ថ្ងៃអាទិត្យ ទី០២ ខែមីនា ឆ្នាំ២០២៥

ពាក្យអធិដ្ឋាននៅពេលចូល

បពិត្រព្រះអម្ចាស់ជាព្រះបិតាដ៏មានតេជានុភាពសព្វប្រការ! សូមទ្រង់ព្រះ​មេត្ដាប្រោសអាណិតអាសូរមនុស្សលោក។ សូមប្រោសឱ្យមនុស្សលោកប្រកប​ដោយសេចក្ដីសុខសាន្ដជានិច្ច តាមគម្រោងការរបស់ព្រះអង្គ។ សូមឱ្យយើងខ្ញុំជា​បុត្រធីតារបស់ព្រះអង្គ អាចបម្រើព្រះអង្គដោយគ្មានចង្អៀតចង្អល់ចិត្ដឡើយ។

អត្ថបទទី១៖ សូមថ្លែងព្រះគម្ពីរលោកបេនស៊ីរ៉ាក់ បសរ ២៧,៤-៧

កាលណាគេរែងអង្ករ សំរាមលេចចេញមក ពេលមនុស្សនិយាយស្ដី គុណវិបត្ដិ​​របស់គេក៏លេចចេញមកដែរ។ ជាងស្មូនដឹងថា ភាជន៍ល្អឬមិនល្អក្នុងពេល​ដុតចម្អិនវានៅក្នុងឡយ៉ាងណា យើងក៏ដឹងចិត្ដគំនិតរបស់មនុស្សក្នុងពេលគេ​និ​យាយស្ដីយ៉ាងនោះដែរ។ ផ្លែឈើបង្ហាញពីរបៀបដែលគេថែទាំដើមវាយ៉ាងណា ពាក្យសម្ដីក៏បង្ហាញពីចិត្ដថ្លើមរបស់មនុស្សយ៉ាងនោះដែរ។ កុំសរសើរនរណាម្នាក់មុនពេលបានឮសម្ដីរបស់គេ ដ្បិតពាក្យសម្ដីនេះហើយ ដែលបង្ហាញពីចិត្ដគំនិតរបស់មនុស្ស។

ទំនុកតម្កើងលេខ ៩២ (៩១),២-៣.១៣-១៦ បទពាក្យ ៧

អត្ថបទទី​២៖ សូមថ្លែងលិខិតទី១ របស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូរិនថូស ១ករ ១៥,៥៤-៥៨

បងប្អូនជាទីស្រឡាញ់
នៅថ្ងៃចុងក្រោយបំផុត រូបកាយដែលតែងតែរលួយរបស់ យើងនេះនឹងទទួលភាពមិនចេះរលួយ។ នៅពេលរូបកាយដែលរមែងតែង​​​តែស្លាប់នេះ ទទួលភាពអមតៈហើយនោះ ព្រះបន្ទូលដែលមានចែងទុកក្នុង​គម្ពីរ​នឹងបានសម្រេចជា រូបរាង គឺថា ជ័យជម្នះបានបំបាត់មច្ចុរាជចោលហើយ! មច្ចុ​រាជអើយ! តើជ័យជម្នះ របស់ឯងនៅឯណា? មច្ចុរាជអើយ! តើអំណាច​ប្រហារ​ជីវិតរបស់ឯងនៅឯណា?។ អំណាចនៃមច្ចុរាជនោះ មកពីអំពើបាប រីឯអំ​ណា​ច​នៃអំពើបាបមកពីធម្មវិន័យ។ សូមអរព្រះគុណព្រះជាម្ចាស់ ព្រោះព្រះអង្គប្រទានឱ្យយើងមានជ័យជម្នះ ដោយសារព្រះអម្ចាស់យេស៊ូគ្រីស្ដ។ បងប្អូនជាទីស្រ​ឡាញ់អើយ! ហេតុនេះ ចូរមានចិត្ដរឹងប៉ឹងមាំមួនឡើង។ ចូរខំប្រឹងធ្វើកិច្ច​ការរបស់ព្រះអម្ចាស់ឱ្យបានចម្រើនឡើងជានិច្ច ដោយដឹងថា កិច្ចការដែលបងប្អូនធ្វើរួមជាមួយព្រះអម្ចាស់ទាំងនឿយហត់នោះ មិនមែនឥត​ប្រយោជន៍ឡើយ។

ពិធីអបអរសាទរព្រះគម្ពីរដំណឹងល្អតាម ភល ២,១៥-១៨

អាលេលូយ៉ា! អាលេលូយ៉ា!
ចូរកាន់តាមព្រះបន្ទូលដែលផ្ដល់ជីវិត!។ បងប្អូននឹងភ្លឺ ដូចពន្លឺដែលបំភ្លឺមនុស្សលោក។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ៦,៣៩-៤៥

