ថ្ងៃអាទិត្យ ទី១០ ខែមីនា ឆ្នាំ២០២៤

អត្ថបទទី ១៖ សូមថ្លែងព្រះគម្ពីររបាក្សត្រទី២ ២របា ៣៦,១៤-១៦.១៩-២៣

នៅក្នុងរជ្ជកាលព្រះបាទសេដេខ្យាស មេដឹកនាំទាំងអស់របស់ក្រុមបូជាចារ្យ ព្រមទាំងប្រជាជននាំគ្នាប្រព្រឹត្តអំពើអាក្រក់ និងក្បត់ព្រះជាម្ចាស់កាន់តែច្រើនឡើងៗ ពួកគេប្រព្រឹត្តអំពើគួរស្អប់ខ្ពើមតាមប្រជាជាតិនានា ហើយបន្ថោកព្រះដំណាក់របស់ព្រះអម្ចាស់ ដែលព្រះអង្គបានញែកជាសក្ការៈនៅក្រុងយេរូសាឡឹម។ ព្រះអម្ចាស់ជាព្រះនៃបុព្វបុរសរបស់ពួកគេ បានចាត់អ្នកបម្រើរបស់ព្រះអង្គឱ្យទៅដាស់តឿនពួកគេជាច្រើនដង ព្រោះព្រះអង្គមានព្រះហប្ញទ័យមេត្តាប្រជារាស្ត្រ និងព្រះដំណាក់របស់ព្រះអង្គផ្ទាល់។ ប៉ុន្តែ ពួកគេបែរជាប្រមាថអ្នកដែលព្រះអង្គចាត់ឱ្យទៅ ពួកគេមើលងាយព្រះបន្ទូលរបស់ព្រះអង្គ ព្រមទាំងប្រមាថពួកព្យាការី រហូតធ្វើឱ្យព្រះអង្គទ្រង់ព្រះពិរោធ ទាស់នឹងប្រជារាស្ត្ររបស់ព្រះអង្គយ៉ាងខ្លាំង មិនអាចប្រែប្រួលបាន។ កងទ័ពបាប៊ីឡូនបានដុតព្រះដំណាក់របស់ព្រះជាម្ចាស់ ផ្តួលរំលំកំពែងក្រុងយេរូសាឡឹម ព្រមទាំងដុតវិមានផ្សេងៗ និងកម្ទេចវត្ថុដ៏មានតម្លៃទាំងអស់ចោល។ ព្រះចៅនេប៊ូកានេសារកៀរប្រជាជនដែលនៅសេសសល់ពីស្លាប់ យកទៅជាឈ្លើយសឹកនៅស្រុកបាប៊ីឡូន។ អ្នកទាំងនោះធ្វើជាទាសកររបស់ព្រះចៅនេប៊ូនេសារនិងបុត្ររបស់ស្តេច រហូតដល់អាណាចក្រពែរ្ស៍គ្រប់គ្រងស្រុក។ ហេតុការណ៍នេះកើតមាន ស្របតាមព្រះបន្ទូលដែលព្រះអម្ចាស់បានថ្លែងតាមរយៈព្យាការីយេរេមីថា ”ស្រុកទេសនឹងក្លាយទៅជាទីស្មសាន្ត អស់រយៈពេលចិតសិបឆ្នាំ ដូច្នេះ ក្នុងអំឡុងពេលនោះ ទឹកដីនឹងបានសម្រាកជំនួយឆ្នាំសប្ប័ទដែលប្រជាជនពុំបានគោរព”។ ក្នុងឆ្នាំទីមួយនៃរជ្ជកាលព្រះចៅស៊ីរូស ជាស្តេចស្រុកពែរ្ស៍ ព្រះអម្ចាស់បានជំរុញព្រះហប្ញទ័យព្រះចៅស៊ីរូសឱ្យចេញប្រកាស និងរាជ្យក្រឹត្យ ក្នុងអាណាចក្ររបស់ស្តេចទាំងមូល ស្របតាមព្រះបន្ទូលដែលព្រះអង្គបានថ្លែងតាមរយៈលោកយេរេមី មានសេចក្តីដូចតទៅ៖ «ព្រះចៅស៊ីរូស ជាស្តេចស្រុកពែរ្ស៍ មានរាជឱង្ការដូចតទៅ ព្រះអម្ចាស់ជាព្រះនៃស្ថានបរមសុខ បានប្រគល់នគរទាំងអស់នៅលើផែនដីមកឱ្យយើងគ្រប់គ្រង។ ព្រះអង្គបញ្ជាឱ្យយើងសង់ព្រះដំណាក់មួយនៅក្រុងយេរូសាឡឹម ក្នុងស្រុកយូដាថ្វាយព្រះអង្គ។ ក្នុងចំណោមអ្នករាល់គ្នា អ្នកណាជាប្រជារាស្ត្ររបស់ព្រះអង្គ ឱ្យអ្នកនោះវិលទៅកាន់ក្រុង យេរូសាឡឹមវិញ ហើយសូមឱ្យព្រះរបស់គេគង់នៅជាមួយគេផង»។

