ថ្ងៃសុក្រ-អាទិត្យទី០៧-រដូវបុណ្យចម្លង


ថ្ងៃសុក្រ អាទិត្យទី០៧
រដូវបុណ្យចម្លង

ពណ៌ស

ថ្ងៃសុក្រ ទី០៦ ខែមិថុនា ឆ្នាំ២០២៥

បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែង! ព្រះអង្គលើកតម្កើងព្រះយេស៊ូ​ឱ្យមានសិរីរុង​រឿង​រួមជា​មួយព្រះអង្គ។ ព្រះអង្គក៏ចាត់ព្រះវិញ្ញាណដ៏វិសុទ្ធឱ្យយាងមកបំភ្លឺចិត្តគំនិតយើងខ្ញុំ។ សូមទ្រង់ព្រះ​មេត្តា​ប្រែ​ចិត្ត​គំនិតយើងខ្ញុំ សូមឱ្យយើងខ្ញុំស្ម័គ្រចិត្តបម្រើព្រះអង្គជានិច្ចផង។

សូមថ្លែងព្រះគម្ពីរកិច្ចការរបស់គ្រីស្តទូត កក ២៥,១៣-២១

ព្រះបាទអគ្រីប៉ា និងម្ចាស់ក្សត្រីយ៍បេរេនីសយាងមកដល់ក្រុងសេសារេ ដើម្បីសួរសុខទុក្ខ​លោក​ភេស្ទុស។ ដោយស្តេចគង់នៅទីនោះជាច្រើនថ្ងៃ លោកភេស្ទុសទូលស្តេចអំពីរឿងលោកប៉ូល​ថា៖ «លោកភេលិច​ទុកបុរស​ម្នាក់​នៅ​ក្នុ​ងទីឃុំឃាំង។ កាលទូលបង្គំទៅក្រុងយេរូសា​ឡឹម ពួកនាយកបូជាចារ្យ និងពួកព្រឹទ្ធាចារ្យនៃសាសន៍យូដានាំគ្នាប្តឹងពីគាត់ ទាំងសុំឱ្យទូលបង្គំកាត់ទោសគាត់។ ទូលបង្គំប្រាប់លោកទាំងនោះវិញថា ជនជាតិរ៉ូមុំាងពុំធ្លាប់​បញ្ជូន​នរណា​​ម្នាក់ឱ្យទៅគេសម្លាប់ដោយមិនបានឱ្យនិយាយតទល់ជាមួយអ្នកដើម​ចោទ ព្រមទាំង​ឆ្លើយ​ការពារ​ខ្លួនចំពោះ​ពាក្យ​ចោទជាមុនសិននោះឡើយ។ លោកទាំងនោះនាំគ្នាមកទីនេះ ហើយនៅថ្ងៃបន្ទាប់ ទូលបង្គំទៅអង្គុយនៅទីកាត់ក្តី និងឱ្យគេនាំបុរស​នោះ​មក​​​ឥតបង្អង់ឡើយ។ ពួកដើមចោទក៏នៅទីកាត់ក្តីដែរ តែគេពុំបានចោទគាត់ពីអំពើ​អាក្រក់​ណាមួយ​ដូចទូល​បង្គំនឹក​ស្មាន​នោះទេ គឺមានតែជជែកវែកញែកអំពីរឿងសាសនារបស់គេ និងអំពីបុរសម្នាក់ឈ្មោះយេស៊ូដែលស្លាប់ ហើយ​ដែល​លោកប៉ូលថា​ នៅមានជីវិតនោះតែប៉ុណ្ណោះ។ ចំណែកឯទូលបង្គំវិញ ទូលបង្គំមិន​ដឹងជាត្រូវ​គិតដូច​ម្តេច​ចំពោះ​ការជជែកវែកញែកបែបនេះ។ ទូលបង្គំសួរគាត់ថា ចង់ទៅក្រុងយេរូសាឡឹមឱ្យគេកាត់ក្តីអំពីរឿងទាំងនេះឬទេ? តែលោកប៉ូលសុំឡើងទៅព្រះមហាក្សត្រាធិរាជ ដើម្បីសុំឱ្យព្រះអង្គកាត់ក្តី។ ទូលបង្គំចេញបញ្ជាឱ្យគេឃុំគាត់ ទុក​រហូត​ដល់ពេលទូលបង្គំនឹងបញ្ជូនគាត់ទៅព្រះចៅអធិរាជ»។

