ទី៤ព្រះយេស៊ូយាងទៅគ្រប់ទីកន្លែងទាំងប្រព្រឹត្តអំពើល្អ

ភាគទី១ ពិធីលើកតម្កើងព្រះបន្ទូល

ភាគទី២ ពិធីអរព្រះគុណដ៏វិសុទ្ធ

ពាក្យជូនពរចុងបញ្ចប់នៃអភិបូជា

ពិធីប្រារព្ធតាមរដូវផ្សេងៗ
១- រដូវអបអរសាទរព្រះគ្រីស្តយាងមក
២- ព្រះអម្ចាស់យេស៊ូប្រសូត
៣-ចូលឆ្នាំថ្មី
៤- បុណ្យព្រះយេស៊ូសម្តែងព្រះអង្គ
៥- ព្រះអម្ចាស់សោយទុក្ខលំបាក
៦- រដូវបុណ្យចម្លង
៧- បុណ្យព្រះអម្ចាស់យាងឡើងស្ថានបរមសុខ
៨- ព្រះវិញ្ញាណដ៏វិសុទ្ធ
៩- រដូវធម្មតាទី ១
១០- រដូវធម្មតាទី ២
១១- រដូវធម្មតាទី ៣
១២- រដូវធម្មតាទី ៤
១៣- រដូវធម្មតាទី ៥
១៤- រដូវធម្មតាទី ៦
បុណ្យគោរពសន្តបុគ្គល
១៥- បុណ្យគោរពព្រះនាងព្រហ្មចារិនីម៉ារី
១៦- សន្តសិលា និងសន្តប៉ូលជាគ្រីស្តទូត
១៧- ក្រុមគ្រីស្តទូត
១៨- សន្តបុគ្គលទាំងឡាយ
ពាក្យជូនពរផ្សេងៗ
១៩- បុណ្យឆ្លងព្រះវិហារ
២០- បុណ្យមរណបុគ្គល

