ថ្ងៃអង្គារ ទី២៤ ខែតុលា ឆ្នាំ២០២៣

អត្ថបទទី១៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្តបរិស័ទក្រុងរ៉ូម រម ៥,១២,១៥.១៧-១៩.២០-២១

បងប្អូនជាទីស្រឡាញ់!
ដោយសារតែមនុស្សតែម្នាក់ បាបបានចូលមកក្នុងពិភពលោក​​ ហើយដោយសារបាប សេចក្ដីស្លាប់ក៏ចូលមកដែរ។ ហេតុនេះហើយ បានជាសេចក្ដីស្លាប់រាលដាលដល់មនុស្សគ្រប់ៗរូប ព្រោះគ្រប់គ្នាសុទ្ធតែបានប្រព្រឹត្ដអំពើបាប។ មនុស្សទូទៅត្រូវស្លាប់ព្រោះតែកំហុសរបស់មនុស្សម្នាក់យ៉ាងណា ព្រះហប្ញទ័យប្រណីសន្ដោសរបស់ព្រះជាម្ចាស់ និងព្រះអំណោយរទាននៃការប្រណីសន្ដោសក៏បានហូរ​មកលើ​មនុស្សទាំងអស់រឹតតែបរិបូណ៌ ដោយសារមនុស្សម្នាក់យ៉ាងនោះដែរ គឺព្រះយេស៊ូគ្រីស្ដ។ បើលោកអដាំតែម្នាក់បានប្រព្រឹត្តខុស មច្ចុរាជបានសោយរាជ្យប៉ុណ្ណឹងទៅហើយ ចំណង់បើអស់អ្នកដែលបានទទួលការប្រណីសន្ដោសដ៏បរិបូណ៌លើសលប់ ដែលប្រោសគេឱ្យបានសុចរិតតាមព្រះអំណោយទាន នឹងរឹតតែបានសោយរាជ្យនៅក្នុងជីវិតថែមទៀត ដោយសារព្រះយេស៊ូគ្រីស្ដតែមួយព្រះអង្គវិញជាពុំខាន។ សរុបមក ដោយសារកំហុស​របស់មនុស្សតែម្នាក់ មនុស្សទាំងអស់ត្រូវជាប់ទោសយ៉ាងណា ដោយសារអំពើសុចរិត​របស់មនុស្សតែម្នាក់ មនុស្សទាំងអស់ក៏បានសុចរិត និងទទួលជីវិតយ៉ាងនោះដែរ ហើយមនុស្សទាំងអស់ក៏ជាប់បាបដោយសារតែមនុស្សម្នាក់មិនស្ដាប់បង្គាប់យ៉ាងណា ព្រះជាម្ចាស់ក៏នឹងប្រោសមនុស្សទាំងអស់ឱ្យបានសុចរិត ដោយសារមនុស្សតែម្នាក់​បានស្ដាប់បង្គាប់យ៉ាងនោះដែរ។ នៅទីណាដែលមានបាបកាន់ច្រើន នៅទីនោះ ព្រះហប្ញទ័យប្រណីសន្ដោស​របស់​ព្រះជាម្ចាស់ ក៏រឹតតែមានច្រើនលើស​លប់ថែមទៀត។ ដូចបាបសោយរាជ្យបណ្ដាល​ឱ្យមានសេចក្ដីស្លាប់យ៉ាងណា ព្រះហប្ញទ័យប្រណីសន្ដោសដែលប្រោសមនុស្សឱ្យបាន​សុចរិត ក៏សោយរាជ្យយ៉ាងនោះដែរ ដើម្បីឱ្យមនុស្សលោកមានជីវិតអស់កល្បជានិច្ច ដោយសារព្រះយេស៊ូគ្រីស្ដជាអម្ចាស់នៃយើង។

ទំនុកតម្កើងលេខ ៤០ (៣៩) ,៧-១០.១៧ បទពាក្យ ៧

ពិធីអបអរសាទរព្រះគម្ពីរដំណឹងល្អតាម លក ២១,៣៦

អាលេលូយ៉ា! អាលេលូយ៉ា!
អ្នកដែលប្រុងស្មារតី អធិដ្ឋានគ្រប់ពេលវេលាពិតជាមានសុភមង្គល ដ្បិតគេអាចឈរនៅមុខបុត្រមនុស្ស។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១២,៣៥-៣៨

ព្រះយេស៊ូមានព្រះបន្ទូលទៅកាន់ក្រុមសាវ័កថា៖ «ចូរប្រុងប្រៀបខ្លួន ហើយទុក​ឱ្យ​ចង្កៀងរបស់អ្នករាល់គ្នានៅឆេះ។ ចូរប្រព្រឹត្តឱ្យបានដូចពួកអ្នកបម្រើ ដែលរងចាំ​ម្ចាស់វិលត្រឡប់មកពីជប់លៀងវិញ គឺនៅពេលមកដល់ លោកគោះទ្វារ អ្នកបម្រើ​ទៅបើកជូនភ្លាម។ ពេលម្ចាស់ត្រឡប់មកដល់ ឃើញអ្នកបម្រើណានៅរងចាំលោក អ្នកបម្រើនោះមានសុភមង្គលហើយ! ខ្ញុំសុំប្រាប់ឱ្យអ្នករាល់គ្នាដឹងច្បាស់ថា លោកនឹង​ឱ្យអ្នកបម្រើនោះអង្គុយបរិភោគ ហើយលោករៀបចំខ្លួនបម្រើគេវិញ។ បើលោកវិល​មកវិញនៅពាក់កណ្ដាលអធ្រាត្រ ឬជិតភ្លឺ ហើយឃើញអ្នកបម្រើទាំងនោះនៅរងចាំ​ដូច្នេះ ពួកគេប្រាកដជាមានសុភមង្គលហើយ»។