ថ្ងៃអាទិត្យ ទី២២ ខែមិថុនា ឆ្នាំ២០២៥

ពាក្យអធិដ្ឋាននៅពេលចូល

បពិត្រព្រះយេស៊ូគ្រីស្ដជាព្រះអម្ចាស់! ព្រះអង្គបានប្រទានសញ្ញានៃព្រះកាយព្រះអង្គ ទុកជាការនឹករឭកពីទុក្ខលំបាករបស់ព្រះអង្គ។ សូមទ្រង់ព្រះមេត្ដាប្រោសយើងខ្ញុំឱ្យយកចិត្ដទុកដាក់គោរពអគ្គសញ្ញាដ៏ប្រសើរឧត្ដមនេះ និងទទួលស្គាល់សេចក្ដីស្រឡាញ់ដ៏លើស លប់របស់ព្រះអង្គផង!។ ព្រះអង្គមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

អត្ថបទទី១៖ សូមថ្លែងព្រះគម្ពីរកំណើត កណ ១៤,១៨-២០

ពេលនោះ លោកអប្រាហាំត្រឡប់មកពីវាយឈ្នះស្ដេចបួនអង្គ។ ព្រះបាទ មែលគីសេដែក ​ជាមហាក្សត្រនៅក្រុងសាឡឹម ឱ្យគេយកនំប៉័ង និងស្រាទំពាំងបាយជូរមកជូនលោកអប្រាហាំ។ ស្ដេចនោះជាបូជាចារ្យរបស់ព្រះដ៏ខ្ពង់ខ្ពស់​បំ​ផុត។ ទ្រង់ប្រទានពរលោកអប្រាហាំថា៖ «សូមព្រះដ៏ខ្ពង់ខ្ពស់បំផុត ដែលបាន​ប​ង្កើតផ្ទៃមេឃ និងផែនដីប្រទានពរដល់លោកអប្រាហាំ សូមលើកតម្កើងព្រះដ៏ខ្ពង់ខ្ពស់បំផុត ដែលបានប្រគល់ខ្មាំងសត្រូវទាំងឡាយមកក្នុងកណ្ដាប់​ដៃ​រប​ស់​លោក!»។ លោកអប្រាហាំយកអ្វីៗទាំងអស់ដែលលោករឹបអូស​បានមកថ្វាយ​ព្រះ​បាទមែលគីសេដែកមួយភាគដប់។

ទំនុកតម្កើងលេខ ១១០ (១០៩), ១-៤ បទកាកគតិ

អត្ថបទទី២៖ សូមថ្លែងលិខិតទី ១ របស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូរិនថូស ១ករ ១១,២៣-២៦

បងប្អូនជាទីស្រឡាញ់!
ខ្ញុំប៉ូល ខ្ញុំបានជម្រាបជូនបងប្អូននូវសេចក្ដីដែលខ្ញុំបាន​ទទួលពីព្រះអម្ចាស់មកថា​ នៅយប់ដែលព្រះអម្ចាស់យេស៊ូត្រូវគេចាប់បញ្ជូន​ទៅ​ឆ្កា​ង ព្រះអង្គយកនំប័ុងមកកាន់ ទ្រង់អរព្រះគុណព្រះជាម្ចាស់ ហើយកាច់​នំ​ប័ុង​នោះទាំងមានព្រះបន្ទូលថា៖ «នេះជារូបកាយរបស់ខ្ញុំ ដែលត្រូវបូជាសម្រាប់អ្នក​រាល់គ្នា។ ចូរធ្វើដូច្នេះដើម្បីនឹករឭកដល់ខ្ញុំ»។ លុះជប់លៀងរួចហើយ ព្រះអ​ង្គ​ធ្វើតាមរបៀបដដែល ទ្រង់យក​ពែងមកកាន់ ទាំងមានព្រះបន្ទូលថា៖«នេះជា​ពែ​ង​នៃសម្ពន្ធមេត្រីថ្មី ចងឡើងដោយលោហិតរបស់ខ្ញុំ។ គ្រប់ពេលដែលអ្នករាល់​គ្នា​​ពិសា ចូរធ្វើដូច្នេះ ដើម្បីនឹករឭកដល់ខ្ញុំ»។ រៀងរាល់ពេលដែលបងប្អូន​ពិ​សា​​នំ​ប័ុ​ង និងពិសាពីពែងនេះ បងប្អូនប្រកាសថា ព្រះអម្ចាស់សោយទិវង្គត គឺប្រ​កាសរហូតដល់ព្រះអង្គយាងមកវិញ។

