អត្ថបទថ្ងៃពុធ អាទិត្យទី២២ រដូវធម្មតា
ថ្ងៃពុធ ទី១ ខែកញ្ញា ឆ្នាំ២០២១ ព័ណបៃតង
អត្ថបទទី១ ឆ្នាំសេស
សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូឡូស កូឡ ១,១-៨
ខ្ញុំប៉ូល ដែលព្រះជាម្ចាស់សព្វព្រះហប្ញទ័យតែងតាំងជាទូតរបស់ព្រះយេស៊ូគ្រីស្ដ និងលោកធីម៉ូថេ សូមជម្រាបមកប្រជារាស្រ្ដដ៏វិសុទ្ធ និងបងប្អូនដែលជឿលើព្រះគ្រីស្ដនៅក្រុងកូឡូស ។ សូមព្រះជាម្ចាស់ ជាព្រះបិតារបស់យើងប្រណីសន្ដោស និងប្រទានសេចក្ដីសុខសាន្ដដល់បងប្អូន ។
យើងសូមអរព្រះគុណព្រះជាម្ចាស់ ជាព្រះបិតារបស់ព្រះយេស៊ូគ្រីស្ដជាអម្ចាស់នៃយើង គ្រប់ពេលដែលយើងអធិដ្ឋានឲ្យបងប្អូន ដ្បិតយើងបានឮគេនិយាយអំពីជំនឿរបស់បងប្អូនលើព្រះយេស៊ូគ្រីស្ដ និងអំពីសេចក្ដីស្រឡាញ់របស់បងប្អូនចំពោះជនដ៏វិសុទ្ធទាំងអស់ ព្រោះតែសេចក្ដីសង្ឃឹមដែលព្រះអង្គបម្រុងទុកសម្រាប់បងប្អូននៅស្ថានបរមសុខ ។ បងប្អូនបានស្គាល់សេចក្ដីសង្ឃឹមនេះ ដោយសារព្រះបន្ទូលនៃសេចក្ដីពិត គឺដំណឹងល្អដែលបានមកដល់បងប្អូន។ ចាប់តាំងពីថ្ងៃដែលបងប្អូនបានទទួល និងបានស្គាល់ព្រះហប្ញទ័យប្រណីសន្ដោសរបស់ព្រះជាម្ចាស់ឲ្យបានសព្វគ្រប់មក ដំណឹងល្អនេះបានបង្កើតផល និងចម្រើនឡើងក្នុងចំណោមបងប្អូន ដូចនៅក្នុងពិភពលោកទាំងមូលដែរ ។ បងប្អូនបានទទួលការអប់រំនេះពីសំណាក់លោកអេប៉ាប្រាស ជាសហការីដ៏ជាទីស្រឡាញ់ដែលរួមការងារជាមួយយើង ។ គាត់ជាអ្នកបម្រើដ៏ស្មោះត្រង់របស់ព្រះគ្រីស្ដសម្រាប់បងប្អូន ។ គាត់បានប្រាប់ឲ្យយើងដឹងច្បាស់អំពីសេចក្ដីស្រឡាញ់ ដែលព្រះវិញ្ញាណប្រទានមកបងប្អូន ។
ទំនុកតម្កើងលេខ ៥២ (៥១),១០-១១ បទកាកគតិ
១០. | រីឯខ្ញុំវិញ | ចិត្តខ្ញុំពោរពេញ | គ្មានគេចកែប្រែ | នៅក្នុងដំណាក់ |
ព្រះម្ចាស់ឥតបែរ | រៀងរាល់ថ្ងៃខែ | នៅក្បែរព្រះអង្គ ។ | ||
ដូចដើមខៀវខ្ចី | អូលីវស្រស់ថ្មី | ល្អល្អះផូរផង់ | ដោយពឹងផ្អែកលើ | |
