ថ្ងៃសៅរ៍ ទី០៧ ខែមិថុនា ឆ្នាំ២០២៥

ពាក្យអធិដ្ឋានពេលចូល

បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែង! ព្រះអង្គលើកព្រះយេស៊ូឡើង តែងតាំង​ជាព្រះ​គ្រីស្ត​ និងជាព្រះអម្ចាស់។ នៅពេលដែលយើងខ្ញុំរង់ចាំព្រះគ្រីស្តយាងមកវិញ សូមទ្រង់ព្រះមេត្តា​ប្រទាន​ព្រះវិញ្ញាណ​ព្រះ​អង្គ​យ៉ាងបរិបូណ៌មកយើងខ្ញុំ តាមព្រះ​បន្ទូលសន្យារបស់ព្រះយេស៊ូ ជាព្រះបុត្រាព្រះអង្គ និងជាព្រះអម្ចាស់យើងខ្ញុំ ដែលទ្រង់មានព្រះជន្មគង់នៅ និងសោយរាជ្យ​រួមជាមួយព្រះបិតា និងព្រះវិញ្ញាណដ៏វិសុទ្ធ​អស់កល្បជា​អង្វែង​តរៀង​ទៅ។

សូមថ្លែងព្រះគម្ពីរកិច្ចការរបស់គ្រីស្តទូត កក ២៨,១៦-២០.២៣-២៤.២៨-៣១

ពេលលោកប៉ូលមកដល់ក្រុងរ៉ូមហើយ អាជ្ញាធរអនុញ្ញាតឱ្យលោកនៅផ្ទះមួយតាមបំណងចិត្តលោក តែគេ​ដាក់ទាហានម្នាក់ឱ្យនៅ​យាមលោក។ បីថ្ងៃក្រោយមក លោកប៉ូលអញ្ជើញអស់​អ្នកដែល​មានមុខមាន​មាត់ក្នុង​ចំណោម​ជន​ជាតិយូដាឱ្យមកជួបលោក។ លុះគេមកជួប​ជុំគ្នាហើយ លោកមានប្រសាសន៍ទៅគេថា៖ «បងប្អូនអើយ! ខ្ញុំពុំបាន​ធ្វើអ្វីប្រឆាំងនឹងប្រជាជាតិយើង ឬក៏ទាស់នឹងប្រពៃណីបុព្វបុរសយើងទេ តែគេចាប់ខ្ញុំឃុំឃាំងនៅក្រុងយេរូសាឡឹម និងបញ្ជូនខ្ញុំទៅក្នុងកណ្តាប់ដៃជនជាតិរ៉ូមុំាង។ កាលពួករ៉ូមុំាងសួរចម្លើយខ្ញុំរួចរាល់ហើយ គេចង់ដោះ​លែងខ្ញុំវិញ​ ព្រោះ​គេ​ពុំ​ឃើញ​ខ្ញុំមានកំហុសអ្វីគួរនឹងមានទោសដល់ជីវិតនោះឡើយ។ ប៉ុន្តែ ជនជាតិយូដានាំគ្នាជំទាស់ ជាហេតុ​បង្ខំឱ្យខ្ញុំ​សុំ​ឡើងមកដល់ព្រះចៅអធិរាជ។ រីឯខ្ញុំវិញ ខ្ញុំគ្មានគោលបំណងនឹងចោទប្រកាន់ប្រជាជាតិរបស់ខ្ញុំទេ។ ហេតុនេះ​ហើយ​ បានជាខ្ញុំសុំជួប និងសុំនិយាយជាមួយបងប្អូន ដ្បិតខ្ញុំជាប់​ចំណង​ព្រោះ​តែសេចក្តី​សង្ឃឹមរបស់​ជនជាតិអ៊ីស្រា​អែល»។ លោកបានវែកញែកតាំងពីព្រឹករហូតដល់ល្ងាច ដោយលើកយកធម្មវិន័យរបស់លោកម៉ូសេ និងគម្ពីរព្យាការី​មក​ពន្យល់​បញ្ជាក់ប្រាប់គេអំពីព្រះយេស៊ូ។ មានពួកគេមួយផ្នែកបានជឿពាក្យដែលលោកមានប្រសាសន៍ តែមួយ​ផ្នែក​ទៀត​ពុំព្រមជឿទេ។ លោកប៉ូលមានប្រសា​សន៍ទៅពួកនេះថា៖ «សូមបងប្អូនជ្រាបថា ព្រះជាម្ចាស់​បានប្រ​ទាន​ព្រះ​បន្ទូលស្តីអំពីការសង្គ្រោះរបស់ព្រះអង្គឱ្យទៅជនជាតិដទៃវិញ គេមុខជានឹងស្តាប់មិនខាន»។ លោកប៉ូលស្នាក់នៅផ្ទះដែលលោកបានជួលនោះអស់រយៈពេលពីរឆ្នាំ ហើយលោកតែងទទួលអស់អ្នក​ដែល​មក​ជួប​លោក។ លោកប្រកាសព្រះរាជ្យរបស់ព្រះជាម្ចាស់ និងបង្រៀនគេអំពីព្រះយេស៊ូគ្រីស្តដោយចិត្តអង់អាច ហើយ​គ្មាន​​អ្វីមករារាំងលោកឡើយ។

