ប្រតិទិនកាតូលិកកម្ពុជា ឆ្នាំ«ក»
២០២៥-២០២៦

បងប្អូនជាទីស្រឡាញ់
«ព្រះសហគមន៍ជាមាតាដ៏វិសុទ្ធរបស់យើងយល់ឃើញថា​ មានភារកិច្ចលើកតម្កើងកិច្ចសង្គ្រោះដែលព្រះគ្រីស្ត​ជា​ព្រះស្វាមីបានសម្រេច ដោយចាត់ចែងពិធីនឹករឭកដ៏សក្តារៈតាមថ្ងៃកំណត់តៗមកក្នុង​អំឡុង​ពេល​ពេញ​មួយ​ឆ្នាំ។ ក្នុងអំឡុងពេលពេញមួយឆ្នាំ ព្រះសហគមន៍លាតព្រឹត្តិការណ៍ដ៏អស្ចារ្យ​ដែលព្រះ​គ្រីស្តបានសម្រេច គឺ​តាំង​ពី​ព្រះ​យេស៊ូប្រសូតជាមនុស្ស រហូតដល់ព្រះបិតាលើកព្រះអង្គឡើង និងរហូតដល់បុណ្យថ្ងៃទីហាសិប ហើយ​រហូត​ដល់​ថ្ងៃ​ព្រះ​អម្ចាស់យាងមកយ៉ាងរុងរឿង តាមសេចក្តីរង់ចាំដ៏សែនសុខសាន្តរបស់យើង។
ដោយលើកតម្កើងព្រឹត្តិ​ការណ៍​ដ៏អស្ចារ្យរបស់ព្រះគ្រីស្តដែលរំដោះយើ​ង​បែបនេះ ព្រះសហគមន៍​ក៏បើក​ទ្រព្យ​ដ៏​មាន​តម្លៃនៃអនុភាព និងនៃគុណបុណ្យព្រះអម្ចាស់របស់ខ្លួនឱ្យ​គ្រីស្តបរិស័ទ។ ធ្វើដូច្នេះ ព្រឹត្តិការណ៍ដ៏​អស្ចារ្យ​ទាំង​នោះ​ហាក់​ដូចជាមានវត្តមានតាមពេលវេលាជាបន្តបន្ទាប់​ ហើយ​គ្រីស្តបរិស័ទអាចភ្ជាប់នឹង​ព្រឹត្តិការណ៍ដ៏​អស្ចារ្យ​ទាំង​នោះ និង​បានពោរពេញដោយព្រះហឫទ័យប្រណីសន្តោសរបស់ព្រះជាម្ចាស់​ដែល​សង្គ្រោះគេ។ ព្រះសហគមន៍អប់រំគ្រីស្តបរិស័ទតាមរដូវផ្សេងៗក្នុងអំឡុងពេលពេញមួយឆ្នាំ​ដោយ​នាំ​ឱ្យគេប្រព្រឹត្ត​តាម​វិន័យបញ្ជូន​បន្ត​ពីដើមមក គឺឱ្យគេធ្វើ​សកម្មភាពផ្សេងៗទាំងខាងវិញ្ញាណផង ទាំងខាងរូបកាយផង។ ព្រះសហគមន៍​បង្រៀន​គេនាំឱ្យគេអធិដ្ឋាន និងឱ្យ​គេ​ប្រែ​ចិត្ត​គំនិត ហើយប្រព្រឹត្តកិច្ចការតាមមេ​ត្តាករុណាទៀត​ផង។» (Sacrosanctum Concilium #១០២ និង#១០៥)។

1. រដូវបុណ្យព្រះយេស៊ូប្រសូត
2. រដូវធម្មតា
3. រដូវបុណ្យចម្លង
4. បុណ្យផ្សេងៗប្រចាំឆ្នាំ
5. អត្ថបទព្រះគម្ពីរពេញមួយឆ្នាំ

១. បុណ្យព្រះយេស៊ូប្រសូត

ទោះបីក្នុងគម្ពីរគ្មានកំណត់ថ្ងៃព្រះយេស៊ូប្រសូតក៏ដោយ ក៏ព្រះសហគមន៍សន្មតយកថ្ងៃទី២៥ ខែធ្នូ ធ្វើជាថ្ងៃខួបនៃកំណើតព្រះអង្គ ពីព្រោះនៅផ្នែកខាងជើងនៃផែនដី ចាប់ពីថ្ងៃ២៥ ធ្នូទៅ ពេលថ្ងៃកាន់តែមានរយៈពេលវែងបន្តិចម្តងៗ។ អ្នកស្រុកនៅមជ្ឈិមបូព៌ា និងអឺរ៉ុបពីដើម យកថ្ងៃនោះធ្វើបុណ្យយ៉ាងឱឡារិកខាងសាសនារបស់ពួកគេ ដើម្បីគោរពព្រះអាទិត្យដែលចាប់ពីថ្ងៃ២៥ ខែមិថុនា បំភ្លឺខ្លីទៅៗដូចស្លាប់ និងថារស់ឡើងវិញពីថ្ងៃទី២៥ ខែធ្នូ។ គ្រីស្តបរិស័ទក៏លើកថ្ងៃនោះមកគោរពព្រះគ្រីស្តទុកជាពន្លឺនៃពិភពលោក ដូចជាថ្ងៃរះឡើងដែរ។ គ្រីស្តបរិស័ទនាំគ្នាប្រកាសជំនឿថា ព្រះជាម្ចាស់ចាត់ព្រះបុត្រាមកប្រសូតជាមនុស្សដូចយើង ដើម្បីរួមសាមគ្គី និងរួមវាសនាជាមួយមនុស្សយើង។

