ថ្ងៃពុធ ទី២២ ខែកក្កដា ឆ្នាំ២០២៦

បុណ្យគោរព
សន្តីម៉ារីម៉ាដាឡា ជាទូតនៃគ្រីស្តទូត

សូមចុចនៅទីនេះ

ក្នុងគម្ពីរដំណឹងល្អទាំងបួនកណ្ឌមានរ៉ាយរ៉ាប់អំពីស្រ្តីៗ ដែលឈរចាំនៅក្បែរឈើឆ្កាងព្រះយេស៊ូ។ លោកលូកាបញ្ជាក់ថា “ស្ត្រីទាំងនោះបានបម្រើព្រះយេស៊ូតាំងពីស្រុកកាលីឡមក”។ ក្នុងចំណោមស្ត្រីទាំងនោះមាននាងម៉ារីពីភូមិម៉ាដាឡាជាដើម។ ព្រះយេស៊ូបានប្រោស​ឱ្យនាងរួចពីអំណាចរបស់មារ។ ដោយព្រះយេស៊ូជម្រះចិត្តគំនិតរបស់នាង នាងមានចិត្តស្រឡាញ់ព្រះអង្គយ៉ាងខ្លាំង។ នាងម៉ារីម៉ាដា​ឡាទៅយំមុខផ្នូរព្រះយេស៊ូ។ នាងយល់ថា ទោះបីព្រះយេស៊ូសោយទិវង្គតក៏ដោយ ក៏ព្រះអង្គនៅតែជាព្រះអម្ចាស់របស់នាងដដែល។ ព្រះគ្រីស្តដែលទទួលព្រះជន្មថ្មីដ៏រុងរឿង បានប្រទានឱ្យនាងមានភារកិច្ចប្រកាសដំណឹងឱ្យក្រុមគ្រីស្តទូតថា ព្រះអង្គពិតជាទទួលព្រះជន្មថ្មីដ៏រុងរឿងមែន!។

សូមថ្លែងព្រះគម្ពីរព្យាការីយេរេមី យរ ១,១.៤-១០

ក្នុងគម្ពីរនេះ មានរៀបរាប់អំពីសេចក្តីដែលព្យាការីយេរេមីបានថ្លែង។ ព្យាការីយេរេមី​​ត្រូវជាកូនរបស់លោកបូជាចារ្យហ៊ីលគីយ៉ា ក្នុងក្រុមបូជាចារ្យនៅភូមិអាណាតូតក្នុង​ស្រុកបេនយ៉ាមីន។ ព្រះអម្ចាស់មានព្រះបន្ទូលមកខ្ញុំថា៖«យើងស្គាល់អ្នកតាំងពីមុនពេលដែលយើងបានសូនអ្នកក្នុងផ្ទៃម្តាយម៉េ្លះ យើងក៏បានញែកអ្នកទុកសម្រាប់យើង តាំងពីមុនពេលអ្នកកើតចេញពីផ្ទៃម្តាយដែរ។ យើងតែងតាំងអ្នកឱ្យធ្វើជាព្យាការីសម្រាប់​ប្រជាជាតិនានា»។ ខ្ញុំទូលព្រះអង្គថា៖«បពិត្រព្រះជាអម្ចាស់! ទូលបង្គំគ្មានសិទ្ធិនឹងថ្លែងព្រះបន្ទូលទេ ដ្បិតទូលបង្គំនៅក្មេងពេក»។ ព្រះអម្ចាស់មានព្រះបន្ទូលមកខ្ញុំថា៖«កុំ​ពោលថា ខ្ញុំនៅក្មេងពេកនោះឡើយ អ្នកត្រូវតែទៅជួបអស់អ្នកដែលយើងចាត់ឱ្យទៅជួប ហើយប្រកាសសេចក្តីទាំងប៉ុន្មានដែលយើងនឹងបង្គាប់អ្នក។ កុំភ័យខ្លាចពួកគេឡើយ ដ្បិតយើងនៅជាមួយអ្នក ដើម្បីរំដោះអ្នក!»។ នេះជាព្រះបន្ទូលរបស់ព្រះអម្ចាស់។ បន្ទាប់មក ព្រះអម្ចាស់លាតព្រះហស្តមកពាល់មាត់ខ្ញុំ ហើយមានព្រះបន្ទូលមកខ្ញុំថា៖«យើងដាក់ពាក្យរបស់យើងក្នុងមាត់អ្នកហើយ។ ថ្ងៃនេះ យើងតែងតាំងអ្នកឱ្យ​មានអំណាចលើប្រជាជាតិ និងលើអាណាចក្រទាំងឡាយ ដើម្បី​ឱ្យអ្នករំលើងនិងរំលំ ដើម្បីឱ្យអ្នកកម្ទេច និងបំផ្លាញ ហើយដើម្បីឱ្យអ្នកសង់ និងដាំឡើងវិញ»។

ទំនុកតម្កើងលេខ ៧១ (៧០),១-៣.៥-៦.១៥.១៧ បទពាក្យ ៧

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១៣,១-៩

នៅគ្រានោះ ព្រះយេស៊ូចាកចេញពីផ្ទះ យាងទៅគង់នៅមាត់សមុទ្រ មានមហាជន​ច្រើនកុះករមកចោមរោមព្រះអង្គ។ ព្រះអង្គក៏យាង​ចុះទៅគង់ក្នុងទូកមួយ រីឯបណ្តា​ជនឈរនៅមាត់ច្រាំង។ ព្រះអង្គមានព្រះបន្ទូលទៅគេយ៉ាងច្រើន ដោយប្រើពាក្យ​ប្រស្នាដូចតទៅនេះ៖​«អ្នកសាបព្រោះចេញទៅព្រោះគ្រាប់ពូជ។ ពេលគាត់ព្រោះ មាន​គ្រាប់ពូជខ្លះធ្លាក់ទៅលើផ្លូវ ហើយសត្វមកចឹកស៊ីអស់ទៅ។ មានគ្រាប់​ពូជខ្លះទៀតធ្លាក់ទៅលើកន្លែងមានថ្ម ពុំសូវមានដីច្រើន គ្រាប់ពូជក៏ដុះឡើងភ្លាម ដោយដីមិនសូវ​ជ្រៅ លុះដល់ថ្ងៃក្តៅឡើងពន្លកទាំងនោះក៏ក្រៀមស្វិតអស់ទៅ ព្រោះឫសចាក់មិនបាន​ជ្រៅ។ គ្រាប់ពូជខ្លះទៀតធ្លាក់ទៅលើដីមានបន្លា បន្លាក៏ដុះឡើងរួបរឹតស្រូវមិនឱ្យ​ដុះបានឡើយ។ គ្រាប់ពូជខ្លះទៀតធ្លាក់ទៅលើដីមានជីជាតិល្អ មួយគ្រាប់ឱ្យផល​ជាមួយរយគ្រាប់ មួយទៀតហុកសិប និងមួយទៀតឱ្យសាមសិប។ អស់អ្នកដែល​ឮពាក្យនេះសូមយកទៅពិចារណាចុះ!»។