនយើងផ្ទាល់ឲ្យបានជាថ្មី “ឲ្យកាន់តែស្មោះភក្ដីតាមដំណឹងល្អរបស់ព្រះគ្រីស្ត។ យើងនឹងខិតខំយកចិត្តទុកដាក់រៀបរាប់សេចក្ដីពិតទាំងស្រុងរបស់ព្រះជាម្ចាស់យ៉ាងសុទ្ធសាធ ដោយមិនលាក់លៀមអ្វីឡើយ ជូនមនុស្សនាបច្ចុប្បន្នកាល ដើម្បីឲ្យគេអាចយល់យ៉ាងច្បាស់ និងភ្ជាប់ចិត្តនឹងសេចក្ដីពិតនេះដោយចិត្តស្មោះ។
ក្នុងឋានៈយើងជាគង្វាល យើងមានបំណងប្រាថ្នាចង់តបឆ្លើយនឹងតម្រូវការរបស់អស់អ្នកដែលស្វែងរកព្រះជាម្ចាស់ "ដោយសង្ឃឹមថា នឹងរកឃើញទាំងស្ទាបស្ទង់។ តាមពិតព្រះអង្គមិនគង់នៅឆ្ងាយពីយើងម្នាក់ៗទេ”។
ហេតុនេះហើយ បានជាយើងសុខចិត្តប្រតិបត្តិតាមព្រះហឫទ័យរបស់ព្រះគ្រីស្ត ដែលបានបូជាព្រះជន្ម” ដើម្បីនាំព្រះសហគមន៍មួយដ៏ឥតស្លាកស្នាម ឥតជ្រីវជ្រួញ ឥតសៅហ្មង ថ្វាយព្រះអង្គផ្ទាល់ "គឺយើងខិតខំអស់ពីសមត្ថភាពកែសម្រួលព្រះសហគមន៍នេះ ឲ្យបានជាថ្មីខាងព្រះវិញ្ញាណទាំងអ្នកដឹកនាំទាំងសមាជិក ដើម្បីឲ្យព្រះសហគមន៍បង្ហាញមុខរបស់ព្រះគ្រីស្តដែលអាចទាក់ទាញចិត្តមនុស្សលោកបាន គឺបង្ហាញព្រះភ័ក្ត្ររបស់ព្រះគ្រីស្ត ដែលភ្លឺក្នុងចិត្តយើង "ដើម្បីឲ្យចំណេះអំពីសិរីរុងរឿងនៃព្រះជាម្ចាស់ចាំងពន្លឺឡើង"។
ព្រះជាម្ចាស់ស្រឡាញ់មនុស្សលោកយ៉ាងក្រៃលែង
យើងជឿថា ព្រះបិតាស្រឡាញ់មនុស្សលោកយ៉ាងក្រៃលែង ទើបព្រះអង្គចាត់ព្រះបុត្រារបស់ព្រះអង្គមកសង្គ្រោះមនុស្សលោក គឺរំដោះយើងឲ្យបានរួចពីបាបកម្ម និងរួចពីធ្វើទាសករនៃបាបកម្មនោះទៀតផង។ ព្រះបុត្រាបាន "សម្រុះសម្រួលមនុស្សយើងឲ្យបានជានាជាមួយព្រះបិតា និងតែងតាំងសេចក្ដីសុខសាន្ត ដោយបានបូជាព្រះជន្ម"។ ហេតុនេះហើយ បានជាយើងពិតជាបុត្រធីតារបស់ព្រះជាម្ចាស់មែន គឺមិនគ្រាន់តែមានឈ្មោះថា ជាបុត្រធីតាប៉ុណ្ណោះទេ តែយើងពិតជាបុត្រធីតារបស់ព្រះអង្គប្រាកដមែន។ ព្រះគ្រីស្តបានចាត់ព្រះវិញ្ញាណក្នុងនាមព្រះបិតាឲ្យយាងមក ដើម្បីឲ្យយើងអាចរស់នៅបានដោយមានព្រះជន្មផ្ទាល់របស់ព្រះអង្គ ទាំងស្រឡាញ់ព្រះជាម្ចាស់ និងស្រឡាញ់បងប្អូន ហើយរួបរួមទាំងអស់គ្នាក្នុងអង្គព្រះគ្រីស្ត។
ទោះបីយើងផ្ញើជីវិតលើព្រះគ្រីស្តក្ដី ក៏យើងយកចិត្តទុកដាក់នឹងបន្ទុករបស់ខ្លួននៅលើផែនដីនេះដែរ គឺជំនឿសេចក្ដីសង្ឃឹម និងសេចក្ដីស្រឡាញ់ជំរុញយើងឲ្យបម្រើបងប្អូនទាំងស្រុង ដោយយកតម្រាប់តាមព្រះបរមគ្រូដ៏ជាទីសក្ការៈរបស់យើង ដែលព្រះអង្គយាងមក "មិនមែនដើម្បីឲ្យគេបម្រើព្រះអង្គទេ តែដើម្បីបម្រើគេវិញ"។ ហេតុនេះហើយ បានជាព្រះអង្គតែងតាំងសហគមន៍មិនមែន ដើម្បីធ្វើជាម្ចាស់មនុស្សលោកទេតែដើម្បីបម្រើគេវិញ។ "ព្រះគ្រីស្តបានបូជាព្រះជន្មសម្រាប់យើង ហេតុនេះហើយយើងក៏ត្រូវបូជាជីវិតសម្រាប់បងប្អូនយើងដែរ"។
យើងមានសេចក្ដីសង្ឃឹមថា ការរិះគិតរបស់មហាសន្និបាតនេះ មុខជានឹងជួយឲ្យជំនឿចាំងពន្លឺកាន់តែភ្លឺត្រចះត្រចង់ឡើង និងជួយកែសម្រួលជីវិតខាងព្រះវិញ្ញាណឲ្យបានជាថ្មីដែរ។ ដូច្នេះការរិះគិតរបស់មហាសន្និបាតយើងនេះ មុខជានឹងធ្វើឲ្យសេចក្តីដែលវិទ្យាសាស្រ្តបានរកឃើញថ្មីៗ និងការចម្រើនឡើងនៃបច្ចេកទេស ហើយការផ្សព្វផ្សាយវប្បធម៌ស្ទុះឡើង និងបង្កើតផលដ៏ល្អប្រសើរព្រោះការទាំងបីនោះសុទ្ធតែជាទ្រព្យដែលមានតម្លៃដ៏ថ្លៃថ្នូររបស់មនុស្សជាតិ។
ព្រះហឫទ័យស្រឡាញ់របស់ព្រះគ្រីស្តជំរុញយើង
យើងមកប្រជុំគ្នានៅទីនេះ ទាំងនាំយកបញ្ហាមនុស្សលោកមករិះគិត គឺទុក្ខវេទនាទាំងខាងជីវភាពទាំងខាងវិញ្ញាណទុក្ខលំបាក និងសេចក្ដីប៉ងប្រាថ្នានៃប្រជាជាតិនានា ពីគ្រប់មជ្ឈដ្ឋាននៃផែនដីដែលព្រះជាម្ចាស់បានផ្ញើទុកមកយើង។ យើងក៏យកចិត្តទុកដាក់នឹងបញ្ហាដ៏ធ្ងន់ធ្ងររបស់មនុស្សលោកទៀតផង យើងសូមសម្តែងសេចក្ដីស្រឡាញ់ និងសេចក្ដីទុកចិត្តចំពោះមនុស្សទាបជាងគេ ចំពោះអ្នកក្រីក្រជាងគេ និងចំពោះអ្នកទន់ខ្សោយជាងគេ។ ពេលព្រះគ្រីស្តទតឃើញបណ្តាជនទាំងឡាយឃ្លានអាហារ មានជំងឺគ្រប់យ៉ាង វង្វេងមិនស្គាល់ផ្លូវ ព្រះអង្គរំជួលព្រះហឫទ័យអាណិតមេត្តាគេយ៉ាងណាយើងក៏រំជួលចិត្តអាណិតមេត្តាមនុស្សលោកនាបច្ចុប្បន្នយ៉ាងនោះដែរ។ យើងរួមសាមគ្គីជាមួយអស់អ្នកដែលមិនអាចទៅដល់ការអភិវឌ្ឍន៍ ដែលមានលក្ខណៈជាមនុស្សយ៉ាងពិតប្រាកដ ព្រោះគ្មាននរណាបានជួយយ៉ាងគ្រប់គ្រាន់ដល់គេនៅឡើយទេ។
ហេតុនេះហើយ បានជានៅក្នុងមហាសន្និបាតនេះ យើងនឹងលើកបញ្ហាលោកីយ៍ទាំងនោះមករិះគិតយ៉ាងយូរ គឺជាបញ្ហាទាក់ទិននឹងតម្លៃដ៏ថ្លៃថ្នូររបស់មនុស្ស និងទាក់ទិននឹងសហគមន៍ដ៏ពិតប្រាកដនៃប្រជាជាតិនានា។ "ព្រះហឫទ័យស្រឡាញ់របស់ព្រះគ្រីស្តជំរុញយើង" "ប្រសិនបើនរណាម្នាក់ឃើញបងប្អូនខ្វះខាតតែមិនអើពើនឹងគេទេ តើសេចក្ដីស្រឡាញ់របស់ព្រះជាម្ចាស់ស្ថិតនៅក្នុងអ្នកនោះដូចម្តេចកើត?"។
គម្រោងការណ៍ពីរដ៏សំខាន់
ក្នុងសារផ្សព្វផ្សាយតាមវិទ្យុនាថ្ងៃ ១១ កញ្ញា ១៩៦២ លោកយ៉ូហានទី២៣ ជាអភិបាលព្រះសហគមន៍ក្រុងរ៉ូម បានគូសសង្កត់លើបញ្ហាពីរដែលមានដូចតទៅ៖
