ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! យើងខ្ញុំសូមផ្ញើជីវិតលើព្រះហប្ញទ័យសប្បុរសរបស់ព្រះអង្គ ដែលចាត់ចែងអ្វីៗទាំងអស់តាមព្រះគម្រោងការដ៏អស្ចារ្យរបស់ព្រះអង្គ ដោយមិនដែលភាន់ច្រឡំឡើយ។ សូមទ្រង់ព្រះមេត្តាកម្ចាត់ឧបទ្រពទាំងឡាយចេញពីយើងខ្ញុំ! សូមប្រោសប្រទាននូវអ្វីៗដែលអាចនាំយើងខ្ញុំឱ្យបានប្រកបដោយសេចក្តីសុខសាន្ត ក្នុងការគោរពបម្រើព្រះអង្គ។

អត្ថបទទី១៖​ សូមថ្លែងព្រះគម្ពីរទុតិយកថា ទក ១១,១៨.២៦-២៨.៣២

លោកម៉ូសេមានប្រសាសន៍ទៅកាន់ប្រជាជនអ៊ីស្រាអែលថា៖ «ត្រូវទុកឱ្យព្រះបន្ទូលដែលខ្ញុំថ្លែងប្រាប់ដក់នៅក្នុងចិត្តក្នុងគំនិតរបស់អ្នករាល់គ្នាជានិច្ច។ ត្រូវចងព្រះបន្ទូលទាំងនេះជាសញ្ញាជាប់នឹងដៃ ហើយដាក់នៅលើថ្ងាសរបស់អ្នករាល់គ្នា ដើម្បីឱ្យអ្នករាល់គ្នាជ្រើសរើស​។ ប្រសិនបើអ្នករាល់គ្នាប្រតិបត្តិតាមបទបញ្ជារបស់ព្រះជាម្ចាស់ជាព្រះរបស់អ្នករាល់គ្នា ដែលខ្ញុំប្រគល់ឱ្យអ្នករាល់គ្នានៅថ្ងៃនេះ អ្នករាល់គ្នាមុខជាទទួលព្រះពរ។ ប្រសិនបើអ្នករាល់គ្នាមិនប្រតិបត្តិតាមបទបញ្ជារបស់ព្រះអម្ចាស់ ជាព្រះរបស់អ្នករាល់គ្នា ប្រសិនបើអ្នករាល់គ្នាងាកចេញពីមាគ៌ាដែលខ្ញុំបង្ហាញដល់អ្នករាល់គ្នានៅថ្ងៃនេះ ទៅជំពាក់ចិត្តនឹងព្រះដទៃដែលអ្នករាល់គ្នាពុំស្គាល់ នោះអ្នករាល់គ្នាមុខជាទទួលបណ្តាសាមិនខាន។ អ្នករាល់គ្នាត្រូវកាន់ ហើយប្រតិបត្តិតាមវិន័យ និងច្បាប់ទាំងប៉ុន្មានដែលខ្ញុំប្រគល់ឱ្យអ្នករាល់គ្នានៅថ្ងៃនេះ»។

ទំនុកតម្កើងលេខ ៣១ (៣០),៣-៤.១៧.២០.២៤-២៥ បទកាកគតិ

អត្ថបទទី​២៖ សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងរ៉ូម រម ៣,២១-២៥.២៨

បងប្អូនជាទីស្រឡាញ់!
មនុស្សនៅក្រោមអំណាចនៃបាបគ្រប់ៗគ្នា។ ធម្មវិន័យរបស់លោកម៉ូសេមានប្រយោជន៍តែម្យ៉ាង គឺនាំឱ្យមនុស្សស្គាល់អំពើបាបប៉ុណ្ណោះ!។ ប៉ុន្តែ ឥឡូវនេះ ក្រៅពីធម្មវិន័យ ព្រះជាម្ចាស់សម្តែងអំពីរបៀបព្រះអង្គប្រោសមនុស្សឱ្យបានសុចរិត ដូចធម្មវិន័យ និងអស់លោកព្យាការីបញ្ជាក់ទុកស្រាប់ គឺថា ព្រះជាម្ចាស់ប្រោសអស់អ្នកដែលមានជំនឿឱ្យបានសុចរិត ដោយសារជំនឿទៅលើព្រះគ្រីស្ត។ មនុស្សទាំងអស់មិនប្លែកពីគ្នាត្រង់ណាសោះ គឺគេសុទ្ធតែប្រព្រឹត្តអំពើបាប ហើយឃ្លាតចាកពីសិរីរុងរឿងរបស់ព្រះជាម្ចាស់គ្រប់ៗគ្នា។ ប៉ុន្តែ ព្រះជាម្ចាស់ប្រោសគេឱ្យបានសុចរិត ទុកជាព្រះអំណោយទានតាមព្រះហប្ញទ័យប្រណីសន្តោសរបស់ព្រះអង្គ ដោយព្រះយេស៊ូ គ្រីស្តលោះគេ។ ព្រះជាម្ចាស់បានតែងតាំងព្រះគ្រីស្តដែលបានបូជាព្រះលោហិតនៅលើឈើឆ្កាង ដើម្បីរំដោះអស់អ្នកដែលជឿលើព្រះអង្គឱ្យរួចពីបាប។ យើងយល់ថា ព្រះជាម្ចាស់ប្រោសមនុស្សឱ្យបានសុចរិត មកពីគេមានជំនឿ មិនមែនមកពីគេបានកុសលផលបុណ្យ តាមធម្មវិន័យនោះឡើយ។

