ថ្ងៃអាទិត្យ ទី១៨ ខែធ្នូ ឆ្នាំ២០២២

ព្រះយេស៊ូមានរូបរាង មានសាច់ឈាមជាមនុស្សដូចយើងរាល់គ្នាបេះបិទ។ ព្រះអង្គជាប់ព្រះរាជវង្សានុវង្សរបស់ព្រះបាទដាវីឌ។ កាលពីដើមព្រះជាម្ចាស់មានព្រះបន្ទូលសន្យាថានឹងចាត់ “ព្រះគ្រីស្ត” ជាស្តេចមួយអង្គដែលយាងមករំដោះប្រជាជនអ៊ីស្រាអែលឱ្យរួចពីខ្មាំង សត្រូវ។ យើងជឿថា ព្រះយេស៊ូពិតជាព្រះគ្រីស្តនោះមែន ទ្រង់រំដោះមនុស្សលោកឱ្យបានរួចពីសេចក្តីអាក្រក់គ្រប់យ៉ាង។ ជនជាតិយូដាស្មានថា ព្រះគ្រីស្តមុខជានឹងយាងមកប្រកបដោយសិរីរុងរឿង និងប្រព្រឹត្តការអស្ចារ្យ ទាំងរំដោះប្រជាជនគេដោយឫទ្ធិបារមីគួរឱ្យស្ញែងខ្លាច។ ផ្ទុយទៅវិញ ព្រះយេស៊ូយាងមករួមរស់ជាមួយមនុស្សយើងដូចមនុស្សធម្មតា ព្រះអង្គធ្វើឱ្យជីវិតមនុស្សយើងទទួលតម្លៃដ៏ថ្លៃប្រសើរផង។
នាងម៉ារី និងលោកយ៉ូសែបជាតំណាងប្រជាជនអ៊ីស្រាអែលទាំងមូលដែលរង់ចាំព្រះគ្រីស្ត។ អ្នកទាំងពីរបានទទួលព្រះអង្គដោយចិត្តស្មោះ។

អត្ថបទទី១៖ សូមថ្លែងព្រះគម្ពីរព្យាការីអេសាយ អស ៧,១០-១៦

ព្រះអម្ចាស់ចាត់លោកអេសាយឱ្យទៅទូលព្រះបាទអខាសថា៖«ព្រះករុណាត្រូវទូលសុំព្រះអម្ចាស់ជាព្រះរបស់ព្រះករុណាសម្តែងនូវទីសម្គាល់មួយ ទោះបីនៅលើភ្នំក្តី ឬនៅក្នុងទីដ៏ជ្រៅក្តី ដើម្បីបញ្ជាក់ថា ព្រះអង្គពិតជាគង់នៅជាមួយព្រះករុណា»។ ព្រះបាទអខាសមានរាជឱង្ការតបមកវិញថា៖«ទេ! យើងមិនទូលសូមអ្វីជាដាច់ខាត យើងមិនព្រមល្បងលឫទ្ធានុភាពរបស់ព្រះអម្ចាស់ទេ!»។ ព្យាការីអេសាយទូលព្រះរាជាថា៖«បពិត្រព្រះរាជ្យវង្សរបស់ព្រះបាទដាវីឌ សូមទ្រង់ព្រះសណ្តាប់ទូលបង្គំ! ព្រះអង្គមិនត្រឹមតែធ្វើឱ្យមនុស្ស​ណាយចិត្តប៉ុណ្ណោះទេ គឺថែមទាំងធ្វើឱ្យព្រះរបស់ទូលបង្គំណាយព្រះហឫទ័យទៀតផង។ ហេតុនេះ ព្រះអម្ចាស់ផ្ទាល់នឹងប្រទានទីសម្គាល់មួយដល់អ្នករាល់គ្នា។ មើល! យុវនារីមានផ្ទៃពោះ នាងនឹងប្រសូត្របានបុត្រមួយ ហើយថ្វាយព្រះនាមបុត្រនោះថា “អេម៉ានូអែល” (ឈ្មោះនេះមានន័យថា “ព្រះជាម្ចាស់គង់ជាមួយយើង)”។ បុត្រនោះនឹងសោយតែទឹកដោះនិងទឹកឃ្មុំ រហូតដល់ពេលចេះបដិសេធអ្វីៗដែលអាក្រក់ ហើយចេះជ្រើសយកអ្វីៗដែលល្អវិញ។​ ក៏ប៉ុន្តែ មុនពេលបុត្រនោះចេះបដិសេធអ្វីៗដែលអាក្រក់ ហើយចេះជ្រើសរើសយកអ្វីៗដែលល្អ ស្រុករបស់ស្តេចទាំងពីរដែលមកបំភ័យព្រះករុណានោះ នឹងត្រូវគេបោះបង់ចោលឱ្យនៅស្ងាត់ជ្រងំ»។

