ថ្ងៃសៅរ៍ ទី២៧ ខែកញ្ញា ឆ្នាំ២០២៥

អត្ថបទទី១៖ សូមថ្លែងព្រះគម្ពីរព្យាការីសាការី សក ២,៥-៩.១៤-១៥

ខ្ញុំសាការី ក្រឡេកមើលទៅ ខ្ញុំនិមិត្តឃើញបុរសម្នាក់កាន់ខ្សែរង្វាស់មួយ។ ខ្ញុំសួរ​បុរសនោះថា៖ «លោកអញ្ជើញទៅណា»។ លោកតបមកវិញថា៖ «ខ្ញុំទៅវាស់ក្រុង​យេរូសាឡឹម ដើម្បីឱ្យដឹងប្រវែងទទឹង និងបណ្ដោយ»។ ពេលនោះ ទេវទូតដែល​និយាយជាមួយខ្ញុំ ដើរទៅមុខ ហើយមានទេវទូតមួយរូបទៀតមកជួប។ ទេវទូតនេះ​ពោលទៅកាន់ទេវទូតមួយរូបទៀតថា៖ «ចូររត់ទៅប្រាប់យុវជនដែលកាន់ខ្សែរង្វាស់​នោះថា៖ «យេរូសាឡឹមនឹងទៅជាក្រុងមួយដែលគ្មានកំពែង ព្រោះមនុស្ស និងសត្វ​ជាច្រើនរស់នៅ។ យើងនឹងធើ្វជាកំពែងភ្លើងការពារក្រុង ហើយយើងក៏នឹងសម្ដែងសិរីរុងរឿងរបស់យើងនៅក្នុងក្រុងនេះដែរ»។ ក្រុងស៊ីយ៉ូនអើយ! ចូរនាំគ្នាស្រែក​​ជ័យឃោស ចូរសប្បាយរីករាយឡើង! ដ្បិតយើងមករកអ្នកហើយ យើងនឹងស្ថិត​នៅកណ្ដាលអ្នក!។ នេះជាព្រះបន្ទូលរបស់ព្រះអម្ចាស់។ នៅថ្ងៃនេះ ប្រជាជាតិជាច្រើននឹងជំពាក់ចិត្តលើយើងជាព្រះអម្ចាស់ ហើយធើ្វជាប្រជារាស្រ្ដរបស់យើង យើង​នឹងស្ថិតនៅជាមួយអ្នក។

ទំនុកតម្កើងលេខ ៣១,១០-១៣ បទព្រហ្មគីតិ

ពិធីអបអរសាទរព្រះគម្ពីរដំណឹងល្អតាម ២ ធម ១,១០

អាលេលូយ៉ា! អាលេលូយ៉ា!
ព្រះគ្រីស្ដយេស៊ូជាព្រះសង្គ្រោះរបស់យើងបានបំបាត់អំណាចនៃសេចក្ដីស្លាប់ ព្រមទាំងបំភ្លឺយើងឱ្យស្គាល់ជីវិតអមតៈ ដោយសារដំណឹងល្អរបស់ព្រះអង្គ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ៩,៤៣-៤៥

នៅពេលនោះ មនុស្សគ្រប់គ្នាកំពុងកោតស្ញប់ស្ញែងនឹងការទាំងប៉ុន្មាន ដែលព្រះ​យេស៊ូប្រព្រឹត្ត។ ព្រះអង្គមានព្រះបន្ទូលទៅក្រុមសាវ័កថា៖ «ចូរអ្នករាល់គ្នាត្រងត្រាប់​ស្ដាប់ពាក្យទាំងនេះ ហើយចងចាំទុកក្នុងចិត្ត គឺបុត្រមនុស្សនឹងត្រូវគេបញ្ជូនទៅក្នុងកណ្ដាប់ដៃរបស់មនុស្សលោកជាមិនខាន»។ សាវ័កពុំបានយល់ព្រះបន្ទូលនេះទេ ព្រោះ​ព្រះជាម្ចាស់មិនទាន់បានសម្ដែងអត្ថន័យឱ្យគេយល់ ប៉ុន្ដែ ពួកគេមិនហ៊ានទូលសួរព្រះអង្គអំពីរឿងនេះឡើយ។