ពិធីអបអរសាទរព្រះគម្ពីរដំណឹងល្អតាម យហ ៦,៥១-៥២

សូមថ្លែងព្រះគម្ពីរដំណឹងល្អតាមសន្តលូកា លក ៩,១១-៥២

ព្រះយេស៊ូមានព្រះបន្ទូលអំពីព្រះរាជ្យរបស់ព្រះជាម្ចាស់ឱ្យបណ្ដាជនស្ដាប់ ព្រមទាំងប្រោសអ្នកជំងឺឱ្យបានជាផង។ ដល់ថ្ងៃជិតលិច សាវ័កទាំងដប់ពីរនាក់​ចូលទៅទូលព្រះអង្គថា៖ «សូមព្រះអង្គប្រាប់ឱ្យបណ្ដាជនចេញទៅរកម្ហូបអាហារ រកកន្លែងស្នាក់នៅតាមផ្ទះ តាមភូមិជិត ៗនេះទៅ ព្រោះទីនេះស្ងាត់ណាស់»។ ព្រះយេស៊ូមានព្រះបន្ទូលតបវិញថា៖«ចូរអ្នករាល់គ្នាយកម្ហូបអាហារឱ្យគេបរិភោគទៅ»។ ក្រុមសាវ័កទូលព្រះអង្គថា៖ «យើងខ្ញុំមាននំប័ុងតែប្រាំដុំ និងត្រី​ងៀតពីរកន្ទុយប៉ុណ្ណោះ! ធ្វើម្ដេចនឹងគ្រាន់! មានតែទៅទិញអាហារសម្រា​ប់​ប្រ​ជា​ជនទាំងនេះ!»។ នៅទីនោះ មានមនុស្សប្រុសប្រមាណប្រាំពាន់នាក់។ ព្រះយេស៊ូមានព្រះបន្ទូលទៅកាន់សាវ័កថា៖ «ចូរអ្នករាល់គ្នាប្រាប់ឱ្យគេអង្គុយចុះ​​ជាក្រុមៗ ក្នុងមួយក្រុមហាសិបនាក់»។ ក្រុមសាវ័កក៏ធ្វើតាម គឺប្រាប់គេឱ្យ​អ​ង្គុ​​យ​ចុះទាំងអស់គ្នា។ ព្រះយេស៊ូយក នំប័ុងទាំងប្រាំដុំ និងត្រីពីរកន្ទុយនោះមកកាន់ ទ្រង់ងើបព្រះភក្ត្រឡើងលើ លើកតម្កើងព្រះជាម្ចាស់ ហើយកាច់ប្រទានឱ្យសាវ័ក ដើម្បីឱ្យគេចែកបណ្ដាជនបរិភោគ។ គេបានបរិភោគឆ្អែតគ្រប់ៗគ្នា រួចប្រមូល​នំប័ុង​ដែលនៅសល់បានពេញដប់ពីរល្អី។

ពាក្យថ្វាយតង្វាយ

បពិត្រព្រះបិតា! ព្រះបុត្រាបានផ្ដាំឱ្យយើងខ្ញុំថ្វាយសក្ការបូជានេះ ដើម្បីនឹករឭកដល់ព្រះអង្គ! សូមទ្រង់ព្រះមេត្ដាប្រោសឱ្យព្រះសហគមន៍ព្រះអង្គចូលរួមជាព្រះកាយតែមួយផង! សូមបញ្ចូលយើងខ្ញុំក្នុងសក្ការបូជារបស់ព្រះយេស៊ូ ដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ធម៌លើកតម្កើង

បពិត្រព្រះបិតាដ៏វិសុទ្ធបំផុត ព្រះអង្គមានព្រះជន្មគង់នៅអស់កល្បជានិច្ច និងប្រកបដោយតេជានុភាពសព្វប្រការ! យើងខ្ញុំសូមលើកតម្កើងសិរីរុងរឿងរបស់ព្រះអង្គ ដោយរួមជាមួយព្រះយេស៊ូគ្រីស្តជាព្រះអម្ចាស់យើងខ្ញុំ។ នៅពិធីជប់លៀងចុងក្រោយបំផុត ព្រះយេស៊ូបានបូជាព្រះជន្មថ្វាយព្រះអង្គ ទុកជាកូនចៀមដ៏ឥតសៅហ្មង ព្រះអង្គក៏សព្វព្រះហប្ញទ័យទទួលសក្ការបូជានោះផង! ពេលយើងខ្ញុំចូលរួមក្នុងសក្ការបូជានោះ ព្រះអង្គប្រទានព្រះជន្មផ្ទាល់របស់ព្រះអង្គឱ្យយើងខ្ញុំ ដើម្បីឱ្យយើងខ្ញុំធ្វើជាសញ្ញាសម្គាល់បញ្ជាក់ថា មនុស្សគ្រប់ៗរូបអាចចូលរួមក្នុងមហាគ្រួសារតែមួយ មានជំនឿតែមួយ មានសេចក្តីស្រឡាញ់តែមួយ។ ហេតុនេះហើយ បានជាយើងខ្ញុំសូមចូលរួមជាមួយទេវទូត និងសន្តបុគ្គលទាំងឡាយ សូមលើកតម្កើងសិរីរុងរឿងរបស់ព្រះអង្គ ដោយសូរស័ព្ទតែមួយថា៖ «ព្រះដ៏វិសុទ្ធ!»

ពាក្យអរព្រះគុណ

បពិត្រព្រះអម្ចាស់ជាព្រះបិតា! ក្នុងអភិបូជានេះ ព្រះអង្គបានប្រោសយើងខ្ញុំឱ្យចូលរួមជាមួយព្រះបុត្រាដែលបានបូជាព្រះជន្ម និងដែលទទួលព្រះជន្មថ្មីដ៏រុងរឿង! សូមទ្រង់ព្រះមេត្ដាប្រោសប្រទានឱ្យគ្រីស្ដបរិស័ទទាំងឡាយ ចូលរួមក្នុងព្រះកាយតែមួយ ជាសញ្ញាសម្គាល់បញ្ជាក់ថា ព្រះអង្គស្រឡាញ់មនុស្សលោកផង។