ព្រះយេស៊ូមានព្រះបន្ទូលជាពាក្យប្រស្នាទៅគេទៀតថា៖ «មនុស្សខ្វាក់ពុំអាចនាំមនុស្សខ្វាក់ម្នាក់ទៀតបានឡើយ។ បើធ្វើដូច្នោះ មុខជាធ្លាក់រណ្ដៅទាំងពីរនាក់មិនខាន។ ពុំដែលមានសិស្សណាធំជាងគ្រូឡើយ ប៉ុន្ដែ សិស្សដែលបានទទួលចំណេះសព្វគ្រប់អាច ស្មើនឹងគ្រូបាន។ ហេតុអ្វីបានជាអ្នកមើលឃើញ​​​ល្អងធូលីនៅក្នុងភ្នែករបស់បងប្អូន តែមើលមិនឃើញធ្នឹមនៅក្នុងភ្នែករបស់​អ្នក​ផ្ទាល់ដូច្នេះ?។ បើអ្នកមើលធ្នឹមនៅក្នុងភ្នែក របស់អ្នកមិនទាំងឃើញផង ម្ដេច​​ក៏​ហ៊ាននិយាយទៅបងប្អូនថា “ទុកឱ្យខ្ញុំផ្ដិតយកល្អងធូលីនេះចេញពីភ្នែកអ្នក?”។ មនុស្សមានពុតអើយ! ចូរយកធ្នឹមចេញពីភ្នែកអ្នកជា មុនសិន ទើបអ្នកមើល​ឃើញច្បាស់ ល្មមនឹងផ្ដិតយកល្អងធូលីចេញពីភ្នែករបស់បងប្អូនអ្នកបាន។ ដើម​​​​ឈើល្អ មិនដែលឱ្យផ្លែអាក្រក់ឡើយ ឯដើមឈើអាក្រក់វិញ ក៏មិនដែលឱ្យ​ផ្លែ​ល្អដែរ ដ្បិតគេស្គាល់ដើមឈើបាន ដោយសារផ្លែវា។ ពុំដែលមាននរណា​បេះ​ផ្លែស្វាយ ឬផ្លែទំពាំងបាជូរពីគុម្ពបន្លាឡើយ។ មនុស្សល្អតែងប្រព្រឹត្ដអំពើល្អ ព្រោះ​​ចិត្ដ របស់គេល្អ រីឯមនុស្សអាក្រក់តែងប្រព្រឹត្ដអំពើអាក្រក់ ព្រោះចិត្ដ​របស់​គេអាក្រក់ ដ្បិតមាត់របស់មនុស្សតែងស្រដីចេញមកនូវសេចក្ដីណាដែលមានពេញហូរហៀរនៅក្នុងដួងចិត្ដរបស់ខ្លួន»។

ពាក្យថ្វាយតង្វាយ

បពិត្រព្រះជាម្ចាស់ជាព្រះបិតា! យើងខ្ញុំគ្មានអ្វីថ្វាយព្រះអង្គ ក្រៅពីវត្ថុដែលទ្រង់បានប្រោសប្រទានមកយើងខ្ញុំនោះទេ។ យើងខ្ញុំសូមថ្វាយតង្វាយទាំងនេះ ព្រមទាំងកាយ វាចា ចិត្ដ ដើម្បីតបស្នងព្រះគុណព្រះអង្គ។ សូមទ្រង់ព្រះមេត្ដាប្រោសប្រែដួងចិត្ដរបស់យើងខ្ញុំ ឱ្យចេះស្រឡាញ់ព្រះអង្គលើសអ្វីៗទាំងអស់​ក្នុង​​លោកនេះផង។

ពាក្យអរព្រះគុណ

បពិត្រព្រះអម្ចាស់ជាព្រះបិតាដ៏មានតេជានុភាពសព្វប្រការ! ក្នុងអភិបូជានេះ ព្រះអង្គបានប្រោសឱ្យយើងខ្ញុំចូលរួមយ៉ាងជិតស្និទ្ធជាមួយព្រះយេស៊ូគ្រីស្ដ ជា​ព្រះ​​​សង្គ្រោះរបស់យើងខ្ញុំ។ សូមទ្រង់ព្រះមេត្ដាប្រោសប្រទានព្រះវិញ្ញាណព្រះអង្គឱ្យ​យាងមកតម្រង់ចិត្ដគំនិតយើងខ្ញុំ។ សូមប្រោសឱ្យយើងខ្ញុំផ្ចង់ចិត្ដគោរពព្រះអង្គ លើសអ្វីៗទាំងអស់ក្នុងលោកនេះផង។