- មុនដំបូងលោកសូមលើកបញ្ហាសន្តិភាពរវាងប្រជាជននានាមករិះគិត។ តើនរណាមិនស្អប់សង្គ្រាម? តើនរណាមិនចង់បានសន្តិភាព? ព្រះសហគមន៍ចង់បានសន្តិភាពច្រើនជាងអ្នកឯទៀតៗទាំងអស់ ព្រោះព្រះសហគមន៍ជាមាតារបស់មនុស្សទាំងអស់។ តាមប្រសាសន៍ជាញឹកញាប់របស់លោកអភិបាលព្រះសហគមន៍ក្រុងរ៉ូមនោះ ព្រះសហគមន៍នៅតែប្រកាសថា ខ្លួនស្រឡាញ់សន្តិភាពប៉ងចង់បានសន្តិភាព ចង់រួមសហការយ៉ាងស្មោះ ជាមួយអស់លោកអ្នកដែលខិតខំកសាងសន្តិភាពដោយចិត្តទៀងត្រង់។ ព្រះសហគមន៍ខិតខំអស់ពីសមត្ថភាពធ្វើឲ្យប្រជាជាតិនានាទាក់ទងគ្នាទៅវិញទៅមក ឲ្យយល់ចិត្តគ្នាឲ្យរាប់រកគ្នាទៀតដែរ។ មហាសនិ្នបាតយើងនេះ ក៏ផ្តល់សក្ខីភាពដ៏រស់រវើក ដែលអាចមើលឃើញបានថា ខ្លួនជាសញ្ញាសម្គាល់អំពីមនុស្សដែលមានជាតិសាសន៍ប្លែកពីគ្នាប្រជាជាតិ និងភាសាប្លែកពីគ្នា ពិតជាសហគមន៍ដែលស្រឡាញ់គ្នាដូចបងប្អូនបង្កើតមែន។ យើងសូមប្រកាសថា មនុស្សគ្រប់ៗគ្នាអាចរួបរួមគ្នាដូចជាបងប្អូនបង្កើត បានដោយគ្មានព្រំដែន និងគ្មានអរិយធម៌ណាមកបំបែកគេបានឡើយ។
- បន្ទាប់មកលោកយ៉ូហានទី២៣ ជាអភិបាលព្រះសហគមន៍ក្រុងរ៉ូម រំឭកយើងអំពីបញ្ហាយុត្តិធម៌ក្នុងសង្គម។ សារលិខិតរបស់លោកក្រោមចំណងជើងថា "ព្រះសហគមន៍ជាមាតា និងជាគ្រូ" បញ្ជាក់យ៉ាងជាក់ច្បាស់ថា មនុស្សលោកទំនើបត្រូវការព្រះសហគមន៍ជាងសម័យមុនៗទៅទៀត ដើម្បីបង្ហាញបញ្ជាក់អំពីភាពអយុត្តិធម៌និងភាពមិនស្មើគ្នា ដែលមនុស្សទ្រាំមិនបាន។ ព្រះសហគមន៍អាចជួយមនុស្សលោក ឲ្យដឹងថាមានសេចក្តីខ្លះ ដែលជាតម្លៃដ៏ថ្លៃថ្នូរតាមលំដាប់លំដោយ យ៉ាងពិតប្រាកដ ដែលអាចណែនាំការរស់នៅរបស់គេ។ ព្រះសហគមន៍អាចជួយមនុស្សឲ្យរស់នៅតាមលក្ខណៈរបស់ខ្លួនជាមនុស្សកាន់តែប្រសើរឡើងៗ និងស្របតាមគោលការណ៍នៃដំណឹងល្អបាន។
ឫទ្ធានុភាពនៃព្រះវិញ្ញាណ
តាមពិតយើងគ្មានមធ្យោបាយខាងសេដ្ឋកិច្ចទេ ហើយយើងក៏គា្មនអំណាចខាងលោកីយ៍ដែរ តែយើងជឿសង្ឃឹមលើឫទ្ធានុភាពនៃព្រះវិញ្ញាណ ដែលព្រះអម្ចាស់យេស៊ូបានសន្យាប្រទានឲ្យព្រះសហគមន៍របស់ព្រះអង្គ។ ហេតុនេះហើយ បានជាយើងសូមអង្វរបងប្អូនដោយចិត្តសុភាពរាបសា អង្វរបងប្អូនដែលយើងបម្រើក្នុងឋានៈជាគង្វាល និងអង្វរបងប្អូនឯទៀតៗដែលផ្ញើជីវិតលើព្រះគ្រីស្ត ព្រមទាំងអង្វរមនុស្សទាំងអស់ ដែលមានឆន្ទៈល្អ "ដែលព្រះជាម្ចាស់សព្វព្រះហឫទ័យសង្គ្រោះ និងនាំឲ្យស្គាល់សេចក្តីពិត" សូមបងប្អូនសុខចិត្តរួមជាមួយយើង ជួយកសាងពិភពលោកប្រកបដោយយុត្តិធម៌ សូមឲ្យមនុស្សស្រឡាញ់គ្នាទៅវិញទៅមក ដូចជាបងប្អូនឲ្យកាន់តែខ្លាំងឡើងៗផង។ គម្រោងការរបស់ព្រះជាម្ចាស់ពិតជាមានដូច្នោះមែន គឺដោយសារមនុស្សស្រឡាញ់គ្នាទៅវិញទៅមកនោះ គឺព្រះអង្គគ្រងរាជ្យលើពិភពលោកយើង និងដូចជាប្រផ្នូលយ៉ាងឆ្ងាយអំពីលោកខាងមុខដែរ។
យើងរស់នៅក្នុងពិភពលោក ដែលមិនទាន់មានសន្តិភាពដ៏ពិតប្រាកដ តាមសេចក្តីប៉ងប្រាថ្នារបស់យើងនៅឡើយ។ មនុស្សក៏ចេះតែតប់ប្រមល់ដោយយល់ឃើញថា មានបច្ចេកទេសចម្រើនយ៉ាងល្អប្រសើរមែន តែបើគ្មានធម្មវិន័យដ៏ខ្ពង់ខ្ពស់ណាមួយណែនាំទេ ការចម្រើននៃបច្ចេកទេសនោះ អាចបណ្តាលឲ្យមានគ្រោះកាចដ៏ធ្ងន់ធ្ងរបំផុត។ សូមពន្លឺនៃសេចក្ដីសង្ឃឹមដ៏ខ្លាំងក្លាចំពោះព្រះយេស៊ូគ្រីស្ត ជាព្រះសង្គ្រោះតែមួយព្រះអង្គគត់ ភ្លឺឡើងក្នុងពិភពលោកយើងនេះកុំខានឡើយ។
សារនៃមហាសន្និបាតនៅថ្ងៃបញ្ចប់
ថ្ងៃទី៨ ខែធ្នូ ឆ្នាំ១៩៦៥
ពាក្យផ្តើម
អស់លោកអភិបាលជាបងប្អូនដ៏ជាទីគោរពសក្ការៈ ដល់ពេលអស់លោកត្រូវចាកចេញ និងបែកខ្ញែកទៅក្នុងពិភពលោកទាំងមូល។ បន្តិចទៀត អស់លោកចេញពីអង្គមហាសន្និបាតទៅជួបមនុស្សជាតិ និងប្រកាសដំណឹងល្អរបស់ព្រះគ្រីស្ត។ យើងរួមគ្នាអស់បួនឆ្នាំមកហើយ យើងខិតខំរិះគិតកែសម្រួលព្រះសហគមន៍ឲ្យបានជាថ្មី។ អស់លោកក៏នឹងយកដំណឹងល្អអំពីព្រះសហគមន៍របស់ព្រះគ្រីស្តដែលកែសម្រួលជាថ្មីនោះទៅជូនដល់គេ។
ពេលនេះពិតជាពេលនៃប្រវត្តិសាស្រ្តដ៏មានអត្ថន័យខ្ពង់ខ្ពស់រកអ្វីមកប្រៀបផ្ទឹមមិនបាន។ អង្គប្រជុំសកលនេះ ពិតជាពេលនិងជាកន្លែងដ៏អស្ចារ្យមែន គឺអតីតកាល បច្ចុប្បន្នកាល និងអនាគតកាលបានជួបជុំគ្នា។ យើងនឹក
អំពីអតីតកាល ព្រោះព្រះសហគមន៍របស់ព្រះគ្រីស្តរួបរួមគ្នានៅទីនេះ ដោយមានប្រពៃណីរបស់ខ្លួន មាន ប្រវត្តិសាស្រ្ត មានមហាសន្និបាតនានាពីសម័យមុនៗមក មានគ្រូបាធ្យាយ មានសន្តបុគ្គល។ល។ រួមគ្នានៅទីនេះ។ យើងនឹកគិតអំពីបច្ចុប្បន្នកាល ព្រោះយើងបែកចេញពីគ្នាទៅកាន់មនុស្សលោកយើងសព្វថ្ងៃដែលជួបការលំបាក ដែលកើតទុក្ខវេទនា ដែលជាប់នឹងអំពើបាប។ល។ តែមនុស្សលោកនេះក៏ចម្រើនឡើងយ៉ាងអស្ចារ្យ និងកាន់តាមគោលការណ៍របស់ខ្លួនដែលមានតម្លៃដ៏ថ្លៃថ្នូរ ហើយក៏មានគុណធម៌របស់ខ្លួនដែរ។ល។ យើងនឹកដល់អនាគតកាល ព្រោះប្រជាជននានាបន្លឺសំឡេងយ៉ាងខ្លាំង ទាមទារយុត្តិធម៌ ចង់បានសន្តិភាព ទោះបីគេដឹងខ្លួនក្ដី ឬមិនដឹងខ្លួនក្ដី ក៏គេនៅតែស្រេកឃ្លានចង់បានជីវិតដ៏ប្រសើរជាងពីមុន គឺគេច្បាស់ជាស្រេកឃ្លានចង់បានជីវិតដែលព្រះសហគមន៍របស់ព្រះគ្រីស្តអាចនិងមានបំណងចង់ផ្តល់ឲ្យគេនោះ។
យើងហាក់ដូចជាឮសម្រែកយ៉ាងខ្លាំងនេះ ពីគ្រប់កន្លែងក្នុងពិភពលោកទាំងមូល តែជាសម្រែកមិនច្បាស់ គឺ អស់អ្នកដែលសម្លឹងមើលមកមហាសន្និបាត សួរយើងទាំងខ្វល់ខ្វាយក្នុងចិត្តថា តើអស់លោកមានសេចក្តីមួយណា មក ប្រាប់យើងឬក៏អត់? តើអស់លោកមានសេចក្តីមួយណាមកប្រាប់យើងជាអ្នកណែនាំប្រទេសឬក៏អត់? តើអស់លោកមានសេចក្តីមួយណាមកប្រាប់យើងជាបញ្ញវន្ត ជាពលករ ជាសិល្បករ។ល។ឬក៏អត់? តើអស់លោកមានសេចក្តីមួយណាមកប្រាប់យើងជាស្ត្រីឬក៏អត់? តើអស់លោកមានសេចក្តីមួយណាមកប្រាប់យើងជាយុវជនយុវនារី ជាអ្នកមានជំងឺជាអ្នកក្រីក្រឬក៏អត់?
