ពាក្យអធិដ្ឋានពេលចូល

បពិត្រព្រះបិតាប្រកបដោយតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! ព្រះអង្គ​ប្រោសព្រះយេស៊ូឱ្យមានព្រះជន្មថ្មីដ៏រុងរឿង និងតែងតាំងជាគង្វាលដ៏ប្រសើរ ដែលប្រមែ​ប្រមូលមនុស្ស​គ្រប់ជាតិ​សាសន៍ធ្វើជាមហាគ្រួសារតែមួយ។ សូមទ្រង់ព្រះមេត្តា​ប្រោស​យើងខ្ញុំឱ្យ​យកចិត្ត​ទុកដាក់​ស្តាប់ព្រះសូរ​សៀង​របស់​គង្វាលនេះ និងបម្រើអ្នកដទៃតាមគង្វាលនេះផង។

អត្ថបទទី១៖ សូមថ្លែងព្រះគម្ពីរកិច្ចការរបស់គ្រីស្តទូត កក ១៣,១៤.៤៣-៥២

លោកប៉ូល និងលោកបារណាបាសទៅដល់ក្រុងអន់ទីយ៉ូក ក្នុងស្រុកពីស៊ីឌី។ នៅថ្ងៃសប្ប័ទ លោក​ទាំង​ពីរ​ចូល​​​ទៅអង្គុយក្នុងធម្មសាលា។ លុះអង្គប្រជុំបែកគ្នាហើយ មានសាសន៍យូដា និងអ្នកចូល​សាស​នា​យូដា​ជា​ច្រើន​នាក់ដែ​ល​​​គោរ​ពប្រណិប័តន៍ព្រះជាម្ចាស់នាំគ្នាទៅតាមលោកប៉ូល និងលោកបារណាបាស។ លោក​ទាំង​ពីរ​សន្ទនា​ជាមួយ​ពួកគេ ហើយក្រើនរំឭកគេឱ្យនៅជាប់នឹងព្រះហឫទ័យប្រណីសន្តោសរបស់ព្រះជាម្ចាស់ជានិច្ច។
នៅថ្ងៃសប្ប័ទបន្ទាប់មកទៀត ប្រជាជននៅក្រុងនោះបានមកជួបជុំស្តាប់ព្រះបន្ទូលរបស់ព្រះ​អម្ចាស់​ស្ទើរតែ​ទាំង​អស់គ្នា។ កាលជនជាតិយូដាឃើញមហាជនដូច្នោះ គេមានចិត្តច្រណែនជាខ្លាំង ក៏នាំគ្នានិយាយជំទាស់នឹង​ពាក្យ​ដែល​លោកប៉ូលមានប្រសាសន៍ ហើយថែមទាំង​ជេរប្រមាថលោកទៀតផង។ លោកប៉ូល និងលោកបារណាបាស​ក៏មានប្រសាសន៍ទៅគេដោយចិត្តអង់អាចថា៖ «មុនដំបូង យើងខ្ញុំត្រូវ​តែប្រកាស​ព្រះបន្ទូល​របស់ព្រះ​ជាម្ចាស់​ដល់​បង​ប្អូន។ ប៉ុន្តែ ដោយបងប្អូនបដិសេធមិនព្រមទទួលព្រះបន្ទូលនេះ ហើយដោយបងប្អូនយល់ឃើញថា ខ្លួនមិន​សម​នឹង​ទទួល​ជីវិតអស់កល្បជានិច្ចទេនោះ យើងខ្ញុំនឹងងាកទៅប្រកាសដល់សាសន៍ដទៃវិញ ដ្បិតព្រះអម្ចាស់បានបង្គាប់​មក​យើងខ្ញុំថា៖ “យើងបានតែងតាំងអ្នកឱ្យធ្វើជាពន្លឺបំភ្លឺជាតិសាសន៍នានា និងឱ្យនាំការសង្គ្រោះរ​ហូត​ទៅ​ដល់​ស្រុក​ដាច់​ស្រយាល​នៃផែន​ដី”»។
កាលសាសន៍ដទៃឮដូច្នោះ គេមានអំណររីករាយ ហើយនាំគ្នាលើកតម្កើងព្រះបន្ទូលរបស់ព្រះអម្ចាស់។ រីឯ​អស់​អ្នកដែលព្រះជាម្ចាស់តម្រូវ​ឱ្យទទួលជីវិតអស់កល្បជានិច្ចក៏នាំគ្នាជឿដែរ។ ព្រះបន្ទូលរបស់ព្រះអម្ចាស់​បាន​ឮ​សុះ​​សាយក្នុងស្រុកនោះទាំងមូល។ ប៉ុន្តែ សាសន៍យូដាបានញុះញង់ស្ត្រីៗមានឋានៈខ្ពង់ខ្ពស់ដែល​គោរព​ប្រណិប័ត​ន៍​​ព្រះ​ជាម្ចាស់ និងញុះញង់ពួកនាម៉ឺននៅក្រុងនោះឱ្យលើកគ្នាទៅបៀតបៀន លោកប៉ូល និងលោកបារណាបាស ព្រមទាំងដេញលោកទាំងពីរចេញពីដែនដីរបស់គេផង។
លោកប៉ូល និងលោកបារណាបាសក៏រលាស់ធូលីដីចេញពីជើងរបស់លោក រួចធ្វើដំណើរទៅក្រុងអ៊ីកូញុម។ រីឯក្រុមសាវ័កនៅអន់ទីយ៉ូកវិញ គេបានពោរពេញដោយអំណរ និងដោយព្រះវិញ្ញាណដ៏វិសុទ្ធ។