១.១ រដូវអបអរសាទរ ឬរដូវរង់ចាំព្រះអម្ចាស់យេស៊ូយាងមក

រយៈពេល៤ អាទិត្យមុនបុណ្យព្រះយេស៊ូប្រសូត ព្រះសហគមន៍ចាត់ចែង «រដូវរង់ចាំ» ឬ«រដូវអបអរសាទរព្រះគ្រីស្តយាងមក» ដែលក្នុងភាសាឡាតាំងគឺពាក្យ «Adventus» ដើម្បីដាស់តឿនគ្រីស្តបរិស័ទឱ្យទទួលព្រះគ្រីស្តដែលកំពុងយាងមកសព្វថ្ងៃ។ យោងតាមជំនឿគ្រីស្តសាសនា ព្រះគ្រីស្តយាងមកជាបីលើក៖

• ព្រះអង្គបានយាងមកកាលពី២០០០ឆ្នាំមុនក្នុងសាច់ឈាម គឺក្នុងភាពទន់ខ្សោយដូចមនុស្សយើង។
• ព្រះអង្គកំពុងតែយាងមកនៅថ្ងៃនេះ តាមរយៈអគ្គសញ្ញានៃព្រះសហគមន៍។
• ព្រះអង្គនឹងយាងមកនៅគ្រាចុងក្រោយបំផុតនៃពេលវេលាប្រកបដោយសិរីរុងរឿង គឺជាអវសានកាលនៃពិភពលោក។

ឆ្នាំនេះអាទិត្យទី១ នៃរដូវរង់ចាំត្រូវនឹង ថ្ងៃអាទិត្យ ទី៣០ ខែវិច្ឆិកា ឆ្នាំ២០២៥ ដែលជាថ្ងៃចូលឆ្នាំថ្មីនៃពិធីបុណ្យគ្រីស្តសាសនា។

១.២ បុណ្យព្រះយេស៊ូប្រសូត

បុណ្យព្រះយេស៊ូប្រសូតឆ្នាំនេះត្រូវនឹង ថ្ងៃព្រហស្បតិ៍ ទី២៥ ខែធ្នូ ឆ្នាំ២០២៥។

១.៣ រដូវបុណ្យព្រះយេស៊ូប្រសូត

ពីថ្ងៃទី២៦ ខែធ្នូទៅ ចាប់ផ្តើមរដូវបុណ្យព្រះយេស៊ូប្រសូត ដែលមានរយៈពេលពីរ។ ក្នុងរយៈពេលនេះមានប្រារព្ធ បុណ្យលើកតម្កើងព្រះរាជវង្ស ឬបុណ្យគ្រួសារដ៏វិសុទ្ធរបស់ព្រះយេស៊ូ បុណ្យព្រះយេស៊ូសម្តែងព្រះអង្គ និងបុណ្យព្រះអម្ចាស់យេស៊ូទទួលពិធីជ្រមុជទឹក។​ ឆ្នាំនេះ រដូវបុណ្យព្រះយេស៊ូប្រសូតបន្តរហូតដល់ ថ្ងៃទី១១ ខែមករា ឆ្នាំ២០២៦។

២. បុណ្យចម្លង

ជាបុណ្យលើកតម្កើងព្រះអម្ចាស់យេស៊ូដែលត្រូវគេឆ្កាង សោយទិវង្គត និងមានព្រះជន្មរស់ឡើងវិញដ៏រុងរឿងពីចំណោមមនុស្សស្លាប់នៅថ្ងៃទី៣ ហៅថា «ព្រឹត្តិការណ៍ដ៏អស្ចារ្យនៃបុណ្យចម្លង»។ បុណ្យចម្លងជាបុណ្យកំពូលលើបុណ្យនានាទាំងអស់នៃគ្រីស្តសាសនា។ ព្រះសហគមន៍កំណត់ថ្ងៃប្រារព្ធបុណ្យចម្លងតាមប្រពៃណីជនជាតិអ៊ីស្រាអែល គឺចាប់ពីពេលថ្ងៃ និងយប់ស្មើគ្នាក្នុងរដូវប្រាំង ត្រូវនឹងថ្ងៃអាទិត្យទីមួយក្រោយថ្ងៃព្រះចន្ទពេញបូណ៌មី គឺចន្លោះថ្ងៃទី២៣ ខែមីនា ដល់ថ្ងៃទី២៥ ខែមេសា។