យើងមានបំណងចង់តបឆ្លើយនឹងពាក្យអង្វរទាំងនោះ ហេតុដូច្នេះហើយ មហាសន្និបាតខិតខំរិះគិតអស់ រយៈពេលបួនឆ្នាំមកហើយ ដើម្បីជាប្រយោជន៍ដល់ក្រុមទាំងនោះ។ មហាសន្និបាតបានតែង“ធម្មនុញ្ញអំពីព្រះសហគមន៍ ក្នុងពិភពលោកនាបច្ចុប្បន្ន” ជាឯកសារដែលយើងបានប្រកាសផ្សព្វផ្សាយពីមិ្សលមិញដោយអង្គប្រជុំទះដៃអបអរ សាទរទាំងរំភើបចិត្តផង។
យើងបាននឹកស្មឹងស្មាធិ៍អំពីព្រះគ្រីស្ត និងអំពីព្រះសហគមន៍របស់ព្រះអង្គយ៉ាងយូរ។ ពីការស្មឹងស្មាធិ៍នោះ មានចេញសារដើមដំបូងនៅពេលនេះ។ សារនេះនាំដំណឹងអំពីសន្តិភាព និងអំពីការសង្រ្គោះសម្រាប់មនុស្សច្រើនឥតគណនាដែលកំពុងតែរង់ចាំ។ មុនបែកចេញពីគ្នា មហាសន្និបាតចង់បំពេញមុខងាររបស់ខ្លួនជាព្យាការី ដោយប្រកាសសារខ្លីៗ តាមភាសាសាមញ្ញដែលមនុស្សទាំងអស់ស្រួលស្តាប់ អំពីដំណឹងល្អដែលមហាសន្និបាតសូមជូនដល់មនុស្សលោក។ មានតំណាងដ៏ប្រសើរនៃមហាសន្និបាត នឹងប្រកាសក្នុងនាមយើងចំពោះមនុស្សជាតិទាំងមូល។
សារគោរពជូនចំពោះអស់លោកអ្នកណែនាំប្រទេស
នៅក្នុងពេលដ៏មហាឱឡារិកនេះ យើងសូមគោរពជូនទាំងមានសេចក្ដីសង្ឃឹម មកអស់លោកអ្នកដែលកាន់វាសនារបស់មនុស្សលោកនៅលើផែនដីនេះ គឺអស់លោកអ្នកដែលកាន់អំណាចលោកីយ៍។ យើងជាអភិបាលដែលជួបជុំគ្នាក្នុងមហាសន្និបាតសកលលើកទី២១ នៃព្រះសហគមន៍កាតូលិក នៅពេលហៀបនឹងបែកខ្ញែងគ្នា ក្រោយពីបានខិតខំរិះគិតអស់បួនឆ្នាំមកហើយ។ យើងសូមគោរពជូនសារនេះ ដោយដឹងខ្លួនយ៉ាងច្បាស់អំពី បេសកកម្ម របស់ យើង ចំពោះមនុស្សជាតិ។
យើងសូមប្រកាសយ៉ាងជាក់ច្បាស់ថា យើងគោរពអំណាច និងភាពជាម្ចាស់ការរបស់អស់លោកអ្នក។ យើងក៏គោរពមុខងារដ៏ប្រសើររបស់អស់លោកអ្នកដែរ យើងទទួលស្គាល់ច្បាប់ដ៏ត្រឹមត្រូវរបស់អស់លោកអ្នក។
យើងរាប់អស់លោកអ្នកដែលបង្កើតច្បាប់ និងអស់លោកអ្នកដែលអនុវត្តតាមច្បាប់ទាំងនោះទុកថាមានតម្លៃផងដែរ។ ក៏ប៉ុន្តែ យើងសូមជម្រាបជូនអស់លោកអ្នក នូវសេចក្តីមួយដ៏សក្ការៈបំផុតដែលមានដូចតទៅ៖ មានព្រះជាម្ចាស់តែ មួយព្រះអង្គគត់ដ៏ប្រសើរឧត្តម។ មានព្រះជាម្ចាស់តែមួយព្រះអង្គគត់ជាដើមនិងជាទិសដៅចុងបំផុតនៃជីវិតមនុស្ស លោក។ មានព្រះជាម្ចាស់តែមួយព្រះអង្គគត់ ជាប្រភពនៃអំណាចរបស់អស់លោកអ្នក និងជាមូលដ្ឋានគ្រឹះនៃច្បាប់ របស់អស់លោកអ្នកដែរ។
អស់លោកអ្នកមានភារកិច្ចលើកស្ទួយឲ្យមានរបៀបរៀបរយ និងសន្តិភាពក្នុងចំណោមមនុស្សនៅលើផែនដី។ ប៉ុន្តែ សូមកុំភ្លេចថា មានតែព្រះជាម្ចាស់មួយព្រះអង្គទេ ជាព្រះបិតារបស់មនុស្សទាំងអស់ ព្រះអង្គមានព្រះជន្មគង់នៅ និងជាព្រះដ៏ពិតប្រាកដ។ មានតែព្រះគ្រីស្តមួយព្រះអង្គទេ យាងមកប្រាប់និងបង្រៀនយើងឲ្យដឹងថា យើងទាំងអស់គ្នាសុទ្ធតែជាបងប្អូនគ្នា។ ព្រះអង្គជាព្រះបុត្រារបស់ព្រះជាម្ចាស់តាំងពីអស់កល្បជានិច្ច គឺព្រះគ្រីស្តនេះហើយដែលអាចបង្កើតរបៀបរៀបរយ និងកសាងសន្តិភាពនៅលើផែនដីបាន ដ្បិតព្រះអង្គណែនាំប្រវត្តិសាស្រ្តរបស់មនុស្សលោក។ មានតែព្រះគ្រីស្តមួយព្រះអង្គទេដែលអាចទាក់ទាញចិត្តមនុស្សឲ្យលះបង់កិលេសតណ្ហា គឺចិត្ត លោភលន់ កំហឹង និងអវិជ្ជាដែលបណ្តាលឲ្យកើតសង្គ្រាម និងកើតទុក្ខ។ ព្រះអង្គយកនំប៉័ងរបស់មនុស្សជាតិមកប្រសិទ្ធិពរ គឺព្រះអង្គប្រោសឲ្យការងារ និងទុក្ខលំបាករបស់មនុស្សលោកបានវិសុទ្ធ ព្រះអង្គក៏ប្រទានអំណរឲ្យមនុស្សលោក ជាអំណរដែលអស់លោកអ្នកមិនអាចផ្តល់ឲ្យគេបានទេ។ នៅពេលគេកើតទុក្ខ ព្រះអង្គលើកទឹកចិត្តគេតាមរបៀប អស់លោកអ្នកមិនអាចសម្រាលទុក្ខគេបានឡើយ។
ក្នុងប្រទេសរបស់អស់លោកអ្នកដែលស្ថិតនៅក្នុងលោកនេះដែលតែងតែកន្លងទៅ ព្រះគ្រីស្តកំពុងសាងសង់ព្រះសហគមន៍តាមរបៀបដ៏អាថ៌កំបាំង គឺព្រះសហគមន៍ជាបុរីខាងព្រះវិញ្ញាណដែលនៅស្ថិតស្ថេរអស់កល្បជានិច្ច។ អស់រយៈពេលជិតពីរពាន់ឆ្នាំមកហើយ ព្រះសហគមន៍មានបទពិសោធន៍ផ្សេងៗជាច្រើន ក្នុងការទាក់ទងជាមួយអស់លោកអ្នកជាអ្នកកាន់អំណាចនៅលើផែនដី។ សព្វថ្ងៃ តើព្រះសហគមន៍សូមអ្វីពីសំណាក់អស់លោកអ្នក? ក្នុងឯកសារមួយដ៏សំខាន់នៃមហាសន្និបាតនេះ ព្រះសហគមន៍សូមសេរីភាពពីសំណាក់អស់លោកអ្នក គឺសេរីភាពខាងជំនឿ ជាសេរីភាពប្រកាសជំនឿរបស់ខ្លួន សេរីភាពស្រឡាញ់និងបម្រើព្រះរបស់ខ្លួន សេរីភាពក្នុងការរស់នៅ និងសេរីភាព ប្រកាសសាររបស់ខ្លួនដែលផ្តល់ជីវិតដល់មនុស្សលោក។ សូមកុំខ្លាចព្រះសហគមន៍ឲ្យសោះ ព្រះសហគមន៍ក៏ដូចព្រះបរមគ្រូរបស់ខ្លួនដែរ គឺព្រះអង្គមានសកម្មភាពដ៏អាថ៌កំបាំងម៉្យាង ព្រះអង្គមិនប៉ះពាល់លុកលុយលើបុព្វសិទ្ធិរបស់អស់លោកអ្នកទេ តែព្រះអង្គព្យាបាលមនុស្សទាំងស្រុងឲ្យបានរួចពីអ្វីៗដែលមិនទៀងទាត់ ព្រះអង្គប្រែទ្រង់ទ្រាយ មនុស្ស ហើយផ្តល់សេចក្ដីសង្ឃឹម សេចក្ដីពិត និងសោភ័ណភាពយ៉ាងពេញបរិបូណ៌ឲ្យមនុស្សលោកផងដែរ។
