ថ្ងៃពុធ ទី២៥ ខែមិថុនា ឆ្នាំ២០២៥

អត្ថបទទី១៖ សូមថ្លែងព្រះគម្ពីរកំណើត កណ ១៥,១-១២.១៧-១៨

ព្រះអម្ចាស់បានបង្ហាញព្រះអង្គឱ្យលោកអប្រាហាំឃើញក្នុងសុបិននិមិ្មត។ ព្រះ​អង្គមានព្រះបន្ទូលមកគាត់ថា៖ «កុំខ្លាចអ្វីអប្រាហាំ​អើយ! គឺយើងនេះហើយដែល​ការពារអ្នក។ អ្នកនឹងបានរង្វាន់ធំក្រៃលែង»។ លោកអប្រាហាំឆ្លើយតបថា៖ «បពិត្រព្រះអម្ចាស់! ព្រះអង្គប្រទានអ្វីមកខ្ញុំក៏ឥតប្រយោជន៍​ដែរ បើខ្ញុំលាចាកលោកនេះទាំងគ្មានកូនដូច្នេះ! ព្រះអង្គពុំបានប្រទានឱ្យខ្ញុំមានកូនបន្តពូជសោះ! ដល់ពេល​ខ្ញុំលាចាកលោកនេះទៅ មានតែអ្នកបម្រើនៅក្នុងក្រុមគ្រួសារខ្ញុំប៉ុណ្ណោះទេដែលត្រូវ​ទទួលកេរមត៌កពីខ្ញុំ?»។ ព្រះអម្ចាស់មានព្រះបន្ទូលមកលោកថា៖ «ទេ! ពុំមែនអ្នកបម្រើទេ គឺកូនដែលកើតចេញពីអ្នកវិញឯណោះ ដែលនឹងទទួលទ្រព្យសម្បត្តិទាំងនោះទុកជាមត៌ក»។ រួចព្រះអង្គនាំលោកអប្រាហាំចេញទៅក្រៅជំរំ ហើយមានព្រះបន្ទូលថា៖ «ចូរងើយមើលទៅលើមេឃ ហើយរាប់ចំនួនផ្កាយមើល៍! តើអ្នកអាចរាប់អស់បាន​ឬទេ? ផ្កាយនៅលើមេឃមានចំនួនច្រើនយ៉ាងណា ពូជពង្សអ្នកក៏នឹងមានចំនួនច្រើន​យ៉ាងនោះដែរ»។ លោកអប្រាហាំជឿលើព្រះអម្ចាស់ ហើយព្រះអង្គប្រោសលោក​ឱ្យបានសុចរិត ដោយយល់ដល់ជំនឿនេះ។ ព្រះអង្គមានព្រះបន្ទូលមកលោកទៀតថា៖ «យើងនេះហើយជាព្រះអម្ចាស់ដែលបាននាំអ្នកចេញពីក្រុងអួរ នៅស្រុកខាល់ដេមក ដើម្បីប្រគល់ស្រុកនេះឱ្យអ្នកធ្វើជាកម្មសិទ្ធិ»។ លោកអប្រាហាំឆ្លើយតបថា «បពិត្រ​ព្រះអម្ចាស់! តើធ្វើម្តេចឱ្យខ្ញុំដឹងថា ខ្ញុំពិតជានឹងបាន​ស្រុកនេះធ្វើជាកម្មសិទ្ធិមែន?»​។ ព្រះអង្គមានព្រះបន្ទូលមកលោកថា៖ «ចូរយកគោញីជំទង់មួយអាយុបីខួប ពពែញីមួយអាយុបីខួប ចៀមឈ្មោលមួយអាយុបីខួប លលកមួយ និងកូនព្រាបមួយមកឱ្យ​យើង»។ លោកអប្រាហាំក៏យកសត្វទាំងនោះមកពុះជាពីរ រួចដាក់ដុំសាច់ដែលពុះជាពីរនោះទន្ទឹមគ្នា តែលោកមិនបានពុះសត្វស្លាបទេ។ ពេលនោះ មានត្មាតមកឆក់​សាច់សត្វទាំងនោះ តែលោកអប្រាហាំដេញវា។ នៅពេលថ្ងៃជិត​លិច លោកអប្រាហាំ​លង់លក់ដូចត្រូវសណ្តំ ហើយព្រឺខ្លាចជាខ្លាំង ដោយមានភាពងងឹតមកគ្របដណ្តប់​ពីលើគាត់។ លុះដល់ថ្ងៃលិច​ផុតទៅ មេឃងងឹតសូន្យសុង ស្រាប់តែមានគប់ភ្លើងមួយហុយផ្សែងឡើង និងចន្លុះមួយកំពុងឆេះកាត់តាមចន្លោះដុំសាច់សត្វដែលពុះជាពីរ​នោះ។ នៅថ្ងៃនោះ ព្រះអម្ចាស់ចង់សម្ពន្ធមេត្រីជាមួយលោកអប្រាហាំ ដោយមាន​​ព្រះបន្ទូលថា៖ «យើងនឹងប្រគល់ស្រុកនេះឱ្យ​ពូជពង្សអ្នក»។

ទំនុកតម្កើងលេខ ១០៥ (១០៤),១-៤.៦-៩ បទកាកគតិ

ពិធីអបអរសាទរព្រះគម្ពីរដំណឹងល្អតាម ទន ១,២-៣

អាលេលូយ៉ា! អាលេលូយ៉ា!
អ្នកចូលចិត្ដធម្មវិន័យរបស់ព្រះអម្ចាស់ អ្នកនោះពិតជាមានសុភមង្គលហើយ! អ្នកនោះក៏បង្កើតមគ្គផលតាមរដូវកាល។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៧,១៥-២០

ក្រុមសាវ័កជួបជុំជាមួយព្រះយេស៊ូនៅលើភ្នំ។ ព្រះអង្គមានព្រះបន្ទូលទៅកាន់ពួកគេថា៖ «ចូរប្រយ័ត្ននឹងពួកព្យាការីក្លែងក្លាយ គេក្លែងខ្លួនមករកអ្នករាល់គ្នាដោយពាក់ស្បែកចៀម តែគេមានចិត្ដសាហាវដូចចចក។ អ្នករាល់គ្នាអាចស្គាល់គេបានតាមអំពើ​ដែលគេប្រព្រឹត្ត។ ពុំដែលមាននរណាបេះផ្លែទំពាំងបាយជូរ និងផ្លែស្វាយពីគុម្ពបន្លា​ឡើយ។ ដើមឈើល្អតែងតែឱ្យផ្លែល្អ រីឯដើមឈើអាក្រក់ តែងតែឱ្យផ្លែអាក្រក់។ ដើមឈើល្អមិនអាចឱ្យផ្លែអាក្រក់ទេ រីឯដើមឈើអាក្រក់ ក៏មិនអាចឱ្យផ្លែល្អបានដែរ។ ដើមឈើណាមិនឱ្យផ្លែល្អ គេនឹងកាប់​យកទៅដុត។ រីឯពួកព្យាការីក្លែងក្លាយក៏ដូច្នោះ​ដែរ អ្នករាល់គ្នាអាចស្គាល់គេបាន តាមអំពើដែលគេប្រព្រឹត្ត»។