២.១ រដូវសែសិបថ្ងៃ

មុនបុណ្យចម្លង ព្រះសហគមន៍តម្រូវឱ្យគ្រីស្តបរិស័ទរៀបចំខ្លួនទាំងខាងវិញ្ញាណ និងខាងរូបកាយអស់រយៈពេល៤០ថ្ងៃ ដែលហៅថា «រដូវសែសិបថ្ងៃ»។ ក្នុងរដូវនេះ យើងជាគ្រីស្តបរិស័ទយកចិត្តទុកដាក់ស្តាប់ព្រះបន្ទូល និងអធិដ្ឋានច្រើនជាងធម្មតាដើម្បីពង្រឹងជំនឿរបស់ខ្លួន។ យើងក៏យកចិត្តទុកដាក់តម(អាហារ ឬអ្វីៗដែលនាំឱ្យយើងជាទាសករនៃអំពើបាប និងព្រះក្លែងក្លាយ) ព្រមទាំងចែកទានដល់បងប្អូនដែលខ្វះខាតផងដែរ។ រដូវសែសិបថ្ងៃនៅឆ្នាំនេះមាន៦អាទិត្យកន្លះ ចាប់ពី ថ្ងៃពុធ ទី១៨ ខែកុម្ភៈ (បុណ្យរោយផេះ) រហូតដល់ ថ្ងៃសៅរ៍ពិសិដ្ឋ ទី០៤ ខែមេសា ឆ្នាំ២០២៦។

២.២ ត្រៃទិវានៃបុណ្យចម្លង

ត្រៃទិវានៃបុណ្យចម្លងឆ្នាំនេះត្រូវនឹង៖

• ថ្ងៃព្រហស្បតិ៍ពិសិដ្ឋ បុណ្យព្រះអម្ចាស់ជប់លៀងក្រុមសាវ័ក ត្រូវនឹងថ្ងៃទី០២ ខែមេសា ឆ្នាំ២០២៦។
• ថ្ងៃសុក្រពិសិដ្ឋ បុណ្យព្រះអម្ចាស់សោយទិវង្គត ត្រូវនឹងថ្ងៃទី០៣ ខែមេសា ឆ្នាំ២០២៦។
• ថ្ងៃសៅរ៍ពិសិដ្ឋ ត្រូវនឹងថ្ងៃទី០៤ ខែមេសា ឆ្នាំ២០២៦។
• ថ្ងៃអាទិត្យបុណ្យចម្លងលើកតម្កើងព្រះអម្ចាស់មានព្រះជន្មរស់ឡើងវិញ ត្រូវនឹងថ្ងៃទី០៥ ខែមេសា ឆ្នាំ២០២៦។

២.៣ រដូវបុណ្យចម្លង

ក្រោយបុណ្យចម្លង ព្រះសហគមន៍ទុកពេលយ៉ាងយូរគឺ ៥០ថ្ងៃ ដែលយើងហៅថា «រដូវបុណ្យចម្លង» ដើម្បីឱ្យគ្រីស្តបរិស័ទនឹករំពឹងអំពីអត្ថន័យនៃបុណ្យចម្លងរបស់ព្រះយេស៊ូគ្រីស្តដែលមានព្រះជន្មរស់ឡើងវិញដ៏រុងរឿង ជាអគ្គសញ្ញានៃការសង្រ្គោះសម្រាប់មនុស្សលោក។ រយៈពេលនោះ គ្រីស្តបរិស័ទយើងនាំគ្នានឹកសញ្ជឹងអំពីព្រះគ្រីស្តដែលគង់នៅជាមួយយើងតាមរបៀបប្លែកពីមុន ហើយដែលណែនាំព្រះសហគមន៍តាមព្រះវិញ្ញាណដ៏វិសុទ្ធ។ «ថ្ងៃបុណ្យព្រះវិញ្ញាណយាងមក» ឬ«បុណ្យថ្ងៃទីហាសិប» គឺជាថ្ងៃចុងក្រោយនៃ «រដូវបុណ្យចម្លង»។ រដូវបុណ្យចម្លងឆ្នាំនេះចាប់ផ្តើមពី ថ្ងៃទី០៥ ខែមេសា រហូតដល់ ថ្ងៃទី២៤ ខែឧសភា ២០២៦។

៣. រដូវធម្មតា

រដូវធម្មតាប្រចាំឆ្នាំ គឺជារដូវក្រៅពីរដូវពិសេសដូចជា រដូវអបអរសាទរ រដូវបុណ្យព្រះយេស៊ូប្រសូត រដូវសែសិបថ្ងៃ រដូវបុណ្យចម្លង។ រដូវនេះមានចំនួន៣៤អាទិត្យក្នុងរយៈពេលពេញមួយឆ្នាំ។ រដូវធម្មតាចែកចេញជា២ភាគ៖

• ភាគទី១៖ ក្រោយបុណ្យព្រះយេស៊ូទទួលពិធីជ្រមុជទឹក រហូតដល់រដូវសែសិបថ្ងៃ (មានពី ៤ ដល់ ៩ អាទិត្យ)។
• ភាគទី២៖ ក្រោយបុណ្យព្រះវិញ្ញាណយាងមក រហូតដល់រដូវអបអរសាទរព្រះគ្រីស្តយាងមក (មានពី ២៥ ដល់ ៣០ អាទិត្យ)។