ចូរបណ្តោយឲ្យព្រះគ្រីស្តបំពេញសកម្មភាពដែលជម្រះសង្គម កុំបដិសេធព្រះអង្គ។ ប្រសិនបើអស់ លោក អ្នក មិនព្រមទទួលព្រះអង្គ អស់លោកអ្នកដូចជាឆ្កាងព្រះអង្គម្តងទៀត។ ប្រសិនបើអស់លោកអ្នកឆ្កាងព្រះអង្គ ម្តងទៀតនោះ អស់លោកអ្នកមុខជាប្រមាថព្រះជាម្ចាស់ពុំខាន ដ្បិតព្រះអង្គពិតជាព្រះបុត្រា របស់ព្រះបិតាមែន។ ប្រសិនបើអស់លោកអ្នកឆ្កាងព្រះអង្គម្តងទៀតនោះ ក៏ដូចជាអស់លោកអ្នកធ្វើអត្តឃាតកម្មដែរ ព្រោះព្រះអង្គពិតជាបុត្រមនុស្ស។ ចូរបណ្តោយឲ្យយើងជាអ្នកបម្រើដ៏សុភាពរាបសារបស់ព្រះអង្គ អាចផ្សព្វផ្សាយនូវដំណឹងល្អស្តីអំពីសន្តិភាព ដោយគ្មានអ្វីរារាំងឡើយ ដូចយើងបានរិះគិតក្នុងមហាសន្និបាតនេះ។ ប្រជាជនរបស់អស់លោកអ្នកមុខជានឹងទទួលផលប្រយោជន៍មុនគេពុំខានពីព្រះសហគមន៍ ដ្បិតព្រះសហគមន៍តែងតែអប់រំប្រជាពលរដ្ឋជូនអស់លោកអ្នក គឺឲ្យគេមានចិត្តស្មោះត្រង់នឹងរដ្ឋអំណាច ឲ្យស្រឡាញ់សន្តិភាពក្នុងសង្គម និងឲ្យស្រឡាញ់ការចម្រើនឡើងនៃប្រទេស។
នៅថ្ងៃបង្ហើយមហាសន្និបាតសកលទី២១ ជាថ្ងៃដ៏មហាឱឡារិកនេះ ព្រះសហគមន៍សូមយកសេចក្ដីស្រឡាញ់ ការបម្រើ កម្លាំងខាងវិញ្ញាណ និងខាងសីលធម៌ មកជូនអស់លោកអ្នកតាមរយៈយើង។ ព្រះសហគមន៍សូមគោរព ជូនសារនៃការសង្គ្រោះនិង សូមគោរពជូនពរដល់អស់លោកអ្នក។ ព្រះសហគមន៍ជូនពរដោយមានចិត្តរីករាយ និង ចិត្តស្មោះត្រង់យ៉ាងណា សូមអស់លោកអ្នកទទួលពរដោយចិត្តរីករាយ និងដោយចិត្តស្មោះយ៉ាងនោះដែរ។ សូម យកសារនិងពរទាំងនោះ ទៅចែកចាយដល់ប្រជាជនរបស់អស់លោកអ្នកឲ្យយើងផង។
សារគោរពជូនចំពោះបញ្ញវន្ត និងអ្នកវិទ្យាសាស្រ្ត
ព្រះសហគមន៍សូមគោរពជម្រាបយ៉ាងពិសេសដល់អស់លោកអ្នកដែលស្វែងរកសេចក្ដីពិត គឺអស់លោកអ្នក ជាបញ្ញវន្តជាអ្នករិះគិតយ៉ាងជ្រាលជ្រៅ និងជាអ្នកវិទ្យាសាស្រ្ត ជាអ្នកស្វែងរកនិងសិក្សាអំពីមនុស្ស រុករកឲ្យស្គាល់កន្លែងថ្មីក្នុងពិភពលោក ជាអ្នកស្វែងរកខាងប្រវត្តិសាស្រ្ត។ល។ អស់លោកអ្នកពិតជាអ្នកធ្វើបូជនីយយេសចរទៅរក ពន្លឺ។ ព្រះសហគមន៍ក៏សូមគោរពអស់លោកអ្នកដែលឈប់តាមផ្លូវ លែងស្វែងរកពន្លឺ ព្រោះអស់លោកអ្នកអស់កម្លាំងពេក ឬខកចិត្តព្រោះបានស្វែងរកដោយឥតបានផលតាមបំណងប្រាថ្នា។ ហេតុអី្វព្រះសហគមន៍សូមគោរពជម្រាបមកអស់លោកអ្នកយ៉ាងពិសេសដូច្នេះ? ព្រះសហគមន៍ជម្រាបមកយ៉ាង ពិសេសដូច្នេះ ដ្បិតយើងទាំងអស់គ្នាជាអភិបាលដែលជួបជុំគ្នាក្នុងមហាសន្និបាតនេះ ក៏ខិតខំស្តាប់សេចក្ដីពិតដែរ។ អស់រយៈបួនឆ្នាំហើយ យើងបានខិតខំស្វែងរកអត្ថន័យឲ្យបានកាន់តែជ្រៅទៅដោយប្រុងប្រយ័ត្នជាសារនៃសេចក្តីពិត ដែលព្រះគ្រីស្តបានផ្ញើទុកមកព្រះសហគមន៍។ យើងក៏ខិតខំស្តាប់តាមព្រះវិញ្ញាណនៃសេចក្ដីពិត បំភ្លឺយើងដោយចិត្តស្មោះឡើងៗទៀតដែរ។
ហេតុនេះហើយបានជាយើងត្រូវតែនិយាយជាមួយបងប្អូនដោយមិនអាក់ខានឡើយ។ ផ្លូវរបស់បងប្អូនក៏ជា ផ្លូវរបស់យើងដែរ ផ្លូវរបស់បងប្អូនមិនដែលប្លែកពីផ្លូវរបស់យើងទេ។ យើងក៏ជាមិត្តសម្លាញ់របស់បងប្អូនដែលស្វែងរកតាមឧបនិស្ស័យរបស់បងប្អូនរៀងៗខ្លួន យើងក៏រួមសាមគ្គីជាមួយបងប្អូនដែលតែងនឿយហត់ យើងក៏ស្ងើចសរសើរបងប្អូន នៅពេលបងប្អូនមានជ័យជម្នះដោយរកឃើញអ្វីមួយថ្មី។ ពេលបងប្អូនធ្លាក់ទឹកចិត្តឬបរាជ័យ យើងក៏លើក ទឹកចិត្តបងប្អូន និងសម្រាលទុក្ខបងប្អូនដែរ។
យើងមានសារគោរពជូនបងប្អូនដូចតទៅ៖ ចូរស្វែងរកបន្តទៅទៀតទៅ កុំអស់សង្ឃឹមពេលអ្នករកមិនឃើញសេចក្ដីពិតភ្លាមៗតាមបំណង! ចូរចងចាំប្រសាសន៍របស់សន្តៈអូហ្គូស្តាំង ជាមិត្តសម្លាញ់ដ៏ប្រសើររបស់បងប្អូនថា៖ “យើងនាំគ្នាខិតខំស្វែងរក ដោយមានបំណងចង់រកឲ្យឃើញ។ បើយើងរកឃើញហើយ យើងនាំគ្នាស្វែងរកតទៅទៀត”។ អស់អ្នកដែលបានរកឃើញសេចក្ដីពិតហើយ តែនៅតែស្វែងរកសេចក្ដីពិតនេះតទៅទៀត ពិតជាមានសុភមង្គលហើយ។ គេខិតខំយល់សេចក្តីពិតនេះឲ្យកាន់តែជ្រៅទៅៗ និងរកពន្យល់តាមរបៀបថ្មី មកចែកចាយដល់អ្នកដទៃទៀត។ អស់អ្នកដែលស្វែងរកសេចក្តីពិត តែមិនទាន់ឃើញ ប៉ុន្តែនៅតែដើររកដោយចិត្តស្មោះ ពិតជាមានសុភមង្គលហើយ! សូមស្វែងរកពន្លឺសម្រាប់បំភ្លឺថ្ងៃស្អែក ដោយយកពន្លឺថ្ងៃនេះមកបំភ្លឺ រហូតតទៅដល់ពន្លឺដ៏ពេញលក្ខណៈលេចឡើង។
ប៉ុន្តែសូមកុំភ្លេចថា បញ្ញាវន្តជាអ្នករិះគិត ពិតជាបំពេញកិច្ចការមួយដ៏ប្រសើរបំផុត ហើយក៏ត្រូវដឹងច្បាស់ថា
