Ordinary Time Year Even - Catholic Faith Cambodia

ខ្ញុំយ៉ូហាន ឃើញទីសម្គាល់មួយទៀតនៅលើមេឃ ជាទីសម្គាល់យ៉ាងធំគួរស្ញែងខ្លាច គឺមានទេវទូតប្រាំពីររូបកាន់គ្រោះកាចប្រាំពីរ ដែលជាគ្រោះកាចចុងក្រោយបង្អស់ ដ្បិតគ្រោះកាចទាំងនេះនឹងធ្វើឱ្យព្រះ‌ជាម្ចាស់ឈប់ព្រះ‌ពិរោធ។ បន្ទាប់មកទៀត ខ្ញុំឃើញដូចជាមានសមុទ្រមួយភ្លឺដូចកែវលាយជាមួយនឹងភ្លើង ហើយអស់អ្នកដែលបានឈ្នះសត្វតិរច្ឆាន និងឈ្នះរូបចម្លាក់របស់វា ព្រមទាំងឈ្នះលេខឈ្មោះរបស់វា ឈរនៅលើសមុទ្រកែវនោះ។ ពួកគេកាន់ពិណរបស់ព្រះ‌ជាម្ចាស់ ហើយនាំគ្នាច្រៀងចម្រៀងរបស់លោកម៉ូសេជាអ្នកបម្រើរបស់ព្រះ‌ជាម្ចាស់ និងចម្រៀងរបស់កូនចៀមថា៖«ឱព្រះ‌ជា‌អម្ចាស់ដ៏មានព្រះ‌ចេស្ដាលើអ្វីៗទាំងអស់អើយ ស្នាព្រះ‌ហស្ដរបស់ព្រះ‌អង្គប្រសើរឧត្ដមគួរឱ្យកោតស្ញប់‌ស្ញែងពន់ពេកណាស់! ឱព្រះ‌មហាក្សត្រនៃប្រជា‌ជាតិទាំង‌ឡាយអើយ មាគ៌ារបស់ព្រះ‌អង្គសុទ្ធតែសុចរិត និងត្រឹមត្រូវទាំងអស់! បពិត្រព្រះ‌អម្ចាស់! តើមាននរណាមិនគោរពកោតខ្លាចព្រះ‌នាមព្រះ‌អង្គ! តើនរណាមិនលើកតម្កើងសិរី‌រុងរឿងនៃព្រះ‌នាមព្រះ‌អង្គ! ដ្បិតមានតែព្រះ‌អង្គប៉ុណ្ណោះជាព្រះដ៏‌វិសុទ្ធ។ មនុស្សគ្រប់ជាតិសាសន៍នឹងនាំគ្នាមកក្រាបថ្វាយ‌បង្គំព្រះ‌អង្គ ដ្បិតគេបានឃើញច្បាស់ថា ព្រះ‌អង្គវិនិច្ឆ័យដោយយុត្តិធម៌»។

ទំនុកតម្កើងលេខ ៩៨(៩៧),១-៣.៧-៩ បទកាកគតិ

១	ចូរច្រៀងបទថ្មី	ថ្វាយព្រះម្ចាស់ថ្លៃ	កុំភ្លេចឡើយណា
	ដ្បិតទ្រង់ប្រព្រឹត្ត	សព្វអស្ចារ្យ	ដោយប្ញទ្ធិចេស្ដា
		យកជ័យជម្នះ	។
២	ព្រះម្ចាស់បង្ហាញ	ប្រជាឱ្យឃើញ	ពីការសង្គ្រោះ
	ព្រះអង្គសម្ដែង	ឱ្យគេទាំងអស់	ឃើញសុចរិតស្មោះ
		របស់ព្រះអង្គ	។
៣	ព្រះអង្គនៅតែ	សម្ដែងឥតប្រែ	ករុណាត្រចង់
	ព្រះទ័យស្មោះស្ម័គ្រ	អ៊ីស្រអែលផង	សុចរិតឥតហ្មង
		ចងចាំទាំងអស់	។
	មនុស្សម្នាមូលមីរ	រស់នៅគ្រប់ទី	ឆ្ងាយទាំងស្រីប្រុស
	នៃភពផែនដី	ឃើញការសង្គ្រោះ	ព្រះជាម្ចាស់របស់
		យើងគ្រប់ៗគ្នា	។
៧	ចូរសមុទ្រលាន់	រលករាប់ពាន់	រំពងអាកាស
	ចូរឱ្យផែនដី	និងអ្វីទាំងអស់	មានជីវិតរស់
		ស្រែកឮអឺងកង	។
៨	ទន្លេទាំងឡាយ	ចូរអរសប្បាយ	សាទរត្រសង
	ចូរភ្នំទាំងអស់	ស្រែកហ៊ោអឺងកង	ព្រមៗគ្នាឡើង
		ដោយស័ព្ទខ្ញៀវខ្ញា	។
៩	ចំពោះព្រះភ័ក្រ្ដ	ព្រះអម្ចាស់ជាក់	គ្រប់គ្រងលោកា
	លើភពផែនដី	យុត្តិធម៌ថ្លៃថ្លា	អស់រាស្រ្ដប្រជា
		ទៀងត្រង់បរិសុទ្ធ	។

