ថ្ងៃអង្គារ ទី២៦ ខែកញ្ញា ឆ្នាំ២០២៣

អត្ថបទទី១៖ សូមថ្លែងព្រះគម្ពីរលោកអែសរ៉ា អរ ៦,៧-៨.១២.១៤-២

ព្រះបាទដារីយ៉ូស ជាព្រះមហាក្សត្រស្រុកពែរ្ស សរសេរព្រះរាជចុតហ្មាយ បញ្ជាក់​ដល់ព្រះរាជប្រតិភូដែលត្រួតត្រាផែនដីទាំងប៉ុន្មាន នៅខាងនាយទន្លេអឺប្រាតថា៖ «ចូរ​ទុកឱ្យអភិ​បាល និងពួកព្រឹទ្ធាចារ្យរបស់ជនជាតិយូដាសង់ព្រះដំណាក់របស់ព្រះជាម្ចាស់នៅកន្លែងដើម។ សុំអស់លោកជួយពួកព្រឹទ្ធាចារ្យរបស់ជនជាតិយូដាក្នុងការសាងសង់​ព្រះដំណាក់របស់ព្រះជាម្ចាស់ឡើងវិញផង ។ ចំពោះចំណាយក្នុងការសង់ ត្រូវយកពី​ឃ្លាំងរាជទ្រព្យ គឺប្រាក់នៃពន្ធអាករដែលទារពីតំបន់ខាងលិចទន្លេអឺប្រាតមកបើកឱ្យ​ពួកគេគ្រប់ចំនួនកុំបីអាក់ខានឡើយ។ យើងដារីយ៉ូសចេញបញ្ជានេះ ដូច្នេះ ត្រូវតែអនុវត្តតាមជាកំហិត»។ ពួកព្រឹទ្ធាចារ្យនៃជនជាតិយូដាបន្ដការសាង​សង់ព្រះវិហារដោយជោគជ័យ ស្របតាមសេចក្ដីដែលព្យាការីហាកាយ និងព្យាការីសាការីជាកូនរបស់លោកអ៊ីដូបានថ្លែង។ ពួកគេបង្ហើយការសាងសង់ព្រះវិហារ ស្របតាមបញ្ជារបស់ព្រះនៃអ៊ីស្រាអែល និងស្រប​តាមរាជក្រឹត្យរបស់ព្រះចៅស៊ីរូស និងព្រះចៅ​ដារីយ៉ូស។ គេសង់ព្រះដំណាក់ចប់សព្វ​គ្រប់នៅថ្ងៃទីបី ខែផល្គុន ក្នុងឆ្នាំទីប្រាំមួយ នៃរជ្ជកាលព្រះបាទដារីយ៉ូស។ ជនជាតិ​អ៊ីស្រាអែល ក្រុមបូជាចារ្យ ក្រុមលេវី និងប្រជាជននៅសេសសល់ដែលត្រូវគេកៀរ​ទៅជាឈ្លើយ ហើយវិញត្រលប់មកវិញនោះ នាំគ្នាប្រារព្ធពិធីបុណ្យឆ្លងព្រះដំណាក់របស់​ព្រះជាម្ចាស់ ដោយអំណរ។ ក្នុងឱកាសពិធីបុណ្យឆ្លងព្រះដំណាក់របស់ព្រះជាម្ចាស់នេះ​ ពួកគេយកគោបាមួយរយក្បាល ចៀមឈ្មោលពីររយក្បាល និងកូនចៀមចំនួនបួនរយក្បាលមកថ្វាយជាយញ្ញបូជារំដោះបាបសម្រាប់ប្រជាជនអ៊ីស្រាអែលទាំងមូល។ គេក៏​បានថ្វាយពពែឈ្មោលដប់ពីរក្បាល តាមចំនួនកុលសម្ព័ន្ធរបស់ជនជាតិអ៊ីស្រាអែលដែរ។ បន្ទាប់មក គេតែងតាំងក្រុមបូជាចារ្យតាមឋានៈរបស់ពួកគេ ព្រមទាំងតែងតាំងពួកលេវីជាក្រុមៗ តាមមុខងារដែលពួកគេបំពេញថ្វាយព្រះជាម្ចាស់នៅក្រុងយេរូសាឡឹម ​ដូចមានចែងទុកក្នុងគម្ពីររបស់លោកម៉ូសេ។ អស់អ្នកដែលគេកៀរទៅជាឈ្លើយ ហើយ​វិលត្រឡប់មកវិញនោះ នាំគ្នាប្រារព្ធពិធីបុណ្យចម្លងនៅថ្ងៃទីដប់បួន ក្នុងខែទីមួយ។ ក្រុមបូជាចារ្យ និងក្រុមលេវីនាំគ្នាធើ្វពិធីជម្រះកាយឱ្យបានបរិសុទ្ធ ហើយពួកគេក៏បានបរិសុទ្ធទាំងអស់គ្នា។ ពួកគេអារកកូនចៀមនៃពិធីបុណ្យចម្លងសម្រាប់ប្រជាជនទាំង​អស់ដែលជាប់ជាឈ្លើយ ហើយវិល​ត្រឡប់មកវិញ សម្រាប់ក្រុមបូជាចារ្យជាបងប្អូន និងសម្រាប់ខ្លួនឯងផ្ទាល់។

ទំនុកតម្កើងលេខ ១២២ (១២១) ,១-៥​ បទកាកគតិ

ពិធីអបអរសាទរព្រះគម្ពីរដំណឹងល្អតាម លក ៩,៥-៩

អាលេលូយ៉ា! អាលេលូយ៉ា!
អ្នកណាស្ដាប់ព្រះបន្ទូលរបស់ព្រះជាម្ចាស់ ហើយអនុវត្តតាម អ្នកនោះពិតជាមានសុភមង្គលមែន! អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ៨,១៩-២១

មាតា និងបងប្អូនរបស់ព្រះយេស៊ូនាំគ្នាមករកព្រះអង្គ ប៉ុន្ដែ មិនអាចចូលទៅជិត​ព្រះអង្គបានឡើយ ព្រោះមានមនុស្សច្រើនពេក។ មានគេទូលព្រះអង្គថា៖ «ម្ដាយ​លោក និងបងប្អូនលោកនៅខាងក្រៅចង់ជួបលោក»។ ព្រះយេស៊ូមានព្រះបន្ទូលទៅ​គេថា៖ «អស់អ្នកដែលស្ដាប់ព្រះបន្ទូលរបស់ព្រះជាម្ចាស់ ហើយប្រតិបត្តិតាម គឺអ្នក​នោះហើយជាម្ដាយ និងជាបងប្អូនរបស់ខ្ញុំ»។