ការរិះគិតគឺជាភារកិច្ចមួយដ៏សំខាន់ជាងគេដែរ។ អ្នកបិទភ្នែក ដោយមិនព្រមឃើញពន្លឺ ពិតជាជនអព្វមង្គលមែន។ អ្នករិះគិតពិតជាទទួលខុសត្រូវយ៉ាងទម្ងន់ម៉្យាងដែរ អស់អ្នកប្រើឧបាយកលផ្សេងៗជាច្រើនបណ្តាលឲ្យអ្នកដទៃធ្លាក់ទឹកចិត្ត ពិតជានាំឲ្យគេអួតបំប៉ោង បញ្ឆោតគេ ហើយក៏បង្ខូចចិត្តគំនិតគេទៀត។ អស់អ្នកស្វែងរកខាងវិទ្យាសាស្រ្ត ត្រូវកាន់តាមគោលការណ៍តែមួយថា គឺត្រូវខិតខំរិះគិតឲ្យបានត្រឹមត្រូវជានិច្ច។ ហេតុនេះហើយបានជាយើងគ្មានបំណងចង់ឲ្យបងប្អូនវិលវល់ក្នុងចិត្តទេ យើងក៏មិនចង់ឲ្យបងប្អូនស្រវាំង ភ្នែកដោយសារពន្លឺរបស់យើងចាំងទៅលើនោះឡើយ។ យើងគ្រាន់តែសូមជូនពន្លឺនៃចង្កៀងដ៏អាថ៌កំបាំងរបស់យើង មកបងប្អូន គឺជូនពន្លឺនៃជំនឿរបស់យើងតែប៉ុណ្ណោះ។ យើងជាសាវ័កដ៏សុភាពរាបសារបស់ព្រះបរមគ្រូជាអម្ចាស់ដ៏ ខ្ពង់ខ្ពស់នៃការរិះគិត ព្រះអង្គបានផ្ញើពន្លឺនេះមកយើង។ ព្រះអង្គជាមនុស្សតែម្នាក់គត់ដែលមានប្រសាសន៍ថា “ខ្ញុំជា ពន្លឺបំភ្លឺមនុស្សលោក ខ្ញុំជាមាគ៌ា ខ្ញុំជាសេចក្ដីពិត និងជាជីវិត”។
ប្រសាសន៍នេះពិតជាមានប្រយោជន៍សម្រាប់បងប្អូន។ តាំងពីដើមរៀងមក មនុស្សមិនដែលមានលទ្ធភាព ធ្វើឲ្យវិទ្យាសាស្រ្តដ៏ពិតប្រាកដ និងជំនឿដ៏ពិតប្រាកដ អាចទាក់ទងគ្នាដូចសព្វថ្ងៃនេះបាន។ វិទ្យាសាស្រ្ត និងជំនឿបម្រើសេចក្ដីពិតតែមួយគត់។ កុំឃាត់ឃាំងមិនឲ្យវិទ្យាសាស្រ្តនិងជំនឿជួបជុំគ្នាឡើយ! ចូរទុកចិត្តលើជំនឿជាមិត្តសម្លាញ់យ៉ាងជិតស្និទ្ធិនៃប្រាជ្ញារបស់មនុស្ស! ចូរយកជំនឿធ្វើជាពន្លឺរបស់ខ្លួន ដើម្បីឲ្យបានយល់សេចក្ដីពិតទាំងមូល។ យើងជាអភិបាលនៃពិភពលោកទាំងមូលដែលមកជួបជុំគ្នាជាមហាសន្និបាតនៅក្រុងរ៉ូមនេះ មុននឹងបែកខ្ញែងពីគ្នា យើងសូមជូនពរដល់បងប្អូន សូមលើកទឹកចិត្តបងប្អូន សូមឲ្យបងប្អូនមានសេចក្ដីសង្ឃឹមជានិច្ចផង។
សារគោរពជូនចំពោះសិល្បករ
សូមគោរពជូនមកបងប្អូនទាំងអស់ជាសិល្បករ។ បងប្អូនចូលចិត្តសោភ័ណភាពជាខ្លាំង ហើយតែងតែបម្រើសោភ័ណភាពនោះផង។ បងប្អូនជាកវី ជាអ្នកនិពន្ធ ជាវិចិត្រករ ជាស្ថាបត្យករ ជាដូរ្យតន្ត្រីករ ជាអ្នកលេងល្ខោន ជាអ្នកផលិតខ្សែភាពយន្ត។ល។ មហាសន្និបាតនៃព្រះសហគមន៍ ក៏ជម្រាបជូនមកបងប្អូនតាមរយៈយើងថា ប្រសិនបើបងប្អូនស្រឡាញ់សិល្បៈដ៏ពិតប្រាកដ នោះបងប្អូនពិតជាមិត្តសម្លាញ់របស់យើងមែន។
តាំងពីយូរយារណាស់មកហើយ ព្រះសហគមន៍ចងសម្ពន្ធមេត្រីជាមួយបងប្អូន។ បងប្អូនបានស្ថាបនា និង តែងលម្អវិហាររបស់យើង។ បងប្អូនបានលើកតម្កើងសេចក្ដីបញ្ជាក់នៃលទ្ធិជំនឿរបស់យើង ធ្វើឲ្យពិធីគោរពប្រណិប័តន៍របស់យើងកាន់តែប្រសើរឡើងៗ។បងប្អូនបានជួយព្រះសហគមន៍ឲ្យបកស្រាយអត្ថន័យព្រះបន្ទូលដែលមកពីព្រះជាម្ចាស់តាមរូបគំនូរនិងតាមរូបភាព បងប្អូនក៏នាំឲ្យមនុស្សលោកអាចស្គាល់ពិភពដែលភ្នែកមនុស្សមើលមិនឃើញទៀតដែរ។
សព្វថ្ងៃក៏ដូចកាលពីមុនដែរ ព្រះសហគមន៍ត្រូវការបងប្អូន ហើយក៏បែរមុខមករកបងប្អូន។ ព្រះសហគមន៍ ជម្រាបជូនមកបងប្អូនតាមរយៈយើងថា កុំបណ្តោយឲ្យសម្ព័ន្ធមេត្រីរបស់យើងដាច់ឡើយ ព្រោះសម័្ពន្ធមេត្រីនេះ បានបង្កើតលទ្ធផលដ៏ប្រសើរលើសអ្វីៗទាំងអស់រួចមកហើយ។ កុំបដិសេធយកទេពកោសល្យរបស់ខ្លួនមកបម្រើសេចក្ដីពិត របស់ព្រះជាម្ចាស់ឡើយ។ កុំបិទចិត្តគំនិតមិនឲ្យខ្យល់នៃព្រះវិញ្ញាណដ៏វិសុទ្ធចូលឡើយ។
ពិភពលោកយើងនេះត្រូវការសោភ័ណភាព កុំឲ្យខ្លួនធ្លាក់ទឹកចិត្តអស់សង្ឃឹម។ សោភ័ណភាពក៏ដូចសេចក្ដីពិតដែរ គឺផ្តល់ឲ្យមនុស្សមានចិត្តសប្បាយរីករាយ។ សោភ័ណភាពពិតជាផលដ៏ប្រសើរដែលមិនចេះចាស់ជរានិង បណ្តោយឲ្យមនុស្សគ្រប់ជំនាន់អាចទាក់ទងគ្នាបាន និងអាចរួបរួមគ្នាស្ងើចសរសើរទៀតផង។ កិច្ចការទាំងនោះ ពិតជាស្នាដៃរបស់បងប្អូនមែន។
សូមបងប្អូនបង្កើតស្នាដៃស្អាតបរិសុទ្ធជានិច្ច កុំចង់រកតែផលប្រយោជន៍សម្រាប់ខ្លួនឯងឡើយ។ សូមបងប្អូននឹកចងចាំជានិច្ចថា បងប្អូនពិតជារក្សាសោភ័ណភាពក្នុងពិភពលោកនេះ។ សូមឲ្យគំនិតនេះជួយរំដោះបងប្អូនឲ្យមានសេរីភាពយ៉ាងពេញលេញ កុំផ្ចង់ចិត្តនឹងចំណូលចិត្តដែលតែងតែប្រែប្រួល និងគ្មានតម្លៃដ៏ពិតប្រាកដឡើយ។ សូមបងប្អូនរំដោះខ្លួនឲ្យរួចពីបំណងប្រាថ្នាលោកីយ៍ដែលសម្តែងសេចក្តីយ៉ាងចម្លែកអស្ចារ្យពេកនិងមិនសមរម្យ។
សូមបងប្អូនបានសមតាមឧត្តមគតិដ៏ខ្ពង់ខ្ពស់របស់បងប្អូនជានិច្ចនិងនៅគ្រប់ទីកន្លែង។ ធ្វើដូច្នេះ បងប្អូនក៏សមរម្យទៅជាបុត្រធីតារបស់ព្រះសហគមន៍ ដែលគោរពជូនសាររបស់ខ្លួន ជាសារសម្តែងសេចក្ដីស្រឡាញ់ដ៏ជ្រាលជ្រៅ សម្តែងការសង្គ្រោះនិងព្រះហឫទ័យប្រណីសន្តាសរបស់ព្រះជាម្ចាស់មកបងប្អូន។ នៅថ្ងៃនេះ ព្រះសហគមន៍ក៏ប្រទានពរមកបងប្អូនតាមរយៈយើងដែរ។
សារគោរពជូនចំពោះស្រ្តីទាំងឡាយ
ឥឡូវនេះ យើងសូមជម្រាបមកស្រ្តីទាំងឡាយ គឺស្រ្តីគ្រប់ឋានៈ វណ្ណៈ ស្ត្រីនៅលីវ ឬស្ត្រីមានគ្រួសារ ស្រ្តីមាន កូន និងស្រ្តីមេម៉ាយ។ សូមជម្រាបមកស្ត្រីព្រហ្មចារីដែលថ្វាយខ្លួនចំពោះព្រះជាម្ចាស់ និងស្រ្តីដែលរស់នៅម្នាក់ឯងដែរ។ ចំនួននាង គឺពាក់កណ្តាលនៃមហាគ្រួសាររបស់មនុស្សជាតិហើយ!