រដូវធម្មតា សំដៅលើពេលវេលាដែលព្រះសហគមន៍ជាមាតា ចង់នាំគ្រីស្តបរិស័ទយើងឱ្យប្រុងស្មារតីក្នុងជីវិតធម្មតាប្រចាំថ្ងៃ ដោយខិតខំស្វែងរកព្រះជាម្ចាស់ និងយកតម្រាប់តាមព្រះអង្គជាព្រះត្រៃឯក ដោយខិតខំអធិដ្ឋានក្នុងអង្គព្រះវិញ្ញាណដ៏វិសុទ្ធ និងចង់ឈ្វេងយល់នូវហេតុការណ៍ និងទីសម្គាល់ផ្សេងៗដែលព្រះជាម្ចាស់ធ្វើការនៅក្នុងជីវិតប្រចាំថ្ងៃរបស់យើងម្នាក់ៗ នៅក្នុងព្រះសហគមន៍ និងនៅក្នុងសង្គមនាសម័យនេះផងដែរ។

«“ព្រះសហគមន៍ធ្វើបូជនីយេសក៍ដោយត្រូវគេបៀតបៀនធ្វើបាបក្នុងលោកនេះ និង​ដោយ​មាន​ព្រះជាម្ចាស់​លួង​លោមផង” (សន្តអូគូស្តាំង) ទាំងប្រកាសថា ព្រះអម្ចាស់សោយ​ទិវង្គត​នៅលើ​ឈើឆ្កាង គឺ​ប្រកាស​សេចក្តីនេះរហូត ដល់ពេលព្រះអង្គយាងមក (១ករ ១១,២៦)។ ឫទ្ធានុភាពរបស់ព្រះអម្ចាស់ ដែលមានព្រះជន្មរស់ឡើងវិញដ៏រុងរឿង ជាកម្លាំងរបស់ព្រះសហគមន៍ដើម្បីឱ្យព្រះ​សហគមន៍​មានចិត្តអត់ធ្មត់ខន្តី និងចិត្តស្រឡាញ់អាចពុះពារ​ទុក្ខលំបាក និងឧបសគ្គនានា មកពី​ខាង​ក្នុង​ផង និង​មក​ពី​ខាងក្រៅផង។ ព្រះសហគមន៍អាចសម្តែងយ៉ាងស្មោះ នៅកណ្តាលចំណោមមនុស្សលោក អំពី​គម្រោង​ការ​ដ៏​អស្ចារ្យ​របស់ព្រះអម្ចាស់ ដែលយើងមិនទាន់ស្គាល់យ៉ាងច្បាស់នៅឡើយ រហូតដល់ថ្ងៃគម្រោងការ​ដ៏អស្ចារ្យនេះ​លេច​ធ្លោ​ក្នុងពន្លឺយ៉ាងច្បាស់។‌‌
ដូច្នេះ ជំនាន់ចុងក្រោយបំផុតមកដល់យើងហើយ (១ករ ១០,១១)។ ពិភពលោក​ប្រែជា​ថ្មីរួច​ជា​ស្រេច​ដោយសារ​ព្រះគ្រីស្ត។ តាំងពីពេលឥឡូវនេះ ការប្រែជាថ្មីនោះកើតជារូបរាង​ជាមុន​យ៉ាងពិត​ប្រាកដ​តាម​របៀប​ម្យ៉ាង​ គឺថា ទោះបីព្រះសហគមន៍​មិន​ទាន់វិសុទ្ធពេញ​លក្ខណៈ​នៅឡើយក្តី ក៏ព្រះ​សហគមន៍​នៅ​លើ​ផែនដីនេះតែង​ខ្លួន​ដោយ​ភាពវិសុទ្ធដ៏​ពិត​ប្រាកដដែរ។ ប៉ុន្តែ ព្រះសហគមន៍​កំពុង​ធ្វើបូជនីយេសក៍ ទម្រាំ​ដល់​ពេល​ព្រះជាម្ចាស់​នឹង​ប្រតិស្ឋានមេឃថ្មី និងផែនដីថ្មីប្រកបដោយសេចក្តីសុចរិត (២សល ៣,១៣)។ ហេតុនេះ ទាំងអគ្គសញ្ញា​របស់​ព្រះ​សហគមន៍​ក្តី ទាំង​រចនាសម្ពន្ធរបស់ខ្លួនក្តីក៏មានលក្ខណៈមិន​ទៀង​ទាត់​របស់​លោកីយ៍ ដែលចេះតែ​កន្លង​ផុតទៅ​ដែ​រ។ ព្រះសហគមន៍​រស់នៅក្នុងចំណោមសត្វលោក‌​ដែល​កំពុង​តែស្រែកថ្ងូរ​ និង​ឈឺចុកចាប់ដូច​ស្ត្រី​ដែល​ហៀប​នឹង​សម្រាលកូន ទាំង​ទន្ទឹងរង់ចាំសិរីរុងរឿង​នៃបុត្រ​ធីតា​របស់ព្រះជាម្ចាស់ (រម ៨,១៩-២២)។» (Lumen Gentium #០៨ និង#៤៨)។

«ឱ ព្រះជាម្ចាស់ជាព្រះបិតាដ៏មានឫទ្ធានុភាពសព្វប្រការ ! គឺដោយព្រះគ្រីស្ត ជាមួយព្រះគ្រីស្ត និងក្នុងអង្គព្រះគ្រីស្ត រួមជាមួយព្រះវិញ្ញាណដ៏វិសុទ្ធផង បានជាយើងខ្ញុំ សូមលើកត​ម្កេីងសិរីរុងរឿងរបស់ព្រះអង្គអស់កល្បជាអង្វែងតរៀងទៅ អាម៉ែន!»។

