ថ្ងៃសៅរ៍ ទី១៦ ខែសីហា ឆ្នាំ២០២៥

អត្ថបទទី១៖ សូមថ្លែងព្រះគម្ពីរលោកយ៉ូស៊ូអា យស ២៤,១៤-២៩

លោកយ៉ូស៊ូអាកោះហៅកុលសម្ពន្ធអ៊ីស្រាអែលទាំងដប់ពីរនៅស៊ីគែម។ លោកមាន​ប្រសាសន៍ទៅគេថា៖ «ចូរកោតខ្លាចព្រះអម្ចាស់ និងគោរពបម្រើព្រះអង្គឱ្យអស់ពី​ដួងចិត្ត និងដោយស្មោះត្រង់បំផុត។ ចូរដកយកព្រះដទៃដែលបុព្វបុរសរបស់អ្នករាល់គ្នាធ្លាប់គោរពបម្រើនៅខាងនាយទន្លេអឺប្រាត និងនៅស្រុកអេស៊ីបនោះចោលទៅ ហើយ​នាំគ្នាគោរពបម្រើព្រះអម្ចាស់។ ប៉ុន្តែ បើអ្នករាល់គ្នាមិនពេញចិត្តនឹងគោរពបម្រើព្រះអម្ចាស់ទេ នៅថ្ងៃនេះ ចូរជ្រើសរើសយកព្រះណាមួយដែលអ្នករាល់គ្នាពេញចិត្ដនឹងគោរព​​បម្រើទៅ! គឺមានព្រះដែលបុព្វបុរសរបស់អ្នករាល់គ្នាធ្លាប់គោរពបម្រើនៅខាងកើតទន្លេ​អឺប្រាត ឬព្រះរបស់ជនជាតិអាម៉ូរីនៅក្នុងស្រុកដែលអ្នករាល់គ្នាស្នាក់នៅនេះជាដើម។ រីឯខ្ញុំ និងក្រុមគ្រួសាររបស់ខ្ញុំវិញ យើងនឹងគោរពបម្រើព្រះអម្ចាស់»។ ប្រជាជនបានឆ្លើយថា៖ «យើងនឹងមិនបោះបង់​ចោលព្រះអម្ចាស់ បែរទៅគោរពបម្រើ​ព្រះដទៃទៀតជាដាច់ខាត! ដ្បិតមានតែព្រះអម្ចាស់ហ្នឹងហើយជាព្រះនៃយើង ព្រះអង្គ​បាននាំយើងខ្ញុំ និងបុព្វបុរសរបស់យើងឱ្យចាកចេញពីស្រុកអេស៊ីប ជាស្រុកដែលយើង​ធ្លាប់ធ្វើជាទាសករ។ ព្រះអង្គបានសម្តែងការអស្ចារ្យធំៗ ឱ្យយើងឃើញច្បាស់នឹងភ្នែកគឺ ព្រះអង្គបានរក្សាការពារយើង តាមផ្លូវដែលយើងធ្វើដំណើរឆ្លងកាត់ទឹកដី​​របស់ប្រជាជននានា។ ព្រះអម្ចាស់បានបណ្តេញប្រជាជនទាំងប៉ុន្មានចេញពីមុខយើង ជាពិសេសជនជាតិអាម៉ូរីដែលរស់នៅក្នុងស្រុកនេះ។ យើងខ្ញុំក៏ចង់គោរពបម្រើព្រះអម្ចាស់ដែរ ដ្បិតព្រះអង្គជាព្រះរបស់យើង»។ លោកយ៉ូស៊ូអាមានប្រសាសន៍ទៅកាន់ប្រជាជនថា៖ «អ្នករាល់គ្នាមិនអាចគោរពបម្រើព្រះអម្ចាស់បានទេ ដ្បិតព្រះអង្គជាព្រះដ៏វិសុទ្ធ ហើយព្រះអង្គមិនសព្វព្រះហឫទ័យឱ្យអ្នករាល់គ្នាគោរពព្រះមួយណាទៀតឡើយ ព្រះអង្គមិនអាចអត់ទោសចំពោះការបះបោរ និងអំពើបាបរបស់អ្នករាល់គ្នាបានទេ។ ប្រសិនបើអ្នករាល់គ្នាបោះបង់ចោលព្រះអម្ចាស់ ហើយងាកទៅគោរពបម្រើព្រះដទៃ ព្រះអង្គបែរមកដាក់ទោសអ្នករាល់គ្នា ធ្វើឱ្យ​អ្នករាល់គ្នាវិនាសសាបសូន្យ ថ្វីដ្បិតតែព្រះអង្គធ្លាប់ប្រទានពរដល់អ្នករាល់គ្នារួចមក​ហើយក៏ដោយ»។ ប្រជាជនឆ្លើយតបទៅលោកយ៉ូស៊ូអាវិញថា៖ «ទេ! យើងចង់គោរពបម្រើព្រះអម្ចាស់​តែមួយព្រះអង្គប៉ុណ្ណោះ»។ លោកយ៉ូស៊ូអាមានប្រសាសន៍ទៅកាន់ប្រជាជនថា៖ «ចូរទទួលខុសត្រូវចំពោះខ្លួនឯងផ្ទាល់ទៅ ដ្បិតអ្នករាល់គ្នាបានសម្រេចចិត្តគោរពបម្រើ​ព្រះអម្ចាស់ហើយ!»។ ពួកគេឆ្លើយថា៖ «យើងសុខចិត្តទទួលខុសត្រូវហើយ!»។ លោក​​យ៉ូស៊ូអាមានប្រសាសន៍ថា៖ «ឥឡូវនេះ ចូរដកព្រះដទៃដែលសិ្ថតនៅកណ្តាលអ្នករាល់គ្នាចោលចេញទៅ ហើយផ្ចង់ចិត្តគំនិតទៅរកព្រះអម្ចាស់ ជាព្រះរបស់ជនជាតិអ៊ីស្រាអែល​វិញ»។ ប្រជាជនឆ្លើយតបទៅលោកយ៉ូស៊ូអាថា៖ «យើងចង់គោរពបម្រើព្រះអម្ចាស់ជាព្រះនៃយើង ហើយ និងប្រតិបត្តិតាមព្រះបន្ទូលរបស់ព្រះអង្គផង»។ នៅថ្ងៃនោះ លោកយ៉ូស៊ូអាចងសម្ពន្ធមេត្រីជាមួយប្រជាជននៅស៊ីគែម ហើយលោក​ចេញច្បាប់ និងវិន័យឱ្យពួកគេកាន់តាមទៀតផង។ លោកយ៉ូស៊ូអាចារសេចក្តីទាំងនេះទុកនៅក្នុងគម្ពីរធម្មវិន័យរបស់ព្រះជាម្ចាស់។ លោកយកថ្មមួយផ្ទាំងយ៉ាងធំមកបញ្ឈរនៅក្រោមដើមជ្រៃដែលស្ថិតក្នុងទីសក្ការៈរបស់ព្រះអម្ចាស់។ លោកយ៉ូស៊ូអាមានប្រសាសន៍ទៅកាន់ប្រជាជនទាំងមូលថា៖ «មើល៍! ថ្មនេះជាសាក្សីរបស់យើងរាល់គ្នា ដ្បិតថ្មនេះបានឮសេចក្តីទាំងប៉ុន្មានដែលព្រះអម្ចាស់មានព្រះបន្ទូលមកយើង។ ថ្មនេះនឹងទៅជាសាក្សីរារាំងអ្នករាល់គ្នា កុំឱ្យក្បត់ព្រះរបស់អ្នករាល់គ្នា»។ បន្ទាប់មក លោកយ៉ូស៊ូអាបញ្ជាឱ្យប្រជាជនវិលត្រឡប់ទៅកាន់ទឹកដីដែលជាមត៌កគេរៀងៗខ្លួនវិញ។ ក្រោយព្រឹត្តិការណ៍ទាំងនោះមក លោកយ៉ូស៊ូអាដែលជាកូនរបស់លោក​នូន និងជាអ្នកបម្រើរបស់ព្រះអម្ចាស់បានទទួលមរណភាពក្នុងជន្មាយុមួយរយដប់ឆ្នាំ។