ពិធីអបអរសាទរព្រះគម្ពីរដំណឹងល្អ ៩៥,១.៧

អាលេលូយ៉ា! អាលេលូយ៉ា!
សូមអញ្ជើញមក! ចូរស្រែកច្រៀងដោយអំណរថ្វាយព្រះអម្ចាស់ ដែលជាថ្មដា និងជាព្រះសង្រ្គោះរបស់យើង! ព្រះអង្គពិតជាព្រះរបស់យើងមែន! អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៧,២១-២៧

នៅគ្រានោះ ក្រុមសាវ័កជួបជុំជាមួយព្រះយេស៊ូនៅលើភ្នំ។ ព្រះអង្គមានព្រះបន្ទូលទៅកាន់ពួកគេថា៖ «អ្នកដែលចូលទៅក្នុងព្រះរាជ្យនៃស្ថានបរមសុខ មិនមែនជាអ្នកដែលគ្រាន់តែហៅខ្ញុំថា “ព្រះអម្ចាស់! ព្រះអម្ចាស់!” ប៉ុណ្ណោះទេ​ គឺជាអ្នកដែលធ្វើតាមព្រះហប្ញទ័យរបស់ព្រះបិតាខ្ញុំដែលគង់នៅស្ថានបរមសុខនោះវិញ។ នៅថ្ងៃនោះ នឹងមានមនុស្សជាច្រើនពោលមកខ្ញុំថា “ព្រះអម្ចាស់! ព្រះអម្ចាស់​អើយ! យើងខ្ញុំធ្លាប់ថ្លែងព្រះបន្ទូលក្នុងព្រះនាមព្រះអង្គ យើងខ្ញុំធ្លាប់ដេញខ្មោចក្នុងព្រះនាមព្រះអង្គ យើងខ្ញុំក៏ធ្លាប់ធ្វើការអស្ចារ្យជាច្រើន ក្នុងព្រះនាមព្រះអង្គដែរ”។ ពេលនោះ ខ្ញុំនឹងប្រកាសប្រាប់អ្នករាល់គ្នាថា ពួកអ្នកប្រព្រឹត្តអំពើទុច្ចរិតអើយ! ចូរថយ​ចេញឱ្យឆ្ងាយពីខ្ញុំទៅ! ខ្ញុំមិនដែលស្គាល់អ្នករាល់គ្នាទេ!។ អ្នកណាស្តាប់ពាក្យខ្ញុំនេះ ហើយប្រព្រឹត្តតាម អ្នកនោះប្រៀបបានទៅនឹងមនុស្សឈ្លាសវៃម្នាក់ដែលបានសង់ផ្ទះរបស់ខ្លួននៅលើផ្ទាំងថ្ម។ ទោះបីភ្លៀងបង្អុរចុះមក មានទឹកជន់ មានខ្យល់បក់បោកប៉ះនឹងផ្ទះនោះយ៉ាងណាក៏ដោយ ក៏ផ្ទះនោះមិនរលំដែរ ព្រោះមានគ្រឹះនៅលើផ្ទាំងថ្ម។ រីឯអ្នកដែលស្តាប់ពាក្យខ្ញុំនេះ តែមិនប្រព្រឹត្តតាម ប្រៀបបានទៅនឹងមនុស្សឥតប្រាជ្ញាម្នាក់ដែលបានសង់ផ្ទះរបស់ខ្លួននៅលើដីខ្សាច់។ ពេលភ្លៀងបង្អុរចុះមក មានទឹកជន់ មានខ្យល់បក់បោកប៉ះនឹងផ្ទះនោះ ផ្ទះនោះរលំ​បាក់បែកខ្ទេចអស់គ្មានសល់»។

ពាក្យថ្វាយតង្វាយ

បពិត្រព្រះអម្ចាស់! យើងខ្ញុំយកតង្វាយដែលកើតពីកម្លាំងញើសឈាមមក​ថ្វាយ​ព្រះអង្គ។ សូមទ្រង់ព្រះមេត្ដាបញ្ចូលយើងខ្ញុំក្នុងសក្ការបូជារបស់ព្រះគ្រីស្ដ សូមជម្រះចិត្ដយើងខ្ញុំឱ្យរួចពីបាបផង។

ពាក្យអរព្រះគុណ

បពិត្រព្រះអម្ចាស់! ព្រះអង្គបានប្រោសប្រទានព្រះកាយ និងព្រះលោហិតនៃព្រះបុត្រាឱ្យយើងខ្ញុំធ្វើជាអាហារដែលផ្ដល់ជីវិត។ សូមទ្រង់ព្រះមេត្ដាចាត់ព្រះវិញ្ញាណព្រះអង្គឱ្យយាងមកណែនាំយើងខ្ញុំ សូមប្រោសឱ្យយើងខ្ញុំអាចផ្ដល់សក្ខីភាព​​​ថ្វាយព្រះអង្គដោយមិន គ្រាន់តែពោលពាក្យប៉ុណ្ណោះទេ គឺដោយប្រព្រឹត្ដអំពើ​ល្អ​ផង។