បារមីព្រះអង្គ | ត្រចះត្រចង់ | រៀងទៅឥតភ្លេច ។ | ||
១១. | ទូលបង្គំនឹង | សរសើរតម្កើង | ព្រះអង្គជានិច្ច | ចំពោះគ្រប់កិច្ច |
ការទ្រង់ប្រព្រឹត្ត | ទូលបង្គំទុកចិត្ត | ព្រះនាមព្រះអង្គ ។ | ||
នៅមុខអស់អ្នក | គោរពស្មោះស្ម័គ្រ | ប្រណិប័តន៍ទ្រង់ | ព្រោះព្រះហឫទ័យ | |
សប្បុរសទៀងត្រង់ | យើងខ្ញុំផ្ចិតផ្ចង់ | តាមទ្រង់ទៅអើយ ។ |
ពិធីអបអរសាទរព្រះគម្ពីរដំណឹងល្អ លក ៤,១៨-១៩
អាលេលូយ៉ា! អាលេលូយ៉ា! ព្រះអម្ចាស់បានចាត់ខ្ញុំឲ្យមកនាំដំណឹងល្អទៅប្រាប់ប្រជាជនក្រីក្រ ឲ្យមកប្រកាសប្រាប់ជនជាប់ជាឈ្លើយថា គេនឹងមានសេរីភាព។ អាលេលូយ៉ា! |
សូមថ្លែងព្រះគម្ពីរដំណឹងល្អតាមសន្តលូកា លក ៤, ៣៨-៤៤
ព្រះយេស៊ូយាងចេញពីធម្មសាលាទៅផ្ទះលោកស៊ីម៉ូន ។ ពេលនោះ ម្ដាយក្មេកលោកស៊ីម៉ូនគ្រុនយ៉ាងខ្លាំង ។ គេទូលព្រះអង្គមេត្តាប្រោសឲ្យគាត់បានជា ។ ព្រះយេស៊ូឧិនទៅលើអ្នកជំងឺ ព្រះអង្គគំរាមជំងឺគ្រុន ជំងឺគ្រុនក៏ចេញបាត់ទៅ ។ រំពេចនោះ គាត់ក្រោកឡើង ហើយបម្រើភ្ញៀវ ។
នៅពេលថ្ងៃលិច អ្នកសុ្រកទាំងអស់នាំបងប្អូនដែលមានជំងឺផ្សេងៗ មករកព្រះយេស៊ូ។ ព្រះអង្គដាក់ព្រះហស្ដលើអ្នកទាំងនោះ ហើយប្រោសគេឲ្យជាសះស្បើយគ្រប់ៗគ្នា ។ មានខ្មោចចេញពីមនុស្សជាច្រើនទាំងស្រែកថា៖« ព្រះអង្គជាព្រះបុត្រារបស់ព្រះជាម្ចាស់»។ ប៉ុន្ដែ ព្រះយេស៊ូគំរាមខ្មោចទាំងនោះ មិនឲ្យនិយាយជាដាច់ខាត ព្រោះវាដឹងថាព្រះអង្គជាព្រះគ្រីស្ដ ។
ព្រលឹមឡើង ព្រះយេស៊ូយាងចេញពីក្រុងទៅកន្លែងស្ងាត់ ។ បណ្ដាជននាំគ្នាដើររកព្រះអង្គ ។ លុះជួបហើយ គេឃាត់ព្រះអង្គឲ្យនៅជាមួយ មិនចង់ឲ្យយាងចាកចោលគេឡើយ ប៉ុន្ដែព្រះយេស៊ូមានព្រះបន្ទូលទៅគេថា៖« ខ្ញុំត្រូវនាំដំណឹងល្អពីព្រះរាជ្យរបស់ព្រះជាម្ចាស់ ទៅក្រុងឯទៀតៗដែរ ដ្បិតព្រះអង្គបានចាត់ខ្ញុំឲ្យមកបំពេញការនេះឯង » ។ បន្ទាប់មក ព្រះយេស៊ូប្រកាសដំណឹងល្អតាមធម្មសាលានានានៅក្នុងស្រុកកាលីឡេ ។