អត្ថបទទី១
សូមថ្លែងព្រះគម្ពីរព្រះប្រាជ្ញាញាណ ប្រាញ ១៨,១៤-១៦;១៩,៦-៩

ពេលអ្វីៗទាំងអស់នៅស្ងៀមស្ងាត់ គឺនៅពាក់កណ្ដោលអធ្រាត្រ​ ស្រាប់តែព្រះបន្ទូលដ៏មានប្ញទា្ធនុភាពសព្វប្រការ បានយាងចាកចេញពីព្រះរាជ្យបល្ល័ង្ករបស់ព្រះអង្គនៅស្ថាន​បរមសុខ ចុះមកដូចអ្នកចំបាំងដែលគ្មានចិត្តត្រាប្រណី ឆ្ពោះទៅកណ្ដាលស្រុកដែលត្រូវ​អន្ដរាយ ទាំងកាន់ព្រះបញ្ជាដែលមិនចេះប្រែប្រួល ធ្វើដូចជាដាវដ៏មុត។ ព្រះបន្ទូល​ក្រោកឡើង ដោយមានព្រះសិរសាប៉ះមេឃ និងព្រះបាទាជាន់ផែនដី បណ្ដាលឱ្យមនុស្ស​​ស្លាប់នៅគ្រប់ទីកន្លែង។

ពេលនោះ ព្រះអង្គសូនសត្វលោកទាំងអស់សាជាថ្មី តាមប្រភេទរៀងៗខ្លួន ហើយ​សត្វលោកទាំងនោះធ្វើតាមបញ្ជារបស់ព្រះអង្គ ដើម្បីការពារបុត្រធីតារបស់ព្រះអង្គ​ឱ្យចៀសផុតពីគ្រោះកាចនានា។ ពួកគេឃើញពពកគ្របបាំងកន្លែងបោះជំរំ ដីគោក​លេចចេញពីកន្លែងមានសុទ្ធតែទឹក គឺបាតសមុទ្រក្រហមប្រែទៅជាផ្លូវដែលអាច​ដើរបានស្រួល ហើយរលកដ៏ខ្លាំងក្លាប្រែទៅជាវាលស្មៅដ៏ខៀវខ្ចី។ ប្រជារាស្រ្ដទាំងមូលដើរកាត់តាមនោះ ទាំងឃើញប្ញទ្ធិបាដិហារិយ៍ដ៏អស្ចារ្យ ដោយមានព្រះបារមីរបស់​ព្រះអង្គជួយការពារ។ បពិត្រព្រះអម្ចាស់! ប្រជារាស្រ្ដរបស់ព្រះអង្គ ប្រៀបដូចជាហ្វូងសេះដែលកំពុងស៊ីស្មៅ និងលោតដូចកូនចៀម ទាំងសរសើរតម្កើងព្រះអង្គដែលបាន​រំដោះគេ។

ទំនុកតម្កើងលេខ ១០៥,២-៣.៣៦-៣៧.៤២-៤៣ បទកាកគតិ

ពិធីអបអរសាទរព្រះគម្ពីរដំណឹងល្អ​តាម ២ថស ២,១៤

អលេលូយ៉ា! អាលេលូយ៉ា!
ព្រះជាម្ចាស់ត្រាស់ហៅបងប្អូនដោយសារដំណឹងល្អ ដើម្បីឱ្យបងប្អូនទទួលសិរីរុងរឿងរបស់ព្រះយេស៊ូគ្រីស្ដជាអម្ចាស់នៃយើង​។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១៨,១-៨

ព្រះយេស៊ូមានព្រះបន្ទូលជាប្រស្នាពន្យល់សាវ័កឱ្យដឹងថា ត្រូវតែអធិដ្ឋានជានិច្ចមិន​ត្រូវរសាយចិត្តឡើយ៖“នៅក្នុងក្រុងមួយ មានចៅក្រមម្នាក់ជាមនុស្សមិនកោតខ្លាចព្រះជាម្ចាស់ ហើយមិនកោតក្រែងនរណាឡើយ។ មានស្រ្ដីមេម៉ាយម្នាក់នៅក្នុងក្រុងនោះ​ដែរ គាត់តែងមកអង្វរចៅក្រមថា៖“សូមលោករកយុត្តិធម៌ឱ្យនាងខ្ញុំផង!”។ ប៉ុន្ដែ ចៅក្រមមិនព្រមកាត់ក្ដីឱ្យភ្លាមៗទេ លោកចេះតែពន្យារពេលយ៉ាងយូរ។ ក្រោយមក​លោកនឹកក្នុងចិត្តថា ទោះបីអញមិនកោតខ្លាចព្រះជាម្ចាស់ មិនកោតក្រែងនរណា​ក៏ដោយ ក៏អញត្រូវតែកាត់ក្ដីឱ្យស្រ្ដីមេម៉ាយនេះដែរ ព្រោះគាត់ចេះតែមករំអុកអញគ្រប់ពេលវេលា។ បើអញមិនកាត់ក្ដីឱ្យគាត់ទេ មុខជាគាត់មករំខានអញមិនចេះចប់​មិនចេះហើយទេ»។ ព្រះអម្ចាស់មានព្រះបន្ទូលបន្ថែមទៀតថា៖«ចូរពិចារណាពាក្យ​របស់ចៅក្រមដ៏អាក្រក់នេះចុះ!។ ចំណង់បើព្រះជាម្ចាស់វិញ ព្រះអង្គរឹតតែរកយុត្តិធម៌ឱ្យអស់អ្នកដែលព្រះអង្គបានជ្រើសរើស ហើយដែលអង្វរព្រះអង្គទាំងយប់ទាំងថ្ងៃ។ ព្រះអង្គគ្រាន់តែបង្អង់ប៉ុណ្ណោះ។ ខ្ញុំសុំប្រាប់អ្នករាល់គ្នាថា ព្រះអង្គនឹងរកយុត្តិធម៌ឱ្យគេ​ក្នុងរយៈពេលដ៏ខ្លី។ ប៉ុន្ដែ ពេលបុត្រមនុស្សមកដល់ តើលោកឃើញមនុស្សមានជំនឿ​នៅលើផែនដីនេះឬទេ?»។