ថ្ងៃសៅរ៍ ទី០២ ខែឧសភា ឆ្នាំ២០២៦

បុណ្យរម្លឹក
សន្តអាថាណាស ជាអភិបាល​
និងជាគ្រូបាធ្យាយនៃព្រះសហគមន៍

សូមចុចទីនេះ

លោកអាថាណាស (២៩៥-៣៧៥) កើតនៅក្រុងអាឡិចសង់ឌ្រី។ កាលលោកនៅពីក្មេង ព្រះចៅឌីយ៉ូ ក្លេស៊ីយ៉ាំងបៀតបៀនធ្វើទុក្ខបុកម្នេញព្រះសហគមន៍។ កាលអាយុប្រហែល ៣០ឆ្នាំ លោកមានមុខងារជាស្មៀនរបស់លោកអភិបាលក្រុងអលិច​សង់ឌ្រី​។​ ពេលនោះ បូជាចារ្យម្នាក់ឈ្មោះ អរីយ៉ូស តែងប្រៀនប្រដៅថា ព្រះយេស៊ូគ្រាន់តែជាមនុស្សប៉ុណ្ណោះ ពុំមែនជាព្រះជាម្ចាស់ទេ។ នៅឆ្នាំ ៣២៥ អភិបាលព្រះសហគមន៍ទាំងអស់ ជួបជុំគ្នាជាមហាសន្និបាតសកលនៅក្រុងនីសេ ដើម្បីជំទាស់នឹងសេចក្តីប្រៀនប្រដៅរបស់លោក អរីយូ៉សនោះ។ លោកអាថាណាសទទួលមុខងារជាអភិបាលព្រះសហគមន៍ក្រុងអេឡិចសង់ឌ្រីនៅឆ្នាំ ៣២៨។ គ្រីស្តបរិស័ទដែលកាន់តាមលោកអរីយូ៉សជំទាស់នឹងលោកអថាណាសអស់រយៈពេល ៤៥ឆ្នាំ រហូតទៅប្តឹងព្រះចៅអធិរាជ ដែលទ្រង់និរទេសលោកប្រាំដង។ ទោះបីគេធ្វើបាបលោកយ៉ាងណាក៏ដោយ ក៏លោកនៅតែប្រកាសជំនឿដ៏ពិតប្រាកដអំពីព្រះយេស៊ូដែលពិតជាព្រះបុត្រារបស់ព្រះជាម្ចាស់ ហើយដែលកើតជាមនុស្ស ដើម្បីឱ្យមនុស្សទៅជាបុត្រធីតារបស់ព្រះបិតា។ លោកយកចិត្តទុកដាក់នឹងការរស់នៅជាបព្វជិត និងជាឥសី ហើយបានសរសេរជីវប្រវត្តិរបស់សន្តអន់ទន ជាមិត្តសម្លាញ់របស់លោក។

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា ប្រកបដោយធម៌មេត្តាករុណាយ៉ាងក្រៃលែង! ព្រះអង្គសព្វ​ព្រះហឫទ័យ​ឱ្យ​មនុស្ស​គ្រប់ជាតិសាសន៍ស្គាល់ព្រះអង្គ និងទទួលជីវិតអស់កល្បជានិច្ច។ សូមទ្រង់ព្រះ​មេត្តា​ប្រោស​ប្រទាន​ឱ្យយើង​ខ្ញុំ​ជា​គ្រីស្តបរិស័ទ មានចិត្តក្លាហាន ពុះពារ​ឧបសគ្គនានា ដើម្បីនាំព្រះ​បន្ទូល​របស់ព្រះអង្គដល់មនុស្ស​សម័យឥឡូវ​នេះ​ផង។

