ថ្ងៃអាទិត្យ ទី២៥ ខែឧសភា ឆ្នាំ២០២៥

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! ព្រះអង្គសព្វព្រះហឫទ័យ​បង្រួប​បង្រួម​មនុស្សដែលបាក់បែកគ្នា ឱ្យចូលរួមក្នុងមហាគ្រួសារតែមួយ។ សូមទ្រង់​ព្រះមេត្តា​ប្រោស​ប្រទាន​ព្រះវិញ្ញាណ​ព្រះ​អង្គឱ្យយើងខ្ញុំ សូមឱ្យយើងខ្ញុំអាចរស់​នៅយ៉ាងសមរម្យនឹងឋានៈរបស់ខ្លួនជាបុត្រធីតារបស់ព្រះអង្គផង។

អត្ថបទទី១៖ សូមថ្លែងព្រះគម្ពីរកិច្ចការរបស់គ្រីស្តទូត កក ១៥,១-២.២២-២៩

មានអ្នកខ្លះមកពីស្រុកយូដា នាំគ្នាប្រៀនប្រដៅបងប្អូនក្រុមអន់ទីយ៉ូកថា៖ «ប្រសិនបើបងប្អូន​មិន​ទទួល​ពិធី​កាត់​​ស្បែកតាមទំនៀមទម្លាប់របស់លោកម៉ូសេទេនោះ បងប្អូនមិនអាចទទួលការសង្គ្រោះបានឡើយ»។ លោកប៉ូល​ និង​លោកបារណាបាសបានប្រកែកជំទាស់នឹងអ្នកទាំងនោះ ព្រមទាំងជជែកវែកញែកជាមួយពួកគេយ៉ាងខ្លាំង។ ពួក​បង​ប្អូនបានសម្រេចចិត្តចាត់លោកប៉ូល និងលោកបារណាបាស ឱ្យទៅក្រុងយេរូសាឡឹម ដោយមានបងប្អូនខ្លះទៀតទៅ​​ជាមួយផង ដើម្បីឱ្យទៅជម្រាបក្រុមគ្រីស្តទូត និងក្រុមព្រឹទ្ធាចារ្យអំពីរឿងនេះ។ ពេលនោះ ក្រុមគ្រីស្តទូត ក្រុមព្រឹទ្ធាចារ្យ និងព្រះសហគមន៍ទាំងមូលយល់ឃើញថា គួរតែជ្រើស​យក​បង​ប្អូនខ្លះក្នុងចំណោមពួកគេ ជាអ្នកដែលពួកបងប្អូនគោរព ដើម្បីចាត់ឱ្យទៅក្រុងអន់ទីយ៉ូកជាមួយលោកប៉ូល និងលោក​បារ​ណាបាស។ គេបានជ្រើសយកលោកយូដាសហៅ “បារសាបា” និងលោកស៊ីឡា។ ព្រះសហគមន៍បានប្រគល់សំបុត្រមួយឱ្យលោកទាំងពីរនាំយកទៅ ដែលមានសេចក្តីដូចតទៅនេះ៖ «យើងជាគ្រីស្តទូត ជាព្រឹទ្ធាចារ្យ និងជាបងប្អូន! សូមជម្រាបសួរមកបងប្អូនជាសាសន៍ដទៃដែល​រស់នៅ​ក្រុង​អន់ទីយ៉ូក ស្រុកស៊ីរី និងស្រុកស៊ីលីស៊ី។ យើងបានទទួលដំណឹងថា មានពួកយើងខ្លះ បាននាំ​ឱ្យបង​ប្អូន​ជ្រួល​ច្របល់​ មក​ពីពាក្យដែលគេនិយាយប្រាប់បងប្អូន បណ្តាលឱ្យ​បងប្អូនមានកង្វល់ក្នុងចិត្ត។ យើងពុំបាន​ចាត់អ្នកទាំង​នោះ​ឱ្យ​មក​ទេ។ យើងទាំងអស់គ្នាបានសម្រេចចិត្តជ្រើសរើសយកគ្នាយើងខ្លះ ចាត់ឱ្យមកជួបបងប្អូនជាមួយលោកបារណាបាស និងលោកប៉ូលដ៏ជាទីស្រឡាញ់របស់យើង ជាអ្នកដែលបានសុខចិត្តបូជាជីវិតរបស់ខ្លួនបម្រើ​ព្រះយេស៊ូគ្រីស្តជា​ព្រះ​អម្ចាស់​របស់យើង។ ហេតុនេះ យើងសុំចាត់លោកយូដាស និងលោកស៊ីឡា ឱ្យនាំពាក្យនេះយកមក​ជម្រាប​បងប្អូន​ស្តាប់​ផ្ទាល់តែម្តង។ ព្រះវិញ្ញាណដ៏វិសុទ្ធ និងយើងយល់ឃើញថា មិនគួរយកវិន័យណាផ្សេងទៀតដែលមិនចាំ​បាច់​មកបង្ខំ​បង​ប្អូនឱ្យប្រតិ​បត្តិតាមឡើយ។ យើងគ្រាន់តែសុំឱ្យបងប្អូនចៀសវាងកុំប្រព្រឹត្តដូចតទៅនេះ គឺកុំបរិភោគម្ហូបអាហារដែលសែនព្រះក្លែងក្លាយ កុំ បរិភោគឈាម កុំបរិ​ភោគ​សាច់​សត្វ​ដែលគេសម្លាប់ដោយច្របាច់ក និងកុំរួមរស់ជាមួយគ្នាដោយមិនរៀបការ។ ប្រសិនបើបងប្អូនប្រតិ​បត្តិដូច្នេះបាន នោះប្រពៃហើយ។ សូមឱ្យបងប្អូនបានប្រកបដោយសេចក្តីសុខសាន្ត»។