ទំនុកតម្កើងលេខ ១០០(៩៩), ១-៣.៥ បទកាកគតិ

អត្ថបទទី២៖ សូមថ្លែងព្រះគម្ពីរវិវរណៈ វវ ៧,៩.១៤-១៧

ខ្ញុំយ៉ូហាន ឃើញមហាជនដ៏ច្រើនកុះករគ្មាននរណាអាចរាប់ចំនួនបាន អ្នកទាំងនោះមកពីគ្រប់ជាតិ​សាស​ន៍​ គ្រប់កុលសម្ព័ន្ធ គ្រប់ប្រជាជន និងពីគ្រប់ភាសា។ ពួកគេពាក់អាវសវែងឈរនៅមុខបល្ល័ង្ក និងនៅមុខកូនចៀមទាំង​កាន់ធាងទន្សែនៅដៃផង។ លោកតាម្នាក់ប្រាប់ខ្ញុំ​ថា៖ ​«អ្នកទាំង​នេះសុទ្ធ​តែបាន​ឆ្លងកាត់​ទុក្ខ​វេទ​នាដ៏ខ្លាំង។ គេបាន​បោ​ក​​អាវរបស់ខ្លួនឱ្យបានសស្អាត ក្នុងព្រះលោហិតរបស់កូនចៀម។ ហេតុនេះហើយ បាន​ជា​ពួក​គេស្ថិតនៅ​មុខ​បល្ល័ង្ករ​បស់​ព្រះជាម្ចាស់ និងគោរពបម្រើព្រះអង្គទាំងថ្ងៃទាំងយប់ នៅក្នុងព្រះវិហាររបស់ព្រះអង្គ។ ព្រះអង្គដែល​គង់​នៅ​លើ​បល្ល័ង្ក នឹងទទួលគេឱ្យជ្រកកោនក្នុងព្រះពន្លារបស់ព្រះអង្គ ពួកគេនឹងលែងឃ្លាន លែងស្រេកទៀតហើយ ព្រះអាទិត្យ​ និង​កំ​ដៅ​គ្រប់យ៉ាង ក៏នឹងលែងធ្វើទុក្ខគេទៀតដែរ ដ្បិតកូនចៀមដែលគង់នៅកណ្តាលបល្ល័ង្ក ទ្រង់នឹងឃ្វាលពួកគេ ព្រះអង្គនឹងនាំគេទៅរកប្រភពទឹកដែលផ្តល់ជីវិត ហើយព្រះជាម្ចាស់នឹងជូតទឹកភ្នែកចេញអស់ពីភ្នែករបស់គេ។