ពិធីអបអរសាទរព្រះគម្ពីរដំណឹងល្អតាម វវ ២,១០

អាលេលូយ៉ា! អាលេលូយ៉ា!
បពិត្រព្រះអម្ចាស់ អ្នកមានចិត្តស្មោះត្រង់រហូតដល់ស្លាប់នឹងទទួលជីវិតមកអ្នកទុកជាកុដពីព្រះអង្គ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ២១,១២-១៩

ព្រះយេស៊ូមានព្រះបន្ទូលទៅកាន់ក្រុមសាវ័ក អំពីដំណើរនិវត្តរបស់ព្រះអង្គថា៖«គេនឹងចាប់ចងអ្នករាល់គ្នា គេបៀត‌បៀន ហើយបញ្ជូនអ្នករាល់គ្នាទៅកាត់ទោសក្នុងសាលាប្រជុំ យកអ្នករាល់គ្នាទៅឃុំ‌ឃាំង។ គេនាំអ្នករាល់គ្នាទៅឱ្យស្ដេច និងលោកទេសា‌ភិបាលកាត់ទោស ព្រោះតែនាមខ្ញុំ។ ប៉ុន្តែ ការនេះប្រែជាហុចឱកាសឱ្យអ្នករាល់គ្នាផ្ដល់សក្ខី‌ភាពទៅវិញ។ ត្រូវចងចាំក្នុងចិត្តថា កុំភ័យបារម្ភជាមុននឹងពាក្យនិយាយការ‌ពារខ្លួនធ្វើអ្វី ដ្បិតខ្ញុំនឹងផ្ដល់ឱ្យអ្នករាល់គ្នាមានថ្វីមាត់ និងប្រាជ្ញា មិនឱ្យពួកប្រឆាំងអាចប្រកែកត‌ទល់នឹងអ្នករាល់គ្នាបានឡើយ។ សូម្បីតែឪពុក‌ម្ដាយ បង‌ប្អូនញាតិ‌សន្ដាន និងមិត្ត‌ភក្ដិរបស់អ្នករាល់គ្នា ក៏បញ្ជូនអ្នករាល់គ្នាមួយចំនួនទៅឱ្យគេសម្លាប់ផងដែរ។មនុស្សគ្រប់ៗរូបនឹងស្អប់អ្នករាល់គ្នា ព្រោះតែនាមខ្ញុំ។ ប៉ុន្តែ សូម្បីតែសក់អ្នករាល់គ្នាមួយសរសៃក៏មិនត្រូវបាត់ឡើយ។ អ្នករាល់គ្នានឹងបានរួចជីវិត ព្រោះអ្នករាល់គ្នាមានចិត្តស៊ូ‌ទ្រាំ»។

12 Views

ថ្ងៃពុធ អាទិត្យទី៣៤រដូវធម្មតា«ឆ្នាំគូ»ពណ៌បៃតង

សូមថ្លែងព្រះគម្ពីរវីវរណៈរបស់សន្ដយ៉ូហាន វវ ១៥,១-៤

ទំនុកតម្កើងលេខ ៩៨(៩៧),១-៣.៧-៩ បទកាកគតិ

ពិធីអបអរសាទរព្រះគម្ពីរដំណឹងល្អតាម វវ ២,១០

សូមថ្លែងព្រះគម្ពីរដំណឹងល្អតាមសន្តលូកា លក ២១,១២-១៩

ថ្ងៃពុធ អាទិត្យទី៣៤
រដូវធម្មតា«ឆ្នាំគូ»
ពណ៌បៃតង