អត្ថបទព្រះគម្ពីរ
ថ្ងៃអង្គារ ទី៧ ខែកញ្ញា ឆ្នាំ២០២១
អាទិត្យទី២៣ រដូវធម្មតា
ព័ណ៌បៃតង
អត្ថបទទី១ ឆ្នាំសេស
សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូឡូស កូឡ ២,៦-១៥
បងប្អូនជាទីស្រឡាញ់! បងប្អូនបានទទួលព្រះយេស៊ូគ្រីស្ដ ទុកជាព្រះអម្ចាស់ពីយើងយ៉ាងណាហើយ ចូររស់នៅរួមជាមួយព្រះអង្គយ៉ាងនោះតទៅទៀតទៅ!។ ចូរចាក់ប្ញស និងកសាងជីវិតលើព្រះអង្គ! ចូររក្សាជំនឿឲ្យបានរឹងប៉ឹង ស្របតាមសេចក្ដីប្រៀនប្រដៅដែលបងប្អូនបានទទួល ។ ចូរអរព្រះគុណព្រះជាម្ចាស់ ឲ្យបានច្រើនលើសលប់។
ចូរប្រុងប្រយ័ត្នកុំឲ្យនរណាម្នាក់មកទាក់ទាញបងប្អូនបាន ដោយប្រើទស្សនវិជ្ជា ឬប្រើពាក្យបោកបញ្ឆោតឥតខ្លឹមសារ ស្របតាមសេចក្ដីប្រៀនប្រដៅរបស់មនុស្សតៗគ្នាមក និងស្របតាមអ្វីៗជាអរូប ដែលមានឥទិ្ធពលលើលោកីយ៍ គឺមិនស្របតាមព្រះគ្រីស្ដទេ ដ្បិតគ្រប់លក្ខណសម្បិត្តរបស់ព្រះជាម្ចាស់ ស្ថិតនៅយ៉ាងពោរពេញក្នុងរូបកាយព្រះគ្រីស្ដ។ រីឯបងប្អូនក៏បានពោរពេញដូច្នោះដែរ ដោយរួមក្នុងអង្គព្រះគ្រីស្ដដែលជាម្ចាស់លើវត្ថុសក្ដិសិទ្ធិ និងលើអ្វីៗទាំងអស់ដែលមានអំណាចលើលោកនេះ។
ក្នុងអង្គព្រះគ្រីស្ដ បងប្អូនក៏បានទទួលពិធីកាត់ស្បែកដែរ តែមិនមែនពិធីកាត់ស្បែកដោយដៃមនុស្សទេ គឺបងប្អូនបានដោះរូបកាយខាងលោកីយ៍ចេញ នេះហើយជាពិធីកាត់ស្បែកតាមរបៀបព្រះគ្រីស្ដ។ ពេលបងប្អូនទទួលអគ្គសញ្ញាជ្រមុជទឹក បងប្អូនក៏មានជីវិតរស់ឡើងវិញរួមជាមួយព្រះអង្គដែរ ព្រោះបងប្អូនមានជំនឿលើប្ញទ្ធានុភាពរបស់ព្រះជាម្ចាស់ ដែលបានប្រោសព្រះគ្រីស្ដឲ្យទទួលព្រះជន្មដ៏រុងរឿង។ ពីដើមបងប្អូនស្លាប់ព្រោះកំហុសរបស់ខ្លួន និងមកពីបងប្អូនពុំបានទទួលពិធីកាត់ស្បែកខាងរូបកាយមែន តែឥឡូវនេះ ព្រះជាម្ចាស់បានប្រោសឲ្យបងប្អូនមានជីវិតរួមជាមួយព្រះគ្រីស្ដ។
ព្រះអង្គបានលើកលែងទោសទាំងប៉ុន្មានរបស់យើង។ ព្រះអង្គបានលុបបញ្ជីដែលចោទប្រកាន់ទាស់នឹងយើងតាមធម្មវិន័យនោះចោល។ ព្រះអង្គបានដកបញ្ជីនេះចេញដោយយកទៅដាក់ភ្ជាប់នឹងឈើឆ្កាង។ ព្រះអង្គបានដកប្ញទ្ធិចេញពីវិត្ថុសក្ដិសិទ្ធិ និងពីអ្វីៗដែលមានអំណាច គឺព្រះអង្គបានបំបាក់មុខពួកវាជាសាធារណៈ ទាំងនាំវាឲ្យទៅជាឈ្លើយក្នុងពេលហែក្បួនជ័យជម្នះរបស់ព្រះអង្គ។
ទំនុកតម្កើងលេខ ១៤៥ (១៤៤),១-២.៨-១១ បទកាកគតិ
១. | បពិត្រព្រះម្ចាស់ | ជាក្សត្ររបស់ | រូបទូលបង្គំ | ពេលនេះខ្ញុំកោត |
