អត្ថបទទី១
សូមថ្លែងព្រះគម្ពីរមរណសាក្សីនៃជនជាតិអ៊ីស្រាអែល ១មបា ២,១៥-២៩

ព្រះមហាក្សត្រចាត់មន្ដ្រីឱ្យមកបង្ខំប្រជាជនលះបង់ជំនឿរបស់ខ្លួន។ អស់លោក​មកដល់ក្រុងម៉ូឌីន ដើម្បីថ្វាយយញ្ញបូជា។ ជនជាតិអ៊ីស្រាអែលជាច្រើនចេញទៅជួបលោក តែលោកម៉ាថាធីយ៉ាស និងកូនទាំងប៉ុន្មានរបស់គាត់ ជួបជុំគ្នាដោយឡែកពីគេ។ មន្ដ្រីរបស់ព្រះមហាក្សត្រប្រាប់លោកម៉ាថាធីយ៉ាសថា៖« លោកជាអ្នកដឹកនាំដ៏មាន​ឈ្មោះល្បី និងមានអំណាចក្នុងភូមិនេះ ដោយមានកូន និងបងប្អូនជាច្រើនជួយគាំទ្រផង។ សូមលោកអញ្ជើញមកអនុវត្តតាមរាជបញ្ជារបស់ព្រះករុណាមុនគេ ដូចប្រជាជាតិទាំង​ប៉ុន្មាន និងអ្នកស្រុកយូដា ព្រមទាំងអ្នកដែលនៅសេសសល់ក្នុងក្រុងយេរូសាឡឹម បានធ្វើ​រួចមកហើយ។ បើធ្វើដូច្នេះ លោកនិងកូនរបស់លោក ត្រូវរាប់បញ្ចូលក្នុងចំណោមមិត្ត​សម្លាញ់របស់ព្រះរាជា។ លោកនិងកូនរបស់លោក នឹងទទួលមាសប្រាក់ ព្រមទាំង​អំណោយជាច្រើនទៀតផង!»។ លោកម៉ាថាធីយ៉ាសបន្លឺសំឡេងយ៉ាងខ្លាំងៗតបទៅ​គេថា៖«ទោះបីប្រជាជាតិទាំងប៉ុន្មានដែលនៅក្នុងរាជាណាចក្រទាំងមូលយល់ព្រមធ្វើ​តាមរាជបញ្ជារបស់ស្ដេច លះបង់សាសនាដូនតារបស់គេរៀងៗខ្លួនចោល ហើយបែរទៅគោរពតាមរាជឱង្ការរបស់សេ្ដចក្ដី ក៏ខ្ញុំ កូនខ្ញុំ និងបងប្អូនខ្ញុំ នៅតែប្រតិបត្តិតាមសម្ពន្ធមេត្រីនៃដូនតារបស់យើងតទៅមុខទៀតជាដរាប។ សូមព្រះជាម្ចាស់អាណិតមេត្ដាការពារយើង កុំឱ្យយើងខ្ញុំបោះបង់ចោលធម្មវិន័យ និងបញ្ញតិ្ដរបស់ព្រះអង្គឡើយ។​ យើងមិនព្រមស្ដាប់តាមរាជបញ្ជាទេ យើងមិនព្រមងាកចេញពីសាសនារបស់យើងឡើយ​ ឱ្យទៅខាងស្ដាំ ឬខាងឆ្វេង គឺយើងមិនព្រមជាដាច់ខាត់!»។

កាលលោកមានប្រសាសន៍ដូច្នេះហើយ ជនជាតិយូដាម្នាក់ឡើងទៅថ្វាយយញ្ញបូជា​នៅចំពោះមុខប្រជាជនទាំងមូល លើអាសនៈនៅក្រុងម៉ូឌីនតាមរាជបញ្ជា។ លោក​ម៉ាថាធីយ៉ាសឃើញដូច្នេះ ក្ដៅក្រហាយញ័រខ្លួនចំប្រប់យ៉ាងខ្លាំង កំហឹងដ៏សុចរិតពុះកញ្ច្រោលក្នុងខ្លួនលោក។ លោកស្ទុះទៅសម្លាប់អ្នកនោះនៅលើអាសនៈ និងសម្លាប់មន្ដ្រីដែលស្ដេចចាត់ឱ្យមកបង្ខំអ្នកស្រុកថ្វាយយញ្ញបូជា រួចលោករំលំអាសនៈនោះចោល​ទៀតផង។ លោកមានចិត្តស្រឡាញ់ធម្មវិន័យជាខ្លាំងដូចកាលពីដើម ដែលលោក​ពីណេហាប់បានប្រព្រឹត្តចំពោះលោកយីមរី ជាកូនលោកសាលូ។ រួចលោកម៉ាថាធីយ៉ាស​ដើរស្រែកយ៉ាងខ្លាំងតាមផ្លូវក្រុងម៉ូឌីនថា៖«អស់អ្នកដែលមានចិត្តស្រឡាញ់ធម្មវិន័យ ​និងចង់គោរពតាមសម្ពន្ធមេត្រី សូមអញ្ជើញតាមខ្ញុំមក!»។ លោកនឹងកូនលោកភៀស​ខ្លួនទៅតំបន់ភ្នំ ដោយទុកទ្រព្យសម្បត្តិទាំងអស់ចោលនៅក្នុងក្រុង។ ពេលនោះ អ្នក​ស្រុកជាច្រើនដែលខិតខំធ្វើអំពើសុចរិត និងគោរពតាមធ្មវិន័យរត់ទៅរស់នៅក្នុង​វាលរហោស្ថាន​​។

ទំនុកតម្កើងលេខ ៥០,១-២.៥.៧.១៤-១៥ បទព្រហ្មគីតិ

ពិធីអបអរសាទរព្រះគម្ពីរដំណឹងល្អ​តាម ទំន ៩៥,៨

អលេលូយ៉ា! អាលេលូយ៉ា!
នៅថ្ងៃនេះ កុំមានចិត្តរឹងរូសឡើយ! ចូរនាំគ្នាប្រុងត្រចៀកស្ដាប់ព្រះសូរសៀងរបស់ព្រះអម្ចាស់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១៩,៤១-៤៤

ព្រះយេស៊ូយាងជិតដល់យេរូសាឡឹម ព្រះអង្គទតឃើញទីក្រុង ហើយទ្រង់ព្រះ​កន្សែងនឹកអាណិតក្រុងនោះ ទាំងមានព្រះបន្ទូលថា៖« យេរូសាឡឹមអើយ! គួរឱ្យ​ស្ដាយពេក! នៅថ្ងៃនេះ អ្នកពុំបានយល់ហេតុការណ៍ដែលផ្ដល់សេចក្ដីសុខសាន្ដមកអ្នក​សោះ! ដោយអត្ថន័យនៅលាក់កំបាំងនៅឡើយ អ្នកពុំអាចមើលឃើញបានទេ។ នៅ​ពេលខាងមុខ ខ្មាំងសត្រូវនឹងមកបោះទ័ពឡោមព័ទ្ធជុំវិញអ្នក ព្រមទាំងវាយប្រហារអ្នក​​ពីគ្រប់ទិស គេនឹងកម្ទេចអ្នកចោល ព្រមទាំងសម្លាប់អ្នកក្រុងឱ្យវិនាសបង់ផង។ គេ​មិនទុកឱ្យដំថ្មនៅត្រួតពីលើគ្នាក្នុងក្រុងទៀតឡើយ ដ្បិតអ្នកពុំបានទទួលស្គាល់ពេលកំណត់ដែលព្រះជាម្ចាស់បានយាងមកសង្គ្រោះអ្នកទេ»។