៤. ពិធីបុណ្យផ្សេងៗប្រចាំឆ្នាំ

៤.១ ថ្ងៃអាទិត្យជាអាទិភាព

«ព្រះសហគមន៍លើកតម្កើងព្រឹត្តិការណ៍ដ៏អស្ចារ្យនៃបុណ្យចម្លង រៀងរាល់ថ្ងៃទី ៨​ ដែលយើងតែងហៅយ៉ាងត្រឹម​ត្រូវថា ”ថ្ងៃរបស់ព្រះអម្ចាស់” ព្រោះជាថ្ងៃព្រះគ្រីស្តមានព្រះជន្មរស់ឡើងវិញដ៏រុងរឿង តាមក្រុម​គ្រីស្តទូតបានបញ្ជូនបន្តមក។ នៅ​ថ្ងៃអាទិត្យនោះ គ្រីស្តបរិស័ទត្រូវតែជួបជុំគ្នា ដោយស្តាប់ព្រះបន្ទូលរបស់ព្រះជាម្ចាស់​ និងចូលរួម​ថ្វាយ​ពិធី​អរព្រះគុណ។ គ្រីស្តបរិស័ទនាំគា្ននឹករឭកដល់ព្រះអម្ចាស់យេស៊ូរងទុក្ខលំបាក និងមានព្រះជន្មរស់ឡើងវិញដ៏រុងរឿង។ គ្រីស្តបរិស័ទក៏​អរ​ព្រះគុណព្រះបិតាដែល “បានប្រោសគេឱ្យកើតជាថ្មី ដោយប្រោសឱ្យព្រះយេស៊ូគ្រីស្តមានព្រះជន្មរស់ឡើងវិញដ៏រុងរឿង។ ដូច្នេះ យើងមានសេចក្តីសង្ឃឹមដែលមិនចេះសាប​សូន្យឡើយ” (១​សល ១,៣)។ ហេតុនេះហើយ បានជាថ្ងៃរបស់ព្រះអម្ចាស់ ជាថ្ងៃធ្វើពិធីគោរពថ្វាយបង្គំដ៏សំខាន់ជាងគេ។ ត្រូវ​ដាស់តឿនឱ្យគ្រីស្តបរិស័ទគោរព​ថ្ងៃរបស់​ព្រះ​អម្ចាស់ ដើម្បី​ឱ្យ​ទៅជាថ្ងៃប្រកប​ដោយ​អំណរសប្បាយ និងសម្រាកពីការងារ។ បុណ្យឯទៀតៗទាំងអស់គ្មាន​អាទិភាព​លើថ្ងៃអាទិត្យ​ទេ លើកលែងតែបុណ្យយ៉ាងឱឡារិកបំផុត ពីព្រោះថ្ងៃអាទិត្យពិតជាគ្រឹះ​ និងជា​ស្នូលនៃពិធី​គោរពប្រណិប័តន៍​ប្រចាំ​ឆ្នាំ​ទាំងមូល។» (Sacrosanctum Concilium #១០៦)។

ដូច្នេះហើយ យើងជាគ្រីស្តបរិស័ទត្រូវតែចូលរួមអភិបូជាជាមួយគ្រីស្តបរិស័ទឯទៀតៗជារៀងរាល់ថ្ងៃអាទិត្យ ដើម្បីរួបរួមគ្នាជាព្រះកាយព្រះគ្រីស្ត។ គ្រីស្តបរិស័ទគឺជាអ្នកដែលរួមស្លាប់រួមរស់ជាមួយព្រះយេស៊ូ និងដើរតាមព្រះយេស៊ូដោយធ្វើជាសាក្សីអំពីព្រះអង្គក្នុងលោកនេះនៅគ្រប់ទីកន្លែងដែលខ្លួនរស់នៅ។

៤.២ ពិធីគោរពសន្តបុគ្គលប្រចាំឆ្នាំ

«ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ! ព្រះអង្គជាម្ចាស់នៃពិភពទាំងមូល…»
«ឱព្រះជាម្ចាស់អើយ! មានតែព្រះអង្គទេជាព្រះដ៏វិសុទ្ធ!…»
ព្រះជាម្ចាស់ខុសប្លែកពីសត្វលោកទាំងឡាយ ព្រះអង្គជាប្រភពនៃជីវិតគ្រប់យ៉ាង ព្រះអង្គជាពន្លឺ គ្មានភាពងងឹតក្នុងព្រះអង្គឡើយ ព្រះអង្គគ្មានសៅហ្មងទាល់តែសោះ ព្រះជាម្ចាស់ប្រកបដោយព្រះហឫទ័យមេត្តាករុណាយ៉ាងក្រៃលែង ហួសពីការស្មានរបស់មនុស្ស។ ដោយមនុស្សយើង យកអ្វីក្នុងលោកនេះមកប្រៀបផ្ទឹមនឹងព្រះជាម្ចាស់ពុំបាន ហេតុដូច្នេះហើយ ទើបក្នុងព្រះគម្ពីរមានចែងថា “ព្រះអង្គជាព្រះដ៏វិសុទ្ធ” ឬ “ព្រះអង្គជាព្រះវិញ្ញាណ” ឬ “ព្រះអង្គគង់នៅស្ថានបរមសុខ”ជាដើម។ល។
អ្វីៗដែលជាប់ទាក់ទងជាមួយ “ព្រះដ៏វិសុទ្ធ” នោះ ក៏ត្រឡប់ទៅជាវិសុទ្ធដែរ។ ឧបមាថា យើងជា “ប្រជារាស្ត្រដ៏វិសុទ្ធ” មានន័យថា ជាប្រជារាស្ត្ររបស់ព្រះអង្គ។ “ព្រះសហគមន៍ដ៏វិសុទ្ធ” ជាក្រុមអស់អ្នកបាបដែលព្រះជាម្ចាស់ត្រាស់ហៅ។ល។ គ្រីស្តទូតប៉ូលធ្លាប់ហៅគ្រីស្តបរិស័ទថា “ជនដ៏វិសុទ្ធ” ព្រោះព្រះគ្រីស្តបានប្រោសគេឱ្យទៅជាបុត្រធីតារបស់ព្រះជាម្ចាស់។