ទី៤ ព្រះយេស៊ូយាងទៅគ្រប់ទីកន្លែងទាំងប្រព្រឹត្តអំពើល្អ

ប.	សូមព្រះអម្ចាស់គង់នៅជាមួយបងប្អូន។
គ្រ.	ហើយគង់នៅជាមួយវិញ្ញាណរបស់លោកផង។
ប.	សូមលើកចិត្តថ្វាយព្រះអង្គ។
គ្រ.	យើងលើកចិត្តថ្វាយព្រះអង្គហើយ។
ប.	សូមអរព្រះគុណព្រះជាអម្ចាស់នៃយើងខ្ញុំ។
គ្រ.	ពិតជាការគួរណាស់ ហើយប្រពៃផង។
ប.	បពិត្រព្រះបិតាជាព្រះជាម្ចាស់ដ៏មានព្រះហឫទ័យមេត្តាករុណា និងស្មោះត្រង់ ! ពិតជាការគួរណាស់ហើយប្រពៃផង ពិតជាត្រឹមត្រូវ និងជាការសង្រ្គោះមែន ដែលយើងខ្ញុំសូមអរព្រះគុណព្រះអង្គគ្រប់ពេលវេលា និងគ្រប់ទិសទី។ ព្រះអង្គបានប្រទានព្រះយេស៊ូគ្រីស្តជាព្រះបុត្រាព្រះអង្គ មកជាព្រះអម្ចាស់ និងជាព្រះប្រោសលោះយើងខ្ញុំ។ ព្រះអង្គតែងតែបង្ហាញធម៌មេត្តាករុណាដល់អ្នកតូចតាច និងអ្នកក្រីក្រ អ្នកជំងឺ និងអ្នកបាប ហើយព្រះអង្គជិតស្និទ្ធជាមួយអ្នកដែលត្រូវគេជិះជាន់ និងអ្នកដែលមានទុក្ខព្រួយ។ ព្រះបុត្រាបានប្រកាសដល់ពិភពលោក តាមព្រះបន្ទូល និងកិច្ចការរបស់ព្រះអង្គថា ព្រះជាម្ចាស់ជាព្រះបិតារបស់យើងខ្ញុំ ហើយព្រះបិតាសព្វព្រះហឫទ័យថែទាំបុត្រធីតាទាំងអស់របស់ព្រះអង្គ។ អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយ សូមលើកតម្កេីង និងអរព្រះគុណព្រះនាមព្រះអង្គ ទាំងច្រៀងបទកោតសរសើរសិរីរុងរឿងរបស់ព្រះអង្គ ដោយឥតឈប់ឈរថា ៖
គ្រ.	ព្រះដ៏វិសុទ្ធ ! ព្រះដ៏វិសុទ្ធ ! ព្រះដ៏វិសុទ្ធ ! ព្រះអង្គជាព្រះអម្ចាស់ នៃពិភពទាំងមូល មេឃនិងដី ពោរពេញដោយសិរីរុងរឿងរបស់ព្រះអង្គ។ ជយោ ! ព្រះអង្គឯស្ថានដ៏ខ្ពង់ខ្ពស់បំផុត សូមលើកតម្កេីងព្រះអង្គ ដែលយាងមកក្នុងព្រះនាមព្រះអម្ចាស់។ ជយោ ! ព្រះអង្គឯស្ថានដ៏ខ្ពង់ខ្ពស់បំផុត។
ប.	ឱ ព្រះជាម្ចាស់ ! ព្រះអង្គពិតជាព្រះដ៏វិសុទ្ធ ព្រះអង្គស្រឡាញ់មនុស្សលោកគ្រប់ជាតិសាសន៍ ហើយរួមដំណើរជាមួយយើងខ្ញុំជារៀងរាល់ថ្ងៃ។ ព្រះបុត្រាប្រកបដោយព្រះពរគ្រប់បែបយ៉ាង ព្រះអង្គគង់នៅកណ្តាលចំណោមយើងខ្ញុំ នៅពេលយើងខ្ញុំជួបជុំគ្នា ក្នុងសេចក្តីស្រឡាញ់របស់ព្រះអង្គ។ ទ្រង់បកស្រាយព្រះគម្ពីរ និងកាច់នំបុ័ងប្រទានឱ្យយើងខ្ញុំ ដូចព្រះអង្គបានប្រព្រឹត្តចំពោះក្រុមសាវ័កកាលពីដើម។ ឱ ព្រះបិតាប្រកបដោយធម៌មេត្តាករុណា ! សូមព្រះអង្គចាត់ព្រះវិញ្ញាណរបស់ព្រះអង្គ មកញុាំងនំបុ័ង និងស្រាតង្វាយនេះឱ្យបានវិសុទ្ធ ទៅជាព្រះកាយ † និងព្រះលោហិត ព្រះអម្ចាស់យេស៊ូគ្រីស្តសម្រាប់យើងខ្ញុំ។ នៅយប់ មុនព្រះយេស៊ូសោយទុក្ខលំបាក ព្រះអង្គធ្វើពិធីជប់លៀងចុងក្រោយបង្អស់ ព្រះអង្គយកនំបុ័ងមកកាន់ លើកតម្កេីងព្រះបិតា ហើយកាច់ប្រទានឱ្យក្រុមសាវ័ក ទាំងមានព្រះបន្ទូលថា ៖
