លោកយ៉ូហានជាកូនលោកសេបេដេ និងជាកូនសិស្សលោកយ៉ូហាបាទីស្ត។ ព្រះយេស៊ូ​ត្រាស់ហៅលោកជាមួយលោកយ៉ាកុបជាបងប្អូន និងជាមួយលោកសិលា ឱ្យដើរតាមព្រះអង្គមុនគេ។ ព្រះអង្គក៏ជ្រើសរើសលោក និងសាវ័កទាំងពីរនាក់នោះឱ្យធ្វើជាសាក្សីពិសេស នៅពេលព្រះអង្គសម្តែងសិរីរុងរឿង និងនៅពេលព្រះអង្គអធិដ្ឋានទាំងព្រួយបារម្ភនៅសួនឧទ្យាន កេតសេម៉ានី។ លោកយ៉ូហាន “សាវ័កដែលព្រះយេស៊ូស្រឡាញ់”។ នៅពេលព្រះយេស៊ូជាប់នៅលើឈើឆ្កាង ព្រះអង្គបានផ្ញើព្រះមាតាឱ្យលោកថែរក្សា។ នៅពេលលោករត់ទៅផ្នូរជាមួយលោកសិលា លោក “ឃើញហើយជឿ”។ លោកនិពន្ធគម្ពីរដំណឹងល្អ លិខិតបីច្បាប់ និងវិវរណៈ។ ក្នុងកណ្ឌគម្ពីរទាំងនេះលោកយ៉ូហាន​ចង់សម្តែងការអាថ៌កំបាំងដ៏អស្ចារ្យរបស់ព្រះយេស៊ូ ដែលជាព្រះបន្ទូលរបស់ព្រះជាម្ចាស់ ហើយដែលប្រទានជីវិតដ៏ពេញលេញឱ្យមនុស្សលោក។ លោកក៏រំឭកអំពីវិន័យថ្មីរបស់ព្រះអង្គដែរ។ មានតែសេចក្តីស្រឡាញ់របស់អស់អ្នកជឿទេ ដែលជាសញ្ញាសម្គាល់បញ្ជាក់ថា ព្រះយេស៊ូពិតជាព្រះសង្គ្រោះរបស់មនុស្សលោកមែន។

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យសម្តែងការអាថ៌កំបាំងដ៏អស្ចារ្យនៃព្រះបន្ទូលព្រះអង្គឱ្យមនុស្សលោកស្គាល់ ដោយសារគ្រីស្តទូតយ៉ូហាន។ យើងខ្ញុំសូមអរព្រះគុណព្រះអង្គ។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំឱ្យយល់ និងគោរពការអស្ចារ្យ ទាំងនោះផង។

អត្ថបទទី១៖ សូមថ្លែងលិខិតទី១ របស់គ្រីស្តទូតយ៉ូហាន ១យហ ១,១-៤

ព្រះបន្ទូលដែលផ្តល់ជីវិត គង់នៅកាលពីដើមដំបូងបង្អស់។ យើងបានឮព្រះបន្ទូលនេះ បានឃើញផ្ទាល់នឹងភ្នែក បានរំពឹងគិត និងបានពាល់ដោយដៃយើងផ្ទាល់ (ដ្បិតជីវិតនេះ បានលេចមកឱ្យយើងឃើញ ហើយយើងសូមផ្តល់សក្ខីភាព និងសូមជូនដំណឹងមកបងប្អូនអំពីជីវិតអស់កល្បជានិច្ច ដែលបែរទៅរកព្រះបិតា និងលេចមកឱ្យយើងឃើញ។ យើង​សូមជូនដំណឹងអំពីព្រះបន្ទូល ដែលយើងបានឃើញ និងបានឮនោះដល់បងប្អូន ដើម្បី​ឱ្យបងប្អូនបានចូលរួមរស់ជាមួយយើង។ រីឯយើងវិញ យើងក៏រួមរស់ជាមួយព្រះបិតា និងជាមួយព្រះយេស៊ូគ្រីស្តដែលជាព្រះបុត្រារបស់ព្រះអង្គ។ យើងសរសេរសេចក្តីទាំងនេះ​មកជូនបងប្អូន ដើម្បីឱ្យយើងមានអំណរពេញលក្ខណៈ។

ទំនុកតម្កើងលេខ ៩៧ (៩៦) ,១-២.៥-៦.១១-១២ បទពាក្យ ៧

ពិធីអបអរសាទរព្រះគម្ពីរដំណឹងល្អតាម យហ ២១,២៤

អាលេលូយ៉ា! អាលេលូយ៉ា!
លោកយ៉ូហានជាសាវ័កដ៏ជាទីស្រឡាញ់បានផ្តល់សក្ខីភាពអំពីព្រះបន្ទូលដែលផ្តល់ជីវិត យើងដឹងថា សក្ខីភាពនេះពិតប្រាកដមែន។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ២០,២-៨