ទំនុកតម្កើងលេខ ១៣៧(១៣៦),១-៦ បទពាក្យ ៧

អត្ថបទទី ២៖ សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងអេភេសូ អភ ២,៤-១០

បងប្អូនជាទីស្រឡាញ់!
ព្រះជាម្ចាស់តែងតែមានព្រះហប្ញទ័យអាណិតមេត្តាដ៏ច្រើនពន់ប្រមាណ ព្រះអង្គមានព្រះហប្ញទ័យស្រឡាញ់យើងយ៉ាងខ្លាំងបំផុត គឺទោះបីយើងស្លាប់ ដោយសារអំពើបាបរបស់យើងហើយក៏ដោយ ក៏ព្រះអង្គបានប្រោសប្រទានឱ្យយើងមានជីវិតរួមជាមួយព្រះគ្រីស្តដែរ។ ព្រះជាម្ចាស់សង្គ្រោះបងប្អូន មកពីព្រះអង្គមានព្រះហប្ញទ័យប្រណីសន្តោស។ ព្រះអង្គបានប្រោសយើងឱ្យមានជីវិតថ្មីរួមជាមួយព្រះគ្រីស្តយេស៊ូ និងឱ្យយើងអង្គុយលើបល្ល័ង្កនៅស្ថានបរមសុខ រួមជាមួយព្រះអង្គដែរ។ ព្រះអង្គបង្ហាញព្រះហប្ញទ័យសប្បុរសចំពោះយើងក្នុងអង្គព្រះគ្រីស្តយេស៊ូ ដូច្នេះ ដើម្បីបង្ហាញឱ្យមនុស្សគ្រប់ជំនាន់ខាងមុខស្គាល់ព្រះហប្ញទ័យប្រណីសន្តោសដ៏ប្រសើរ​លើសលប់បំផុតរបស់ព្រះអង្គ ព្រះអង្គសង្គ្រោះបងប្អូន មកពីព្រះអង្គមានព្រះហប្ញទ័យប្រណីសន្តោស ដោយបងប្អូនមានជំនឿ។ ការសង្គ្រោះមិនមែនមកពីបងប្អូនទេ គឺជាព្រះអំណោយទានរបស់ព្រះជាម្ចាស់ ហើយក៏មិនមែនមកពីមនុស្សប្រព្រឹត្តអំពើល្អដែរ ដើម្បីកុំឱ្យនរណាម្នាក់អួតខ្លួនបាន។ យើងជាស្នាព្រះហស្តដែលព្រះជាម្ចាស់បានបង្កើតមកក្នុងអង្គព្រះគ្រីស្តយេស៊ូ ដើម្បីឱ្យយើងប្រព្រឹត្តអំពើល្អ ដែលព្រះអង្គបានបម្រុងទុកជាមុនសម្រាប់ឱ្យយើងប្រព្រឹត្តតាម។

ពិធីអបអរសាទរព្រះគម្ពីរដំណឹងល្អតាម មថ ១៧,៥

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ៣,១៤-២១

កាលនៅវាលរហោស្ថាន លោកម៉ូសេបានលើកពស់ធ្វើពីទង់ដែងឡើងយ៉ាងណា បុត្រមនុស្សនឹងត្រូវគេលើកឡើងយ៉ាងនោះដែរ ដើម្បីឱ្យអស់អ្នកដែលជឿលើព្រះអង្គ មានជីវិតអស់កល្បជានិច្ច។ ព្រះជាម្ចាស់ស្រឡាញ់មនុស្សលោកខ្លាំងណាស់ ហេតុនេះហើយបានជាព្រះអង្គប្រទានព្រះបុត្រាតែមួយរបស់ព្រះអង្គមក ដើម្បីឱ្យអស់អ្នកដែលជឿលើព្រះបុត្រាមានជីវិតអស់កល្បជានិច្ច គឺមិនឱ្យគេវិនាសឡើយ។ ព្រះជាម្ចាស់បានចាត់ព្រះបុត្រារបស់ព្រះអង្គឱ្យយាងមកក្នុងលោកនេះ ពុំមែនដើម្បីដាក់ទោសមនុស្សលោកទេ គឺដើម្បីសង្គ្រោះមនុស្សលោកដោយសារព្រះបុត្រាវិញ។ អ្នកជឿលើព្រះបុត្រាមិនត្រូវទទួលទោសទេ រីឯអ្នកមិនព្រមជឿបានទទួលទោសរួចស្រេចទៅហើយ ព្រោះគេពុំបានជឿលើព្រះនាមព្រះបុត្រាតែមួយរបស់ព្រះជាម្ចាស់។ ហេតុដែលបណ្តាលឱ្យមានទោសនោះគឺ ពន្លឺបានយាងមកក្នុងពិភពលោក ប៉ុន្តែ មនុស្សលោកចូលចិត្តភាពងងឹតជាងពន្លឺ ដ្បិតអំពើរបស់គេសុទ្ធតែអាក្រក់។ អស់អ្នកដែលប្រព្រឹត្តអំពើក្បត់ តែងតែស្អប់ពន្លឺ ហើយមិនចូលមករកពន្លឺឡើយ ព្រោះខ្លាចគេឃើញអំពើដែលខ្លួនបានប្រព្រឹត្ត។ ផ្ទុយទៅវិញ អស់អ្នកដែលប្រព្រឹត្តតាមសេចក្តីពិត តែងតែចូលមករកពន្លឺ ដើម្បីឱ្យគេឃើញថា អំពើដែលខ្លួនប្រព្រឹត្តនោះស្របតាមព្រះជាម្ចាស់មែន។

