ថ្ងៃអាទិត្យ ទី២៦ ខែឧសភា ឆ្នាំ២០២៤

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា ដ៏មានតេជានុភាពសព្វប្រការ! សូមទ្រង់ព្រះមេត្តាប្រោសអាណិតអាសូរមនុស្សលោក។ សូមប្រោសមនុស្សលោកឱ្យបានរស់នៅប្រកបដោយសេចក្តីសុខសាន្តជានិច្ច តាមគម្រោងការរបស់ព្រះអង្គ។ សូមឱ្យយើងខ្ញុំជាបុត្រធីតារបស់ព្រះអង្គ អាចបម្រើព្រះអង្គដោយគ្មានចិត្តចង្អៀតចង្អល់ឡើយ។

អត្ថបទទី១៖​ សូមថ្លែងព្រះគម្ពីរព្យាការីហូសេ ហស ២,១៦.១៧.២១-២២

ព្រះអម្ចាស់មានព្រះបន្ទូលថា៖ «យើងនឹងទាក់ទាញចិត្តភរិយាដែលបានក្បត់យើង យើងនឹងនាំនាងទៅវាលរហោស្ថាន យើងនឹងនិយាយលួងលោមចិត្តនាង។ នៅទីនោះ នាងនឹងឆ្លើយតបមកយើង ដូចនៅគ្រាដែលនាងនៅពីក្មេង គឺនៅគ្រាដែលនាងទើបនឹង ចេញ​ពីស្រុកអេស៊ីប។ យើងនឹងដណ្តឹងនាងធ្វើជាភរិយាជាដរាបតរៀងទៅ យើងនឹងដណ្តឹងនាងធ្វើជាភរិយាដោយសុចរិត និងយុត្តិធម៌ ដោយភក្តីភាព និងអាណិតអាសូរ។ យើងនឹងដណ្តឹងនាងធ្វើជាភរិយាដោយចិត្តស្មោះស្ម័គ្រ ហើយនាងនឹងទទួលស្គាល់ព្រះអម្ចាស់»។

ទំនុកតម្កើងលេខ ១០៣ (១០២), ១-៤.៨-៩.១២-១៣ បទកាកគតិ

អត្ថបទទី​២៖ សូមថ្លែងលិខិតទី ២ របស់គ្រីស្តទូតប៉ូលផ្ញើជូនគ្រីស្តបរិស័ទក្រុងកូរិនថូស ២ ករ ៣,១-៦

បងប្អូនជាទីស្រឡាញ់!
យើងមិនត្រូវការយកលិខិតតែងតាំងយើងជាគ្រីស្តទូតមកជូនបងប្អូន ឬសុំលិខិតតែងតាំងពីបងប្អូនវិញ ដូចអ្នកខ្លះទេ។ បងប្អូនហ្នឹងហើយជាលិខិតរបស់យើង ជាលិខិតសរសេរនៅក្នុងដួងចិត្តរបស់យើង ដែលមនុស្សទាំងអស់អាចស្គាល់ និងអានបាន។ បងប្អូនពិតជាលិខិតរបស់ព្រះគ្រីស្តមែន ជាលិខិតដែលព្រះអង្គសរសេរផ្ញើមកតាមកិច្ចការដែលយើងបំពេញ។ លិខិតនេះមិនមែនសរសេរដោយទឹកខ្មៅទេ គឺសរសេរឡើងដោយព្រះវិញ្ញាណរបស់ព្រះជាម្ចាស់ ដែលមានព្រះជន្ម មិនមែនជាលិខិតសរសេរនៅលើផ្ទាំងថ្មទេ គឺសរសេរក្នុងសាច់ ក្នុងដួងចិត្តរបស់បងប្អូន។ យើងមានសេចក្តីទុកចិត្តដ៏មុតមាំនៅចំពោះព្រះភក្ត្រព្រះជាម្ចាស់បែបនេះ ក៏ព្រោះតែព្រះគ្រីស្តនេះហើយ។ យើងមិនអាចចាត់ទុកថា ខ្លួនយើងមានសមត្ថភាពនឹងធ្វើកិច្ចការអ្វីមួយបានដោយខ្លួនយើងផ្ទាល់ឡើយ គឺព្រះជាម្ចាស់ឯណោះវិញទេ ដែលប្រទានឱ្យយើងមានសមត្ថភាពអាចធ្វើបាន។ ព្រះអង្គក៏ប្រទានឱ្យយើងមានសមត្ថភាពធ្វើជាអ្នកបម្រើសម្ពន្ធមេត្រីថ្មីដែរ ជាសម្ពន្ធមេត្រីដែលមិនមែនចងឡើងដោយសរសេរជាលាយលក្ខណ៍អក្សរនោះទេ គឺចងឡើងដោយព្រះវិញ្ញាណវិញ ដ្បិតធម្មវិន័យដែលសរសេរជាលាយលក្ខណ៍អក្សរបណ្តាលឱ្យស្លាប់ រីឯព្រះវិញ្ញាណវិញ ទ្រង់ប្រទានជីវិត។

