ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! យើងខ្ញុំជឿថា ព្រះយេស៊ូគ្រីស្តជាព្រះសង្គ្រោះរបស់មនុស្សលោក​គង់នៅ​ជា​មួយ​ព្រះអង្គ ទាំងប្រកប​ដោយសិរីរុងរឿង។ យើងខ្ញុំក៏ជឿជាក់ថា ព្រះគ្រីស្តស្ថិតនៅជាមួយយើងខ្ញុំសព្វថ្ងៃនេះ រហូត​ដល់​អវសានកាលនៃពិភពលោកដែរ។ សូមព្រះ​អង្គទ្រង់ព្រះមេត្តាប្រោសយើងខ្ញុំឱ្យធ្វើជាសាក្សីពីព្រះគ្រីស្តនេះផង។

អត្ថបទទី១៖ សូមថ្លែងព្រះគម្ពីរកិច្ចការរបស់គ្រីស្តទូត កក ៧,៥៥-៦០

ពេលនោះ គេចាប់លោកស្ទេផាន។ លោកពោរពេញដោយព្រះវិញ្ញាណដ៏វិសុទ្ធ។ លោកសម្លឹង​មើល​ទៅលើ​មេ​ឃ​​ ឃើញសិរីរុងរឿងរបស់ព្រះជាម្ចាស់ និងឃើញព្រះយេស៊ូឈរនៅខាងស្តាំព្រះអង្គ។ លោកមាន​ប្រសាសន៍​ថា៖​ «មើល​ហ្ន៎!​ ខ្ញុំឃើញផ្ទៃមេឃបើកចំហ និងឃើញបុត្រមនុស្សឈរនៅខាងស្តាំព្រះជាម្ចាស់»។ ពួកគេស្រែកឡើងយ៉ាងខ្លាំង ទាំង​​យកដៃ​ខ្ទប់ត្រចៀក ហើយនាំគ្នាស្ទុះទៅសង្គ្រុបពីលើលោក។ គេបណ្តេញលោកចេញពីទីក្រុង រួចយកដុំថ្ម​គប់​សម្លាប់​លោក។ ពួកអ្នកដែលជាសាក្សីបានយកសម្លៀកបំពាក់របស់ខ្លួន ទៅ​ទុកនៅ​ក្បែរ​ជើង​យុវជន​ម្នាក់​ឈ្មោះ​សូល។ ​នៅពេលគប់ដុំថ្មសម្លាប់នោះ លោកស្ទេផានទូលអង្វរថា៖ «ឱព្រះអម្ចាស់យេស៊ូអើយ! សូមទទួល វិញ្ញាណរបស់​ទូល​បង្គំ​ផង!»។ បន្ទាប់មក លោកលុតជង្គង់ចុះ ហើយបន្លឺសំឡេងខ្លាំងៗថា៖ «ឱព្រះអម្ចាស់អើយ! សូមកុំប្រកាន់​ទោស​គេ​​​ ព្រោះតែអំពើបាបនេះធ្វើអ្វី»។ កាលបានទូលដូច្នោះហើយ លោកក៏ផុតដង្ហើមទៅ។

ទំនុកតម្កើងលេខ ៩៧ (៩៦), ១-២.៦-៧.៩ បទពាក្យ ៧

អត្ថបទទី២៖ សូមថ្លែងព្រះគម្ពីរវិវរណៈ វវ ២២,១២-១៤.១៦-២០ (ឬយ៉ាងខ្លី ២២,១២-១៤.១៦-១៧)

ខ្ញុំយ៉ូហាន ឮព្រះសូរសៀងប្រាប់ខ្ញុំថា៖ «យើងនឹងមកដល់ក្នុងពេលឆាប់ៗ ទាំងយករង្វាន់មកចែក​ឱ្យម្នាក់ៗ​តាម​អំពើដែលខ្លួនបានប្រព្រឹត្ត។ យើងជាអាល់ផា និងជាអូមេកា នៅមុនគេ និងនៅក្រោយគេបំផុត ជាដើមដំបូង​ និង​ជា​ចុងបង្អស់។ អ្នកណាបោកអាវវែងរបស់ខ្លួនបានស្អាត អ្នកនោះមានសុភមង្គលហើយ! គេនឹងមានសិទ្ធិបេះផ្លែពី​ដើម​ឈើដែលផ្តល់ជីវិត ព្រមទាំងចូលទៅក្នុងក្រុងតាមទ្វារ​ផង។ យើងយេស៊ូ យើងបានចាត់ទេវទូតរបស់​យើងឱ្យ​មក​បញ្ជាក់​​សេចក្តីទាំងនេះប្រាប់អ្នករាល់គ្នាអំពីព្រះសហគមន៍នានា។ យើងជាពន្លកដែល​ដុះចេញពី​ពូជ​ពង្ស​របស់​ព្រះ​បាទ​ដាវីឌ យើងជាផ្កាយព្រឹកដ៏ភ្លឺចិញ្ចែង»។
ព្រះវិញ្ញាណ និងភរិយាថ្មោងថ្មីពោលឡើងថា៖ «សូមព្រះអង្អយាងមក!»។ សូមឱ្យអស់អ្នកដែល​បានឮ​ពោល​ឡើងដែរថា៖ «សូមព្រះអង្គយាងមក!»។ អ្នកណាស្រេក សុំអញ្ជើញមក! អ្នកណាចង់បាន សុំអញ្ជើញមក​ទទួលទឹក​ដែល​ផ្តល់ជីវិត ដោយមិនបាច់បង់ថ្លៃ!។