ទំនុកតម្កើងលេខ ១០៣ (១០២),១-២.១១-១២.១៩-២០ បទកាកគតិ

ខ្ញុំសូមសរសើរព្រះគ្មានអ្វីស្មើអស់ពីដួងចិត្ត
ខ្ញុំសូមតម្កើងនាមដ៏វិសុទ្ធព្រះដ៏មានឫទ្ធិ
ផុតលើលោកា
ខ្ញុំសូមតម្កើងសរសើរលើកឡើងអស់ពីចិន្តា
ខ្ញុំសូមរំឭកព្រះហស្តអស្ចារ្យសប្បុរសករុណា
មិនបំភ្លេចឡើយ
១១មេឃនៅខ្ពស់ឆ្ងាយសន្លឹមអន្លាយពីភពផែនដី
ព្រះទ័យព្រះម្ចាស់ដែលធ្លាប់ប្រណីក៏នៅខ្ពស់ឆ្ងាយ
យ៉ាងដូច្នោះដែរ
១២ទិសកើតទិសលិចឆ្ងាយគ្នាមិនតិចឥតមានកែប្រែ
ព្រះអង្គធ្វើឱ្យអំពើបាបបែរឆ្ងាយមិនជិតទេ
ពីយើងយ៉ាងនោះ
១៩ព្រះអង្គបានតាំងព្រះរាជបល្ល័ង្កនៅទីស្ថានខ្ពស់
គឺបរមសុខឥតបីមានមោះគ្រងរាជ្យទាំងអស់
មិនចន្លោះអ្វី
២០ទេវទូតដ៏ខ្លាំងរបស់ព្រះអង្គពូកែពេកក្រៃ
លោកតែងអនុវត្តតាមបន្ទូលថ្លៃចូរកុំសង្ស័យ
តម្កើងព្រះម្ចាស់

ពិធីអបអរសាទរព្រះគម្ពីរដំណឹងល្អតាម យហ ១០,១៤

អាលេលូយ៉ា! អាលេលូយ៉ា!
ព្រះយេស៊ូពិតជាគង្វាលដ៏ប្រសើរ! ព្រះអង្គស្គាល់ចៀមរបស់ព្រះអង្គ ចៀមក៏ស្គាល់​ព្រះអង្គ​ដែរ។ ព្រះអង្គស៊ូប្តូរព្រះជន្មដើម្បីចៀមរបស់ព្រះអង្គ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ២១,១៥-១៩