សេចក្ដីអត្ថាធិប្បាយគម្ពីរដំណឹងល្អតាមសន្តយ៉ូហាន ៣,១៤-២១

ព្រះយេស៊ូយាងមកក្នុងលោកនេះ ដើម្បីសម្ដែងអំពីព្រះហឫទ័យស្រឡាញ់ហួសកំរិតរបស់ព្រះបិតា ។

ពាក្យពន្យល់៖ សូមអានសេចក្តីអត្ថាធិប្បាយសន្តយ៉ូហាន ទំព័រ ៥៦-៥៥

អត្ថបទនេះ តពីអត្ថបទដែលរៀបរាប់អំពីព្រះយេស៊ូសន្ទនាជាមួយលោកនីកូដេម។ ក្នុងអត្ថបទនេះ លោកយ៉ូហានពន្យល់ជំនឿរបស់ព្រះសហគមន៍លើព្រះយេស៊ូ និងអំពីមុខងាររបស់ព្រះអង្គ ។

– “ពស់ធ្វើពីទង់ដែង៖ (សូមអានគម្ពីរជំរឿនប្រជាជន ២១,៤-៩) ជារឿងមួយរៀបរាប់ថា ប្រសិនបើមាននរណាម្នាក់ត្រូវពស់ចឹក អ្នកនោះត្រូវសម្លឹងមើលទៅរូបពស់ធ្វើពីទង់ដែង នោះមិនត្រូវស្លាប់ទេ ។ លោកយ៉ូហានប្រៀបប្រដូចព្រះយេស៊ូដែលជាប់លើឈើឆ្កាង ទៅ នឹងពោះដែលធ្វើពីទង់ដែងនោះ គឺអស់អ្នកណាបែរចិត្តមកជឿសង្ឃឹមលើព្រះយេស៊ូដែលត្រូវគេឆ្កាង អ្នកនោះនឹងទទួលការសង្គ្រោះពីព្រះអង្គ ។

– “បុត្រមនុស្ស៖ ពាក្យនេះមានអត្ថន័យពីរយ៉ាងគឺ៖ ម្យ៉ាងថា ព្រះយេស៊ូពិតជាមនុស្សដូចមនុស្សឯទៀតទាំងអស់ដែរ ម្យ៉ាងទៀតមានន័យថា ព្រះយេស៊ូជាព្រះមួយអង្គដែលនឹងយាងមកនៅពេលចុងក្រោយបំផុត ប្រកបដោយអំណាច និងវិនិច្ឆ័យប្រជាជនទាំងឡាយតាមពាក្យទំនាយរបស់ព្យាការីដនីអែល ៧,១៤។

– “ពន្លឺបានយាងមកក្នុងពិភពលោក៖ ព្រះយេស៊ូជាព្រះបន្ទូល និងជាបុត្រានៃព្រះបិតា ។ ព្រះអង្គយាងមកបង្ហាញទីដៅនៃជីវិត​​​ មនុស្ស។ ព្រះអង្គបំភ្លឺចិត្តគំនិតមនុស្សគ្រប់ៗរូប និងផ្តល់ជីវិតអោយពួកគេផង (យហ ១,៩, ៩,៥)។