ប្រសិនបើអានយ៉ាងខ្លី សូមឈប់ត្រឹមនេះ។
ខ្ញុំសូមបញ្ជាក់ប្រាប់អស់អ្នកដែលបានឮព្រះបន្ទូលថ្លែងទុកក្នុងសៀវភៅនេះថា បើនរណាម្នាក់បន្ថែម​អ្វី​មួយ​​ពីលើ ព្រះជាម្ចាស់នឹងយកគ្រោះ​កាចដែលមានរៀបរាប់ក្នុងសៀវភៅនេះ មកដាក់លើអ្នកនោះថែមទៀតផង ហើយ​ប្រ​សិនបើមាននរណាម្នាក់ដកហូតសេចក្តីណា​មួយពីព្រះបន្ទូលដែលមានថ្លែងទុកក្នុងសៀវភៅនេះ ព្រះជាម្ចាស់ក៏នឹង​ដកហូតចំណែកផ្លែរបស់ដើមឈើដែលផ្តល់ជីវិតពីអ្នកនោះដែរ ហើយមិន​ឱ្យគេចូលទៅក្នុងក្រុងដែលមាន​រៀប​រាប់​ក្នុងសៀវភៅនេះឡើយ។ ព្រះអង្គដែលបានបញ្ជាក់សេចក្តីទាំងនេះ ទ្រង់មាន​ព្រះ​បន្ទូលថា៖ «ពិតមែនហើយ យើង​នឹងមកដល់ក្នុងពេលឆាប់ៗ!»។ អាម៉ែន! ឱព្រះអម្ចាស់យេស៊ូអើយ! សូមព្រះអង្គយាងមក!។