ប.	សូមអ្នករាល់គ្នាយកពិសាចុះ នេះជារូបកាយរបស់ខ្ញុំ ដែលត្រូវបូជាសម្រាប់អ្នករាល់គ្នា។ នៅពេលចុងក្រោយនៃពិធីជប់លៀង ព្រះអង្គធ្វើតាមរបៀបដដែល ព្រះអង្គលើកពែងស្រាឡើង អរព្រះគុណព្រះបិតា ហើយប្រទានឱ្យក្រុមសាវ័ក ទាំងមានព្រះបន្ទូលថា ៖ សូមអ្នករាល់គ្នាយកពែងនេះ ហើយពិសាចុះ នេះជាលោហិតរបស់ខ្ញុំ ដែលចងសម្ពន្ធមេត្រីថ្មី និងគង់វង្សអស់កល្បជានិច្ច ហើយដែលត្រូវបង្ហូរ ដើម្បីលើកលែងទោសអ្នករាល់គ្នា និងមនុស្សច្រើនឥតគណនាឱ្យរួចពីបាប។ សូមអ្នករាល់គ្នាធ្វើដូច្នេះ ដើម្បីនឹករឭកដល់ខ្ញុំ។
ប.	នេះជាគម្រោងការដ៏អស្ចារ្យនៃជំនឿ !
គ្រ.	ឱ ព្រះអម្ចាស់អើយ ! យើងខ្ញុំជឿថា ព្រះអង្គសោយទិវង្គត និងមានព្រះជន្មរស់ឡើងវិញ ហើយយើងខ្ញុំសូមប្រកាសរហូតដល់ពេលព្រះអង្គយាងមក។
ឬ
គ្រ.	ឱ ព្រះអម្ចាស់អើយ ! រៀងរាល់ពេល យើងខ្ញុំពិសានំបុ័ង និងពិសាពីពែងនេះ យើងខ្ញុំបញ្ជាក់ថា ព្រះអង្គសោយទិវង្គត ហើយយើងខ្ញុំសូមប្រកាសរហូតដល់ពេលព្រះអង្គយាងមក។
ឬ
គ្រ.	ឱ ព្រះសង្រ្គោះនៃមនុស្សលោកអើយ ! ព្រះអង្គសោយទិវង្គតលើឈើឆ្កាង និងមានព្រះជន្មរស់ឡើងវិញ ដើម្បីរំដោះយើងខ្ញុំ សូមសង្រ្គោះយើងខ្ញុំ។
ប.	បពិត្រព្រះបិតាដ៏វិសុទ្ធ ! យើងខ្ញុំសូមនឹករឭកដល់ព្រះគ្រីស្តជាព្រះបុត្រាព្រះអង្គ និងជាព្រះសង្រ្គោះយើងខ្ញុំ។ ក្រោយពេលព្រះបុត្រាឆ្លងកាត់ទុក្ខលំបាក និងសោយទិវង្គតនៅលើឈើឆ្កាង ព្រះបិតាបានប្រោសព្រះបុត្រាឱ្យមានព្រះជន្មរស់ឡើងវិញ ប្រកបដោយសិរីរុងរឿង និងគង់ខាងស្តាំព្រះអង្គ។ យើងខ្ញុំសូមប្រកាសពីកិច្ចការនៃព្រះហឫទ័យស្រឡាញ់របស់ព្រះអង្គ រហូតដល់ពេលព្រះគ្រីស្តយាងមកវិញ ហើយយើងខ្ញុំក៏សូមថ្វាយព្រះអង្គនូវនំបុ័ងដែលផ្តល់ជីវិត និងពែងនៃព្រះពរ។ សូមទ្រង់ទតមើលតង្វាយរបស់ព្រះសហគមន៍ព្រះអង្គដោយអនុគ្រោះ យើងខ្ញុំសូមបង្ហាញពីសក្ការបូជានៃបុណ្យចម្លងរបស់ព្រះគ្រីស្ត ដែលយើងខ្ញុំបានទទួលបន្តពីជំនាន់មុនៗ។ ដោយឫទ្ធានុភាពរបស់ព្រះវិញ្ញាណនៃសេចក្តីស្រឡាញ់ សូមរាប់បញ្ចូលយើងខ្ញុំទៅក្នុងចំណោមសរីរាង្គរបស់ព្រះបុត្រាព្រះអង្គ ចាប់ពីឥឡូវនេះ រហូតដល់ថ្ងៃយើងខ្ញុំទទួលជីវិតអស់កល្បជានិច្ច