ទំនុកតម្កើងលេខ ១៣៦ (១៣៥),១-៣.១៦-១៨.២១-២២.២៤ បទកាកគតិ

ពិធីអបអរសាទរព្រះគម្ពីរដំណឹងល្អតាម មថ ១១,២៥

អាលេលូយ៉ា! អាលេលូយ៉ា!
បពិត្រព្រះបិតាជាអម្ចាស់នៃស្ថានបរមសុខ និងជាអម្ចាស់នៃផែនដី! យើងខ្ញុំសូមសរសើរតម្កើងព្រះអង្គ ព្រោះទ្រង់បានសម្តែងការអស្ចារ្យនៃព្រះរាជ្យឱ្យមនុស្សតូចតាចយល់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១៩,១៣-១៥

នៅគ្រានោះ មានមនុស្សម្នានាំក្មេងតូចៗមកឱ្យព្រះយេស៊ូដាក់ព្រះហស្តលើវា និងអធិដ្ឋានឱ្យ។ ក្រុមសាវ័កស្តីបន្ទោសអ្នកទាំងនោះ តែព្រះយេស៊ូមានព្រះបន្ទូលថា៖ «ទុកឱ្យក្មេងតូចៗមករកខ្ញុំចុះ កុំឃាត់វាឡើយ! ដ្បិតមានតែអ្នកមានចិត្តដូចក្មេងៗទាំងនេះប៉ុណ្ណោះទេ ដែលចូលក្នុងព្រះរាជ្យនៃស្ថានបរមសុខបាន»។ បន្ទាប់មក​​ ព្រះអង្គដាក់ព្រះហស្តលើក្មេងទាំងនោះ រួចទ្រង់ក៏យាងចាកចេញពីទីនោះទៅ។