ពិធីអបអរសាទរព្រះគម្ពីរដំណឹងល្អតាម យហ ១៤,១៨

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៧,២០-២៦

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គងើបព្រះភក្រ្ដទតទៅលើមេឃ ហើយមានព្រះបន្ទូលថា៖ «ទូលបង្គំមិនអង្វរព្រះអង្គឱ្យតែអ្នកទាំងនេះប៉ុណ្ណោះទេ គឺអង្វរឱ្យអស់អ្នកជឿលើទូលបង្គំ តាមរយៈពាក្យដែលអ្នកទាំងនេះថ្លែងប្រាប់ផង​ដែរ សូមឱ្យគេទាំងអស់គ្នារួមជាអង្គតែមួយ។ ឱព្រះបិតាអើយ! ព្រះ​អង្គ​ស្ថិតនៅជាប់នឹងទូលបង្គំ ហើយទូលបង្គំស្ថិតនៅជាប់នឹងព្រះអង្គយ៉ាងណា សូមឱ្យគេរួម​គ្នាជាអង្គតែមួយ​នៅក្នុង​យើង​យ៉ាងនោះដែរ ដើម្បីឱ្យមនុស្សលោកជឿថា ព្រះអង្គបានចាត់ទូលបង្គំឱ្យមកមែន។ រីឯសិរីរុង​រឿង​ដែលព្រះអង្គ​ប្រទាន​មក​ទូលបង្គំ ទូលបង្គំបានប្រគល់ឱ្យទៅគេហើយ ដើម្បីឱ្យគេរួមគ្នាជាអង្គតែមួយ ដូចយើងជាអង្គតែ​មួយដែរ ​គឺឱ្យ​ទូល​បង្គំ​នៅក្នុងគេ ហើយព្រះអង្គនៅក្នុងទូលបង្គំ ដើម្បីឱ្យគេរួមគ្នាជាអង្គតែមួយពិតប្រាកដមែន។ ដូច្នេះ មនុស្សលោក​ទទួល​ស្គាល់​ថា​ ព្រះអង្គបានចាត់ទូលបង្គំឱ្យមក ព្រមទាំងទទួលស្គាល់ថា ព្រះអង្គស្រឡាញ់គេ ដូចព្រះអង្គស្រឡាញ់ទូលបង្គំដែរ។ ឱព្រះបិតាអើយ! ទូលបង្គំចង់ឱ្យអស់អ្នកដែលព្រះអង្គប្រទានមកទូលបង្គំ បាននៅជាមួយទូលបង្គំ ឯ​កន្លែង​ដែលទូលបង្គំនៅនោះដែរ ដើម្បីឱ្យគេឃើញសិរីរុងរឿងដែលព្រះអង្គប្រទានមកទូលបង្គំ ព្រោះព្រះ​អង្គបាន​ស្រឡាញ់ទូលបង្គំតាំងពីមុនកំណើតពិភពលោកមកម្ល៉េះ។ ឱព្រះបិតាដ៏សុចរិតអើយ! មនុស្សលោកពុំបានស្គាល់​ព្រះ​អង្គ​ទេ រីឯទូលបង្គំវិញ ទូលបង្គំស្គាល់ព្រះអង្គ ហើយអ្នកទាំងនេះក៏ទទួលស្គាល់ថា ព្រះ​អង្គបាន​ចាត់​ទូល​បង្គំឱ្យមក​មែន។ ទូលបង្គំបានសម្តែងព្រះនាមព្រះអង្គឱ្យគេស្គាល់ ហើយទូលបង្គំនឹងសម្តែងឱ្យគេរឹតតែស្គាល់ថែមទៀត ដើម្បី​ឱ្យ​សេចក្តីស្រឡាញ់របស់ព្រះអង្គចំពោះទូលបង្គំ ស្ថិតនៅក្នុងគេ ហើយទូលបង្គំក៏ស្ថិតនៅក្នុងគេដែរ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះយេស៊ូអង្វរព្រះអង្គឱ្យយើងខ្ញុំ សូមឱ្យអស់អ្នកជឿរួបរួម​គ្នាជាអង្គតែមួយ​។​ ក្នុងអភិបូជានេះ យើងខ្ញុំនាំគ្នានឹករឭកដល់ព្រះយេស៊ូបូជាព្រះជន្ម ដើម្បីបង្រួបបង្រួមមនុស្សលោក។ សូមព្រះអង្គ​ទ្រង់​​​ព្រះសណ្តាប់ពាក្យអង្វររបស់ព្រះយេស៊ូដោយអនុគ្រោះផង។

ធម៌លើកតម្កើង

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! យើងខ្ញុំសូមលើក​តម្កើងសិរីរុង​រឿង​របស់ព្រះអង្គ ដោយរួមជាមួយព្រះគ្រីស្តជាអម្ចាស់យើងខ្ញុំ។ ព្រះគ្រីស្តប្រទាន​ជីវិតថ្មីឱ្យ​យើងខ្ញុំ​ដែល​ជឿ​សង្ឃឹម​លើ​​ព្រះ​អង្គ។ ទ្រង់បង្រួបបង្រួមមនុស្សគ្រប់ជាតិសាសន៍ឱ្យចូលក្នុងព្រះសហគមន៍តែមួយ។ ព្រះសហគមន៍​ក៏ទទួល​ឫទ្ធិបារមីពីព្រះវិញ្ញាណដែរ ដើម្បីបង្ហាញធម៌មេត្តាការុណារបស់ព្រះអង្គសព្វថ្ងៃនេះ។ អាស្រ័យហេតុនេះ​ហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយ សូម​លើក​តម្កើងសិរីរុងរឿងរបស់ព្រះអង្គ ដោយប្រកាសថា៖ “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”។

ពាក្យអរព្រះគុណ

បពិត្រព្រះបិតា ប្រកបដោយធម៌មេត្តាករុណាយ៉ាងក្រៃលែង! ព្រះអង្គប្រទានព្រះកាយ និងព្រះលោហិត​របស់​​ព្រះបុត្រាឱ្យយើងខ្ញុំទទួលទានទុកជាអាហារ។ យើងខ្ញុំសូមអរព្រះគុណព្រះអង្គ។ សូមទ្រង់​ព្រះមេត្តា​ប្រទាន​ឱ្យ​យើង​​ខ្ញុំមានសេចក្តីសង្ឃឹមយ៉ាងមាំមួនថា នឹងទទួលសិរីរុងរឿងរួមជាមួយព្រះយេស៊ូនៅថ្ងៃណាមួយជាពុំខាន! សូមជួយយើងខ្ញុំឱ្យបង្ហាញការសង្គ្រោះរបស់ព្រះអង្គសព្វថ្ងៃនេះផង។