ទំនុកតម្កើងលេខ ៦៧ (៦៦),២-៤.៨ បទពាក្យ ៧

អត្ថបទទី២៖ សូមថ្លែងព្រះគម្ពីរវិវរណៈ វវ ២១,១០-១៤.២២-២៣

ខ្ញុំយ៉ូហាន ឃើញទេវទូតមួយរូបលើកវិញ្ញាណខ្ញុំឡើងទៅលើភ្នំមួយយ៉ាងធំខ្ពស់ រួចបង្ហាញឱ្យខ្ញុំឃើញក្រុង​ដ៏វិសុទ្ធ ជាក្រុងយេរូសាឡឹមដែលចុះពីស្ថានបរមសុខ គឺចុះមកពីព្រះជាម្ចាស់។ ក្រុងនេះប្រកប​​ដោយសិរីរុង​រឿង​របស់​​​​ព្រះជាម្ចាស់ ពន្លឺរស្មីរបស់ក្រុង ប្រៀបបីដូចជាត្បូងដ៏មានតម្លៃបំផុត គឺដូច​ត្បូងមណីជោតិរសដែល​ភ្លឺថ្លា​ដូច​កែវ​ចរណៃ​។ ក្រុងនេះមានកំពែងមួយយ៉ាងធំខ្ពស់ ព្រមទាំងមានខ្លោងទ្វារ​ដប់ពីរ។ នៅលើខ្លោងទ្វារ មានទេវទូតដប់ពីររូប និង​មា​ន​ចារឹក​ឈ្មោះ​កុលសម្ព័ន្ធទាំងដប់ពីររបស់ជនជាតិអ៊ីស្រាអែលដែរ។ នៅទិសខាងកើតមានខ្លោងទ្វារបី ទិសខាង​ជើង​មាន​​​ខ្លោងទ្វារបី ទិសខាងត្បូងមានខ្លោងទ្វារបី និងទិសខាងលិចមានខ្លោងទ្វារបី។ កំពែងរបស់ក្រុងមានគ្រឹះដប់ពីរ ហើយ​នៅលើគ្រឹះទាំងនោះ មានចារឹកឈ្មោះគ្រីស្តទូតទាំងដប់ពីររបស់កូនចៀម។ ខ្ញុំពុំឃើញមានព្រះវិហារនៅក្នុងទីក្រុងទេ ដ្បិតព្រះជាអម្ចាស់ក៏មានព្រះចេស្តាលើអ្វីៗទាំងអស់ ព្រម​ទាំង​កូន​ចៀម​នេះ​ហើយ​ដែលជាព្រះវិហាររបស់ក្រុងនោះ។ ក្រុង នោះមិនត្រូវការពន្លឺព្រះអាទិត្យ ឬព្រះច័ន្ទឡើយ ដ្បិតសិរីរុងរឿងរបស់​ព្រះ​ជាម្ចាស់បំភ្លឺក្រុង ហើយកូនចៀមក៏ជាចង្កៀងរបស់ក្រុងដែរ។