ពិធីអបអរសាទរព្រះគម្ពីរដំណឹងល្អតាម យហ ១០,១៤-១៥

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១០,២៧-៣០

ព្រះយេស៊ូមានព្រះបន្ទូលទៅកាន់ជនជាតិយូដាថា៖ «ខ្ញុំជាគង្វាលដ៏ល្អ។ ចៀមរបស់ខ្ញុំតែងស្តាប់សំឡេងខ្ញុំ ខ្ញុំស្គាល់ចៀមទាំងនោះ ហើយ​ចៀមទាំងនោះមកតាមខ្ញុំ។ ខ្ញុំឱ្យគេមានជីវិតអស់កល្បជានិច្ច គេមិនវិនាស​អន្តរាយ​ឡើយ​ ហើយគ្មាននរណាអាចឆក់យកគេពីដៃខ្ញុំជាដាច់ខាត។ ព្រះបិតាដែលបានប្រទានចៀមទាំងនោះមកឱ្យខ្ញុំ ទ្រង់​មានអំណាចធំលើសអ្វីៗទាំងអស់ គ្មាននរណាអាចឆក់យកគេពីព្រះហស្តព្រះបិតាបានឡើយ។ ខ្ញុំ និងព្រះបិតាជាអង្គតែមួយ»។

ពាក្យថ្វាយតង្វាយ

បពិត្រព្រះអម្ចាស់! ជារៀងរាល់ឆ្នាំព្រះអង្គសព្វព្រះហឫទ័យឱ្យយើងខ្ញុំនឹករឭកអំពីរបៀបព្រះគ្រីស្តស​ង្គ្រោះ​យើង​ខ្ញុំ!។ យើងខ្ញុំសូមថ្វាយកាយ វាចា ចិត្ត រួមជាមួយព្រះយេស៊ូដែលបានបូជាព្រះជន្ម។ សូមទ្រង់​ព្រះមេត្តា​ទទួល​តង្វាយ​របស់យើងខ្ញុំដោយអនុគ្រោះ។

ធម៌លើកតម្កើង

បពិត្រព្រះអម្ចាស់ជាព្រះបិតា! យើងខ្ញុំសូមលើកតម្កើងសិរីរុងរឿងរបស់ព្រះអង្គ ជាពិសេស នៅថ្ងៃនេះដែលព្រះគ្រីស្តបានបូជាព្រះជន្ម ដូចជាកូនចៀមដែលគេធ្លាប់យកទៅធ្វើយញ្ញក្នុងបុណ្យចម្លង។ ព្រះគ្រីស្តបានប្រោសបុត្រធីតាជាច្រើនឱ្យទទួលជីវិតអស់កល្បជានិច្ច!។ អស់អ្នកជឿក៏អាចចូលព្រះរាជ្យនៃស្ថានបរមសុខបានដែរ។ ពិតមែនហើយ! ដោយព្រះគ្រីស្តសោយទិវង្គត ព្រះអង្គបានប្រោសយើងខ្ញុំឱ្យរួចពីអំណាច​នៃសេចក្តីស្លាប់! ដោយព្រះគ្រីស្តមានព្រះជន្មថ្មី យើងខ្ញុំម្នាក់ៗក៏ទទួលជីវិតថ្មីដែរ។ អាស្រ័យហេតុនេះហើយ បានជាយើងខ្ញុំជាប្រជាជនដែលទទួលអគ្គសញ្ញាជ្រមុជទឹកទូទាំងសកលលោកមានអំណរសប្បាយ ហើយសូមចូលរួមជាមួយអស់ទេវទូត និងសន្តបុគ្គលទាំងឡាយ ដើម្បីលើកតម្កើងសិរីរុងរឿងរបស់ព្រះអង្គដោយប្រកាសថា៖ “ព្រះដ៏វិសុទ្ធ!” ។

ពាក្យអរព្រះគុណ

បពិត្រព្រះបិតាប្រកបដោយតេជានុភាពសព្វប្រការ ហើយដែលជាគង្វាលដ៏សប្បុរស! ព្រះអង្គសង្គ្រោះយើង​ខ្ញុំ​​ដោយព្រះបុត្រាបូជាព្រះជន្ម។ សូមទ្រង់ព្រះមេត្តាណែនាំយើងខ្ញុំជាព្រះសហគមន៍ព្រះអង្គ ឱ្យស្គាល់ធម៌មេត្តា​ករុ​ណា​​ដ៏លើសលប់របស់ព្រះអង្គផង។