– “ភាពងងឹត៖ គឺ កិលេសតណ្ហា អំពើអាក្រក់ និងសេចក្តីស្លាប់។

– “ប្រព្រឹត្តតាមសេចក្តីពិត”៖ គឺប្រព្រឹត្តតាមព្រះយេស៊ូគ្រីស្តដែលជាពន្លឺបង្ហាញសេចក្តីពិត។ ព្រះអង្គបង្ហាញអោយអ្នកជឿស្គាល់ព្រះហឫទ័យរបស់ព្រះជាម្ចាស់ ។

អត្ថន័យសំរាប់យើងសព្វថ្ងៃ

ឃ្លាសំខាន់ពីរឱ្យគេចាំរត់មាត់៖

“ព្រះជាម្ចាស់ស្រឡាញ់មនុស្សលោកខ្លាំងណាស់ ហេតុនេះហើយ បានជាព្រះអង្គប្រទានព្រះបុត្រាតែមួយរបស់ព្រះអង្គមក “…” ព្រះជាម្ចាស់បានចាត់ព្រះបុត្រារបស់ព្រះអង្គ ពុំមែនដើម្បីដាក់ទោសមនុស្សលោកទេ គឺដើម្បីសង្គ្រោះមនុស្សលោកវិញ”។

– ព្រះយេស៊ូពិតជាព្រះបុត្រានៃព្រះជាម្ចាស់។ ព្រះយេស៊ូមានព្រះហឫទ័យស្រឡាញ់យើង ដូចព្រះបិតាស្រឡាញ់យើងដែរ។ ព្រះយេស៊ូសព្វព្រះហឫទ័យជាប់លើឈើឆ្កាង ដើម្បីប្រទានព្រះជន្មផ្ទាល់របស់ព្រះអង្គឱ្យយើង។

– ប្រសិនបើយើងជឿសង្ឃឹមលើព្រះយេស៊ូ ព្រះអង្គមុខជានឹងប្រោសយើងឱ្យរួចពីទីងងឹត គឺរួចពីសេចក្ដីអាក្រក់ ទ្រង់ក៏នឹងប្រោសឱ្យយើងរស់ទីភ្លឺ និងឱ្យប្រព្រឹត្ដតាមព្រះហឫទ័យព្រះបិតាពុំខាន។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គមានព្រះហប្ញទ័យមេត្តាករុណាចំពោះមនុស្សលោក សូម្បីតែមនុស្សបាប ក៏ព្រះអង្គអាណិតដែរ។ យើងខ្ញុំគ្មានអ្វីតបស្នងព្រះគុណព្រះអង្គ ក្រៅពីផ្ញើជីវិតទាំងស្រុងទៅលើព្រះហប្ញទ័យស្រឡាញ់របស់ព្រះអង្គ។ យើងខ្ញុំសូមថ្វាយកាយ វាចា ចិត្ត រួមជាមួយសក្ការបូជារបស់ព្រះយេស៊ូគ្រីស្ត ដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ធម៌លើកតម្កើង កាលណាអានព្រះគម្ពីរដំណឹងល្អតាមសន្តៈយ៉ូហាន ៩,១-៤១

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! យើងខ្ញុំសូមលើកតម្កើងសិរីរុងរឿងព្រះអង្គ និងសូមអរព្រះគុណព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ គឺព្រះគ្រីស្តនេះហើយដែលជាពន្លឺដ៏ពិតប្រាកដ ទ្រង់បំភ្លឺចិត្តគំនិតយើងខ្ញុំ ដោយប្រោសយើងខ្ញុំឱ្យមានជំនឿ ទ្រង់ណែនាំមនុស្សលោកឱ្យចេញផុតពីភាពងងឹត ដើរឆ្ពោះទៅរកព្រះអង្គ។ ទ្រង់បង្ហាញសេចក្តីស្រឡាញ់របស់ព្រះអង្គចំពោះអ្នកបាប ហើយប្រោសអស់អ្នកជឿឱ្យទៅជាបុត្រធីតាព្រះអង្គផង។
អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់អ្នកដែលលើកតម្កើងសិរីរុងរឿងរបស់ព្រះអង្គ ទាំងនៅស្ថានបរមសុខ ទាំងនៅលើផែនដី ដោយប្រកាសថា៖ “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គពិតជាពន្លឺដែលបំភ្លឺមនុស្សគ្រប់ជាតិ គ្រប់សាសន៍។ សូមទ្រង់ព្រះមេត្តាប្រោសពង្រឹងជំនឿរបស់យើងខ្ញុំ ដែលទើបទទួលព្រះកាយ និងព្រះលោហិតព្រះបុត្រាព្រះអង្គ។ សូមបំភ្លឺចិត្តគំនិតយើងខ្ញុំ ឱ្យយល់អំពីធម៌មេត្តាករុណារបស់ព្រះអង្គ និងស្រឡាញ់អ្នកដទៃតាមរបៀបព្រះអង្គផង។