នាមព្រះឧត្ដម | អស់កល្បយូរលង់ | ជារៀងដរាប ។ | ||
២. | ខ្ញុំសូមតម្កើង | ព្រះអង្គខ្ពស់ឡើង | រទៅរៀងរៀប | ខ្ញុំសូមសរសើរ |
ព្រះនាមល្អគាប់ | អស់កល្បដរាប | រហូតតទៅ ។ | ||
៨. | ព្រះជាអម្ចាស់ | ប្រកបដោយព្រះ | ហឫទ័យត្រចង់ | ប្រណីសន្ដោស |
ករុណាហ្មត់ហ្មង | អត់ធ្មត់កន្លង | អាណិតមេត្តា ។ | ||
៩. | ព្រះជាអម្ចាស់ | ព្រះទ័យសប្បុរស | លើមនុស្សលោកា | ទ្រង់មានព្រះទ័យ |
សន្ដោសករុណា | មនុស្សគ្រប់អាត្មា | រស់ពេញផែនដី ។ | ||
១០. | បពិត្រព្រះម្ចាស់ | សត្វលោកទាំងអស់ | មានច្រើនពេកក្រៃ | នាំគ្នាតម្កើង |
រុងរឿងសិរី | រាស្រ្ដទាំងប្រុសស្រី | ក៏ថ្កើងទ្រង់ដែរ ។ | ||
១១. | គេនឹងរៀបរាប់ | ព្រះរាជ្យគួរគាប់ | រុងរឿងស្ថិតស្ថេរ | របស់ព្រះអង្គ |
ឥតមានប្រួលប្រែ | អនុភាពឥតកែ | ព្រះអង្គនៅគង់ ។ |
ពិធីអបអរសាទរព្រះគម្ពីរដំណឹងល្អ យហ ១៥,១៦
អាលេលូយ៉ា! អាលេលូយ៉ា! ព្រះអម្ចាស់បានជ្រើសរើសពួកគេពីចំណោមមនុស្សលោក ដើម្បីឲ្យគេបង្កើតផល ព្រមទាំងឲ្យផលរបស់គេនៅស្ថិតស្ថេរ។ អាលេលូយ៉ា! |
សូមថ្លែងព្រះគម្ពីរដំណឹងល្អតាមសន្តលូកា លក ៦, ១២-១៩
នៅគ្រានោះ ព្រះយេស៊ូយាងឡើងទៅលើភ្នំដើម្បីអធិដ្ឋាន ។ ព្រះអង្គអធិដ្ឋានពេញមួយយប់។ លុះព្រលឹមឡើង ព្រះអង្គត្រាស់ហៅក្រុមសាវ័កមក ។ ក្នុងចំណោមសាវ័កទាំងនោះ ព្រះអង្គជ្រើសរើសដប់ពីរនាក់ ហើយទ្រង់ប្រទាបងារជាទូតរបស់ព្រះអង្គគឺមានស៊ីម៉ូន ដែលទ្រង់ប្រទានឈ្មោះថា សិលា និងអន់ដ្រេជាប្អូនរបស់គាត់ យ៉ាកុប យ៉ូហាន ភីលីព បាថូឡូមេ ម៉ាថាយ ថូម៉ាស យ៉ាកុបជាកូនលោកអាល់ផាយស៊ីម៉ូនហៅជិាតនិយម យួដាសជាកូនលោកយ៉ាកុប និងយូដាសអ៊ីស្ការីយ៉ុត ដែលនឹងក្បត់ព្រះអង្គ។
ព្រះយេស៊ូយាងចុះពីលើភ្នំជាមួយក្រុមសាវ័កទាំងដប់ពីរនាក់ មកប្រថាប់នៅត្រង់កន្លែងមួយរាបស្មើ។ នៅទីនោះមានសាវ័កជាច្រើន និងមហាជនពីស្រុកយ៉ូដា ពីក្រុងយេរូសាឡឹម ពីក្រុងទីរ៉ូសនិងក្រុងស៊ីដូន នៅតាមមាត់សមុទ្រ មករង់ចាំព្រះអង្គ និងសូមព្រះអង្គយ៉ាងកកកុញ។ គេនាំគ្នាមកស្ដាប់ព្រះអង្គ និងសូមព្រះអង្គប្រោសឲ្យគេជាពីជំងឺ។ រីឯអស់អ្នកដែលមានខ្មោចចូលក៏បានជាដែរ ។ បណ្ដាលជនប្រជៀតគ្នាចូលមកពាលព្រះយេស៊ូ ដ្បិតមានប្ញទ្ធានុភាពចេញពីព្រះអង្គមកប្រោសគេឲ្យជាគ្រប់ៗគ្នា។