ទំនុកតម្កើងលេខ ២៤ (២៣), ១-៦ បទពាក្យ ៧

អត្ថបទទី២៖ សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងរ៉ូម រម ១,១-៧

ខ្ញុំប៉ូល ជាអ្នកបម្រើរបស់ព្រះគ្រីស្តយេស៊ូ សូមជម្រាបមកបងប្អូនទាំងអស់នៅក្រុងរ៉ូមជាអ្នកដែលព្រះជាម្ចាស់ស្រឡាញ់ និងត្រាស់ហៅឱ្យធ្វើជាប្រជាជនដ៏វិសុទ្ធ។ ព្រះជាម្ចាស់ត្រាស់ហៅខ្ញុំឱ្យធ្វើជាគ្រីស្តទូត និងជ្រើសរើសខ្ញុំឱ្យប្រកាសដំណឹងល្អរបស់ព្រះអង្គ។ ក្នុងព្រះគម្ពីរ​ ព្រះ​​អង្គបានសន្យាទុកជាមុនតាមរយៈពួកព្យាការីរបស់ព្រះអង្គថា​ នឹងប្រទានដំណឹងល្អនេះអំពីព្រះបុត្រារបស់ព្រះអង្គ គឺអំពីព្រះយេស៊ូ​គ្រីស្តជាអម្ចាស់នៃយើង។ បើគិតជាមនុស្ស ព្រះ​យេស៊ូប្រសូត្រមកក្នុងព្រះរាជ្យវង្សរបស់ព្រះបាទដាវីឌ តែបើគិតជាព្រះវិញ្ញាណដែល​ផ្តល់​ឱ្យ​មនុស្សបានវិសុទ្ធវិញ ព្រះជាម្ចាស់បានតែងតាំងព្រះយេស៊ូជាព្រះបុត្រា​ប្រកបដោយ​ឫទ្ធានុភាពដោយប្រោសព្រះអង្គឱ្យទទួលព្រះជន្មថ្មី។ តាមរយៈព្រះបុត្រានេះ ព្រះជាម្ចាស់​បានប្រណីសន្តោសយើង និងប្រទានឱ្យយើងមានមុខងារជាគ្រីស្តទូត ដើម្បីនាំជាតិ​សាសន៍ទាំងអស់ប្រតិបត្តិតាមជំនឿសម្រាប់លើតម្កើងព្រះនាមព្រះអង្គ។ បងប្អូនដែល​​​ព្រះ​យេស៊ូ​គ្រីស្តបានត្រាស់ហៅ ក៏នៅក្នុងចំណោមជាតិសាសន៍ទាំងនោះដែរ។
សូមព្រះជាម្ចាស់ជាព្រះបិតារបស់យើង និងព្រះយេស៊ូគ្រីស្តជាអម្ចាស់ប្រណីសន្តោស និងប្រទានសេចក្តីសុខសាន្តដល់បងប្អូន!។

ពិធីអបអរសាទរព្រះគម្ពីរដំណឹងល្អតាម មថ ១,២៣

អលេលូយ៉ា! អាលេលូយ៉ា!
ស្ត្រីព្រហ្មចារីនឹងមានផ្ទៃពោះ នាងនឹងសម្រាលបានបុត្រមួយដែលគេនឹងថ្វាយព្រះនាមថា “អេម៉ានូអែល” គឺព្រះជាម្ចាស់គង់ជាមួយយើង”។អាលេលូយ៉ា!

សូមថ្លែងព្រះគម្ពីរដំណឹងល្អតាមសន្ដម៉ាថាយ មថ ១,១៨-២៤

ព្រះយេស៊ូគ្រីស្តប្រសូតដូចតទៅ។ នាងម៉ារី មាតារបស់ព្រះអង្គត្រូវជាគូរដណ្តឹងរបស់លោកយ៉ូសែប។ មុនពេលអ្នកទាំងពីររួមរស់ជាមួយគ្នា នាងម៉ារីមានផ្ទៃពោះដោយសារព្រះវិញ្ញាណដ៏វិសុទ្ធរួចទៅហើយ។ លោកយ៉ូសែបជាស្វាមីរបស់នាង និងជាមនុស្សសុចរិត លោកមិនចង់បំបាក់មុខនាងទេ គឺលោកសម្រេចចិត្តថានឹងផ្តាច់ពាក្យដោយស្ងាត់ៗវិញ។ ពេលលោកកំពុងគិតដូច្នេះ ស្រាប់តែមានទេវទូតរបស់ព្រះអម្ចាស់មកប្រាប់លោកក្នុងសុបិននិមិត្តថា៖«លោកយ៉ូសែបជារាជវង្សរបស់ព្រះបាទដាវីឌអើយ! សូមកុំខ្លាចនឹងទទួលនាងម៉ារីមកធ្វើជាភរិយាឡើយ! ទោះបីបុត្រដែលនៅក្នុងផ្ទៃនាងកើតមកពីព្រះវិញ្ញាណដ៏វិសុទ្ធ ហើយនាងនឹងសម្រាលបានបុត្រមួយអង្គក្តី ក៏លោកត្រូវថ្វាយព្រះនាមថា “យេស៊ូ” ដ្បិតបុត្រនោះនឹងសង្គ្រោះប្រជារាស្ត្រព្រះអង្គឱ្យរួចពីបាប»។ ហេតុការណ៍នេះកើតឡើងដើម្បីឱ្យសេចក្តី​ដែលព្រះអម្ចាស់មានព្រះបន្ទូលតាមរយៈព្យាការីបានសម្រេចជារូបរាងថា៖ ស្រ្តីព្រហ្មចារីនឹងមានផ្ទៃពោះ នាងនឹងសម្រាលបានបុត្រមួយ ដែលគេនឹងថ្វាយព្រះនាមថា“ព្រះអេម៉ានូអែល”(ឈ្មោះនេះប្រែថា “ព្រះជាម្ចាស់គង់នៅជាមួយយើង)”។ លុះលោក​យ៉ូសែបភ្ញាក់ឡើង លោកក៏ធ្វើតាមបង្គាប់ទេវទូតរបស់ព្រះអម្ចាស់ គឺលោកទទួលនាងម៉ារីមកធ្វើជាភរិយា។