ព្រឹកថ្ងៃបុណ្យចម្លង នាងម៉ារីជាអ្នកស្រុកម៉ាដាឡា រត់មកជម្រាបលោកស៊ីម៉ូសិលា និងសាវ័កម្នាក់ទៀតដែលព្រះយេស៊ូស្រឡាញ់ថា៖ «គេយកព្រះអម្ចាស់ចេញពីផ្នូរបាត់ យើងមិនដឹងជាគេយកទៅដាក់នៅឯណាឡើយ!»។ លោកសិលា និងសាវ័កម្នាក់ទៀតនោះក៏ចេញទៅផ្នូរ។ សាវ័កទាំងពីររត់ទៅជាមួយគ្នា តែសាវ័កម្នាក់នោះរត់លឿនជាងលោកសិលា ទៅដល់ផ្នូរមុន។ គាត់ឈ្ងោកមើលឃើញសំពត់ស្នប តែគាត់មិនបានចូលទៅក្នុងផ្នូរឡើយ។ លោកស៊ីម៉ូនសិលាដែលរត់តាមក្រោយក៏មកដល់ គាត់ចូលទៅក្នុងផ្នូរ ហើយសម្លឹងមើល៍សំពត់ស្នបនៅទីនោះ ព្រមទាំងក្រណាត់ដែលគេគ្របព្រះសិរសាព្រះអង្គមូរទុកដោយឡែក គឺមិននៅជាមួយសំពត់ស្នបទេ។ ពេលនោះ សាវ័កដែលទៅដល់ផ្នូរមុន ក៏ចូលទៅខាងក្នុងដែរ។ គាត់បានឃើញ ហើយជឿ។

ឬសូមថ្លែងព្រះគម្ពីរដំណឹងល្អតាមសន្តយ៉ូហាន យហ ២១,២០-២៤

លោកសិលាងាកមើលក្រោយ ឃើញសាវ័កដែលព្រះយេស៊ូស្រឡាញ់ដើរតាមមកដែរ។ សាវ័កនោះហើយដែលបានឱនទៅជិតព្រះឱរារបស់ព្រះយេស៊ូនៅពេលជប់លៀង ហើយ​ទូលព្រះអង្គថា៖ «បពិត្រព្រះអម្ចាស់! តើនរណានាំគេមកចាប់ព្រះអង្គ?»។ កាលលោកសិលាឃើញគាត់ លោកទូលព្រះយេស៊ូថា៖ «ព្រះអម្ចាស់អើយ! រីឯអ្នកនោះវិញ តើនឹងមានកើតអ្វីដល់គាត់?»។ ព្រះយេស៊ូមានព្រះបន្ទូលតបទៅគាត់ថា៖ «ប្រសិនបើខ្ញុំចង់ឱ្យគាត់មានជីវិតរស់រហូតដល់ខ្ញុំត្រឡប់មកវិញ តើនឹងកើតអំពល់អ្វីដល់អ្នក?។ រីឯអ្នកសុំអញ្ជើញមកតាមខ្ញុំ!»។ តាំងពីពេលនោះមក មានលេចឮពាក្យក្នុងចំណោមពួកបងប្អូនថា សាវ័កនោះមិនត្រូវស្លាប់ទេ។ តាមពិត ព្រះយេស៊ូពុំបានប្រាប់លោកសិលាថា សាវ័កនោះមិនត្រូវស្លាប់ឡើយ ព្រះអង្គគ្រាន់តែមានព្រះបន្ទូលថា៖ «ប្រសិនបើខ្ញុំចង់ឱ្យគាត់មានជីវិតរស់រហូតដល់ខ្ញុំត្រឡប់មកវិញ តើនឹងកើតអំពល់អ្វីដល់អ្នក?» សាវ័កនោះហើយដែលបានផ្តល់សក្ខីភាពអំពីហេតុការណ៍ទាំងអស់នេះ ព្រមទាំងបានកត់ត្រាទុកមកផង។ យើងដឹងថា សក្ខីភាពរបស់គាត់ពិតជាត្រឹមត្រូវមែន។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ដោយព្រះយេស៊ូប្រសូតជាមនុស្ស ព្រះអង្គបានសម្តែងព្រះបន្ទូលព្រះអង្គឱ្យយើងខ្ញុំស្គាល់។ សូមទ្រង់ព្រះមេត្តាទទួលសក្ការបូជា ដែលយើងខ្ញុំសូមថ្វាយព្រះអង្គនៅថ្ងៃគោរពសន្តយ៉ូហាន។ ក្នុងអភិបូជានេះ សូមប្រោសយើងខ្ញុំឱ្យចូលរួម ជាមួយព្រះយេស៊ូ ជាព្រះបន្ទូលដែលប្រទានជីវិតដ៏ពិតប្រាកដ ជាព្រះគ្រីស្តដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! យើងខ្ញុំសូមអរព្រះគុណព្រះអង្គ។ ក្នុងអភិបូជានេះ ព្រះអង្គបានប្រទានព្រះកាយនៃព្រះបន្ទូលដែលប្រសូតជាមនុស្សឱ្យយើងខ្ញុំ ដូចសន្តយ៉ូហានបង្រៀនយើងខ្ញុំ។ សូមព្រះអង្គប្រទានព្រះបន្ទូលដែលផ្តល់ជីវិតឱ្យស្ថិតនៅក្នុងចិត្តយើងខ្ញុំ អស់កល្បជានិច្ចផង។