ក្រោយពីព្រះយេស៊ូមានព្រះជន្មរស់ឡើងវិញ ព្រះអង្គប្រទានអាហារឱ្យក្រុមសាវ័កនៅមាត់​សមុទ្រ​ទីបេ​រីយ៉ា​ដ​។ លុះគេបានបរិភោគរួចរាល់ហើយ ព្រះយេស៊ូមានព្រះបន្ទូលសួរលោក​ស៊ីម៉ូន​សិលាថា៖ «​ស៊ីម៉ូនកូន​លោក​យ៉ូហាន​អើយ! តើអ្នកស្រឡាញ់ខ្ញុំជាងអ្នកទាំងនេះស្រឡាញ់ខ្ញុំឬ?»។ គាត់ទូលព្រះអង្គថា៖ «ព្រះអម្ចាស់! ព្រះអង្គជ្រាបស្រាប់ហើយថា ខ្ញុំស្រឡាញ់ព្រះអង្គ»។ ព្រះយេស៊ូមានព្រះបន្ទូលទៅគាត់ថា៖ «សុំថែរក្សាកូនចៀមរបស់ខ្ញុំផង!»។ ព្រះអង្គ​មា​ន​ព្រះបន្ទូលសួរគាត់ជាលើកទីពីរថា៖ «ស៊ីម៉ូនកូនលោក​យ៉ូហានអើយ! តើអ្នកស្រឡាញ់ខ្ញុំឬទេ?»។ លោកសិលា​ទូល​ថា៖ «ក្រាបទូលព្រះអម្ចាស់! ព្រះអង្គជ្រាបស្រាប់ហើយថា ខ្ញុំស្រឡាញ់ព្រះអង្គ»។ ព្រះយេស៊ូមាន​ព្រះបន្ទូល​ទៅ​គាត់​ថា៖ «សុំឃ្វាលហ្វូងចៀមរបស់ខ្ញុំផង!»។ ព្រះអង្គមានព្រះបន្ទូលសួរគាត់ជាលើក​ទីបី​ថា៖ «ស៊ីម៉ូន​កូនលោក​យ៉ូ​ហាន​អើយ! តើអ្នកស្រឡាញ់ខ្ញុំឬទេ?»។ លោកសិលាព្រួយចិត្ត ព្រោះព្រះអង្គសួរគាត់​ដល់ទៅ​បីលើក​ថា ​”អ្នក​ស្រឡា​ញ់​ខ្ញុំឬទេ” ដូច្នេះ។ លោកទូលតបទៅព្រះអង្គថា៖ «បពិត្រព្រះអម្ចាស់! ព្រះអង្គជ្រាបអ្វីៗសព្វគ្រប់ទាំងអស់! ព្រះ​អង្គ​ជ្រាបស្រាប់ហើយថា ទូលបង្គំស្រឡាញ់ព្រះអង្គ»។ ព្រះយេស៊ូមាន​ព្រះបន្ទូលទៅគាត់ថា៖ «សុំថែរក្សា​ហ្វូងចៀម​របស់​ខ្ញុំផង។ ខ្ញុំសុំប្រាប់អ្នកដឹងច្បាស់ថា កាលអ្នកនៅក្មេង អ្នកក្រវាត់ចង្កេះខ្លួនឯង ហើយអ្នកទៅ​ណា​តាម​តែ​ចិត្ត​អ្នក​ចង់។ លុះដល់អ្នកចាស់ អ្នកនឹងលើកដៃឡើង ហើយមានម្នាក់ទៀតក្រវាត់ចង្កេះឱ្យអ្នក ទាំងនាំអ្នកទៅកន្លែង​ដែល​អ្នក​មិនចង់ទៅថែមទៀតផង»។ ព្រះអង្គមានព្រះបន្ទូលដូច្នេះ បង្ហាញអំពីរបៀបដែលលោកសិលាស្លាប់ ដើម្បី​សម្តែង​សិរីរុងរឿងរបស់ព្រះជាម្ចាស់។ បន្ទាប់មក ព្រះអង្គមានព្រះបន្ទូលទៅគាត់ថា៖ «សុំអញ្ជើញមកតាមខ្ញុំ!»។

បពិត្រព្រះអម្ចាស់ជាព្រះបិតា! ព្រះយេស៊ូលើកលែងទោសឱ្យលោកសិលាដែលក្បត់ព្រះអង្គ ព្រមទាំងផ្ញើ​មុខ​ងារ​ឱ្យលោកណែនាំព្រះសហគមន៍ផង។ ក្នុងអភិបូជានេះ សូមទ្រង់ព្រះមេត្តា​ប្រទាន​ព្រះវិញ្ញាណ​ព្រះអង្គ​ឱ្យយើង​ខ្ញុំ​។ ​សូមឱ្យយើងខ្ញុំអាចស្រឡាញ់ ព្រះអង្គដោយស្មោះអំពីចិត្តផង។

បពិត្រព្រះបិតាជាទីស្រឡាញ់! ព្រះអង្គប្រទានព្រះកាយព្រះគ្រីស្តឱ្យយើងខ្ញុំធ្វើជាអាហារ ផ្តល់កម្លាំងនៅ​ពេល​​យើងខ្ញុំកំពុងធ្វើដំណើរនៅនាលោកនេះ។ សូមទ្រង់ព្រះមេត្តាប្រទានព្រះវិញ្ញាណ ដើម្បីឱ្យយើងខ្ញុំ​ស្រឡាញ់​ព្រះអង្គ​កាន់​តែខ្លាំងឡើងៗផង។

221 Views