សូមថ្លែងព្រះគម្ពីរកិច្ចការរបស់គ្រីស្តទូត កក ១៣,៤៤-៥២

នៅថ្ងៃសប្ប័ទ បន្ទាប់ពីលោកប៉ូលប្រកាសដំណឹងល្អនៅក្រុងអន់ទីយ៉ូក ប្រជាជននៅក្រុងនោះ​មក​ជួប​ជុំគ្នាស្តាប់​ព្រះបន្ទូលរបស់ព្រះអម្ចាស់ស្ទើរតែទាំងអស់។ កាលជនជាតិយូដាឃើញមហាជនដូច្នោះ គេមាន​ចិត្ត​ច្រណែន​ជា​ខ្លាំង​ក៏នាំគ្នានិយាយជំទាស់នឹងពាក្យដែលលោកប៉ូលមានប្រសាសន៍ និងជេរប្រមាថលោកទៀតផង។ លោកប៉ូល និងលោកបារណាបាសក៏មានប្រសាសន៍ទៅគេដោយចិត្តអង់អាចថា៖ «មុនដំបូង យើងខ្ញុំត្រូវតែប្រកាសព្រះបន្ទូល​រប​ស់​​​​ព្រះ​ជាម្ចាស់ដល់បងប្អូន ប៉ុន្តែ ដោយបងប្អូនបដិសេធមិនព្រមទទួលព្រះបន្ទូលនេះ ហើយដោយ​បងប្អូន​យល់​ឃើញ​​ថា ខ្លួនមិនសមនឹងទទួលជីវិតអស់កល្បជានិច្ចទេនោះ យើងខ្ញុំនឹងងាកទៅប្រកាសដល់សាសន៍ដទៃវិញ ដ្បិត​ព្រះ​អម្ចាស់​បានបង្គាប់មកយើងខ្ញុំថា “យើងបានតែងតាំងអ្នកឱ្យធ្វើជាពន្លឺបំភ្លឺជាតិសាសន៍នានា និងនាំឱ្យការ​សង្គ្រោះរហូតទៅដល់ស្រុកដាច់ស្រយាលនៃផែនដី”។ កាលសាសន៍ដទៃឮដូច្នោះ គេមានអំណររីករាយ ហើយនាំគ្នាលើកតម្កើងព្រះបន្ទូលរបស់ព្រះអម្ចាស់។ រីឯអស់​អ្នកដែលព្រះជាម្ចាស់តម្រូវឱ្យទទួលជីវិតរស់អស់កល្បជានិច្ច ក៏នាំគ្នាជឿដែរ។ ព្រះបន្ទូលរបស់​ព្រះអម្ចាស់​បាន​ឮ​សុះសាយក្នុងស្រុកនោះទាំងមូល។ ប៉ុន្តែ សាសន៍យូដាបានញុះញង់ស្ត្រីៗ​មានឋានៈ​ខ្ពង់ខ្ពស់​ដែល​គោរពប្រណិ​ប័ត​ន៍​ព្រះជាម្ចាស់ និងញុះញង់ពួកនាម៉ឺននៅក្រុងនោះឱ្យលើកគ្នាទៅបៀតបៀនលោកប៉ូល និងលោកបារណាបាស ព្រមទាំងដេញលោកទាំងពីរចេញពីដែនដីរបស់គេផង។ លោកប៉ូល និងលោកបារណាបាសក៏រលាស់ធូលី​ដីចេញ​ពី​ជើង​របស់​លោក រួចធ្វើដំណើរទៅក្រុងអ៊ីកូញុម។ រីឯក្រុមសាវ័កនៅអន់ទីយ៉ូកវិញគេពោរពេញដោយអំណរ និង​ដោយ​ព្រះវិញ្ញាណដ៏វិសុទ្ធ។