ពិធីអបអរសាទរព្រះគម្ពីរដំណឹងល្អតាម មក ២,១៩.២២

អាលេលូយ៉ា! អាលេលូយ៉ា!
អ្នកដែលព្រះជាម្ចាស់ត្រាស់ហៅឱ្យចូលរួមក្នុងពិធីជប់លៀងមង្គលការនៃព្រះរាជ្យ ពិតជាមានសុភមង្គល! ព្រះអង្គច្រកស្រាទំពាំងបាយជូរនៃសម្ពន្ធមេត្រីថ្មីជូនគេ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ២,១៨-២២

ថ្ងៃមួយ ពួកសិស្សរបស់លោកយ៉ូហានបាទីស្ត និងពួកសិស្សខាងគណៈផារីស៊ីនាំគ្នាតមអាហារ។ ពួកគេមកទូលសួរព្រះយេស៊ូថា៖ «សិស្សរបស់លោកយ៉ូហាន និងសិស្សខាងគណៈផារីស៊ី តមអាហារ ចុះហេតុដូចម្តេចបានជាសិស្សរបស់លោកមិនតមដូចេ្នះ?» ព្រះយេស៊ូមានព្រះបន្ទូលទៅគេថា៖ «ក្នុងពិធីមង្គលការ នៅពេលកូនកំលោះនៅជាមួយ តើភ្ញៀវអាចតមអាហារកើតឬ?។ ទេ! ដរាបណាកូនកំលោះនៅជាមួយ ភ្ញៀវមិនអាចតមអាហារបានឡើយ។ ថ្ងៃក្រោយ ពេលគេចាប់ស្វាមីយកទៅ ទើបភ្ញៀវទាំងនោះតមអាហារ។ ពុំដែលមាននរណាយកក្រណាត់ថ្មីមកប៉ះសម្លៀកបំពាក់ចាស់ឡើយ បើធ្វើដូច្នេះ ក្រណាត់ថ្មីនឹងបណ្តាលឱ្យសម្លៀកបំពាក់ចាស់រហែកលើសដើមទៅទៀត។ ពុំដែលមាននរណាច្រកស្រាទំពាំងបាយជូរថ្មីទៅក្នុងថង់ស្បែកចាស់ឡើយ បើធ្វើដូច្នោះ ស្រានឹងធ្វើឱ្យថង់ស្បែកនោះធ្លាយ បណ្តាលឱ្យខូចទាំងស្រា ទាំងថង់ស្បែកជាមិនខាន។ ត្រូវច្រកស្រាថ្មីទៅក្នុងថង់ស្បែកថ្មី»។

ពាក្យថ្វាយតង្វាយ

បពិត្រព្រះជាម្ចាស់! យើងខ្ញុំគ្មានអ្វីថ្វាយព្រះអង្គ ក្រៅពីវត្ថុដែលទ្រង់បានប្រោសប្រទានមកយើងខ្ញុំនោះទេ។ យើងខ្ញុំសូមថ្វាយតង្វាយទាំងនេះ ព្រមទាំងកាយ វាចា ចិត្ត ដើម្បីតបស្នងព្រះគុណព្រះអង្គ។ សូមទ្រង់ព្រះមេត្តាប្រែចិត្តគំនិតរបស់យើងខ្ញុំ ឱ្យចេះស្រឡាញ់ព្រះអង្គលើសអ្វីៗទាំងអស់ក្នុងលោកនេះផង។

ពាក្យអរព្រះគុណ

បពិត្រព្រះអម្ចាស់ជាព្រះបិតាដ៏មានតេជានុភាពសព្វប្រការ! ក្នុងអភិបូជានេះ ព្រះអង្គបានប្រោសឱ្យយើងខ្ញុំចូលរួមយ៉ាងជិតស្និទ្ធជាមួយព្រះយេស៊ូគ្រីស្ត ជាព្រះសង្គ្រោះរបស់យើងខ្ញុំ។ សូមទ្រង់ព្រះមេត្តាប្រោសប្រទានព្រះវិញ្ញាណព្រះអង្គឱ្យយាងមកតម្រង់ចិត្តគំនិតរបស់យើងខ្ញុំ។ សូមប្រោសឱ្យយើងខ្ញុំផ្ចង់ចិត្តគោរពព្រះអង្គលើសអ្វីៗទាំងអស់ក្នុងលោកនេះផង។