ថ្ងៃពុធ ទី០៩ ខែកក្ដដា ឆ្នាំ២០២៥

អត្ថបទទី១៖ សូមថ្លែងព្រះគម្ពីរកំណើត កណ ៤១,៥៥-៥៧; ៤២,៥-៧.១៧-២៥

នៅគ្រានោះ ទុរ្ភិក្សកើតក្នុងស្រុកអេស៊ីបទាំងមូល។ ប្រជាជននាំគ្នាទាមទារសុំស្បៀងអាហារពីព្រះបាទផារ៉ោន។ ព្រះបាទផារ៉ោនក៏មានរាជឱង្ការទៅកាន់ជនជាតិអេស៊ីបទាំងអស់ថា៖ «ចូរទៅជួបលោកយ៉ូសែបវិញទៅ! បើលោកប្រាប់ឱ្យធ្វើអ្វី ចូរធ្វើតាមពាក្យលោកទៅ!»។ ពេលនោះ ទុរ្ភិក្សបានរាលដាលពាសពេញទូទាំងស្រុក​អេស៊ីប។ លោកយ៉ូសែបអនុញ្ញាតឱ្យគេបើកឃ្លាំងទាំងប៉ុន្មានតាមក្រុងនានា យក ស្រូវលក់ឱ្យជនជាតិអេស៊ីប។ ក៏ប៉ុន្តែ ទុរ្ភិក្សនៅតែកើតមានកាន់តែខ្លាំងឡើងៗ នៅ​ក្នុងស្រុកអេស៊ីបដដែល។ មនុស្សម្នាពីគ្រប់ប្រទេស នាំគ្នាធ្វើដំណើរមកស្រុកអេស៊ីប ដើម្បីរកទិញស្រូវពីលោកយ៉ូសែប ដ្បិតទុរ្ភិក្សរាលដាលកាន់តែខ្លាំងឡើងៗគ្រប់ប្រទេសនៅលើផែនដីទាំងមូល។ កូនទាំងប៉ុន្មានរបស់លោកយ៉ាកុប ក៏នាំគ្នាធ្វើដំណើរទៅរក​ទិញស្រូវនៅស្រុកអេស៊ីប ដូចអ្នកឯទៀតៗដែរ ដ្បិតនៅស្រុកកាណានក៏កើតទុរ្ភិក្ស​ដែរ។ នៅគ្រានោះ លោកយ៉ូសែបមានអំណាចគ្រប់គ្រងលើស្រុកអេស៊ីប ហើយលោកចាត់ចែងលក់ស្រូវឱ្យអ្នកស្រុកនោះទាំងអស់។ បងៗរបស់លោកនាំគ្នាមក​ក្រាបថ្វាយបង្គំលោក ឱនមុខចុះដល់ដី។ កាលលោកយ៉ូសែបឃើញបងៗ លោក​ស្គាល់គេភ្លាម តែលោកមិនធ្វើឱ្យគេស្គាល់លោកវិញទេ។ លោកក៏មានប្រសាសន៍យ៉ាងតឹងរ៉ឹងទៅកាន់ពួកគេ។ លោកបញ្ជាឱ្យគេ ចាប់​បងៗយកទៅឃុំឃាំងអស់​រយៈពេលបីថ្ងៃ។ លុះដល់ថ្ងៃទីបី លោកយ៉ូសែបមានប្រសាសន៍ទៅបងៗថា៖ «ខ្ញុំជាអ្នកគោរពកោតខ្លាចព្រះជាម្ចាស់ បើអ្នករាល់គ្នាចងរួចជីវិតត្រូវធ្វើដូចតទៅ ប្រសិនបើអ្នក​រាល់គ្នាពិតជាមនុស្សទៀងត្រង់មែន ត្រូវទុកម្នាក់ក្នុងចំណោមអ្នករាល់គ្នាឱ្យនៅ​ជាប់ឃុំឃាំងនៅទីនេះសិន។ រីអ្នកឯទៀតៗត្រូវវិលត្រឡប់ទៅស្រុកវិញ ដោយយក​ស្បៀងអាហារទៅឱ្យក្រុមគ្រួសារដែលកំពុងតែអត់ឃ្លាននោះទៅ។ បន្ទាប់មក ​ត្រូវនាំប្អូនពៅមកជួបខ្ញុំ ដើម្បីបញ្ជាក់ថា ពាក្យដែលអ្នករាល់គ្នានិយាយពិតមែនហើយ។ ដូច្នេះ អ្នករាល់គ្នាមិនត្រូវបាត់បង់ជីវិតឡើយ»។ ពួកគេក៏យល់ព្រមធ្វើតាម​ទាំងនិយាយគ្នាទៅវិញទៅមកថា៖ «ឃើញទេ! យើងបានប្រព្រឹត្ដខុសចំពោះប្អូនយើងហើយ! យើងបានឃើញទុក្ខលំបាករបស់វានៅពេលវាទទូចអង្វរយើង តែយើងពុំបាន​ស្តាប់វាទេ។ ហេតុនេះហើយ បានជាយើងត្រូវកើតទុក្ខលំបាកដូច្នេះ»។ លោករូបេនពោលថា៖ «បងបានប្រាប់ប្អូនៗហើយថា កុំសម្លាប់ប្អូនយើងឱ្យសោះ! តែអ្នករាល់គ្នា​ពុំព្រមស្តាប់ទេ។ ឥឡូវនេះ យើងត្រូវតែរងទុក្ខទោសព្រោះតែយើងបានបង្ហូរឈាមប្អូន​យើង»។ ពួកគេពុំដឹងថា លោក​យ៉ូសែបស្តាប់ឮទាំង​អស់ទេ ដ្បិតពេលលោកនិយាយជាមួយពួកគេមានអ្នកបកប្រែ។ លោកយ៉ូសែបចេញពីពួកគេបន្តិច ដើម្បីទៅពួនយំ។