ទំនុកតម្កើងលេខ ៩៨ (៨៧),១-៤ បទកាកគតិ

ពិធីអបអរសាទរព្រះគម្ពីរដំណឹងល្អតាម ១យហ ៤, ១៤.១៦

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៤,៧-១៤

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គមានព្រះបន្ទូល​ទៅកាន់​ក្រុម​សាវ័ក​ថា៖ «បើអ្នករាល់គ្នាស្គាល់ខ្ញុំ អ្នករាល់គ្នាក៏នឹងស្គាល់ព្រះបិតារបស់ខ្ញុំដែរ។ ឥឡូវនេះអ្នករាល់គ្នាស្គាល់​ព្រះ​អង្គ​ហើយ​ ព្រមទាំងបានឃើញព្រះអង្គថែមទៀត​ផង»។ លោកភីលីព​ទូលព្រះអង្គថា៖ «ឱព្រះអម្ចាស់អើយ! សូមបង្ហាញព្រះបិតាឱ្យយើងខ្ញុំឃើញផង នោះយើង​ខ្ញុំ​នឹង​​អស់ចិត្តហើយ»។ ព្រះយេស៊ូមានព្រះបន្ទូលទៅគាត់ថា៖ «ភីលីពអើយ! ខ្ញុំនៅជាមួយ​អ្នករាល់គ្នា​តាំង​ពីយូរមក​ហើយ! ម្តេចក៏អ្នកនៅតែមិនស្គាល់ខ្ញុំ!។ អ្នកណាបានឃើញខ្ញុំ ក៏បានឃើញព្រះបិតាដែរ។ ហេតុដូចម្តេចបានជាអ្នកថា សូម​បង្ហា​ញ​ព្រះបិតាឱ្យយើងខ្ញុំឃើញផងដូច្នេះ? តើអ្នកមិនជឿថា ខ្ញុំនៅក្នុងព្រះបិតា ហើយព្រះបិតាគង់នៅក្នុងខ្ញុំទេឬ?។ សេចក្តីដែលខ្ញុំនិយាយប្រាប់អ្នករាល់គ្នា មិនមែនចេញមកពីខ្ញុំផ្ទាល់ទេ គឺព្រះបិតាដែលស្ថិតនៅជាប់នឹងខ្ញុំទ្រង់បំពេញកិច្ចការរបស់ព្រះអង្គ។ ពេលខ្ញុំនិយាយថា ខ្ញុំនៅក្នុងព្រះបិតា ហើយ​ព្រះ​បិតា​នៅក្នុងខ្ញុំ ចូរជឿខ្ញុំចុះ! បើមិនជឿសេចក្តីដែលខ្ញុំនិយាយនេះទេ ចូរជឿដោយឃើញកិច្ចការទាំងនោះទៅ។ ខ្ញុំសុំ​ប្រាប់​ឱ្យអ្នករាល់គ្នាដឹងច្បាស់ថា អ្នកណាជឿលើខ្ញុំ អ្នកនោះក៏នឹងធ្វើកិច្ចការដែលខ្ញុំធ្វើដែរ ហើយនឹង​ធ្វើកិច្ច​ការ​ធំ​ជាង​នេះទៅទៀត ពីព្រោះខ្ញុំទៅឯព្រះបិតា។ អ្វីៗដែលអ្នករាល់គ្នាទូលសូមក្នុងនាមខ្ញុំ ខ្ញុំនឹងធ្វើកិច្ចការនោះជាមិនខាន ដើម្បី​ឱ្យព្រះបិតាសម្តែងសិរីរុងរឿងក្នុងព្រះបុត្រា។ បើអ្នករាល់គ្នាសូមអ្វីក្នុងនាមខ្ញុំ ខ្ញុំនឹងធ្វើកិច្ចការនោះ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា ប្រកបដោយធម៌មេត្តាករុណាយ៉ាងក្រៃលែង! ក្នុងអភិបូជា យើងខ្ញុំ​សូមរួម​ស្លាប់​រួមរស់ជាមួយព្រះយេស៊ូជាព្រះបុត្រា ដែលស្ថិតនៅក្នុងព្រះបិតា។ សូមទ្រង់ព្រះ​មេត្តាទទួលសក្ការ​បូជារបស់​យើង​ខ្ញុំ​ដោយអនុគ្រោះ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះយេស៊ូបានបង្ហាញព្រះអង្គឱ្យយើងខ្ញុំស្គាល់ និងឃើញថែមទៀត។ ឥឡូវ​នេះ ព្រះយេស៊ូយាងឆ្លងទៅព្រះបិតាវិញ ហើយអង្វរព្រះអង្គឱ្យយើងខ្ញុំ​​។ សូមទ្រង់ព្រះមេត្តាប្រោសប្រទានឱ្យយើងខ្ញុំជាអ្នកជឿសង្ឃឹមលើព្រះគ្រីស្ត មានបំណងប្រព្រឹត្តតែកិច្ចការរបស់ព្រះគ្រីស្តក្នុងលោកនេះ។