ពាក្យអធិដ្ឋាននៅពេលចូល

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! ព្រះអង្គសព្វព្រះហប្ញទ័យត្រាស់ហៅយើងខ្ញុំឱ្យស្គាល់ព្រះអង្គ និងឱ្យទៅជាបុត្រធីតារបស់ព្រះអង្គ។ សូមទ្រង់ព្រះមេត្តាប្រោសយើងខ្ញុំឱ្យស្រឡាញ់ព្រះអង្គកាន់តែខ្លាំងឡើងៗ ដោយ ស្រឡាញ់មនុស្សឯទៀតៗដូចបងប្អូនបង្កើតផង។

អត្ថបទទី១៖​ សូមថ្លែងព្រះគម្ពីរព្យាការីសាការី សក ១២,១០-១១; ១៣,១

ព្រះអម្ចាស់មានព្រះបន្ទូលថា៖ «នៅថ្ងៃនោះ យើងនឹងចាក់បង្ហូរវិញ្ញាណមកលើរាជវង្សរបស់ដាវីឌ និងប្រជាជនក្រុងយេរូសាឡឹម ដើម្បីឱ្យពួកគេមានឆន្ទៈល្អ និងចេះអធិដ្ឋាន។ ពួកគេនឹងសម្លឹងមើលមកយើងដែលពួកគេបានចាក់ទម្លុះ។ ពួកគេនឹងកាន់ទុក្ខដូចគេកាន់ទុក្ខ ព្រោះកូនប្រុសតែមួយបាត់បង់​ជីវិត។ ពួកគេយំសោកយ៉ាងជូរចត់ ដូចគេយំសោកស្រណោះសពកូនប្រុសច្បង។ នៅថ្ងៃនោះ ប្រជាជននៅក្រុងយេរូសាឡឹមនឹងកាន់ទុក្ខយ៉ាងធំ។ នៅថ្ងៃ​នោះ នឹងមានប្រភពទឹកផុសឡើងលាងជម្រះអំពើបាប និងអំពើសៅហ្មងរបស់ព្រះញាតិ​វង្សព្រះបាទដាវីឌ និងប្រជាជននៅក្រុងយេរ៉ូសាឡឹម។

ទំនុកតម្កើងលេខ ៦៣ (៦២),២-៨ បទកាកគតិ

អត្ថបទទី​២៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទស្រុកកាឡាទី កឡ ៣,២៦-២៩

បងប្អូនជាទីស្រឡាញ់!
ដោយសារជំនឿលើព្រះគ្រីស្ដយេស៊ូ បងប្អូនសុទ្ធតែជាបុត្រធីតារបស់ព្រះជាម្ចាស់។ បងប្អូនទាំងអស់គ្នាបានទទួលពិធីជ្រមុជទឹកដើ​ម្បី​ឱ្យបានរួមជាមួយព្រះគ្រីស្ដ បងប្អូនក៏មានព្រះគ្រីស្ដនៅជាប់ជាមួយដែរ។ ដូច្នេះ គ្មា​ន​សាសន៍យូដា គ្មានសាសន៍ក្រិកទៀតទេ ហើយក៏គ្មានអ្នកងារ គ្មានអ្នកជា គ្មាន​បុរស គ្មានស្រ្ដីទៀតដែរ គឺបងប្អូនទាំងអស់បានរួមគ្នាមកជាអង្គតែមួយ​ក្នុង​ព្រះ​គ្រីស្ដយេស៊ូ។ ប្រសិនបើ​បងប្អូនចូលរួមជាមួយព្រះគ្រីស្ដ បងប្អូនជាពូជពង្សរបស់​លោកអប្រាហាំ ហើយក៏ត្រូវទទួលមត៌កតាមព្រះបន្ទូលសន្យាដែរ។

ពិធីអបអរសាទរព្រះគម្ពីរដំណឹងល្អតាម ១ ករ ១,២៣-២៤

អាលេលូយ៉ា! អាលេលូយ៉ា!
យើងប្រកាសអំពីព្រះគ្រីស្ដដែលសោយទិវង្គតនៅលើឈើឆ្កាង។ មនុស្សលោកយល់ឃើញថា ជារឿងលេលា។ ប៉ុន្ដែ ព្រះគ្រីស្ដមានឫទ្ធានុភាព និងជាព្រះប្រាជ្ញាញាណរបស់ព្រះជាម្ចាស់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ៩,១៨-២៤

