ថ្ងៃអាទិត្យ ទី០៤ ខែមិថុនា ឆ្នាំ២០២៣

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យចាត់ព្រះយេស៊ូជាព្រះបុត្រាផ្ទាល់របស់ព្រះអង្គ ដើម្បីណែនាំយើងខ្ញុំឱ្យស្គាល់ព្រះអង្គ! ព្រះអង្គក៏សព្វព្រះហឫទ័យចាត់ព្រះវិញ្ញាណរបស់ព្រះអង្គ ដើម្បីឱ្យយើងខ្ញុំទៅជាបុត្រធីតារបស់ព្រះអង្គដែរ។ សូមទ្រង់ព្រះមេត្តាប្រោសប្រទានឱ្យយើងខ្ញុំ ស្គាល់ជម្រៅនៃសេចក្តីស្រឡាញ់របស់ព្រះអង្គ និងរស់នៅក្នុងលោកនេះឱ្យបានស្របតាមឋានៈរបស់ខ្លួនផង។

អត្ថបទទី១៖ សូមថ្លែងព្រះគម្ពីរដំណើរឆ្ពោះទៅកាន់សេរីភាព សរ ៣៤,៤-៦.៨-៩

លោកម៉ូសេក្រោកពីព្រលឹម ឡើងទៅលើភ្នំស៊ីណៃតាមបញ្ជារបស់ព្រះអម្ចាស់។ ព្រះអម្ចាស់យាងចុះមកក្នុងពពក ហើយគង់នៅទីនោះ ក្បែរលោកម៉ូសេទាំងប្រកាសព្រះនាមព្រះអម្ចាស់។ បន្ទាប់មក ព្រះអម្ចាស់ឆ្លងកាត់ពីមុខលោកម៉ូសេទាំងប្រកាសថា៖ «ព្រះអម្ចាស់! ព្រះអម្ចាស់! ព្រះអង្គប្រកបដោយព្រះហប្ញទ័យអាណិតអាសូរ និងប្រណីសន្តោស! ព្រះអង្គមានព្រះហប្ញទ័យអត់ធ្មត់ ហើយពោរពេញទៅដោយព្រះហប្ញទ័យមេត្តាករុណា និងស្មោះស្ម័គ្រជានិច្ច»។ លោកម៉ូសេក្រាបថ្វាយបង្គំព្រះអម្ចាស់ភ្លាម។ លោកទូលថា៖ «បពិត្រព្រះអម្ចាស់! ប្រសិនបើព្រះអង្គគាប់ព្រះហប្ញទ័យនឹងទូលបង្គំមែន សូមព្រះអង្គយាងទៅជាមួយយើងខ្ញុំផង។ ប្រជាជនទាំងនេះជាមនុស្សរឹងរូសមែន! ប៉ុន្តែ ព្រះអង្គមុខជានឹងអត់ទោសចំពោះកំហុស និងអំពើបាបដែលយើងខ្ញុំប្រព្រឹត្ត។ ព្រះអង្គមុខជាទទួលយើងខ្ញុំធ្វើជាប្រជារាស្ត្រផ្ទាល់របស់ព្រះអង្គពុំខាន»។

ទំនុកតម្កើងរបស់លោកដានីអែល ៣,៥២-៥៦ បទកាកគតិ

អត្ថបទទី២៖ សូមថ្លែងលិខិតទី២របស់គ្រីស្តទូតប៉ូលផ្ញើជូនគ្រីស្តបរិស័ទក្រុងកូរិនថូស ២ករ ១៣,១១-១៣

បងប្អូនជាទីស្រឡាញ់!
ចូរមានអំណរឡើង ចូរខំប្រឹងឱ្យបានគ្រប់លក្ខណៈ ចូរលើកទឹកចិត្តគ្នាទៅវិញទៅមក ចូរមានចិត្តគំនិតតែមួយ ចូររស់នៅដោយសុខសាន្តជាមួយគ្នា នោះព្រះជាម្ចាស់ដែលជាប្រភពនៃសេចក្តីស្រឡាញ់ និងនៃសេចក្តីសុខសាន្ត មុខជាគង់ជាមួយបងប្អូនមិនខាន។ ចូរជម្រាបសួរគ្នាទៅវិញទៅមកដោយស្និទ្ធស្នាលផង។ ជនដ៏វិសុទ្ធទាំងអស់ក៏សូមជម្រាបសួរមកបងប្អូនដែរ។ សូមឱ្យបងប្អូនទាំងអស់គ្នា បានប្រកបដោយព្រះហប្ញទ័យប្រណីសន្តោសរបស់ព្រះយេស៊ូគ្រីស្តជាអម្ចាស់ សូមឱ្យបងប្អូនបានប្រកបដោយសេចក្តីស្រឡាញ់របស់ព្រះជាម្ចាស់ សូមឱ្យបងប្អូនរួមរស់ជាមួយគ្នាដោយព្រះវិញ្ញាណដ៏វិសុទ្ធផង។