នារីទាំងឡាយដឹងច្បាស់ថា ព្រះសហគមន៍មានកិត្តិយសដោយបានលើកតម្កើងនិងរំដោះនារីហើយ។ តាមប្រវត្តិសាស្រ្តដ៏យូរអង្វែងមក ព្រះសហគមន៍តែងតែប្រកាសថា ទោះបីបុរសនិងស្រ្តីមានចរិតលក្ខណៈ និងទេពកោសល្យប្លែកពីគ្នាក៏ដោយ ក៏ស្រ្តីមានតម្លៃស្មើនឹងបុរសយ៉ាងពិតប្រាកដ។ ប៉ុន្តែដល់ពេល គឺឥឡូវនេះហើយ ដែលឧបនិស្ស័យរបស់ស្រ្តីកើតជារូបរាងយ៉ាងពេញលក្ខណៈ។ ស្រ្តីមានឥទ្ធិពលយ៉ាងខ្លាំងក្នុងសង្គមស្រ្តីៗមានកិត្តិយស ដូចពន្លឺសាយភាយឡើង និងមានអំណាចដែលមិនធ្លាប់មានកាលពីសម័យមុនៗនៅឡើយ។
សព្វថ្ងៃ មនុស្សជាតិប្រែប្រួលយ៉ាងខ្លាំង។ ហេតុនេះហើយបានជាស្ត្រីដែលមានគោលគំនិតនៃដំណឹងល្អ ជ្រួតជ្រាបក្នុងចិត្តគំនិត បានជួយមនុស្សជាតិយ៉ាងសម្បើម កុំឲ្យមនុស្សជាតិធ្លាក់ដុនដាប។ បងប្អូនជាស្រ្តីៗអើយ! អ្នកនៅតែមានភារកិច្ចរក្សាក្រុមគ្រួសារជានិច្ច គឺអ្នកស្រឡាញ់ប្រភពនៃជីវិត និងតែងតែស្រឡាញ់ទារក។ អ្នកមានវត្តមាននៅពេលជីវិតចាប់ផ្តើមឡើងយ៉ាងអស្ចារ្យ។ ពេលមនុស្សទទួលមរណភាពក៏អ្នកចេះលួងលោមគេដែរ។ ប្រសិនបើយើងមិនប្រយ័ត្ន បចេ្ចកទេសរបស់យើងអាចបណ្តាលឲ្យជីវិតមនុស្សបាត់លក្ខណៈជាមនុស្ស។ ចូរអ្នករំឭកមនុស្សលោកឲ្យគោរពតម្លៃនៃជីវិត ជាពិសេស យើងអង្វរបងប្អូន សូមរក្សាការពាររអនាគតនៃពូជមនុស្សយើងឲ្យនៅគង់វង្ស។ សូមឃាត់ដៃរបស់អស់អ្នកដែលចង់បំផ្លាញអរិយធម៌របស់មនុស្សជាតិ នៅគ្រាដែលគេបាត់ស្មារតី។
ស្រ្តីៗដែលមានគ្រួសារ និងមានកូន អ្នកជាអ្នកអប់រំមនុស្សជាតិមុនគេបង្អស់ ក្នុងទីលាក់កំបាំងនៃក្រុមគ្រួសារ ។ ចូរបញ្ជូនបន្តប្រពៃណីដូនតាឲ្យកូនប្រុស កូនស្រីយល់ដឹង។ នៅពេលជាមួយគ្នានោះ អ្នកនឹងអប់រំកូនៗ គឺរៀបចំកូនៗឲ្យប្រឈមមុខនឹងអនាគតដែលគ្មាននរណាដឹងជាមុន។ ចូរនឹកចងចាំជានិច្ចថា ម្តាយតែងភ្ជាប់នឹងអនាគតរបស់កូន ដែលនាងប្រហែលនឹងមើលមិនឃើញឡើយ។
ចំពោះស្រ្តីៗនៅលីវ ចូរដឹងថា អ្នកអាចបំពេញឧបនិស្ស័យរបស់ខ្លួនបាន គឺបម្រើអ្នកដទៃដោយចិត្តទូលាយ។ សង្គមហៅរកអ្នកពីគ្រប់មជ្ឈដ្ឋាន ប្រសិនបើគ្មានស្រ្តីណានៅលីវមកជួយទេ មានក្រុមគ្រួសារខ្លះមិនអាចរស់ នៅបានឡើយ។
ជាពិសេសស្ត្រីៗព្រហ្មចារី ដែលញែកខ្លួនថ្វាយព្រះម្ចាស់ សូមអ្នករក្សាភាពបរិសុទ្ធ ជាអ្នកមិនរកប្រយោជន៍ផ្ទាល់ ខ្លួន និងជាអ្នកគោរពប្រណិប័តន៍ព្រះជាម្ចាស់ ក្នុងពិភពយើងនេះដែលមានមនុស្សជាច្រើន រាប់ទុកការត្រេកត្រអាល ភ្លើតភ្លើនតាមកាមគុណថោកទាប ទុកជាផ្លូវធម្មតារបស់មនុស្សលោក ព្រះយេស៊ូបានប្រោសប្រទានឲ្យសេចក្តី ស្រឡាញ់របស់គូស្វាមីភរិយាមានតម្លៃពេញលក្ខណៈ ព្រះអង្គក៏បានលើកតម្កើងការលះបង់ស្នេហា តាមលោកីយ៍ដែរ លុះត្រា អ្នកលះបង់សេចក្ដីស្នេហានោះ តម្រង់ខ្លួនទៅរកសេចក្ដីស្រឡាញ់ដ៏អនន្ត និងនាំឲ្យបម្រើអ្នកដទៃទាំងអស់។
ចំពោះស្រ្តីៗកំពុងរងទុក្ខលំបាក សូមអ្នកក្រោកឈរត្រង់ឡើងនៅក្បែរឈើឆ្កាង ដូចនាងម៉ារីដែរ។ តាមប្រវត្តិសាស្ត ពួកនាងជាច្រើនបានប្រគល់ឲ្យបុរសៗមានកម្លាំងអាចតស៊ូវាយតយុទ្ធរហូតដល់ទីបំផុត គឺរហូតដល់បូជាជីវិតក៏មាន។ ចូរជួយបុរសៗម្តងទៀតឲ្យមានចិត្តក្លាហាន ហ៊ានធ្វើការយ៉ាងអស្ចារ្យ ព្រមទាំងឲ្យគេមានចិត្តអត់ធ្មត់ខន្តីដោយដឹងជានិច្ចថា អ្នកចង់ធ្វើកិច្ចការដ៏ធំអស្ចារ្យ ត្រូវចាប់ផ្តើមដោយធ្វើការតូចៗយ៉ាងសុភាពរាបសាឡើងទៅ។ បងប្អូនជាស្រ្តីៗអើយ! បងប្អូនចេះធ្វើឲ្យសេចក្ដីពិត បានស្រួលស្តាប់ ថ្នាក់ថ្នម លួងលោមចិត្តគេ។ សូមអ្នកជាប់ចិត្តនឹងចង់ធ្វើឲ្យគោលគំនិតនៃមហាសន្និបាតជ្រួតជ្រាបក្នុងស្ថាប័ន ក្នុងសាលារៀន ក្នុងក្រុមគ្រួសារ ក្នុការរស់នៅរបស់មនុស្សជារៀងរាល់ថ្ងៃ។
បងប្អូនជាស្ត្រីៗនៃភិភពលោកទំាងមូលអើយ ទាំងគ្រីស្តបរិស័ទក្ដី មិនមែនគ្រីស្តបរិស័ទក្តី ព្រះជាម្ចាស់បានផ្ញើជីវិតទុកឲ្យនាងហើយ។ ក្នុងគ្រាដ៏សែនធ្ងន់ធ្ងរនៃប្រវិត្តិសាស្រ្តយើងនេះ នាងមានភារកិច្ចសង្រ្គោះសន្តិភាពនៃពិភព លោកហើយ!
សារគោរពជូនចំពោះពលករទាំងឡាយ
យើងជាអភិបាលនៃព្រះសហគមន៍កាតូលិកពីទ្វីបទាំងប្រាំ បានរិះគិតរួមជាមួយគ្នាក្នុងមហាសន្និបាតនេះ។ ក្នុងចំណោមប្រធានបទទាំងប៉ុន្មាន យើងបានរិះគិតអំពីបញ្ហាដ៏ធ្ងន់ធ្ងរដែលចោទឡើងលើមនសិការមនុស្សជាតិ គឺបានរិះគិតអំពីបញ្ហាសភាពការណ៍សេដ្ឋកិច្ច និងសង្គមក្នុងពិភពលោកសព្វថ្ងៃ អំពីបញ្ហាប្រជាជាតិត្រូវរស់នៅជាមួយគ្នាដោយសុខសន្តិភាព ព្រមទាំងអំពីបញ្ហាសាស្រ្តាវុធ បញ្ហាសង្គ្រាម និងសន្តិភាព។ យើងដឹងច្បាស់ថា ដំណោះស្រាយបញ្ហាទាំងនោះមុខជានឹងមានឥទ្ធិពលយ៉ាងខ្លាំងលើការរស់នៅធម្មតារបស់ពលករ ពលការិនី ក្នុងពិភពលោកទាំងមូលពុំខាន។ ហេតុនេះហើយបានជា នៅពេលបញ្ចប់ការពិគ្រោះគ្នានេះ យើងសូមផ្ញើសារនេះ សម្តែងសេចក្តីទុកចិត្តនិងសេចក្ដីស្រឡាញ់របស់យើងមកបងប្អូនជាពលករទាំងឡាយ។ សូមបងប្អូនពលករបានប្រកបដោយសុខសន្តិភាព។
កូនដ៏ជាទីស្រឡាញ់! មុនដំបូង សូមបងប្អូនដឹងឲ្យបានច្បាស់ថា ព្រះសហគមន៍ស្គាល់ទុក្ខវេទនា ការតយុទ្ធ និងសេចក្ដីសង្ឃឹមរបស់ប្អូនៗ។ ព្រះសហគមន៍ក៏ចូលចិត្តយ៉ាងខ្លាំងនូវគុណធម៌ ដែលផ្តល់ឲ្យជីវិតបងប្អូនមានតម្លៃដ៏ថ្លៃថ្នូរ គឺបងប្អូនមានសេចក្ដីក្លាហាន ចិត្តលះបង់សម្រាប់អ្នកដទៃ មនសិការក្នុងអាជីវកម្ម ចិត្តស្រឡាញ់យុត្តិធម៌។ ព្រះសហគមន៍ក៏ទទួលស្គាល់យ៉ាងច្បាស់នូវជំនួយដ៏ធំមហិមារបស់ប្អូនចំពោះសង្គមទាំងមូល គឺប្អូនម្នាក់ៗតាមកន្លែងរៀងៗខ្លួន ទោះបីមនុស្សទូទៅមិនសូវស្គាល់ការងាររបស់បងប្អូនក្តី ជាការងារថោកទាបដែលគេតែងមើលងាយទៀតផង ក៏បងប្អូនតែងតែបម្រើសង្គមទាំងមូលយ៉ាងល្អប្រសើរដែរ។ ព្រះសហគមន៍ដឹងគុណ ហើយសូមអរគុណបងប្អូនតាមរយៈយើង។