ថ្ងៃមួយ ពេលព្រះយេស៊ូនៅអធិដ្ឋានដាច់ឡែកពីបណ្ដាជន ក្រុមសាវ័កក៏​នៅ​ជាមួយព្រះអង្គដែរ។ ព្រះអង្គមានព្រះបន្ទូលសួរគេថា៖ «តើមហាជនទាំង​ឡា​យ​ថាខ្ញុំជានរណា»?។ ក្រុមសាវ័កទូលឆ្លើយថា៖ «អ្នកខ្លះថា លោកគ្រូជាលោក​យ៉ូហានបាទីស្ដ អ្នកខ្លះថា លោកជាព្យាការីអេលី ហើយអ្នកខ្លះទៀតថា លោក​ជា​ព្យាការីម្នាក់ពីសម័យបុរាណដែលរស់ឡើងវិញ»។ ព្រះយេស៊ូសួរទៀតថា៖ «ចុះ​​អ្នករាល់គ្នាវិញ តើអ្នករាល់គ្នាថា ខ្ញុំជានរណាដែរ?»។ លោកសិលាទូល​ព្រះអង្គ​ថា៖ «លោកជាព្រះគ្រីស្ដ ដែលព្រះជាម្ចាស់ចាត់ឱ្យមក»។ ព្រះយេស៊ូ​ក៏​ហាមប្រាម​គេមិនឱ្យនិយាយប្រាប់អ្នកណាជាដាច់ខាត។
ព្រះអង្គមានព្រះបន្ទូលទៀតថា៖«បុត្រមនុសុ្សត្រូវរងទុក្ខវេទនាយ៉ាងខ្លាំង។ ពួកព្រឹទ្ធាចារ្យ ពួកនាយកបូជាចារ្យ ពួកធម្មាចារ្យនឹងបោះបង់លោកចោលថែម​ទាំងសម្លាប់លោកទៀតផង។ ប៉ុន្ដែ បីថ្ងៃក្រោយមក លោកនឹងរស់ឡើងវិញ»។
បន្ទាប់មក ព្រះយេស៊ូមានព្រះបន្ទូលទៅកាន់បណ្ដាជនថា៖ «បើអ្នកណាចង់​មកតាមក្រោយខ្ញុំ ត្រូវលះបង់ខ្លួនឯងចោល ត្រូវលីឈើឆ្កាងរបស់ខ្លួនរៀងរាល់ថ្ងៃ ហើយមកតាមខ្ញុំចុះ ដ្បិតអ្នកណាចង់បានរួចជីវិត អ្នកនោះនឹងបាត់​បង់ជីវិត​ពុំខាន ប៉ុន្ដែ អ្នកណាបាត់បង់ជីវិតព្រោះតែខ្ញុំ អ្នកនោះនឹងបានរួចជីវិតវិញ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! យើងខ្ញុំសូមលើកកាយ វាចា ចិត្ត ថ្វាយព្រះអង្គ។ សូមទ្រង់ព្រះមេត្តាប្រោសយើងខ្ញុំដែលរស់នៅក្នុងលោកដ៏មិនទៀតទាត់នេះ ឱ្យភ្ជាប់ចិត្តនឹងព្រះយេស៊ូគ្រីស្តដែលបានបូជាព្រះជន្ម ហើយដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតាដ៏មានតេជានុភាពសព្វប្រការ! ព្រះអង្គបានប្រោសប្រទានព្រះកាយ និងព្រះលោហិតរបស់ព្រះបុត្រាឱ្យយើងខ្ញុំ ទុកជាសញ្ញាសម្គាល់បញ្ជាក់ថា ព្រះអង្គស្ថិតនៅជាមួយយើងខ្ញុំជានិច្ច។ សូមទ្រង់ព្រះមេត្តាពង្រឹងជំនឿរបស់យើងខ្ញុំ ឱ្យភ្ជាប់ចិត្តនឹងព្រះអង្គគ្រប់ពេលវេលា ទាំងនៅគ្រាសប្បាយ ទាំងនៅគ្រាមានអាសន្នផង។