ពិធីអបអរសាទរព្រះគម្ពីរដំណឹងល្អតាម វវ ១,៨

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ៣,១៦-១៨

ព្រះជាម្ចាស់ស្រឡាញ់មនុស្សលោកខ្លាំងណាស់ ហេតុដូច្នេះហើយ បានជាព្រះអង្គប្រទានព្រះបុត្រាតែមួយរបស់ព្រះអង្គមក ដើម្បីឱ្យអស់អ្នកដែលជឿលើព្រះបុត្រាមានជីវិតអស់កល្បជានិច្ច គឺមិនឱ្យគេវិនាសឡើយ។ ព្រះជាម្ចាស់ចាត់ព្រះបុត្រារបស់ព្រះអង្គឱ្យយាង​មកក្នុងលោកនេះ ពុំមែនដើម្បីដាក់ទោសមនុស្សលោកទេ គឺដើម្បីសង្គ្រោះមនុស្សលោកដោយសារព្រះបុត្រាវិញ។ អ្នកជឿលើព្រះបុត្រាមិនត្រូវទទួលទោសទេ។ រីឯអ្នកមិនព្រមជឿទទួលទោសរួចស្រេចទៅហើយ ព្រោះគេពុំបានជឿលើព្រះនាមព្រះបុត្រាតែមួយរបស់ព្រះជាម្ចាស់។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គបានចាត់ព្រះបុត្រាព្រះអង្គ ដើម្បីឱ្យអស់អ្នកជឿលើព្រះបុត្រាទទួលការសង្គ្រោះ។ យើងគ្មានអ្វីតបស្នងព្រះគុណព្រះអង្គទេ ហើយសូមយកកាយ វាចា ចិត្ដ ថ្វាយរួមនឹងសក្ការបូជារបស់ព្រះយេស៊ូគ្រីស្ដ ជាព្រះបុត្រាព្រះអង្គ និងជាអម្ចាស់យើងខ្ញុំ។

ធម៌លើកតម្កើង

បពិត្រព្រះអម្ចាស់ជាព្រះបិតាដ៏វិសុទ្ធ ជាព្រះដ៏មានព្រះជន្មគង់នៅអស់កល្បជានិច្ច ហើយដែលមានតេជានុភាពសព្វប្រការ! យើងខ្ញុំសូមលើកតម្កើងសិរីរុងរឿងរបស់ព្រះអង្គ រួមជាមួយព្រះបុត្រា និងព្រះវិញ្ញាណជាព្រះត្រៃឯងតែមួយ ដែលបំបែកគ្នាពុំបាន។ ព្រះអង្គចាត់ព្រះបុត្រាឱ្យយាងមក បង្ហាញសេចក្ដីស្រឡាញ់ដ៏លើសលប់របស់ព្រះអង្គចំពោះយើងខ្ញុំ! ព្រះអង្គបានប្រទានវិញ្ញាណព្រះអង្គ ឱ្យយើងខ្ញុំទៅជាបុត្រធីតារបស់ព្រះអង្គ។ អាស្រ័យហេតុនេះហើយ បានជាយើងខ្ញុំសូមចូលរួមជាមួយទេវទូត និងសន្ដបុគ្គលទាំងឡាយ សូមលើកតម្កើងសិរីរុងរឿងរបស់ព្រះអង្គ ដោយសូរស័ព្ទតែមួយថា៖ «ព្រះដ៏ វិសុទ្ធ»…។

ពាក្យអរព្រះគុណ

បពិត្រព្រះបិតាប្រកបដោយធម៌មេត្ដាករុណាយ៉ាងក្រៃលែង! ព្រះអង្គសព្វព្រះហឫទ័យប្រទានព្រះកាយនៃព្រះបុត្រាព្រះអង្គឱ្យយើងខ្ញុំជាបុត្រធីតាព្រះអង្គ។ ព្រះអង្គបានប្រទានព្រះវិញ្ញាណព្រះអង្គដើម្បីណែនាំយើងខ្ញុំសព្វថ្ងៃនេះ។ សូមទ្រង់ព្រះមេត្ដាប្រោសយើងខ្ញុំឱ្យស្គាល់ព្រះអង្គកាន់តែច្បាស់ឡើងៗ និងរស់នៅតាមជំនឿរបស់យើងខ្ញុំផង។