ពិតមែនហើយ យើងជាគ្រីស្តបរិស័ទ ជឿសង្ឃឹមលើព្រះជាម្ចាស់តែមួយព្រះអង្គគត់ដែលសង្គ្រោះយើង ដោយសារព្រះយេស៊ូគ្រីស្តជាព្រះបុត្រាព្រះអង្គ។ ក្រៅពីព្រះយេស៊ូគ្មាននរណាម្នាក់អាចសង្គ្រោះមនុស្សបានទាល់តែសោះ ដ្បិត“នៅក្រោមមេឃ ព្រះជាម្ចាស់មិនបានប្រទាននាមណាមួយ ផ្សេងទៀតមក ដើម្បីសង្គ្រោះយើងឡើយ” (កក ៤,១២)។

សន្តបុគ្គល មិនមែនជាវីរបុរសទេ សន្តបុគ្គលគ្រាន់តែបណ្តោយឱ្យឫទ្ធានុភាពរបស់ព្រះគ្រីស្តបង្កើតផលល្អក្នុងខ្លួនគាត់ ដូចសន្តប៉ូលចែងថា៖ “មិនមែនខ្ញុំទេដែលរស់ គឺព្រះគ្រីស្តទេតើ ដែលមានព្រះជន្មរស់នៅក្នុងខ្ញុំ” (កាឡ ២, ២០)។ ក្នុងចំណោមសន្តបុគ្គល ដែលព្រះសហគមន៍ទទួលស្គាល់នោះ មានចាស់ មានក្មេង មានបុរស មានស្ត្រី មានអ្នកមាន មានអ្នកក្រ មានគ្រីស្តបរិស័ទធម្មតា មានគ្រីស្តបរិស័ទបំពេញមុខងារពិសេសក្នុងព្រះសហគមន៍ មានលោកគង្វាល មានបព្វជិត មានអ្នកមានគ្រួសារ មានអ្នកចេះដឹង មានមនុស្សល្ងង់ មានព្រះមហាក្សត្រ មានរាស្ត្រសាមញ្ញធម្មតា ។ល។ តែសន្តបុគ្គលទាំងនោះបានរួមរស់ជាមួយព្រះគ្រីស្តយ៉ាងស្និទ្ធស្នាល ហើយបានបង្ហាញនូវអំណោយទានគ្រប់បែបយ៉ាងរបស់ព្រះគ្រីស្ត។

គ្រីស្តបរិស័ទកាតូលិកជឿថា ព្រះសហគមន៍ជាមហាគ្រួសារដ៏ធំមួយ ដែលមានសមាជិកកំពុងរស់នៅក្នុងលោកនេះនៅឡើយ ហើយក៏មានសមាជិករស់នៅជាមួយព្រះគ្រីស្តឯស្ថានបរមសុខដែរ។ បងប្អូនទាំងនេះ ក៏អាចជួយគ្នាទៅវិញទៅមកបាន។ សន្តបុគ្គលប្រៀបបាននឹងបងៗ ដែលបានដល់ត្រើយរួចហើយ គាត់នៅរួមជាមួយព្រះគ្រីស្ត អង្វរព្រះបិតាឱ្យយើង។ ក្នុងធម៌ប្រកាសជំនឿ យើងតែងប្រកាសថា “ខ្ញុំជឿសហភាពរវាងជនដ៏វិសុទ្ធទាំងឡាយ” គឺថា គ្រីស្តបរិស័ទទាំងនៅលើផែនដី ទាំងនៅស្ថានបរមសុខអាចជួយអង្វរព្រះជាម្ចាស់ឱ្យគ្នាទៅវិញទៅមក។