ប៉ុន្មានឆ្នាំកន្លងមក ព្រះសហគមន៍នៅតែគិតគូរអំពីបញ្ហាទាំងអស់របស់ពលករពលការិនីក្នុងពិភពលោកទាំងមូល ជាបញ្ហាកាន់តែស្មុគ្រស្មាញឡើងៗ។ ក្នុងចំណោមបងប្អូនមានអ្នកខ្លះបានចាប់អារម្មណ៍នឹងសារលិខិតនៃអភិបាលព្រះសហគមន៍ក្រុងរ៉ូម។ បងប្អូនទាំងនោះបញ្ជាក់ថា ចិត្តគំនិតរបស់ពលករពលការិនី ត្រូវនឹងចិត្តគំនិតអ្នកដឹកនាំដ៏ខ្ពង់ខ្ពស់ខាងវិញ្ញាណរបស់មនុស្សលោក។ លោកយ៉ូហានទី២៣ បានសរសេរ សារលិខិតដែលមានតម្លៃរកអ្វីមកប្រៀបធៀបពុំបាន មកបន្ថែមក្នុងបេតិកភ័ណ្ឌនៃព្រះសហគមន៍។ លោកបានរកផ្លូវឲ្យបងប្អូនចាប់អារម្មណ៍។ លោកសម្តែងយ៉ាង ត្រចះត្រចង់នូវសេចក្ដីស្រឡាញ់របស់ព្រះសហគមន៍ទាំងមូល ចំពោះបងប្អូនជាពលករពលការិនី។ លោកក៏បាន សម្តែងសេចក្តីស្រឡាញ់របស់ព្រះសហគមន៍ចំពោះសេចក្ដីពិត យុត្តិធម៌ សេរីភាព សេចក្ដីស្រឡាញ់ ជាគ្រឹះសម្រាប់សាងសង់សន្តិភាពក្នុងពិភពលោក។ យើងក៏ចង់ទៅជាសាក្សីនៃសេចក្ដីស្រឡាញ់របស់ព្រះសហគមន៍ចំពោះបងប្អូនជាពលករពលការិនីដែរ ហើយសូមប្រកាសដោយស្មោះអស់ពីចិត្តថា ព្រះសហគមន៍ជាមិត្តសម្លាញ់របស់បងប្អូន។ ចូរជឿទុកចិត្តលើព្រះសហ- គមន៍ចុះ! នៅសម័យបុរាណ គួរឲ្យស្តាយណាស់ យើងពលករពលការិនីនិងព្រះសហគមន៍ស្តាប់គ្នាមិនបាន បណ្តាល ឲ្យមិនទុកចិត្តគ្នាទៅវិញទៅមកទេ។ វណ្ណៈកម្មករ និងព្រះសហគមន៍បានរងទុក្ខទាំងសងខាង។ ឥឡូវដល់ពេលសម្រុះសម្រួលគ្នាវិញហើយ ព្រះសហគមន៍នៃមហាសន្និបាតអញ្ជើញបងប្អូនឲ្យលើកតម្កើងការសម្រុះសម្រួលនេះ ដោយគ្មានគំនិតវៀចវេរឡើយ។
ព្រះសហគមន៍ខិតខំស្គាល់បងប្អូនឲ្យកាន់តែច្បាស់ឡើងៗ។ ប៉ុន្តែ បងប្អូនក៏ត្រូវខិតខំយល់អំពីមុខងារព្រះសហគមន៍សម្រាប់បងប្អូនជាប្រជាពលករដែរ។ បងប្អូនពិតជាអ្នកដ៏សំខាន់ជាងគេ ក្នុងកិច្ចបង្កើតការប្រែប្រួលដ៏អស្ចារ្យនៃពិភពលោកនាបច្ចុប្បន្នកាលយើងនេះ។ បងប្អូនជ្រាបច្បាស់ថា ប្រសិនបើគ្មានខ្យល់ដ៏ខ្លាំងពូកែនៃព្រះ វិញ្ញាណផ្តល់ជីវិតរស់រវើកទេនោះ ការប្រែប្រួលនិងសមិទ្ធផលទាំងនោះ មុខជានឹងបណ្តាលឲ្យអន្តរាយដល់មនុស្ស ជាតិជាពុំខាន មិននាំសុភមង្គលឡើយ។ ការស្អប់គ្នាមិនអាចសង្គ្រោះមនុល្សលោកបានទេ! អាហារខាងលោកីយ៍ តែមួយមុខ ក៏មិនអាចធ្វើឲ្យមនុស្សស្កប់ចិត្តបានឡើយ។
ហេតុនេះ សូមបងប្អូនទទួលសាររបស់ព្រះសហគមន៍ដោយអនុគ្រោះ។ ចូរទទួលជំនឿដែលព្រះសហគមន៍សូមជូនមកបងប្អូន ទុកជាពន្លឺសម្រាប់បំភ្លឺផ្លូវជីវិតរបស់បងប្អូន។ ជំនឿនេះពិតជាជំនឿរបស់អ្នកបន្តមុខងារពីគ្រីស្តទូតសិលាមក ជាជំនឿរបស់អភិបាលពីរពាន់នាក់ដែលប្រជុំគ្នាជាមហាសន្និបាត និងជាជំនឿរបស់ប្រជាជនគ្រីស្តបរិស័ទទាំងមូល សូមឲ្យជំនឿនេះបំភ្លឺចិត្តគំនិតបងប្អូន សូមឲ្យជំនឿនេះណែនាំបងប្អូន។ សូមឲ្យជំនឿនេះ ណែនាំបងប្អូនឲ្យស្គាល់ព្រះយេស៊ូគ្រីស្ត ជាមិត្តសំឡាញ់រួមការងាររបស់បងប្អូន ជាព្រះបរមគ្រូ និងជាព្រះសង្គ្រោះមនុស្ស ជាតិទាំងមូល។
សារគោរពជូនចំពោះជនក្រីក្រ អ្នកជំងឺ និងអស់អ្នកដែលកើតទុក្ខលំបាក
មហាសន្និបាតសូមគោរពជូនសារយ៉ាងពិសេស មកអស់បងប្អូនដែលកើតទុក្ខនិងឈឺចុកចាប់គ្រប់យ៉ាង។ មហាសន្និបាតឃើញបងប្អូនសម្លឹងមកយើង ទាំងអង្វរ ទាំងភ្នែកស្រវាំងដោយគ្រុនក្កៅ ឬដោយអស់កម្លាំង ហើយសួរថា ហេតុអ្វីមនុស្សកើតទុក្ខដូច្នេះ? បងប្អូនតប់ប្រមល់ក្នុងចិត្តហើយសួរទៀតថា តើនរណា នៅពេលណាមានគេមកសម្រាលទុក្ខនេះពីយើងបាន? តែគ្មានឮចម្លើយសោះ។ បងប្អូនដ៏ជាទីស្រឡាញ់ ក្នុងឋានៈយើងជាឪពុកនិងជាគង្វាល យើងព្រួយបារម្ភជាខ្លាំងដោយឮស្នូរសម្រែក និងស្នូរត្អូញត្អែរបស់បងប្អូន។ យើងរឹតតែព្រួយ ចិត្តដោយនឹកឃើញថា យើងគ្មានសមត្ថភាពអាចផ្តល់សុខភាពដល់រូបកាយបងប្អូន ឬធ្វើឲ្យបងប្អូនបានធូរស្រាល។ មានតែគ្រូពេទ្យ គិលានុបដ្ឋាក គិលានុបដ្ឋាកយីកា និងអស់អ្នកដែលខិតខំជួយព្យាបាលជំងឺទេ ដែលអាច សម្រាលទុក្ខក្នុងរូបកាយបងប្អូនបាន។
ប៉ុន្តែយើងមានថ្នាំដ៏ប្រសើរជាង និងដែលមានតម្លៃថ្លៃជាង ផ្តល់មកបងប្អូន គឺជំនឿដែលជាសេចក្ដីពិតតែមួយអាចតបឆ្លើយនឹងការអាថ៌កំបាំងនៃទុក្ខលំបាក។ ជំនឿនេះក៏អាចសម្រាលទុក្ខបងប្អូនដោយមិនភាន់ច្រឡំឡើយ។ ចូរផ្ញើជីវិតលើព្រះគ្រីស្ត ជាមនុស្សដែលរងទុក្ខលំបាក ជាព្រះបុត្រារបស់ព្រះជាម្ចាស់ដែលត្រូវគេឆ្កាង ព្រោះតែអំពើបាបរបស់យើង និងដើម្បីសង្គ្រោះយើង។
ព្រះគ្រីស្តមិនបានលប់បំបាត់ទុក្ខទេ ព្រះអង្គក៏មិនសព្វព្រះហឫទ័យបកស្រាយអត្ថន័យយ៉ាងពិស្តានៃទុក្ខដែរ តែព្រះអង្គបានផ្ទុកទុក្ខលំបាករបស់មនុស្សលោកលើព្រះអង្គ។ ដូច្នេះគ្រប់គ្រាន់ហើយដើម្បីឲ្យយើងយល់អំពីតម្លៃដ៏ ថ្លៃថ្នូរនៃទុក្ខលំបាក។
បងប្អូនកំពុងរងទុក្ខអើយ! បងប្អូនដូចជាលីឈើឆ្កាងដ៏ធ្ងន់ធ្ងរដែរ។ បងប្អូនជាអ្នកក្រីក្រ និងជាអ្នកដែល គ្មាននរណារាប់រក បងប្អូនដែលកំពុងយំសោក បងប្អូនដែលត្រូវគេបៀតបៀនធ្វើបាបព្រោះតែសេចក្តីសុចរិត បងប្អូន ដែលគ្មាននរណានិយាយរក បងប្អូនដែលកំពុងរងទុក្ខតែគ្មាននរណាដឹងឮ ចូរមានចិត្តក្លាហានឡើង! ព្រះជាម្ចាស់ ស្រឡាញ់បងប្អូនលើសគេទាំងអស់ ព្រះអង្គប្រទានសេចក្ដីសង្ឃឹម សុភមង្គល និងជីវិតព្រះអង្គឲ្យគ្រងរាជ្យលើបងប្អូនហើយ! បងប្អូនពិតជាបងប្អូនរបស់ព្រះគ្រីស្តដែលកំពុងតែរងទុក្ខមែន! ប្រសិនបើបងប្អូនសុខចិត្ត បងប្អូនក៏អាចសង្គ្រោះមនុស្សលោកបានរួមជាមួយព្រះអង្គដែរ។