គឺនៅក្នុងព្រះកាយ និងព្រះលោហិតព្រះគ្រីស្ត ដែលយើងខ្ញុំរួបរួមគ្នាជាធ្លុងតែមួយ។ ឱ ព្រះអម្ចាស់អើយ ! សូមឱ្យព្រះសហគមន៍របស់ព្រះអង្គមានជំនឿ និងសេចក្តីស្រឡាញ់ឥតខ្ចោះ រួមជាមួយសម្តេចប៉ាបយើងខ្ញុំ (នាម…) ជាមួយលោក (នាម…) ជាអភិបាលព្រះសហគមន៍យើងខ្ញុំ និងជាមួយលោកអភិបាលទាំងឡាយ ជាមួយលោកបូជាចារ្យ និងលោកឧបដ្ឋាក ព្រមទាំងប្រជារាស្រ្តទាំងអស់ ដែលព្រះអង្គបានលោះធ្វើជាកម្មសិទ្ធិរបស់ព្រះអង្គ។ សូមទ្រង់បើកភ្នែកយើងខ្ញុំ ឱ្យស្គាល់ពីសេចក្តីត្រូវការរបស់បងប្អូនយើងខ្ញុំ សូមបំភ្លឺចិត្តគំនិតយើងខ្ញុំឱ្យពោលពាក្យ និងប្រព្រឹត្តកិច្ចការ ដើម្បីលើកទឹកចិត្តអស់អ្នកដែលនឿយហត់ និងមានបន្ទុកធ្ងន់។ សូមប្រោសឱ្យយើងខ្ញុំបម្រើបងប្អូនទាំងនោះ ដោយចិត្តស្មោះត្រង់ តាមគំរូ និងសេចក្តីប្រៀនប្រដៅរបស់ព្រះគ្រីស្ត។ សូមឱ្យព្រះសហគមន៍របស់ព្រះអង្គផ្តល់សក្ខីភាពដ៏រស់រវើក អំពីសេចក្តីពិត និងសេរីភាព អំពីសន្តិភាព និងយុត្តិធម៌ ដើម្បីឱ្យមនុស្សគ្រប់ៗរូបភ្ញាក់រឭកក្នុងសេចក្តីសង្ឃឹមថ្មី។ សូមព្រះអង្គនឹកដល់អស់បងប្អូនយើងខ្ញុំ (ឈ្មោះ…និងឈ្មោះ…) ដែលសម្រាន្តលក់ក្នុងសេចក្តីសុខសាន្តរបស់ព្រះគ្រីស្ត ព្រមទាំងមរណបុគ្គលទាំងឡាយ មានតែព្រះអង្គទេ ដែលស្គាល់ជំនឿរបស់អ្នកទាំងនោះ។ សូមព្រះអង្គទទួលបុគ្គលទាំងនោះ ឱ្យគេមានអំណរសប្បាយ ក្នុងពន្លឺនៃព្រះភក្រ្តព្រះអង្គ ហើយនៅពេលគេរស់ឡើងវិញ សូមប្រទានឱ្យគេមានជីវិតពេញបរិបូណ៌។ ពេលយើងខ្ញុំបញ្ចប់ដំណើរនៅនាលោកនេះ សូមព្រះអង្គប្រោសប្រទានឱ្យយើងខ្ញុំ បានទទួលលំនៅស្ថានដ៏ស្ថិតស្ថេរ និងរស់នៅជាមួយព្រះអង្គអស់កល្បជានិច្ច។ យើងខ្ញុំទាំងអស់គ្នាសូមកោតសរសើរ និងលើកតម្កេីងព្រះអង្គ រួមជាមួយព្រះនាងព្រហ្មចារិនីម៉ារី ដែលពោរពេញដោយសុភមង្គល ជាមាតាព្រះជាម្ចាស់ ជាមួយអស់គ្រីស្តទូត និងមរណសាក្សី (ជាមួយសន្ត…ដែលយើងខ្ញុំគោរពក្នុងថ្ងៃនោះ ឬជាឧបការី) ព្រមទាំងសន្តបុគ្គលទាំងឡាយ តាមរយៈព្រះយេស៊ូគ្រីស្តជាព្រះបុត្រាព្រះអង្គ។ ឱ ព្រះជាម្ចាស់ជាព្រះបិតាដ៏មានឫទ្ធានុភាពសព្វប្រការ ! គឺដោយព្រះគ្រីស្ត ជាមួយព្រះគ្រីស្ត និងក្នុងអង្គព្រះគ្រីស្ត រួមជាមួយព្រះវិញ្ញាណដ៏វិសុទ្ធផង បានជាយើងខ្ញុំ សូមលើកតម្កេីងសិរីរុងរឿងរបស់ព្រះអង្គ អស់កល្បជាអង្វែងតរៀងទៅ។
គ្រ.	អាម៉ែន។

ពិធីទទួលព្រះកាយ និងព្រះលោហិត >>

550 Views

Post Views: 543