ថ្ងៃព្រហស្បតិ៍ ទី១៥ ខែឧសភា ឆ្នាំ២០២៥

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា ប្រកបដោយធម៌មេត្តាករុណាយ៉ាងក្រៃលែង! ព្រះអង្គចាត់ព្រះយេស៊ូ​ជា​ព្រះ​គ្រីស្ត​ ត្រូវតាមព្រះបន្ទូលសន្យារបស់ព្រះអង្គ ដើម្បីប្រោសមនុស្សលោកឱ្យក្រោកឡើង និងឱ្យមានកិត្តិយស​ជាង​ពីមុន​ទៅទៀត។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំ ឱ្យយល់កាន់តែច្បាស់នូវព្រះអំណោយទានដ៏ថ្លៃថ្លានេះផង។

សូមថ្លែងព្រះគម្ពីរកិច្ចការរបស់គ្រីស្តទូត កក ១៣,១៣-២៥

លោក​ប៉ូល និង​សហការី​របស់​លោកបាន​ចុះ​សំពៅ​ពី​ក្រុង​ប៉ាផូសឆ្ពោះ​ទៅ​ក្រុង​ពែរកេ ក្នុង​ស្រុក​ប៉មភី‌លី។ ពេល​នោះ លោក​យ៉ូហាន​បាន​បែក​ចេញ​ពី​ពួក​គេវិល​ត្រឡប់​ទៅ​ក្រុង​យេរូ‌សាឡឹម​វិញ។ រីឯ​លោក​ប៉ូល និង​សហការី​របស់​លោកបាន​បន្ដ​ដំណើរ​ពី​ក្រុង​ពែរកេ រហូត​ទៅ​ដល់​ក្រុង​អន់‌ទី‌យ៉ូក ក្នុង​ស្រុក​ពីស៊ី‌ឌី។ នៅ​ថ្ងៃ​សប្ប័ទ លោក​ទាំង​ពីរ​ចូល​ទៅ​អង្គុយ​ក្នុង​សាលា​ប្រជុំ។ បន្ទាប់​ពី​បាន​អាន​គម្ពីរ‌វិន័យ និង​គម្ពីរ​ព្យាការី​រួច​ហើយ ពួក​អ្នក​ទទួល​ខុស​ត្រូវ​លើ​សាលា​ប្រជុំ សុំឱ្យ​គេ​ជម្រាប​ពួក​លោក​ប៉ូល​ថា៖ «បង‌ប្អូន​អើយ! បើ​បង‌ប្អូន​មាន​ពាក្យ​អ្វី​លើក​ទឹក​ចិត្ត​ប្រជាជន សូម​មាន​ប្រសាសន៍​មក​ចុះ»។ លោក​ប៉ូល​ក្រោក​ឡើង​លើក​ដៃ​ធ្វើ​សញ្ញា ហើយ​មាន​ប្រសាសន៍​ថា៖ «សូម​ជម្រាប​បង‌ប្អូន​ជន​ជាតិ​អ៊ីស្រា‌អែល និង​បង‌ប្អូន​ដែល​ជា​អ្នក​គោរព​កោត​ខ្លាច​ព្រះ‌ជាម្ចាស់ សូម​ជ្រាប! ព្រះ​របស់​ជន​ជាតិ​អ៊ីស្រា‌អែល​បាន​ជ្រើស‌រើស​បុព្វបុរស​របស់​យើង និង​ប្រទាន​ឱ្យ​ប្រជា‌រាស្ដ្រ​នេះ​បាន​ចម្រើន​ឡើង នៅ​ពេល​គេ​ស្នាក់​នៅ​ក្នុង​ប្រទេស​អេស៊ីប។ បន្ទាប់​មក ព្រះ‌អង្គ​បាន​នាំ​គេ​ចេញ​ពី​ប្រទេស​នោះ ដោយ​ឫទ្ធិ‌បារមី​របស់​ព្រះ‌អង្គ។ ព្រះ‌អង្គ​បាន​ផ្គត់‌ផ្គង់​​គេ​អស់‌រយៈ​ពេល​ប្រមាណ​សែ‌សិប​ឆ្នាំនៅ​វាល​រហោ‌ស្ថាន។ ក្រោយ​ពី​ព្រះ‌អង្គ​រំលាយ​ជាតិ​សាសន៍​ទាំង​ប្រាំ​ពីរ​នៅ​ស្រុក​កាណាន​រួច​ហើយ ព្រះ‌អង្គ​បាន​ប្រទាន​ទឹក​ដី​នោះ​ឱ្យប្រជា‌រាស្ដ្រ​របស់​ព្រះ‌អង្គ​ធ្វើ​ជា​កម្ម‌សិទ្ធិ។ ហេតុ‌ការណ៍​ទាំង​នោះ​កើត​មាន​ក្នុង​អំឡុង​ពេល​ប្រមាណ​បួន‌រយ​ហា‌សិប​ឆ្នាំ។ ក្រោយ​មក ព្រះ‌អង្គ​ប្រទាន​ឱ្យមាន​អ្នក​គ្រប់‌គ្រង​រហូត​ដល់​ជំនាន់​ព្យាការី​សាមូ‌អែល។ បន្ទាប់​មក​ទៀត គេ​បាន​នាំ​គ្នា​ទូល​សូម​ស្ដេច​មួយ​អង្គ ព្រះ‌ជាម្ចាស់​ក៏​ប្រទាន​ព្រះ‌បាទ​សាអ៊ូល ជា​បុត្រ​របស់​លោក​គីស ក្នុង​កុល‌សម្ព័ន្ធបេន‌យ៉ាមីនឱ្យ​គ្រង​រាជ្យ​អស់‌រយៈ​ពេល​សែ‌សិប​ឆ្នាំ។ ក្រោយ​ពី​បាន​ដក​រាជ្យ​ពី​ព្រះ‌បាទ​សាអ៊ូល ព្រះ‌ជាម្ចាស់​ប្រទាន​ឱ្យ​ព្រះ‌បាទ​ដាវីឌ​ឡើង​គ្រង​រាជ្យ។ ព្រះ‌អង្គ​ប្រទាន​សក្ខី‌ភាព​អំពី​ព្រះ‌បាទ​ដាវីឌ​នេះ​ថាៈ “យើង​រក​បាន​មនុស្ស​ម្នាក់ជា​ទី​គាប់​ចិត្ត​យើង​ណាស់ គឺ​ដាវីឌ​ជា​បុត្រ​របស់​យេសាយ ដ្បិត​ដាវីឌ​នឹង​បំពេញ​តាម​បំណង​ទាំង​ប៉ុន្មាន​របស់​យើង”។ ក្នុង​ព្រះ‌រាជ‌វង្ស​របស់​ព្រះ‌បាទ​ដាវីឌ​នេះ​ហើយ ដែល​ព្រះ‌ជាម្ចាស់​ប្រទាន​ឱ្យព្រះ‌យេស៊ូ​កើត​មក និង​ធ្វើ​ជា​ព្រះ‌សង្គ្រោះ​របស់​ជន​ជាតិ​អ៊ីស្រា‌អែល ស្រប​តាម​ព្រះ‌បន្ទូល​សន្យា​របស់​ព្រះ‌អង្គ។ មុន​នឹង​ព្រះ‌យេស៊ូ​យាង​មក​ដល់ លោក​យ៉ូហាន​បាន​ប្រកាស​ឱ្យ​ជន​ជាតិ​អ៊ីស្រា‌អែល​ទាំង​មូល​កែ​ប្រែ​ចិត្ត​គំនិត ដោយ​ទទួល​ពិធី​ជ្រមុជ​ទឹក។ ពេល​លោក​យ៉ូហាន​បំពេញ​មុខ‌ងារ​របស់​លោកចប់​សព្វ​គ្រប់​ហើយ លោក​មាន​ប្រសាសន៍​ថាៈ “ខ្ញុំ​នេះ​មិន​មែន​ជា​អ្នកដែល​បង‌ប្អូន​ទន្ទឹង​រង់‌ចាំ​នោះ​ទេ។ ឥឡូវ​នេះ មាន​លោក​ម្នាក់​មក​តាម​ក្រោយ​ខ្ញុំ លោក​មាន​ឋានៈ​ខ្ពង់‌ខ្ពស់​ណាស់ បើ​ខ្ញុំ​ស្រាយ​ខ្សែ​ស្បែក​ជើង​ជូន​លោកក៏​មិន​សម​នឹង​ឋានៈ​របស់​លោក​ផង”។