នេះជាចំណេះរបស់គ្រីស្តបរិស័ទអំពីទុក្ខ ជាចំណេះតែមួយដែលអាចផ្តល់សេចក្ដីសុខសាន្តមកបងប្អូន។ ចូរដឹងជាក់ច្បាស់ថា បងប្អូនមិននៅម្នាក់ឯងទេ បងប្អូនក៏មិនរស់នៅដាច់ឡែកពីគេដែរ គេមិនលះបង់បងប្អូនចោលទេ កុំនិយាយថា បងប្អូនគ្មានប្រយាជន៍ឡើយ! ផ្ទុយទៅវិញ ព្រះគ្រីស្តហៅបងប្អូន បងប្អូនពិតជារូបតំណាងដែលមានជីវិតរស់រវើករបស់ព្រះអង្គ ហើយបណ្តោយឲ្យគេឃើញព្រះអង្គបានទៀតផង។ ក្នុងនាមព្រះគ្រីស្ត មហាសន្និបាត សូមគោរព ជម្រាបដល់បងប្អូនដោយសេចក្ដីស្រឡាញ់។ មហាសន្និបាតក៏អរគុណបងប្អូន និងបញ្ជាក់ថា ពិតជាស្រឡាញ់បងប្អូន មែន! ព្រះសហគមន៍ជួយគាំទ្របងប្អូន និងជូនពរដល់បងប្អូនទៀតផង។
សារគោរពជូនយុវជនយុវនារីទាំងឡាយ
នៅទីបញ្ចប់ មហាសន្និបាតសូមគោរពជូនសារចុងក្រោយនេះ មកប្អូនៗក្មួយៗជាយុវជនយុវនារីក្នុងពិភពលោកទាំងមូល។ គឺប្អូនៗក្មួយៗនេះហើយនឹងទទួលចង្កៀងពន្លឺពីបងៗ ហើយនឹងរស់នៅក្នុងពិភពលោកនាសម័យដែលប្រែប្រួលយ៉ាងសម្បើមអស្ចារ្យយើងនេះ តាមប្រវត្តិសាស្រ្តមិនដែលមានប្រែប្រួលបែបនេះទេ។ ប្អូនៗក្មួយៗ មុខជានឹងទទួលយកគំរូដ៏ល្អជាងគេ ពីសេចក្តីបង្រៀនរបស់ឪពុកម្តាយ និងរបស់គ្រូបាធ្យាយមកបង្កើតសង្គមនៅថ្ងៃ អនាគតកាល។ ប្អូនៗក្មួយៗ មុខជានឹងរួមសង្គ្រោះខ្លួនឯងក៏បាន ឬក៏រួមអន្តរាយជាមួយសង្គមនោះក៏បានដែរ។
អស់បួនឆ្នាំមកហើយព្រះសហគមន៍ខិតខំរិះគិត ដើម្បីកែទ្រង់ទ្រាយរបស់ខ្លួនឲ្យបានជាថ្មី ក្នុងគោលបំណងបានស្របតាមគម្រោងការរបស់ព្រះគ្រីស្តឲ្យកាន់តែច្បាស់ឡើងៗ គឺព្រះគ្រីស្តដែលបានតែងតាំងព្រះសហគមន៍។ ព្រះអង្គមានព្រះជន្មគង់នៅយ៉ាងអស្ចារ្យ និងនៅក្នុងយុវវ័យជានិច្ចនិរន្តរ៍។ ពេលបញ្ចប់ការរិះគិតអំពីការស់នៅរបស់ខ្លួន ព្រះសហគមន៍បែរមករកប្អូនៗក្មួយៗជាយុវជនយុវនារី ដោយសារមហាសន្និបាតនេះ ព្រះសហគមន៍ទើបនឹងបានអុជចង្កៀងមួយ ជាពិសេសអុជចង្កៀងសម្រាប់ប្អូនៗក្មួយៗ គឺជាចង្កៀងផ្តល់ពន្លឺបំភ្លឺអនាគត ជាអនាគតរបស់ប្អូនៗក្មួយៗនេះហើយ!
ព្រះសហគមន៍ប្រាថ្នាចង់ឲ្យសង្គមដែលប្អូនៗក្មួយៗនឹងសាងសង់នៅពេលអនាគតនោះ គោរពតម្លៃដ៏ថ្លៃថ្នូរ សេរីភាព និងសិទ្ធិរបស់បុគ្គលគ្រប់ៗរូប។ បុគ្គលទាំងនោះ គឺប្អូនៗក្មួយៗនេះឯង!
ព្រះសហគមន៍ប្រាថ្នាចង់ឲ្យសង្គមនាអនាគតកាលនោះ បណ្តោយឲ្យជំនឿអាចលេចចាំងពន្លឺឡើង គឺជំនឿដែលមានតម្លៃដ៏ថ្លៃថ្នូរជានិច្ច ទាំងនៅអតីតកាល ទាំងនៅអនាគតកាល។ សូមឲ្យជំនឿបំភ្លឺចិត្តគំនិតប្អូនៗក្មួយៗដោយសេរី និងផ្តល់សេចក្តីសុខសាន្តឲ្យប្អូនៗក្មួយៗផង។ ព្រះសហគមន៍សង្ឃឹមថា ប្អូនៗក្មួយៗមុខជានឹងទទួលកម្លាំងយ៉ាងខ្លាំង និងបានអំណរសប្បាយយ៉ាងក្រៃលែងបានដែរ។ បើដូច្នេះ ប្អូនៗក្មួយមិនចាញ់ការល្បួងដូចបងៗខ្លះ គឺប្អូនៗក្មួយៗមិនបណ្តោយខ្លួនតាមទស្សនវិជ្ជាដែលទាក់ទាញចិត្ត គឺទស្សនវិជ្ជានាំឲ្យគិតតែពីខ្លួនឯង ឲ្យគិតតែពីការភ្លើតភ្លើនសប្បាយតាមកាមគុណថោកទាប ឬទស្សនវិជ្ជាបណ្តាលឲ្យអស់សង្ឃឹម និងនាំឲ្យវាសនាខ្លួនសាបសូន្យ។ មានលទ្ធិមួយប្រកាសថា គ្មានព្រះទាល់តែសោះ។ លទ្ធិនេះជាអភូតហេតុកើតពីមនុស្សដែលណាយចិត្តនឹងជីវិត នឹងជាអភូតហេតុរបស់ពួកចាស់ជរា។ ព្រះសហគមន៍សង្ឃឹមថា នៅចំពោះលទ្ធិនោះ ប្អូនៗក្មួយៗមុខជានឹងចេះប្រកាសបញ្ជាក់ជំនឿរបស់ខ្លួន ទៅលើជីវិត និងទៅលើអ្វីៗដែលផ្តល់ឲ្យជីវិតមានអត្ថន័យដ៏ថ្លៃថ្នូរ គឺជំនឿយ៉ាងជាក់ច្បាស់ថា មានព្រះបិតាប្រកបដោយព្រះហឫទ័យស្រឡាញ់ និងសុចរិត ព្រះអង្គមានព្រះជន្មគង់នៅពិតប្រាកដមែន។
យើងសូមដាស់តឿនប្អូនៗក្មួយៗក្នុងនាមព្រះបិតានេះ និងក្នុងនាមព្រះយេស៊ូជាព្រះបុត្រាព្រះអង្គដែរ សូមលាតត្រដាងចិត្តគំនិតប្អូនៗក្មួយៗតាមទំហំពិភពលោកទាំងមូល ចូរស្តាប់ពាក្យស្រែកហៅរបស់បងប្អូន។ សូមប្អូនៗក្មួយៗសម្រេចចិត្តយកថាមពលថ្មីរបស់ប្អូនៗក្មួយៗមកបម្រើគេដោយចិត្តក្លាហាន។ សូមប្រឆាំងនឹងអត្ថទត្ថបុគ្គល និយមគ្រប់យ៉ាង។ កុំបណ្តោយខ្លួនតាមទោសៈ និងការស្អប់គ្នា ដែលបណ្តាលឲ្យកើតសង្គ្រាម និងទុក្ខវេទនាគ្រប់ យ៉ាង។ ចូរមានចិត្តទូលំទូលាយ បរិសុទ្ធ ចេះគោរពអ្នកដទៃ និងស្មោះត្រង់ជានិច្ច។ ចូរយកចិត្តទុកដាក់សាងសង់ ពិភពលោកដ៏ល្អប្រសើរជាងពិភពរបស់បងៗ។
ព្រះសហគមន៍មើលប្អូនៗក្មួយៗទាំងទុកចិត្ត និងដោយសេចក្ដីស្រឡាញ់។ ព្រះហគមន៍មានអតីតកាលដ៏យូរ អង្វែងដែលមានតម្លៃដ៏ថ្លៃថ្នូរ ហើយនៅតែរក្សាតម្លៃដ៏ថ្លៃថ្នូរនៃអតីតកាលនេះក្នុងខ្លួន។ ព្រះសហគមន៍ធ្វើដំណើរតាមកាលៈទេសៈ ទាំងនាំមនុស្សលោកឲ្យបានពេញលក្ខណៈជាមនុស្ស និងនាំគេទៅកាន់ទិសដៅចុងបំផុតនៃប្រវត្តិ សាស្រ្ត និងនៃជីវិត។ ព្រះសហគមន៍ពិតជាយុវវ័យនៃពិភពលោកមែន។ ព្រះសហគមន៍មានអ្វីៗដែលផ្តល់កម្លាំងនិង ធ្វើឲ្យមនុស្សពេញចិត្តស្រឡាញ់យុវជនយុវនារី គឺព្រះសហគមន៍មានសមត្ថភាពអរសប្បាយដោយឃើញអ្វីៗដែលកើតឡើង មានសមត្ថភាពចែកចាយអ្វីៗដោយមិនទាមទារសុគុណពីគេ មានសមត្ថភាពកែខ្លួនឲ្យបានជាថ្មីជានិច្ច និងបន្តដំណើរទៅមុខ ដើម្បីឲ្យបានជ័យជម្នះជាថ្មីតទៅទៀត។ ចូរសម្លឹងមើលព្រះសហគមន៍មើល៍! ប្អូនៗក្មួយៗមុខជានឹង ឃើញព្រះភ័ក្ត្រព្រះគ្រីស្តក្នុងព្រះសហគមន៍ពុំខាន។ ព្រះគ្រីស្តជាវិរបុរសដ៏ពិតប្រាកដមែន ព្រះអង្គប្រកបដោយចិត្តសុភាពរាបសា មានប្រាជ្ញាដ៏វាងវៃ ជាព្យាការីប្រកាសសេចក្ដីពិតនិងសេចក្ដីស្រឡាញ់ ជាអ្នកធ្វើដំណើរជាមួយ យុវជនយុវនារី និងជាមិត្តសម្លាញ់របស់ប្អូនៗក្មួយៗ។ ក្នុងនាមព្រះគ្រីស្តនេះហើយ យើងសូមជម្រាបមកប្អូនៗក្មួយៗ សូមដាស់តឿនប្អូនៗក្មួយៗ និងប្រទានពរឲ្យប្អូនៗក្មួយៗផងដែរ។