ទំនុកតម្កើងលេខ ៣៣ (៣២),២-៣.១០-១១.១៨-១៩ បទព្រហ្មគីតិ

ពិធីអបអរសាទរព្រះគម្ពីរដំណឹងល្អតាម មក ១,១៥

អាលេលូយ៉ា! អាលេលូយ៉ា!
ព្រះរាជ្យរបស់ព្រះជាម្ចាស់មកជិតបង្កើយហើយ! ចូរនាំគ្នាជឿដំណឹងល្អចុះ!។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១០,១-៧

ព្រះយេស៊ូត្រាស់ហៅក្រុមសាវ័កទាំងដប់ពីរនាក់មក ហើយប្រទានឱ្យគេមាន​អំណាចដេញខ្មោច ព្រមទាំងមានអំណាចប្រោសអ្នកជំងឺគ្រប់យ៉ាង និងអ្នកពិការគ្រប់​ប្រភេទឱ្យបានជាផង។ ទូតរបស់ព្រះអង្គទាំងដប់ពីរមាននាមដូចតទៅ អ្នកទី​មួយគឺស៊ីម៉ូន ហៅសិលានិងអន់ដ្រេ ជាប្អូនរបស់គាត់។ យ៉ាកុប និងយ៉ូហាន ជាប្អូន​របស់គាត់ ដែលត្រូវជាកូនរបស់លោកសេបេដេ។ ភីលីព និងបារថូឡូមេ ថូម៉ាស់ និងម៉ាថាយ​ជាអ្នកទារពន្ធ។ យ៉ាកុប ជាកូនរបស់លោកអាល់ផាយ និងថាដេ ស៊ីម៉ូនជាអ្នកជាតិ​និយម​ និងយូដាសអ៊ីស្ការីយ៉ុត ជាអ្នកក្បត់ព្រះអង្គ។ ព្រះយេស៊ូចាត់ក្រុមសាវ័កទាំងដប់ពីរនាក់នេះឱ្យទៅ ដោយផ្ដែផ្ដាំថា៖ «កុំទៅ​រកសាសន៍ដទៃឡើយ ហើយក៏កុំចូលទៅក្នុងភូមិរបស់ជនជាតិសាម៉ារីដែរ គឺត្រូវទៅ​ស្វែងរកអស់អ្នកដែលវង្វេងក្នុងចំណោមជនជាតិអ៊ីស្រាអែលនោះវិញ។ ពេលធ្វើ​ដំណើរទៅ ចូរប្រកាសថា ព្រះរាជ្យនៃស្ថានបរមសុខមកជិតបង្កើយហើយ!»។