ទំនុកតម្កើងលេខ ៨៩ (៨៨),២-៣.២១-២២.២៥.២៧ បទកាកគតិ

ពិធីអបអរសាទរព្រះគម្ពីរដំណឹងល្អតាម វវ ១,៥

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៣,១៦-២០

ព្រះយេស៊ូបានលាងជើងក្រុមសាវ័ក រួចព្រះអង្គមានព្រះបន្ទូលទៅកាន់​ពួកគេថា៖ «ខ្ញុំសុំប្រាប់​ឱ្យអ្នករាល់គ្នា​ដឹង​ច្បាស់ថា អ្នកបម្រើមិនធំជាងម្ចាស់ឡើយ រីឯអ្នកដែលគេចាត់ឱ្យទៅ ក៏មិនធំជាងអ្នកចាត់ខ្លួនឱ្យទៅនោះដែរ។ ប្រ​សិន​​​បើអ្នករាល់គ្នាដឹងសេចក្តីនេះ ហើយប្រតិ​បត្តិតាម អ្នករាល់គ្នាមុខជាមានសុភមង្គលមិនខាន។ ខ្ញុំនិយាយ​ដូច្នេះ ​មិន​មែនសំដៅលើអ្នកទាំងអស់គ្នាទេ ដ្បិតខ្ញុំស្គាល់អស់អ្នកដែលខ្ញុំបានជ្រើសរើស តែ​ខ្ញុំនិយាយនេះ ដើម្បីឱ្យ​បាន​ស្រប​តាមសេចក្តីមានចែងទុកក្នុងគម្ពីរថា៖ “អ្នកបរិភោគអាហារជាមួយខ្ញុំ ប្រឆាំងនឹងខ្ញុំ”​។ ខ្ញុំនិយាយប្រាប់​អ្នករាល់​គ្នា​ពី​ឥឡូវនេះឱ្យហើយ មុនការណ៍ទាំងនោះកើតឡើង។ កាលណាការណ៍ទាំងនោះមកដល់ អ្នករាល់គ្នា​នឹង​ជឿថា ខ្ញុំ​ពិត​ជាព្រះដែលគង់នៅមែន។ ខ្ញុំសុំប្រាប់ឱ្យអ្នករាល់គ្នាដឹងច្បាស់ថា អ្នកណាទទួលអ្នកដែល​ខ្ញុំ​នឹង​ចាត់ឱ្យ​ទៅ ក៏​ដូច​ជា​ទទួលខ្ញុំដែរ ហើយអ្នកណាទទួលខ្ញុំ ក៏ដូចជាទទួលព្រះអង្គដែលបានចាត់ខ្ញុំឱ្យមកនោះដែរ»។

ពាក្យថ្វាយតង្វាយ

បពិត្រព្រះបិតាប្រកបដោយតេជានុភាពសព្វប្រការ! ទោះបីព្រះយេស៊ូជាព្រះបុត្រាព្រះអង្គក៏ដោយ ក៏ទ្រង់​សព្វព្រះ​ហឫទ័យដាក់ព្រះអង្គធ្វើជាអ្នកបម្រើ រហូតដល់លាងជើងក្រុមសាវ័ក។ សូមទ្រង់​ព្រះមេត្តា​ប្រោស​ប្រទាន​ឱ្យ​យើង​​ខ្ញុំស្ម័គ្រចិត្តលះបង់ប្រយោជន៍ផ្ទាល់ខ្លួន និងបម្រើអស់អ្នកដែលនៅជាមួយយើងខ្ញុំសព្វថ្ងៃនេះ។ ដូច្នេះ យើងខ្ញុំ​ពិតជាចូលរួមក្នុងសក្ការៈ​បូជារបស់ព្រះយេស៊ូគ្រីស្តដែលមានព្រះជន្មគង់នៅ និងសោយ​រាជ្យ​អស់​កល្ប​ជាអង្វែង​តរៀង​ទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គស្រឡាញ់មនុស្សលោករហូតដល់ចាត់ព្រះបុត្រាឱ្យយាងមកបម្រើ​យើង​ខ្ញុំ។ សូមទ្រង់ព្រះមេត្តាប្រោសប្រទានឱ្យយើងខ្ញុំដែលបានទទួលព្រះកាយព្រះគ្រីស្តក្នុងអភិបូជានេះ តបស្នង​​ព្រះគុណព្រះបិតា ដោយបម្រើអ្នកដទៃផង។