«ក្នុងអំឡុងពេលពេញមួយឆ្នាំ ព្រះសហគមន៍ក៏គោរពព្រះនាងម៉ារីជាព្រះមាតារបស់ព្រះអម្ចាស់ ដោយមាន​សេចក្តី​ស្រឡាញ់​យ៉ាងពិសេសចំពោះ​ព្រះនាង ព្រោះព្រះនាងភ្ជាប់ជាមួយបុត្រ​របស់នាង​ក្នុង​កិច្ច​សង្រ្គោះ​របស់​បុត្រ​នោះ ដោយ​ចំណង​ដែលមិនអាចស្រាយ​បាន។ ពេលព្រះសហគមន៍សម្លឹងមើលព្រះនាងម៉ារី ព្រះសហគមន៍​សរសើរ និង​លើកតម្កើងផលដ៏ប្រសើរជាង​គេ​បំផុត​របស់​ព្រះគ្រីស្តដែលរំដោះមនុស្សលោក។ ម្យ៉ាងទៀត ពេល​ព្រះ​សហគមន៍​សម្លឹងមើល​ព្រះនាង ព្រះសហគមន៍​ក៏​នឹក​រំពឹង​គិត​ដោយ​អំណរហាក់ដូចជាសម្លឹង​មើល​ក្នុងរូបដ៏និមល​បំផុត​នោះនូវអ្វីៗ​ដែល​ខ្លួនប្រាថ្នាចង់បាន ហើយ​សង្ឃឹម​ថា នឹងបាន​ទាំង​ស្រុងដូចព្រះ​នាង​ដែរ។
តាំងពីដើមរៀងមក ព្រះសហគមន៍ក៏បញ្ចូលថ្ងៃនឹករឭកមរណសក្សី និងសន្តបុគ្គលផ្សេងៗទៀតក្នុងចំណោមពិធីបុណ្យប្រចាំឆ្នាំ។ ព្រះជាម្ចាស់ប្រកបដោយព្រះហឫទ័យប្រណីសន្តោស​ជាច្រើន​យ៉ាង​ ព្រះអង្គបានលើក​សន្ត​បុគ្គលទាំងនោះឱ្យបាន​ពេញ​លក្ខណៈ និងឱ្យបានទទួល​ការសង្រ្គោះអស់កល្ប​ជានិច្ច​រួច​ហើយ។ សន្តបុគ្គល​ទាំង​នោះ​នាំ​គា្ន​ច្រៀងបទលើក​តម្កើង​ដ៏ពេញលក្ខណៈថ្វាយព្រះជាម្ចាស់នៅស្ថានបរមសុខ ព្រម​ទាំង​ជួយ​អង្វរ​ព្រះអង្គឱ្យយើង។
ពេលព្រះ​សហគមន៍​ធ្វើពិធី​នឹក​ថ្ងៃខួប​នៃ​កំណើត​របស់សន្តបុគ្គល​នៅ​ស្ថាន​បរមសុខ​នោះ ព្រះសហគមន៍ក៏ប្រកាស​ព្រឹត្តិការណ៍​ដ៏អស្ចារ្យនៃបុណ្យចម្លង គឺសន្តបុគ្គលទាំងនោះរងទុក្ខលំបាករួម​ជាមួយ​ព្រះគ្រីស្ត ហើយគេក៏បានទ​ទួល​សិរីរុង​រឿង​រួម​ជា​មួយព្រះគ្រីស្តដែរ។ ព្រះសហគមន៍ក៏បង្ហាញសន្តបុគ្គលទុកជាគំរូ​ឱ្យ​គ្រីស្ត​បរិស័ទ​យកតម្រាប់តាម គឺ​គំរូ​ដែលទាក់​ទាញ​គ្រីស្តបរិស័ទទាំងអស់ទៅរកព្រះបិតាដោយសារព្រះគ្រីស្ត។ អំពើ​ល្អ​របស់​សន្តបុគ្គល​ទាំង​នោះ​នៅពេលគាត់រស់នៅ ក៏ធ្វើ​ឱ្យព្រះ​ជាម្ចាស់នឹងប្រទានពរដល់ព្រះសហគមន៍ទៀតផង។» (Sacrosantum Concilium #១០៣ និង#១០៤)។