ពិធីអបអរសាទរព្រះគម្ពីរដំណឹងល្អតាម យហ ១៤,២៥.២៧

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៤,២៣-២៩

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គមានព្រះបន្ទូល​ទៅកាន់​ក្រុម​សាវ័ក​ថា៖ «អ្នកណាស្រឡាញ់ខ្ញុំ អ្នកនោះនឹងប្រតិបត្តិតាមពាក្យខ្ញុំ។ ព្រះបិតាខ្ញុំនឹងស្រឡាញ់អ្នកនោះ ហើយ​ព្រះបិតា​ និង​ខ្ញុំ ក៏នឹងមកតាំងលំនៅនៅក្នុងអ្នកនោះដែរ។ អ្នកណាមិនស្រឡាញ់ខ្ញុំ អ្នកនោះមិនប្រតិបត្តិតាមពាក្យខ្ញុំឡើយ។ ពាក្យ​ដែលអ្នករាល់គ្នាឮខ្ញុំនិយាយ មិនមែនជាពាក្យរបស់ខ្ញុំទេ គឺជាព្រះបន្ទូលរបស់ព្រះបិតាដែលបានចាត់ខ្ញុំឱ្យមក។ ខ្ញុំ​បាន​ប្រាប់សេចក្តីទាំងនេះឱ្យអ្នករាល់គ្នាដឹង ក្នុងពេលដែលខ្ញុំស្ថិតនៅជាមួយអ្នករាល់គ្នានៅឡើយ។ ប៉ុន្តែ ព្រះអង្គ​ដែល​ជួយ​ការពារ គឺព្រះវិញ្ញាណដ៏វិសុទ្ធដែលព្រះបិតាចាត់ឱ្យមកក្នុងនាមខ្ញុំ នឹងបង្រៀន​សេចក្តី​ទាំង​អស់​ដល់​អ្នក​រាល់​គ្នា ព្រមទាំងរំឭកអ្វីៗដែលខ្ញុំបានប្រាប់អ្នករាល់គ្នាផង។ ខ្ញុំទុកសេចក្តីសុខសាន្តឱ្យអ្នករាល់គ្នា ខ្ញុំផ្តល់សេចក្តីសុខសាន្តរបស់ខ្ញុំឱ្យអ្នករាល់ គ្នា។ សេចក្តីសុខ​សាន្ត​ដែល​ខ្ញុំផ្តល់ឱ្យនេះ មិនដូចសេចក្តីសុខសាន្តដែលមនុស្សលោកឱ្យទេ។ ចូរកុំរន្ធត់ចិត្ត កុំភ័យខ្លាចឱ្យសោះ។ អ្នករាល់​គ្នាបា​ន​​​ឮខ្ញុំនិយាយរួចមកហើយថា ខ្ញុំនឹងចាកចេញទៅ រួចខ្ញុំមករកអ្នករាល់គ្នាវិញ។ ប្រសិនបើអ្នករាល់គ្នាស្រឡាញ់ខ្ញុំ អ្នក​រាល់​គ្នាមុខតែសប្បាយចិត្ត ដោយខ្ញុំទៅឯព្រះបិតា ដ្បិតព្រះបិតាមានឋានៈធំជាងខ្ញុំ។ ខ្ញុំប្រាប់ឱ្យអ្នករាល់គ្នាដឹងឥឡូវនេះ មុនហេតុការណ៍ទាំងនោះកើតឡើង។ លុះដល់ហេតុការណ៍​ទាំងនោះ​កើត​ឡើ​ង ​​អ្នករាល់គ្នានឹងជឿ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! យើងខ្ញុំសូមថ្វាយកាយ វាចា ចិត្ត ចំពោះព្រះអង្គ រួមជាមួយ​ព្រះយេស៊ូ​ដែល​បាន​បូជាព្រះជន្ម។ សូមទ្រង់ព្រះមេត្តាចាត់ព្រះវិញ្ញាណយាងមកញ៉ាំងតង្វាយទាំងនេះឱ្យបានគាប់​ហឫទ័យព្រះអង្គ និងឱ្យបានទៅជាព្រះកាយ និងព្រះលោហិតរបស់ព្រះបុត្រា ដែលមានព្រះជន្មគង់នៅអស់កល្បជាអង្វែងតរៀងទៅ​។

ធម៌លើកតម្កើង

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! យើងខ្ញុំសូមលើក​តម្កើងសិរីរុង​រឿង​របស់ព្រះអង្គ ដោយរួមជាមួយព្រះគ្រីស្តជាអម្ចាស់យើងខ្ញុំ។ ព្រះគ្រីស្តប្រទាន​ជីវិតថ្មីឱ្យ​យើងខ្ញុំ​ដែល​ជឿ​សង្ឃឹម​លើ​​ព្រះ​អង្គ។ ទ្រង់បង្រួបបង្រួមមនុស្សគ្រប់ជាតិសាសន៍ឱ្យចូលក្នុងព្រះសហគមន៍តែមួយ។ ព្រះសហគមន៍​ក៏ទទួល​ឫទ្ធិបារមីពីព្រះវិញ្ញាណដែរ ដើម្បីបង្ហាញធម៌មេត្តាការុណារបស់ព្រះអង្គសព្វថ្ងៃនេះ។ អាស្រ័យហេតុនេះ​ហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយ សូម​លើក​តម្កើងសិរីរុងរឿងរបស់ព្រះអង្គ ដោយប្រកាសថា៖ “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”។

ពាក្យអរព្រះគុណ

បពិត្រព្រះបិតាប្រកបដោយតេជានុភាពសព្វប្រការ! ដោយព្រះអង្គប្រោសព្រះយេស៊ូ ឱ្យមានព្រះជន្មថ្មី​ដ៏រុង​រឿ​ង​​ ព្រះអង្គក៏ប្រទានជីវិតថ្មីឱ្យ​យើងខ្ញុំ។ សូមទ្រង់ព្រះមេត្តាប្រទានព្រះវិញ្ញាណព្រះអង្គឱ្យបង្ហាញ​សេចក្តីពិតដល់​យើ​ង​ខ្ញុំ​ផង។ សូមព្រះវិញ្ញាណណែនាំយើងខ្ញុំ ឱ្យរស់នៅយ៉ាងសមរម្យនឹងឋានៈរបស់ខ្លួន ជាបុត្រធីតា​របស់​ព្រះ​អង្គ​ផង​។