ទំនុកតម្កើងលេខ ១១ (១០), ៤-៥.៧ បទកាកគតិ

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ២១,២០-២៥

ព្រះយេស៊ូប្រទានដំណឹងឱ្យលោកសិលាដឹងអំពីរបៀបលោកត្រូវទទួលមរណភាព ដើម្បីលើកតម្កើង​សិរីរុង​រឿងរបស់ព្រះជាអម្ចាស់។ ពេលនោះ លោកសិលាងាកមើលក្រោយ ឃើញសាវ័កដែលព្រះយេស៊ូស្រឡាញ់ដើរ​តាម​ដែរ។ សាវ័កនោះហើយដែលបានឱនទៅជិតឱរារបស់ព្រះយេស៊ូនៅពេលជប់លៀង ហើយទូលសួរព្រះអង្គថា៖ «បពិត្រព្រះអម្ចាស់! តើនរណានាំគេមកចាប់ព្រះអង្គ?»។ កាលលោកសិលាឃើញគាត់ លោកទូល​សួរព្រះ​យេស៊ូ​ថា៖​ «បពិត្រព្រះអម្ចាស់! រីឯអ្នកនោះវិញ តើនឹងមានកើតអ្វីដល់គាត់?»។ ព្រះយេស៊ូមានព្រះ​បន្ទូល​តប​ទៅ​គាត់​ថា៖ «​ប្រ​សិ​ន​បើខ្ញុំចង់ឱ្យគាត់មានជីវិតរហូតដល់ខ្ញុំត្រឡប់មកវិញ តើនឹងកើតអំពល់អ្វីដល់អ្នក?។ ចំពោះអ្នកវិញ សុំអញ្ជើញ​មក​តាម​ខ្ញុំ!»។ តាំងពីពេលនោះមក មានលេចឮពាក្យក្នុងចំណោមបងប្អូនថា សាវ័កនោះមិនត្រូវស្លាប់ទេ។ តាមពិត ព្រះ​យេ​ស៊ូពុំបានប្រាប់លោកសិលាថា សាវ័កនោះមិន​ត្រូវស្លាប់​ឡើយ ព្រះអង្គ​គ្រាន់តែ​មាន​ព្រះបន្ទូលថា៖ «​ប្រសិន​បើខ្ញុំ​ចង់​ឱ្យគាត់មានជីវិតរហូតដល់ខ្ញុំត្រឡប់មកវិញ តើនឹងកើតអំពល់អ្វីដល់អ្នក?»។ សាវ័កនោះ​ហើយដែលផ្តល់សក្ខីភាពអំពីហេតុការណ៍ទាំងអស់នេះ ព្រមទាំងបានកត់ត្រាទុកមកផង។ យើង​ដឹងថា សក្ខីភាពរបស់គាត់ពិតជាត្រឹមត្រូវមែន។ ព្រះយេស៊ូបានធ្វើកិច្ចការឯទៀតៗជាច្រើន។ ប្រសិនបើ​មាន​គេកត់​ត្រា​ហេតុការណ៍ទាំងនោះឱ្យបានល្អិតល្អន់ខ្ញុំយល់ថា ពិភពលោកនេះ ពុំអាចនឹងមានកន្លែងល្មមសម្រាប់ទុកសៀវភៅដែលគេកត់ត្រា​នោះបានឡើយ។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គមានព្រះបន្ទូលសព្វគ្រប់មកយើងខ្ញុំ ដោយសារព្រះយេស៊ូ។ ក្នុងអភិបូ​ជា​នេះ យើងខ្ញុំនាំគ្នានឹករឭកអំពីព្រះបន្ទូលទាំងនេះ និងនឹករឭកសក្ការបូជារបស់ព្រះយេស៊ូដែរ។ សូមទ្រង់​ព្រះមេត្តា​ប្រ​ទាន​​ព្រះវិញ្ញាណព្រះអង្គ យើងខ្ញុំអាចយល់ព្រះបន្ទូលព្រះអង្គកាន់តែច្បាស់ឡើងៗ និងអាចប្រព្រឹត្តតាមផង។

ពាក្យអរព្រះគុណ

បពិត្រព្រះបិតាជាប្រភពនៃជីវិតគ្រប់យ៉ាង! ព្រះអង្គបានប្រោសប្រទានឱ្យយើងខ្ញុំទទួលអគ្គសញ្ញាជ្រមុជទឹក និងទទួលព្រះកាយព្រះគ្រីស្ត គឺព្រះអង្គប្រទានជីវិតថ្មីឱ្យយើងខ្ញុំទៅជាបុត្រធីតារបស់ព្រះអង្គ។ សូមទ្រង់​ព្រះមេត្តា​ប្រោស​ឱ្យយើងខ្ញុំមានចិត្តគំនិតដ៏វិសុទ្ធ ស្របតាមឋានៈរបស់ខ្លួនផង។