៤.៣ ក្បួនពិធីគោរពសន្តបុគ្គលទាំងនោះមាន៖

• បុណ្យឱឡារិក (Solemnity) គឺជាបុណ្យដែលព្រះសហគមន៍ចាត់ចែងដោយខានពុំបាន សូម្បីថ្ងៃប្រារព្ធពិធីនោះចំថ្ងៃអាទិត្យក៏ដោយដូចជា បុណ្យគោរពព្រះយេស៊ូ បុណ្យគោរពព្រះនាងម៉ារី បុណ្យគោរពសន្តយ៉ូហាន បាទីស្ត បុណ្យគោរពសន្តសិលា និងសន្តប៉ូលជាដើម។ ក្នុងប្រតិទិននេះ យើងសរសេរថ្ងៃបុណ្យឱឡារិកទាំងនោះជាអក្សរពណ៌ ក្រហមក្រាស់។
• បុណ្យគោរព (Feast) គឺជាថ្ងៃគោរពសន្តបុគ្គល ដែលមានសារសំខាន់ក្នុងព្រះសហគមន៍ ដូចជាបុណ្យគោរពគ្រីស្តទូត បុណ្យគោរពអ្នកនិពន្ធគម្ពីរជាដើម។ តាមធម្មតាត្រូវអានអត្ថបទព្រះគម្ពីរពិសេសដែលភ្ជាប់នឹងបុណ្យថ្ងៃនោះ។ ក្នុងប្រតិទិននេះ យើងសរសេរថ្ងៃបុណ្យគោរពទាំងនោះជាអក្សរពណ៌ ខ្មៅក្រាស់។
• បុណ្យរម្លឹកដោយចាំបាច់ (Obligatory Memorial) គឺជាថ្ងៃរម្លឹកដល់សន្តបុគ្គលចាំបាច់។ ក្នុងអភិបូជាគ្រីស្តបរិស័ទនឹកដល់សន្តបុគ្គលនោះ ដោយអានជីវប្រវត្តិយ៉ាងខ្លីរបស់គាត់ ឬសេចក្តីដែលគាត់បាននិពន្ធ ហើយយើងអង្វរព្រះជាម្ចាស់រួមជាមួយគាត់ដែរ។ ក្នុងប្រតិទិននេះ យើងសរសេរថ្ងៃបុណ្យរម្លឹកសន្តបុគ្គលដោយចាំបាច់នោះជាអក្សរពណ៌ ខ្មៅត្រង់។
• បុណ្យរម្លឹកដោយជ្រើសរើស (Optional Memorial) គឺជាថ្ងៃរម្លឹកដល់សន្តបុគ្គលដោយសេរីតាមជម្រើស។ ចំពោះសន្តបុគ្គលខ្លះគ្មានចែងអ្វីសោះ គឺគ្រីស្តបរិស័ទដែលស្រឡាញ់សន្តបុគ្គលនោះអាចធ្វើពិធីគោរពគាត់ និងអង្វរព្រះជាម្ចាស់តាមរយៈគាត់ដែរ តែគ្មានការបង្គាប់បញ្ជាឱ្យព្រះសហគមន៍ទាំងមូលគោរពទេ។ ក្នុងប្រតិទិននេះ យើងសរសេរថ្ងៃបុណ្យរម្លឹកសន្តបុគ្គលដោយជ្រើសរើសទាំងនោះជាអក្សរពណ៌ ខ្មៅទ្រេត។

៥. អត្ថបទព្រះគម្ពីរពេញមួយឆ្នាំ

រៀងរាល់ឆ្នាំ គ្រីស្តបរិស័ទនឹកអំពីស្នាព្រះហស្តដែលព្រះយេស៊ូបានប្រព្រឹត្តដើម្បីសង្គ្រោះមនុស្សលោក តាំងពីពេលព្រះអង្គប្រសូតរហូតដល់ព្រះអង្គប្រទានព្រះវិញ្ញាណឱ្យអ្នកជឿ។ ព្រះសហគមន៍មានបំណងអប់រំគ្រីស្តបរិស័ទ ដោយចាត់ចែងឱ្យគេស្ដាប់អត្ថបទព្រះគម្ពីរដែលជាអាហារពិសេសសម្រាប់គេជារៀងរាល់ថ្ងៃ ដោយរៀបចំបញ្ជីអត្ថបទសំខាន់ៗសម្រាប់អានរាល់ថ្ងៃអាទិត្យចំនួនបីឆ្នាំ គឺឆ្នាំ “ក” តាមសន្តម៉ាថាយ ឆ្នាំ “ខ” តាមសន្តម៉កុស និងឆ្នាំ “គ” តាមសន្តលូកា។ នៅឆ្នាំ២០២៦ នេះ យើងអានអត្ថបទគម្ពីរឆ្នាំ“ក”។

• នៅថ្ងៃធម្មតានៃរដូវធម្មតាប្រចាំឆ្នាំ ព្រះសហគមន៍រៀបចំអត្ថបទព្រះគម្ពីរតាមឆ្នាំ “គូ” និង ឆ្នាំ “សេស”។
• នៅថ្ងៃមាន បុណ្យឱឡារិក (Solemnity)  ឬ បុណ្យគោរព (Feast) ព្រះសហគមន៍រៀបចំអត្ថបទព្រះគម្ពីរពិសេសភ្ជាប់ជាមួយ។
• សម្រាប់ថ្ងៃ បុណ្យរម្លឹកដោយចាំបាច់ (Obligatory Memorial) គួរតែថ្លែងអត្ថបទព្រះគម្ពីរស្របតាមក្បួនប្រចាំរដូវកាលផងដែរ លើកលែងតែមានអត្ថបទព្រះគម្ពីរពិសេសផ្សេងទៀតក្នុងក្បួនពិធីបុណ្យគោរពសន្តបុគ្គលជាប្រចាំឆ្នាំ។
• ចំពោះថ្ងៃ បុណ្យរម្លឹកដោយជ្រើសរើស (Optional Memorial) គួរថ្លែងអត្ថបទព្រះគម្ពីរតាមក្បួនប្រចាំតាមរដូវនៃពិធីបុណ្យ។

ដើម្បីទទួលបានព្រះគម្ពីរកាតូលិកចំនួនទាំង៧៣កណ្ឌ សូមចុចនៅទីនេះ។

ប្រតិទិនឆ្នាំ«ក» ២០២៥-២០២៦

ប្រតិទិនឆ្នាំ«គ» ២០២៤-២០២៥

ប្រតិទិនឆ្នាំ«ខ» ២០២៣-២០២៤

ប្រតិទិនឆ្នាំ«ក» ២០២២-២០២៣

ប្រតិទិនឆ្នាំ «គ» ២០២១-២០២២